Yu bin ritim gut ol nupela Wastaua? Yu ken traim bekim ol dispela askim:

Sapos ol papamama i laik helpim ol pikinini long sait bilong bilip, orait bilong wanem ol i mas skelim wanem tokples ol bai skulim pikinini long en?

Ating ol pikinini bai lainim tokples bilong hap ol i stap long en taim ol i go long skul. I gutpela long pikinini i mas save long ol narapela tokples tu. Papamama i mas skelim sapos pikinini bai kliagut long tok i tru na kamap strong long bilip taim em i stap wantaim kongrigesen i mekim tokples bilong hap ol i stap long en, o kongrigesen i mekim tokples bilong papamama. Ol papamama Kristen i daunim laik bilong ol yet na helpim ol pikinini long stap gut long bilip.—w17.05, p. 9-11.

Jisas i tokim Pita: “Yu laikim mi moa winim ol dispela samting”? Ol “dispela samting” i makim wanem samting? (Jon 21:15)

I luk olsem Jisas i toktok long wok bisnis bilong kisim pis. Bihain long Jisas i dai, Pita i go bek long wok bisnis bilong em long kisim pis. Ol Kristen i no ken larim wok mani i stap namba 1 samting long laip bilong ol.—w17.05, p. 22-23.

Bilong wanem Abraham i tokim meri bilong em long tokim ol man olsem em i susa bilong em? (Stt. 12:10-13)

Sara em hap susa bilong Abraham. Sapos Sara i tok olsem em i meri bilong Abraham, ol dispela man bai kilim Abraham na nau Pikinini bilong promis i no inap kamap long lain tumbuna bilong em.—wp17.3, p. 14-15.

Elias Hutter i yusim wanem kain stail bilong rait bilong helpim ol lain husat i lainim tokples Hibru?

Em i laik helpim ol sumatin long luksave long ol bikpela tok Hibru i stap long Baibel na ol tok i stap long fran na long baksait bilong ol bikpela tok. Olsem na em i putim planti ing long ol bikpela tok, na em i yusim liklik ing long ol tok i stap long fran na long baksait bilong ol bikpela tok. New World Translation of the Holy Scriptures—With References i bihainim wankain stail long raitim ol futnot.—wp17.4, p. 11-12.

Ol Kristen i mas tingim wanem ol samting taim ol i laik i gat gan bilong lukautim ol yet?

Ol i mas tingim olsem: Laip bilong man em samting i holi long ai bilong God. Jisas i no bin tokim ol disaipel long kisim ol bainat bilong lukautim ol yet. (Luk 22:36, 38) Yumi mas paitim ol bainat bilong yumi i kamap olsem ol ain bilong brukim graun. Laip bilong yumi i bikpela samting moa winim mani kago. Yumi mas tingim maus bilong bel bilong ol narapela, na tu, yumi laik stap olsem gutpela piksa long ol narapela Kristen. (2 Kor. 4:2)—w17.07, p. 31-32.

Bilong wanem stori em Matyu na Luk i raitim long laip bilong Jisas i no wankain?

Matyu i stori long Josep. Em i stori long tingting Josep i gat taim Maria i gat bel, na driman Josep i kisim we ensel i tokim em long ranawe i go long Isip na kam bek. Luk i stori long Maria; em i stori long Maria i go visitim Elisabet, na samting Maria i mekim taim Jisas i stap bek long tempel.—w17.08, p. 32.

Olsem wanem Baibel i stap yet maski ol senis i kamap?

Mining bilong ol tok ol man i yusim long raitim Baibel i senis insait long sampela haptaim. Ol gavman i senis na dispela i mekim na ol bikpela tokples tu i senis. Ol man i birua long wok bilong trensletim Baibel i go long ol bikpela tokples em ol man i save long en.—w17.09, p. 19-21.

Yu ting yumi gat wanpela was ensel?

Nogat. Jisas i tokim ol disaipel olsem, ol ensel long heven i save stap long ai bilong God. (Mat. 18:10) Tok bilong em i no makim olsem wan wan man i gat was ensel, nogat. Em i laik tok ol ensel i tingim tru ol wan wan disaipel bilong em.—wp17.5, p. 5.

Wanem kain pasin laikim em i nambawan tru?

Pasin laikim we ol stiatok bilong Baibel i as bilong en (a ga’pe) em pasin laikim i nambawan tru. Man i gat dispela pasin laikim bai tingim ol narapela na mekim gut long ol. Na tu, em bai putim laik bilong ol narapela i go pas long laik bilong em yet.—w17.10, p. 7.