OLSEM WANEM? Yu bin pilim nogut tru na yu no laik stap laip moa? Sapos olsem, yu bai kliagut long filings bilong Adriana. Em i karim hevi long pasin bilong wari oltaim na sori, na pilim olsem i no gat hop. Adriana i painimaut olsem em i gat sik dipresen.

Tingim tu stori bilong wanpela man Japan, nem bilong em Kaoru, em i lukautim tupela lapun papamama bilong em i gat sik. Em i tok: “Sampela taim, presa bilong wok i daunim mi tru. I no longtaim, mi no wok long kaikai gut na mi no inap slip gut. Mi kisim tingting olsem ol dispela hevi bai pinis sapos mi dai.”

Wanpela man Naijiria, nem bilong em Ojebode, i tok: “Olgeta taim mi pilim sori na mi save krai, so mi painim rot bilong pinisim laip bilong mi yet.” Gutpela tru, Ojebode, Kaoru, na Adriana i no pinisim laip bilong ol yet. Tasol long olgeta yia planti handet tausen i save kilim i dai ol yet.

Planti bilong ol manmeri i suasaid em ol man, planti bilong ol i sem long askim ol narapela long helpim ol. Jisas i tok ol sikman i nidim dokta. (Luk 5:31) So sapos yu pilim olsem, plis no ken sem long kisim helpim. Planti i gat sik dipresen i luksave olsem marasin inap helpim ol long karim dispela hevi. Ojebode, Kaoru, na Adriana i kisim helpim long ol dokta na nau ol inap karim hevi bilong ol.

Ol dokta inap givim yu marasin o wanpela dokta i toktok long yu o mekim tupela samting wantaim long daunim sik dipresen. Na tu, ol man i gat dispela sik i nidim sapot na lukaut bilong famili na ol pren, long pilim hevi bilong ol na no les kwik long ol. Jehova God inap stap bes pren bilong yu, em i save givim ol gutpela helpim long Tok bilong em, Baibel.

Planti taim, ol man i gat sik dipresen i mas kisim marasin inap longpela taim na ol i mas lain long karim dispela hevi taim ol i mekim senis long i stap bilong ol. Tasol sapos yu karim hevi bilong sik dipresen, yu ken luk fowed long gutpela samting bai kamap bihain, olsem Ojebode. Em i tok: “Mi luk fowed long lukim truim bilong Aisaia 33:24, we i tok promis olsem long dispela taim no gat wanpela long graun bai tok ‘Mi sik.’” Olsem Ojebode, tok promis bilong God long “nupela graun” we “pen” bai i no stap moa, dispela i ken mekim isi bel bilong yu. (Revelesen 21:1, 4) Dispela promis i makim tu olsem sik bilong tingting na bel hevi bai pinis. Ol filings bilong pen na hevi yu karim bai pinis olgeta. Bai yu no inap “tingim gen” ol dispela filings bilong pen o ‘pilim gen long bel.’—Aisaia 65:17.