OLSEM WANEM dispela samting i kamap? Mi bai stori long dispela samting. Mama i karim mi long Julai 29, 1929, na mi kamap bikpela long provins Bulacan long Filipins. Mipela i no gat planti samting bikos i gat hevi bilong mani. Woa i kirap taim mi yangpela man. Ol ami bilong Japan i kam pait long Filipins. Tasol ples bilong mipela i stap longwe long taun, olsem na dispela pait i no putim hevi long mipela. Mipela i no gat redio, televisen, o niuspepa, olsem na mipela i save harim nius bilong pait taim ol narapela i tokim mipela.

Mi namba 2 long 8-pela pikinini long famili. Taim mi gat 8-pela krismas, ol bubu bilong mi i kisim mi na lukautim mi. Mipela i save go long lotu Katolik, tasol bubu man i save amamas long ritim ol buk bilong ol Witnes na ol narapela lotu em ol pren bilong em i givim long em. Bubu man i bin soim mi wanpela Baibel na ol buklet Protection, Safety, na Uncovered long tokples Tagalok. * Mi save amamas long ritim Baibel, moa yet 4-pela Gutnius. Dispela i kirapim laik bilong mi long bihainim eksampel bilong Jisas.—Jon 10:27.

Long 1945, ol ami bilong Japan i lusim Filipins. Long dispela taim, papamama i askim mi long kam bek long haus. Bubu man i tokim mi long go bek long papamama, olsem na mi go.

Long Disemba 1945, ol Witnes Bilong Jehova long taun Angat i kam autim tok long ples bilong mipela. Wanpela lapun Witnes i kam long haus bilong mipela na em i stori long tok Baibel i mekim long “taim bilong las de.” (2 Tim. 3:1-5) Em invaitim mipela long kam long Baibel stadi long wanpela ples i stap klostu. Papamama i no go, tasol mi go. Inap olsem 20 manmeri i kam long dispela bung, na sampela i gat ol askim long Baibel.

Mi no kliagut long olgeta samting ol i toktok long en, olsem na mi tingting long lusim ol. Tasol ol i kirap singim wanpela singsing bilong Kingdom. Mi pilim tru ol tok bilong dispela singsing, olsem na mi  stap bek. Bihain long singsing na beten, ol i invaitim mipela olgeta long i go long miting long Angat long Sande.

Mipela sampela i wokabaut inap olsem 8 kilomita bilong i go long miting long haus bilong famili bilong Cruz. Mi amamas tru long lukim olsem ol yangpela pikinini namel long 50 manmeri husat i kam bung, ol i kamapim ol bekim bilong ol bikpela tok bilong Baibel. Bihain long ol narapela miting, Brata Damian Santos, em wanpela lapun painia na bipo em wanpela bikman bilong gavman, em i invaitim mi long slip long haus bilong em. Long dispela nait olgeta, mitupela i stori long tok bilong Baibel.

Long dispela taim, planti bilong mipela i kamap strong long bilip taim mipela i wok long kisim save long ol bikpela tok i tru bilong Baibel. Bihain long sampela miting, ol brata i askim mi na ol narapela olsem, “Olsem wanem? Yupela i laik kisim baptais?” Mi tokim ol, “Yes, mi laik kisim baptais.” Mi save olsem mi laik “stap olsem ol wokboi bilong Bosman, em Krais.” (Kol. 3:24) Mipela i go long wanpela wara i stap klostu, na mi na narapela brata i kisim baptais long Februeri 15, 1946.

Mipela i luksave olsem sapos wanpela Kristen i baptais, dispela i makim olsem em i mas bihainim pasin bilong Jisas long autim tok oltaim. Taim mi kisim baptais, Papa i no amamas na em i tok: “Yu yangpela tumas long autim tok. Na tu, maski ol i putim yu i go insait long wara, dispela i no makim olsem yu mas autim tok.” Mi tokim em olsem em laik bilong God long yumi mas autim gutnius bilong Kingdom Bilong God. (Mat. 24:14) Mi tok moa olsem, “Mi mas truim tok promis mi mekim long God.” Dispela i mekim na Papa i kros long mi na i mekim dispela tok em mi kamapim long kirap bilong stori. Em i tingting strong long stopim mi long autim tok. Dispela em namba 1 taim bilong mi long lusim olgeta samting na winim ol mak mi laik winim long sait bilong bilip.

Famili bilong Cruz i invaitim mi long stap wantaim ol long Angat. Na tu, ol i strongim mi na yangpela pikinini meri bilong ol, Nora, long insait long wok painia. Mitupela wantaim i kirap mekim wok painia long Novemba 1, 1947. Nora i mekim wok painia long narapela taun, na mi mekim wok painia long Angat.

Long namba 3 yia bilong mi long mekim wok painia, brens ofis i salim Brata Earl Stewart i kam bilong mekim wanpela tok, na 500 manmeri i kam bung long Angat bilong harim dispela tok. Em i mekim tok long Inglis, na bihain mi kamapim ol bikpela tok long tokples Tagalok. Maski mi skul inap 7-pela yia, mi save long tok Inglis bikos ol tisa bilong mipela i save mekim tok Inglis long olgeta de. Na tu, mi save stadi long ol buk na nius bilong tok Inglis bikos mipela i no gat planti pablikesen bilong Baibel long tokples Tagalok. Dispela i helpim mi long trensletim tok Brata Stewart i mekim na ol narapela tok i kamap bihain.

Brata Stewart i tokaut long kongrigesen olsem brens ofis i laik invaitim 1-pela o 2-pela painia brata long kam long Betel. Ol i go bilong helpim wok long Betel taim ol misineri i go long kibung Theocracy’s Increase Assembly long 1950 long New York, Amerika. Mi wanpela bilong ol brata ol i invaitim long i go. Olsem na mi lusim gen olgeta samting bilong i go helpim wok long Betel.

Mi kamap long Betel long Jun 19, 1950 na mi kirap long mekim nupela asainmen bilong mi. Betel i stap long wanpela bikpela haus bilong bipo na ol bikpela diwai i stap raunim Betel long bikpela hap graun inap olsem 1-pela hekta. Inap 12-pela singel brata i mekim wok long Betel. Long olgeta moning, mi save helpim wok long haus kuk. Bihain, long 9 klok mi save go wok long londri na ainim ol klos. Long belo bek, mi save bihainim wankain sediul. Taim ol misineri i kam bek long intenesenel kibung, mi mekim yet wok long Betel. Mi save pasim ol magasin bilong salim i go long ol narapela hap, stretim ol envelop bilong ol sabskripsen, na mekim wok long risepsen. Mi save mekim olgeta wok ol i askim mi long mekim.

Long 1952, brens ofis i askim mipela 7-pela brata bilong Filipins long i go long namba 20 klas bilong Skul Gileat, na mi amamas tru long i go. Planti samting mipela i lukim long Amerika i nupela long mipela. Ol i no wankain long ol samting mi lukim long ples bilong mi.

Mipela i lain long yusim ol lait na ol masin we i yusim pawa, na tu, mipela i yusim ol sospen, kap, na naip samting we mipela i no gat long ples. Na tu, weda long Amerika i narakain olgeta long weda bilong ples! Wanpela moning, mi kam ausait na mi lukim ples i wait olgeta na i luk nais tru. Em fes taim tru long mi lukim sno. Bihain mi luksave olsem ples i kol nogut tru!

 Tasol mi no tingim tumas ol dispela samting bikos mi amamas tru long trening mi kisim long Gileat. Ol tisa long skul Gileat i yusim kain kain gutpela rot bilong skulim mipela. Mipela i mas lain long mekim gutpela wok painimaut na stadi. Trening mi kisim long Gileat i helpim mi long kamap strong moa long bilip.

Bihain long gretiuesen, ol i asainim mi long mekim wok olsem spesel painia long Bronx long New York City. Long Julai 1953, brens ofis i singautim mi long i go long kibung New World Society Assembly, dispela kibung i kamap long Bronx. Bihain long kibung, mi kisim asainmen long go bek long Filipins.

Ol brata long brens ofis i tok, “Nau yu bai go mekim wok sekit.” Dispela i opim rot long mi long bihainim lek mak bilong Jisas, em i save go long ol taun i stap longwe bilong helpim ol sipsip bilong Jehova. (1 Pita 2:21) Mi kisim asainmen long mekim wok sekit long Luzon, em bikpela ailan bilong Filipins. Dispela hap i gat ol narapela provins olsem Bulacan, Nueva Ecija, Tarlac, na Zambales. Bilong i go long sampela taun, mi mas brukim rot namel long ol ples maunten bilong Sierra Madre. I no gat ol PMV bilong i go long ol dispela ples, olsem na mi mas askim ol draiva bilong ol bikpela trak sapos mi inap sindaun antap long ol diwai i stap baksait long trak. Planti taim ol i save larim mi long mekim olsem, tasol em i no seif tumas long sindaun long baksait bilong trak.

Planti nupela kongrigesen ol i liklik. Olsem na ol brata i amamas taim mi helpim ol long oganaisim ol miting na wok autim tok long kamap gutpela moa.

Bihain, ol i salim mi i go mekim wok sekit long Bicol. I gat planti liklik grup long dispela hap na ol spesel painia i go pas long autim tok long ol longwe teritori. Long wanpela haus, i gat wanpela toilet em ol i digim graun na putim tupela diwai long namel. Taim mi sanap long diwai, diwai i pundaun i go daun long hul na mi tu mi pundaun i go insait. Mi mas lusim bikpela haptaim long waswas na klinim mi yet paslain long mi kaikai!

Mi stap long dispela asainmen na mi stat long tingim Nora, em i kirap mekim wok painia long Bulacan. Long dispela taim, em i mekim wok olsem spesel painia long Dumaguete City, na mi go visitim em. Mitupela i raitim pas long narapela narapela, na long 1956 mitupela i marit. Wanpela wik bihain long weding, mipela i visitim wanpela kongrigesen long ailan Rapu Rapu. Mipela i mas kalapim planti maunten na wokabaut long longpela rot, tasol mipela i amamas tru long helpim ol bratasista long ol ples i stap longwe!

Mipela i mekim wok sekit klostu 4-pela yia, na bihain brens ofis i singautim mipela. Kirap long Janueri 1960 i kam inap long nau, mipela i wok long Betel. Insait long ol dispela yia, mi lainim planti samting long ol brata mi wok wantaim em ol i save mekim ol bikpela wok, na Nora i mekim narapela narapela asainmen long Betel.

Mi wok long Betel na mi amamas long lukim olsem wok bilong Kingdom i kamap bikpela long Filipins. Fes taim mi kam long Betel olsem wanpela singel brata, i gat 10 tausen pablisa tasol long kantri olgeta. Tasol nau i gat winim 200 tausen pablisa long Filipins. Planti handret bratasista i wok long Betel bilong sapotim wok bilong autim tok.

Insait long sampela yia, wok bilong sapotim Kingdom i go bikpela. Tasol Betel i no gat inap spes long kisim sampela moa bratasista i kam wok. Olsem na Gavening Bodi i askim mipela long painim wanpela bilding i bikpela inap long mipela i sanapim nupela brens ofis. Mi na ovasia bilong Printing Dipatmen i go long ol neiba na askim ol sapos ol i tingting long salim haus. I no gat wanpela i redi long salim haus bilong ol, na wanpela man i tokim mipela: “Mipela ol Saina i no save salim ol haus. Mipela i save baim ol haus.”

Wanpela taim, wanpela man i laik go long Amerika na em i laik salim graun bilong em long mipela. Bihain narapela neiba i tingting long salim haus bilong em, na em i kirapim ol narapela long mekim olsem. Nau rot i op long mipela inap baim haus bilong dispela man husat i tok, “Mipela ol Saina i no save salim ol haus.” Insait long liklik haptaim, hap graun em brens ofis i stap long en i go bikpela moa winim 3-pela taim. Mi bilip olsem God Jehova i laik bai dispela samting i kamap.

Long 1950, mi wanpela tasol i yangpela long ol narapela long Betel. Tasol nau mi na meri bilong mi i gat bikpela krismas moa winim ol narapela long Betel. Mi no rigret long mi bihainim Jisas long wanem wanem wok em i tokim mi long mekim. Maski papamama i rausim mi long haus, Jehova i givim mi bikpela famili, em ol wanbilip. Mi no gat tupela tingting olsem Jehova bai i lukautim mipela maski mipela i mekim wanem asainmen. Mitupela Nora i tenkyu tru long Jehova i lukautim mipela, na mipela i strongim ol narapela long ol tu i mas traim Jehova.—Mal. 3:10.

Jisas i invaitim Matyu Livai em wanpela man bilong kisim takis, na em i tok: “Kam bihainim mi.” Dispela man i mekim wanem? “Em i lusim olgeta samting na em i kirap na i go bihainim Jisas.” (Luk 5:27, 28) Mi tu i lusim olgeta samting na bihainim Jisas, na mi laik kirapim ol narapela long mekim wankain samting na kisim planti blesing.