God i Wokim Yumi Bilong Stap Oltaim
YUMI olgeta i laik stap laip longpela taim na stap amamas, a? Tingim laip bai gutpela tru sapos yumi stap oltaim na i gat gutpela helt na stap amamas! Yumi inap stap longpela taim wantaim lain yumi laikim, raun long olgeta hap bilong graun, lainim ol nupela samting, save bilong yumi bai go bikpela, na yumi bai kisim gut save long ol samting yumi laikim.
Yu ting dispela kain laik i no stret? Nogat! Baibel i tok God i putim dispela tingting long bel bilong yumi. (Eklisiastis 3:11) Na Baibel i tok tu olsem “God em i pasin laikim.” (1 Jon 4:8) Yu ting God i gat pasin laikim bai putim laik bilong i stap oltaim long yumi, sapos yumi bilong i stap sotpela taim tasol?
I klia tru, no gat wanpela man i laik i dai. Baibel i kolim dai olsem “birua.” (1 Korin 15:26) Sampela i dai taim ol i yangpela yet; sampela i dai taim ol i lapun, tasol olgeta man i save dai. Planti i tingim dispela na ol i pret. Yu ting dispela birua bai pinis? Dispela samting inap kamap tru?
EVIDENS OLSEM GUTPELA SAMTING BAI KAMAP
Ating yu kirap nogut long save olsem em i no laik bilong God long ol man i dai, a? Buk Stat long Baibel i kamapim evidens olsem em laik bilong God long ol man i stap oltaim long graun. Jehova God i redim gut ol samting long graun na bai ol man inap stap long en. Bihain em i wokim fes man, Adam, na putim em long wanpela paradais, em wanpela gaden long Iden. Bihain, “God i lukim olgeta samting em i bin wokim i gutpela tru.”—Stat 1:26, 31.
God i wokim Adam i gutpela olgeta, wankain olsem em yet. (Lo 32:4) Meri bilong Adam, Iv, em tu i gutpela olgeta, long tingting na bodi. Jehova i tokim ol: “Kamapim ol pikinini na kamap planti na go sindaun long olgeta hap bilong graun na bosim olgeta samting i stap long en. Bosim ol pis long solwara, olgeta samting i flai long skai, na olgeta samting i gat laip na i save muv i go i kam long graun.”—Stat 1:28.
Bilong ol pikinini i ken go sindaun long olgeta hap bilong graun, sampela haptaim i mas lus. Iv inap karim ol pikinini, na ol dispela pikinini inap karim ol pikinini i go inap graun i pulap olsem God i tingting pinis long en. (Aisaia 45:18) Yu ting i stret long tok Jehova i givim dispela presen long Adam na Iv, sapos ol i bilong stap sotpela taim tasol na lukim pikinini na ating tumbuna pikinini bilong ol, na i no save long samting bai kamap bihain?
Tingim tu olsem, ol i gat wok long bosim ol animal. God i tokim Adam long givim nem long ol animal, na ating longpela taim i mas lus long mekim dispela wok. (Stat 2:19) Tasol bilong bosim ol ating em i mas kisim save long ol na kliagut long pasin bilong lukautim ol. Dispela inap kisim longpela haptaim.
So tok bilong God long ol i mas kamapim ol pikinini na bosim ol animal i makim olsem God i wokim fes man na meri long i stap longpela taim. Na tru tru, Adam i bin stap longpela taim.
GOD I LAIK BAI OL MAN I STAP OLTAIM LONG PARADAIS LONG GRAUN
OL I STAP LONGPELA TAIM TRU
Adam, 930 yia
Metusela, 969 yia
Noa, 950 yia
Long nau, 70-80 yia
Baibel i soim olsem ol man i bin stap longpela taim tru winim yumi long nau. Baibel i tok: “Adam i stap inap 930 yia olgeta na em i dai.” Na tu, Baibel i tok long 6-pela narapela man husat i bin stap winim 900 yia! Em Set, Enos, Kenan, Jaret, Metusela, na Noa. Olgeta i stap paslain long Bikpela Tait long taim bilong Noa—Noa i bin stap 600 yia paslain long Bikpela Tait. (Stat 5:5-27; 7:6; 9:29) Wanem samting i mekim na ol i stap longpela taim?
Olgeta dispela man i stap klostu long taim ol man i bin gutpela olgeta. Ating em nambawan risen na ol i stap longpela taim. Tasol olsem wanem laip i gutpela olgeta i mekim na ol man i stap longpela taim? Na olsem wanem dai bai pinis? Bilong kisim bekim, pastaim yumi mas kliagut long risen na yumi go lapun na dai.