Inap 3,500 yia i go pinis, Jehova God i tokim ol man i lotuim em long ol samting ol i mas mekim na bai ol i gat gutpela sindaun long bihain: “Mi putim long ai bilong yupela rot bilong laip na dai, na rot bilong blesing na bagarap; na yupela i mas makim rot bilong laip na bai yupela i ken i stap laip, yupela wantaim ol tumbuna pikinini bilong yupela.”—Lo 30:19.

Bilong kisim gutpela sindaun long bihain, ol i mas wokim gutpela disisen. Long nau yumi tu i mas wokim gutpela disisen. Baibel i stori long olsem wanem yumi ken kisim gutpela sindaun long bihain: “Yupela i mas laikim Jehova, God bilong yupela, na harim tok bilong em.”—Lo 30:20.

KISIM SAVE LONG ROT BILONG BAIBEL: Bilong laikim Jehova, pastaim yu mas kisim save long em long rot bilong Baibel. Taim yu mekim olsem, yu bai kisim save olsem em i God i gat pasin laikim na em i laik bai yu stap gut. God i singautim yu long beten long em bikos ‘em i save wari long yu.’ (1 Pita 5:7) Baibel i tok promis olsem sapos yu wok strong long go klostu long em, ‘em bai kam klostu long yu.’—Jems 4:8.

BIHAINIM OL SAMTING YU LAINIM: Bilong harim tok bilong God, dispela i makim olsem yu mas bihainim ol gutpela tok bilong em i stap long Baibel. Taim yu mekim olsem, “olgeta samting yu mekim bai kamap gutpela na yu bai bihainim savetingting.”—Josua 1:8.