Stori bilong 4-pela man long hos inap pretim yumi na yumi pilim olsem i no gat rot long save long wok bilong ol. Baibel na ol samting i kamap long nau i helpim yumi long kliagut long wan wan man long hos i makim wanem samting. Ron bilong ol i makim ol bikpela hevi i kamap long graun, na i makim tu olsem gutpela samting bai painim yu na famili bilong yu. Bilong wanem yumi inap tok olsem? Pastaim yumi ken stori long ol man long hos i makim wanem samting.

Visen i kirap olsem: “Mi lukluk i stap, na mi lukim wanpela waitpela hos, na man i sindaun antap long en i holim wanpela banara. Na God i givim em wanpela kraun, na em i go bilong daunim ol birua bilong em na winim ol pait.”—Revelesen 6:2.

Man long waitpela hos em i husat? Buk Revelesen i kolim em olsem “Tok Bilong God,” na dispela inap helpim yumi long save long dispela man. (Revelesen 19:11-13) Dispela biknem, Tok, i makim Jisas Krais bikos em i stap olsem mausman bilong God. (Jon 1:1, 14) Na tu, ol i kolim em “King bilong olgeta king na Bikpela bilong olgeta bikman,” na “Man i Save Lukautim Gut Wok Bilong En na Man Bilong Tok Tru.” (Revelesen 19:16) Em i gat namba olsem King bilong pait, na em i no mekim wok nogut long namba bilong em. Tasol yumi laik save long sampela samting.

Husat i givim namba long Jisas long daunim ol birua? (Revelesen 6:2) Long wanpela visen, Profet Daniel i lukim Mesaia olsem “wanpela man.” God Jehova, em “Man bilong bipo bipo yet,” em i makim dispela Mesaia long “kamap king na i givim em strong na biknem.” * (Daniel 7:13, 14) God i Gat Olgeta Strong i givim strong na namba long Jisas long mekim wok king na kotim ol manmeri. Waitpela hos i makim stretpela pait em Pikinini Bilong God bai mekim. Long Baibel, waitpela kala i makim stretpela pasin.—Revelesen 3:4; 7:9, 13, 14.

Wanem taim ol hos i kirap long ron? Jisas i sindaun long namba 1 hos, na hos bilong em i kirap long ron taim God i givim kraun long Jisas. (Revelesen 6:2) Wanem taim Jisas i kisim kraun na kamap King long heven? Bihain long em i kirap bek na i go long heven, Baibel i kamapim klia olsem em i wet inap sampela haptaim paslain long em i kamap King. (Hibru 10:12, 13) Jisas i kolim sampela samting bai kamap olsem sain na ol disaipel bai luksave olsem em i kirap long mekim wok king long heven. Em i tok olsem taim em i kirap long mekim wok king, ol pasin nogut long graun bai kamap nogut moa. Bai i gat ol woa, hevi bilong kaikai i sot, na ol bikpela sik. (Matyu 24:3, 7; Luk 21:10, 11) Bihain long Wol Woa 1 long 1914, ol hevi i kamap long graun i soim klia olsem em kirap bilong haptaim em Baibel i kolim olsem “taim bilong las de.”—2 Timoti 3:1-5.

Jisas i kamap King long 1914, olsem na i stret long ol gutpela samting i kamap. Tasol bilong wanem ol hevi long graun i kamap bikpela moa? Tingim, Jisas i kamap King long heven, i no long graun. Woa i kamap long heven, na Jisas, em Baibel i kolim Maikel, em i bin rausim Satan na ol ensel nogut long heven na tromoi ol i kam daun long graun. (Revelesen 12:7-9, 12) Satan i belhat nogut tru, long wanem, em i save olsem em i gat sotpela haptaim tasol bilong i stap. I no longtaim God bai rausim Satan long dispela graun olsem em i bin promis long mekim. (Matyu 6:10) Orait, nau yumi ken stori long olsem wanem arapela 3-pela man long hos inap helpim yumi long save tru olsem yumi stap long “taim bilong las de.”  Man i sindaun long namba 1 hos i makim Jisas, tasol arapela 3-pela hos i makim ol bikpela hevi we i kamap long olgeta hap bilong graun.

“Narapela hos i kam, em wanpela retpela hos. Na man i sindaun antap long dispela hos em i kisim namba bilong tekewe bel isi long graun bai narapela man i kilim i dai narapela man. Na em i kisim wanpela bikpela bainat.”—Revelesen 6:4.

Dispela man long hos i makim woa. Em i tekewe bel isi long olgeta hap bilong graun, na i no long sampela kantri tasol. Long 1914, em namba 1 taim long bikpela pait i kamap long olgeta hap bilong graun. Bihain, Wol Woa 2 i kamap na kilim planti man moa na bagarapim tru ol samting. Sampela wok painimaut i kamapim olsem, namba bilong ol man i dai long ol woa na ol narapela pait kirap long 1914 i winim 100 milion! Na tu, planti arapela manmeri i kisim ol bikpela bagarap long bodi.

Olsem wanem long ol pait i kamap long taim bilong yumi? Long nau, em namba 1 taim we ol man i gat bikpela strong na save na ol inap pinisim laip bilong olgeta manmeri long graun. Sampela oganaisesen i gat nem olsem lain bilong kamapim bel isi. Tasol ol dispela oganaisesen, olsem Yunaitet Nesen, ol i no gat rot long stopim retpela hos long inapim wok bilong en.

“Mi lukluk i stap na mi lukim wanpela blakpela hos. Na man i sindaun long en i holim wanpela skel long han bilong en. Na mi harim samting olsem wanpela nek i toktok namel long dispela 4-pela serap, na em i tok: ‘Pe bilong 1 kilo wit em wanpela denarius, na pe bilong 3 kilo bali em wanpela denarius, na no ken westim nating oliv oil na wain.’”—Revelesen 6:5, 6.

Man long hos i makim bikpela hangre. Baibel i tok, ol manmeri bai sot tru long kaikai, na pe bilong 1 kilo wit em wanpela koin denarius—long taim bilong ol aposel, dispela em pe bilong wanpela de! (Matyu 20:2) Ol man inap yusim wankain koin mani long baim 3 kilo bali, em kaikai we i no gutpela tumas olsem wit. Hau bai kain kaikai olsem inap lukautim wanpela bikpela famili? Long dispela taim bipo, em nomol long ol manmeri long yusim oliv oil na wain long olgeta wan wan de, na Baibel i tok ol i no ken westim ol dispela samting. Dispela i soim olsem ol manmeri i mas bihainim gutpela tingting na skelim na yusim gut kaikai bilong olgeta de.

Kirap long 1914, yu ting i gat sampela samting i kamap na i soim klia olsem man long blakpela hos i mekim wok bilong em? Yes! Kirap long yia 1900 na i kam inap long yia 2000, hevi bilong bikpela hangre i kilim i dai inap olsem 70 milion manmeri. Wanpela ripot i tok, inap olsem “805 milion manmeri—wanpela long olgeta 9-pela 9-pela manmeri long graun—i sot tru long gutpela kaikai, namel long 2012 na 2014.” Narapela ripot i tok: “Long olgeta yia, ol manmeri i dai long bikpela hangre, na namba bilong ol i bikpela moa winim namba bilong olgeta manmeri i dai long sik AIDS, TB, na malaria.” Maski ol manmeri i wok strong long givim kaikai long ol lain i stap hangre, man i sindaun long blakpela hos i mekim yet wok bilong em.

“Mi lukluk i stap na mi lukim wanpela yelopela hos. Na man i sindaun long en, nem bilong en Dai. Na Matmat i bihainim em i kam. Na tupela i kisim namba long bosim wanpela bilong ol 4-pela hap bilong graun, bai tupela i ken kilim ol man i dai long rot bilong bainat, bikpela hangre, bikpela sik, na long rot bilong ol wel animal bilong graun.”—Revelesen 6:8.

Man long namba 4 hos i makim dai i kamap long rot bilong sik na ol bikpela hevi. Bihain tasol long 1914, bikpela sik kus bilong Spen i kamap na i kilim i dai planti milion manmeri. Inap olsem 500 milion manmeri i kisim dispela sik—em olsem 1-pela long olgeta 3-pela 3-pela manmeri bilong dispela taim bipo!

Bihain long bikpela sik kus bilong Spen, sampela moa sik i kamap. Ol saveman i tok namel long yia 1900 na 2000, planti milion manmeri i dai long sik smolpoks. I kam inap long nau, planti milion man i dai long sik AIDS, TB, na malaria, maski ol saveman i wok long traim kain kain rot bilong stretim.

Wankain samting i painim ol manmeri husat i kisim hevi long woa, bikpela hangre, na bikpela sik—olgeta i dai. Matmat i wok long kisim ol manmeri, na em i no marimari long ol.

Klostu nau ol hevi bai pinis. Tingim: Jisas “i go bilong daunim ol birua” long 1914, na em i rausim Satan i kam daun long graun, tasol Jisas i no pinisim yet wok bilong em long daunim ol birua. (Revelesen 6:2; 12:9, 12) Klostu nau, long pait bilong Armagedon, Jisas bai kalabusim Satan na pinisim ol man husat i bihainim pasin bilong Satan. (Revelesen 20:1-3) Jisas bai pinisim strong bilong dispela 3-pela man i ron long hos, na tu, em bai stretim bek ol hevi ol i kamapim. Lukim ol tok promis em Baibel i mekim.

Woa bai pinis, na bel isi bai stap. Jehova “i save mekim i dai pait long olgeta hap graun. Em i save brukim olgeta banara na spia.” (Song 46:9) Ol manmeri husat i laikim pasin bilong i stap bel isi, “bai ol i sindaun gutpela tumas na amamas i stap.”—Song 37:11.

Bikpela hangre bai pinis, na kaikai bai i pulap. “Planti rais na wit samting i ken kamap long ol gaden bilong ol manmeri.”—Song 72:16.

Ol bikpela sik na dai bai pinis, na olgeta manmeri bai gat gutpela helt na stap laip inap oltaim oltaim. God “bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen.”—Revelesen 21:4.

Taim Jisas i stap long graun, em i mekim ol samting i olsem piksa bilong ol blesing bai kamap taim em i bosim graun. Em i skulim ol man long i stap bel isi, em i wokim mirakel na givim kaikai long planti tausen man, oraitim ol sikman, na kirapim bek ol man i dai pinis.—Matyu 12:15; 14:19-21; 26:52; Jon 11:43, 44.

Ol Witnes Bilong Jehova bai yusim Baibel bilong yu yet long helpim yu long kisim save long ol samting yu mas mekim bilong i stap redi taim bagarap i painim dispela 3-pela man long hos. Bai yu amamas long kisim sampela save moa?