1, 2. Taim yumi laik putim ol mak yumi laik winim, bilong wanem i gutpela long bihainim tok bilong God? (Lukim ol piksa long kirap bilong stadi.)

SAPOS yu wanpela yangpela, ating yu kisim planti edvais long ol samting yu inap mekim long bihain. Ating ol tisa, ol kaunsela, na ol narapela i kirapim yu long i go long bikpela skul na kisim wok i gat gutpela pe. Tasol Jehova i givim skultok bilong stiaim yu long mekim narapela disisen. Em tru olsem, em i laik bai yu wok hat long skul bambai yu inap lukautim yu yet taim yu lusim skul. (Kol. 3:23) Yumi stap long taim bilong pinis, olsem na taim yu laik makim ol bikpela samting yu laik mekim, God i laik bai yu bihainim ol stiatok we inap helpim yu long mekim laik bilong em.—Mat. 24:14.

² Jehova i laik bai yu bihainim ol gutpela stiatok bikos em i save long samting bai kamap long graun, na em i save olsem klostu tru nau ol pasin nogut bai pinis. (Ais. 46:10; Mat. 24:3, 36) Na tu, em i save gut long yumi—em i save long ol samting we inap mekim yumi amamas tru na ol samting we inap mekim yumi bel hevi. Ol man inap givim gutpela edvais, tasol sapos ol i no skelim tok bilong Baibel, dispela em i no savetingting.—Prov. 19:21.

3, 4. Adam na Iv i bihainim edvais nogut, olsem na wanem hevi i painim tupela na ol tumbuna pikinini bilong ol?

³ Bihain tasol long God i wokim namba 1 man na meri, Satan i givim edvais nogut long tupela. Em i gat pasin antap na long laik bilong em yet, em i tokim Iv olsem Iv na man bilong em bai stap amamas moa sapos ol yet i makim ol samting ol i laik mekim. (Stt. 3:1-6) Tasol tru tru, Satan i tingim em yet. Em i laik bai Adam na Iv—na ol tumbuna pikinini—i stap daun long em na lotuim em, na ol i no ken lotuim Jehova. Tasol Satan i mekim wanem bilong helpim ol? Jehova tasol i givim olgeta samting long ol—em i wokim tupela bilong inapim laik bilong narapela narapela, em i wokim naispela gaden ol i stap long en, na bodi bilong ol i gutpela olgeta na ol inap stap laip inap oltaim oltaim.

⁴ Sori tru olsem Adam na Iv i sakim tok bilong God na ol i no pas gut moa wantaim em. Olsem na bikpela hevi tru i painim ol. Wankain olsem nupela plaua em man i katim, isi isi tupela i kamap lapun na ol i dai. Na tu, ol tumbuna pikinini bilong ol i karim ol hevi i kamap long rot bilong sin. (Rom 5:12) Ol manmeri i luksave long dispela hevi, tasol ol i no laik stap aninit long God. Ol i laik bihainim laik bilong ol yet. (Efe. 2:1-3) Dispela i soim klia olsem “i no gat savetingting . . . taim man i birua long Jehova.”—Prov. 21:30.

5. God i save olsem sampela manmeri bai mekim wanem?

⁵ Jehova i save olsem sampela manmeri na planti yangpela bai mekim disisen long kisim save long em na mekim wok bilong em. (Sng. 103:17, 18; 110:3) Em i laikim tru ol kain lain olsem! Yu tingim yu yet olsem wanpela bilong ol? Sapos olsem, ating yu kisim pinis planti “gutpela samting” long God na dispela i mekim yu amamas. (Ritim Buk Song 103:5; Prov. 10:22) Sampela bilong ol dispela “gutpela samting” em planti kaikai yumi kisim long sait bilong bilip, ol gutpela pren tru, ol gutpela mak yumi laik winim, na fridom tru.

6. (a) Bilong wanem yu mas kisim ol tok i kam long God? (b) Jehova i yusim wanem ol rot bilong inapim laik bilong ol man long kisim save long em?

⁶ Yumi stap narapela kain long ol animal bikos yumi gat laik long save long God, na em tasol bai inapim dispela laik. (Mat. 4:4) Taim yu putim gut yau long em, yu bai kisim savetingting, kliagut long ol bikpela samting, na yu bai stap amamas. Jisas i tok: “Ol man i hangre long kisim save long God, ol i ken amamas.” (Mat. 5:3) God i inapim laik bilong ol man long kisim save long em long rot bilong Baibel na ol gutpela tok i kam long “gutpela wokboi i gat savetingting.” (Mat. 24:45) Yumi kisim planti gutpela kaikai bilong strongim bilip!—Ais. 65:13, 14.

7. Taim yu kisim savetingting i kam long God, hau bai dispela i lukautim yu?

⁷ Ol gutpela tok i kam long God bai helpim yu long kisim savetingting na yu inap wokim gut tingting, na dispela bai banisim yu long planti hevi. (Ritim Provep 2:10-14.) Taim yu kisim savetingting na yu inap wokim gut tingting, yu bai luksave na sakim ol tok giaman. Em ol kain tok olsem i no gat Krieta, o mani kago bai mekim yu i stap amamas. Yu bai luksave na sakim ol laik nogut na ol pasin we inap givim hevi long yu. Olsem na wok yet long kisim savetingting na yu mas wokim gut tingting—ol dispela pasin i olsem samting i dia tumas! Taim yu kisim ol dispela pasin, yu yet bai luksave olsem Jehova i laikim yu na em i laik bai yu stap gut na stap amamas.—Sng. 34:8; Ais. 48:17, 18.

8. Sapos yu go klostu long God long nau, hau bai dispela i helpim yu long bihain?

 ⁸ Klostu nau bikpela bagarap bai painim olgeta man i stap aninit long wok bos bilong Satan, na yumi bai lukluk i go long Jehova tasol long lukautim yumi. Ating yumi bai sot long kaikai, na yumi mas bilip na hop long Jehova tasol long sambai long yumi! (Hab. 3:2, 12-19) Nau em taim bilong i go klostu moa long God na strongim pasin bilong yu long trastim em. (2 Pita 2:9) Taim yu mekim olsem, yu no inap pret na guria maski wanem hevi i kamap. Yu bai pilim wankain olsem Devit, em i tok: “Oltaim mi lukim Jehova i stap long ai bilong mi. Em i stap long rait sait bilong mi, olsem na mi no ken guria.”—Sng. 16:8.

9. (a) Olsem Jon 6:44 i kamapim, Jehova i save mekim wanem? (b) Taim yu bungim wanpela Witnes long festaim, hau na dispela i narapela kain long taim yu bungim man i no wanbilip?

⁹ Jehova i kirapim ol man i gat gutpela bel long kam insait long oganaisesen bilong em. (Ritim Jon 6:44.) Long festaim yu bungim man i no wanbilip, ating yu no save tumas long em. Yu save tasol long nem na lukluk bilong em. Tasol i no olsem taim yu bungim man i save long Jehova na laikim em. Maski em i bilong narapela kantri, kalsa, klen, o sindaun, yu save pinis long planti samting long laip bilong em—na em tu i gat wankain save long yu!

10, 11. Wanem samting i wankain long olgeta manmeri bilong Jehova? Olsem wanem dispela i helpim yumi?

¹⁰ Kwiktaim yupela i luksave long “tokples” bilong yupela—“gutpela tokples tru” bilong tok i tru. (Sef. 3:9) Yupela i save long ol samting yupela i bilip long en. Kain olsem: God em i husat, ol stretpela lo, na ol gutpela samting bai kamap bihain. Dispela em ol bikpela samting yumi mas save long en bikos dispela bai strongim yumi long bilip na trastim narapela narapela. Na tu, dispela bai opim rot bilong yumi long kamap gutpela pren tru.

¹¹ Yumi lotuim Jehova, olsem na yumi gat ol gutpela pren tru long olgeta hap bilong graun. Yu no bungim yet olgeta dispela pren! Ol manmeri bilong Jehova tasol i gat dispela blesing!

12. Yu yet inap putim wanem ol mak long sait bilong bilip?

¹² Ritim Eklisiastis 11:9–12:1. Olsem wanem? Yu putim sampela mak yu wok long winim? Ating yu laik ritim Baibel long olgeta de. O yu laik kamap gutpela moa long pasin bilong mekim tok na skulim man. Maski yu putim wanem mak yu laik winim, taim yu lukim olsem gutpela samting i kamap—o ol narapela i lukim na ol i tok amamas long yu—yu save pilim olsem wanem? Ating yu amamas na yu pilim olsem yu winim mak yu bin putim. I stret yu pilim olsem bikos yu bihainim pasin bilong Jisas na yu putim laik bilong God i stap namba 1 winim laik bilong yu yet.—Sng. 40:8; Prov. 27:11.

13. Taim man i mekim wok bilong God, bilong wanem dispela i gutpela moa winim pasin bilong bungim mani kago?

¹³ Taim yu tingting strong long winim ol mak long sait bilong bilip, yu bai amamas tru bikos hatwok bilong yu i no inap lus nating. Aposel Pol i tok: “Yupela i mas sanap strong, na no ken surik. Oltaim yupela i mas bisi long mekim planti wok bilong Bikpela. Yupela save, wok yupela i mekim bilong Bikpela i no inap lus nating.” (1 Kor. 15:58) Taim man i tingting tasol long painim gutpela wok mani na bungim mani kago, ol dispela samting i no inap helpim em maski ol narapela i ting laip bilong em i gutpela. (Luk 9:25) King Solomon i gat planti mani kago, tasol em i no stap amamas.—Rom 15:4.

14. Yu inap kisim wanem skul long wok painimaut bilong Solomon?

¹⁴ Solomon i gat biknem na planti mani kago. Em i laik mekim wok painimaut na em i tok: “Mi traim kisim kain kain amamas, na lukim wanem gutpela samting bai kamap long en.” (Ekl. 2:1-10) Em i wokim ol haus, ol gaden na ol pak, na em i kisim olgeta kain samting em i laikim. Bihain em i pilim olsem wanem? Yu ting em i belgut? Yu ting em i inapim tru laik bilong em? Yu ting em i stap amamas? Solomon yet i tok: “Taim mi tingting long olgeta wok mi bin mekim long tupela han bilong mi yet . . . , mi lukim olsem olgeta samting i nogat as tru bilong en, . . . [na] i no gat wanpela gutpela samting i kamap.” (Ekl. 2:11) Yumi kisim gutpela skul tru! Olsem wanem? Yu bai yusim savetingting na bihainim dispela skultok?

15. (a) Bilong wanem yu mas i gat pasin bilong bilip? (b) Olsem Song 32:8 i kamapim, olsem wanem bai bilip i helpim yu?

¹⁵ Jehova i no laik bai yu karim pen na hevi long ol disisen yu mekim. Bilip bai kirapim yu long bihainim tok bilong God na putim laik bilong em i stap namba 1 samting long laip bilong yu. Bilip bai lukautim yu na i no inap putim hevi long yu. Yes, Jehova i no inap lusim tingting long “pasin bilong [yu] long laikim tru nem bilong em.” (Hib. 6:10) Olsem na yu mas wok hat long strongim bilip bilong yu, na yu bai luksave olsem Papa bilong yu i laik bai yu stap amamas.—Ritim Buk Song 32:8.

16. Bilong wanem yumi mas bihainim savetingting na yusim gut pasin bilong i stap fri?

¹⁶ Pol i tok: “Taim holi spirit bilong Jehova i stap, man i stap fri.” (2 Kor. 3:17) Jehova i laikim pasin bilong i stap fri, na em i wokim yu wantaim laik bilong i stap fri. Tasol em i laik bai yu yusim gut dispela laik bambai yu inap i stap gut. Ating yu save long sampela yangpela em ol i save lukim ponografi o insait long pasin pamuk, pilaim ol spots we man inap kisim bagarap, o kisim drak na alkohol. Ol i amamas, tasol ating amamas bilong ol i bilong sotpela taim tasol. Bihain bikpela hevi inap painim ol; ol  inap kisim sik, stap kalabus long dispela pasin, o ol inap i dai. (Gal. 6:7, 8) Ol i no yusim gut laik bilong “i stap fri” na dispela i putim bikpela hevi long ol yet.—Tai. 3:3.

17, 18. (a) Taim man i bihainim tok bilong God, olsem wanem dispela i helpim em long abrusim ol hevi? (b) Olsem wanem fridom em Adam na Iv i ekspiriensim i narapela kain long fridom bilong ol manmeri long nau?

¹⁷ Olsem wanem? Yu save long wanpela man husat i kisim sik bikos em i bihainim ol stretpela lo bilong Baibel? Taim yumi bihainim tok bilong Jehova, dispela bai lukautim helt bilong yumi na helpim yumi long abrusim hevi. (Sng. 19:7-11) Taim yu larim ol stretpela lo na stiatok bilong God i stiaim yu long yusim fridom bilong yu, yu soim klia long God na papamama olsem ol i ken givim yu sampela moa fridom. God i laik givim fridom tru long ol wokman bilong em. Baibel i kolim dispela fridom olsem “pasin bilong i stap fri i nambawan tru olsem bilong ol pikinini bilong God.”—Rom 8:21.

¹⁸ Adam na Iv i bin ekspiriensim dispela fridom. Long gaden Iden, God i putim hamaspela lo? Em i putim wanpela lo tasol. Ol i no ken kaikai prut bilong wanpela diwai. (Stt. 2:9, 17) Yu ting God i mekim hatpela pasin o putim hevi long ol? Nogat tru! Tasol ol man i putim planti tausen lo na fosim ol narapela long kisim save na bihainim ol dispela lo.

19. Olsem wanem God i skulim yumi long i stap fri?

¹⁹ Jehova i bihainim savetingting taim em i givim lo bilong stiaim ol manmeri bilong em. Em i no givim planti tausen lo, nogat. Em i skulim yumi long bihainim pasin laikim. Em i laik bai yumi bihainim ol stiatok bilong em na heitim ol pasin nogut. (Rom 12:9) Taim Jisas i mekim wok tisa antap long maunten, em i kamapim klia olsem yumi mas bihainim pasin laikim bikos dispela bai kirapim yumi long sakim pasin nogut. (Mat. 5:27, 28) Krais i stap King long Kingdom Bilong God, na long nupela taim em bai wok yet long skulim yumi. Yumi bai bihainim stretpela pasin olsem em i mekim. (Hib. 1:9) Na tu, yumi bai kamap gutpela olgeta long bodi na long tingting. Tingim, yu no inap karim ol hevi em sin i save kamapim. Yu bai kisim “pasin bilong i stap fri i nambawan tru,” em pasin Jehova i bin tok promis long en.

20. (a) Jehova i stap fri long mekim olgeta kain samting, tasol em i larim wanem samting i stiaim em? (b) Wanem samting bai kamap taim yumi bihainim eksampel bilong God?

²⁰ Yumi no inap i stap fri long mekim olgeta kain samting yumi laik mekim. Pasin bilong laikim God na ol narapela bai stiaim ol samting yumi mekim. Jehova i laik bai yumi bihainim pasin bilong em. Em i stap fri long mekim olgeta kain samting em i laik mekim, tasol pasin laikim i stiaim ol samting em i mekim long yumi. (1 Jon 4:7, 8) Olsem na yumi inap i stap fri tru taim yumi larim pasin laikim i stiaim ol samting yumi mekim.

21. (a) Devit i pilim olsem wanem long Jehova? (b) Yumi bai stori long wanem samting long neks stadi?

²¹ Jehova i givim yu planti “gutpela samting,” olsem planti kaikai bilong strongim bilip, ol gutpela pren, ol gutpela mak bilong winim, na em i opim rot bilong yu inap kisim fridom tru long bihain. Olsem wanem? Yu amamas long ol dispela samting? (Sng. 103:5) Sapos olsem, yu ken mekim wankain tok i stap long Buk Song 16:11: “Yu soim mi rot i go long laip. Yu amamas long mi na dispela i mekim mi belgut; mi stap long rait sait bilong yu na dispela i mekim mi i stap amamas inap oltaim oltaim.” Neks stadi bai stori long sampela gutpela skul yumi inap kisim long Buk Song sapta 16. Yumi bai kliagut moa long ol samting yumi mas mekim bilong kisim laip tru.