1-2. (a) Jubili em wanem samting? (Lukim blok, “Jubili Em Wanem Samting?”) (b) Olsem Luk 4:16-18 i kamapim, Jisas i toktok long wanem samting?

LONG sampela kantri, ol i save mekim ol spesel bung bilong selebretim namba 50 yia bilong king o kwin. Ol i kolim dispela namba 50 yia olsem yia bilong jubili. Ol i save mekim ol bung bilong amamas inap wanpela de, wanpela wik, o sampela moa wik, na bihain ol dispela amamas i pinis na i no longtaim ol manmeri i save lusim tingting long amamas ol i bin kisim.

² Yumi bai stori long narapela Jubili we i gutpela moa winim Jubili bilong lain Israel long bipo we i save kamap long olgeta 50 yia. Dispela Jubili bilong bipo i bin helpim ol manmeri husat i stap insait long dispela bung. Wai na yumi mas kisim save long en? Yia bilong lain Israel long mekim bung bilong Jubili i kirapim yumi long tingim wanpela gutpela samting em Jehova i mekim long nau tu bilong helpim yumi long kamap fri olgeta—Jisas i bin toktok long dispela fridom.—Ritim Luk 4:16-18.

3. Olsem Wok Pris 25:8-12 i kamapim, olsem wanem yia bilong Jubili i bin helpim lain Israel?

³ Pastaim yumi ken skelim ol samting i save kamap long bung bilong Jubili long bipo, na dispela bai helpim yumi long kliagut moa long tok bilong Jisas long ol manmeri bai kamap fri. Jehova i tokim lain Israel olsem: “Namba 50 yia em i holi, na yupela i mas tokaut olsem ol manmeri long olgeta hap long kantri bilong yupela i kamap fri. Dispela yia em i yia bilong Jubili bilong yupela. Na graun bilong yupela em narapela man i bin baim, bai yupela i kisim bek na yupela i mas go bek long famili bilong yupela yet.” (Ritim Wok Pris 25:8-12.) Long atikol i kamap paslain, yumi bin stori long olsem wanem lain Israel  i kisim helpim long Sabat bilong olgeta wik. Olsem wanem lain Israel i kisim helpim long Jubili? Tingim: Sapos wanpela papagraun long Israel i gat dinau, em inap salim graun bilong em bambai em i ken bekim dinau. Long yia bilong Jubili, man i bin baim graun i mas givim dispela graun i go bek long papagraun. Olsem na papagraun inap “kisim bek” graun bilong em, na lain pikinini bilong em bai sindaun long dispela graun. Na tu, sapos wanpela man i gat dinau, em inap salim wanpela pikinini bilong em—o em inap salim em yet—long mekim wok sleiv bambai em inap bekim dinau. Long yia bilong Jubili, wokboi “i mas go bek long famili bilong [em] yet.” Olsem na i no gat man bai stap wokboi inap long laip olgeta bilong em! Dispela i soim olsem Jehova i tingim tru ol manmeri bilong em!

4-5. Wai na em i bikpela samting long yumi mas kisim save long Jubili bilong bipo?

⁴ Wanem narapela rot em lain Israel i bin kisim helpim long Jubili? Jehova i tok: “I no gat wanpela namel long yupela bai i stap rabis, long wanem, Jehova bai blesim yupela long dispela graun em Jehova, God bilong yupela, bai givim long yupela bilong sindaun long en.” (Lo 15:4) Dispela i narapela kain tru long pasin i kamap long graun long nau, we ol maniman i kisim planti mani moa na ol rabisman i sot moa yet long mani!

⁵ Yumi ol Kristen i no stap aninit long Lo Bilong Moses. Olsem na yumi no bihainim pasin bilong lusim ol wokboi i go fri, fogivim man i gat dinau, na givim graun i go bek long papagraun, nogat. (Rom 7:4; 10:4; Efe. 2:15) Maski i olsem, em i bikpela samting long yumi mas kisim save long Jubili. Wai? Bikos dispela bai kirapim yumi long tingim samting Jehova i mekim bilong helpim yumi long lusim kalabus bilong sin na dai.

6. Olgeta lain man i mas kamap fri long wanem samting?

⁶ Yumi olgeta i mas kamap fri bikos yumi stap wokboi long wankain samting—wokboi bilong sin. Yumi gat sin, olsem na yumi save kamap lapun, kisim sik, na yumi dai. Planti manmeri i luksave long dispela taim ol i lukluk long mira o go lukim dokta. Na tu, yumi save bel hevi taim yumi mekim rong. Aposel  Pol i tok “lo bilong sin i wok long kalabusim [em].” Em i tok moa: “Mi pilim nogut tru! Husat bai kisim bek mi long dispela bodi em bilong i dai?”—Rom 7:23, 24.

7. Aisaia i mekim wanem tok profet long kamap fri?

⁷ Yumi ken amamas bikos God i stretim rot long yumi inap kamap fri long kalabus bilong sin. Jisas i opim rot bilong yumi long kamap fri. Winim 700 yia paslain long Jisas i kam long graun, profet Aisaia i stori long wanpela taim bai kamap na ol manmeri bai kisim bikpela fridom. Dispela fridom bai i winim tru fridom ol manmeri i bin kisim long Jubili bilong lain Israel long bipo. Aisaia i tok: “Spirit bilong Nambawan Bikpela Jehova i stap long mi, long wanem, Jehova i bin makim mi long autim gutnius long ol man i daunim ol yet. Em i bin salim mi i kam bilong oraitim ol man husat i bel hevi tru, bilong autim tok olsem ol man i stap kalabus ol i ken i go fri.” (Ais. 61:1) Dispela tok profet i makim husat?

8. Olsem tok profet bilong Aisaia i kamapim, husat bai helpim yumi long kamap fri?

⁸ Dispela bikpela tok profet i stat long kamap tru bihain long Jisas i kirapim wok bilong em long graun. Taim Jisas i go long sinagog long asples bilong em long Nasaret, em i ritim dispela tok profet long ol Juda husat i bung pinis long sinagog. Jisas i kolim em yet insait long dispela tok profet na em i tok: “Spirit bilong Jehova i stap long mi, long wanem, em i bin makim mi long autim gutnius long ol rabisman. Na em i salim mi i kam bilong autim tok olsem ol man i stap kalabus ol i ken i go fri na ol aipas i ken lukluk, na ol man ol arapela i daunim ol, hevi bilong ol i ken pinis, na long autim tok long dispela haptaim bilong Jehova long belgut long ol man.” (Luk 4:16-19) Olsem wanem Jisas i truim dispela tok profet?

9. Long taim bilong Jisas, planti manmeri i laik kamap fri long wanem samting?

⁹ Long taim bilong Jisas, ol manmeri i stat long kisim fridom em Aisaia i bin tok profet long en. Jisas i kamapim klia dispela samting taim em i tok: “Dispela hap tok bilong Rait Holi nau yupela i harim, tude truim bilong en i kamap.” (Luk 4:21) Planti bilong ol manmeri husat i harim dispela tok, ol i laik kamap fri long wok bos bilong gavman Rom. Ating ol disaipel bilong Jisas tu i bin pilim olsem. Bikos 2-pela disaipel bilong em i bin tok: “Mipela i bin ting olsem dispela man em man bilong kisim bek Israel.” (Luk 24:13, 21) Tasol yumi save olsem Jisas i no kirapim ol disaipel long bikhet na sakim hatpela wok  bos bilong gavman Rom, nogat. Em i tokim ol olsem “ol samting bilong Sisar, givim long Sisar.” (Mat. 22:21) Orait olsem wanem Jisas i helpim ol manmeri long taim bilong em long kamap fri?

10. Jisas i helpim ol man long kamap fri long wanem samting?

¹⁰ Pikinini Bilong God i kam long helpim ol manmeri long kamap fri, o kisim fridom, long 2-pela rot. Namba 1: Jisas i helpim ol long kamap fri long olgeta bilip giaman bilong ol lida bilong lotu. Long dispela taim bipo, planti Juda i stap kalabus long ol kastam na ol bilip giaman. (Mat. 5:31-37; 15:1-11) Ol man husat i laik stiaim ol narapela long sait bilong bilip, i olsem ol yet i stap aipas. Taim ol i sakim Mesaia na ol i no laik kisim helpim em i givim long sait bilong bilip, i olsem ol i stap yet long tudak na ol i bihainim yet pasin bilong mekim rong. (Jon 9:1, 14-16, 35-41) Taim Jisas i skulim ol man long tok i tru na soim gutpela pasin ol i ken bihainim, em i helpim ol man i gat pasin daun long luksave olsem ol inap kamap fri long sait bilong bilip.—Mak 1:22; 2:23–3:5.

11. Jisas i helpim ol manmeri long kamap fri long wanem narapela rot?

¹¹ Namba 2: Jisas i helpim ol manmeri long kamap fri long sin ol i kisim long Adam. Jisas i givim laip bilong em olsem ofa, olsem na God inap fogivim sin bilong ol manmeri husat i bilip long dispela ofa. (Hib. 10:12-18) Jisas i tok: “Sapos Pikinini i mekim yupela i kamap fri, orait yupela bai stap fri tru.” (Jon 8:36) Dispela fridom i bikpela moa winim fridom em lain Israel i bin kisim long yia bilong Jubili! Maski man i kamap fri long yia bilong Jubili, em inap kamap sleiv gen, na bihain em bai dai, tasol fridom i kam long Jisas bai stap inap oltaim oltaim.

12. Husat ol i fes lain long kamap fri olsem Jisas i bin tokaut long en?

¹² Long de bilong Pentikos 33 C.E., Jehova i kapsaitim holi spirit long ol aposel na ol bilipman na bilipmeri, na long dispela rot em i anointim ol. Em i adoptim ol long kamap ol pikinini bilong em, olsem na ol inap kirap bek na i go mekim wok king wantaim Jisas long heven. (Rom 8:2, 15-17) Ol i fes lain long kamap fri olsem Jisas i bin tokaut long en taim em i ritim Rait Holi insait long sinagog bilong Nasaret. Ol dispela manmeri i no stap kalabus moa long ol bilip giaman na ol pasin nogut bilong ol lida bilong lotu Juda. Na tu, long ai bilong God i olsem ol i kamap fri long ol hevi bilong sin. Jubili bilong ol Kristen i kirap long yia 33 C.E. taim God i anointim ol disaipel bilong Krais, na dispela Jubili bai pinis bihain long Wan Tausen Yia bilong Jisas long mekim wok king.  Wanem samting bai kamap long pinis bilong Wan Tausen Yia?

13-14. Husat lain tu inap kisim fridom em Jisas i bin tokaut long en?

¹³ Long nau, planti milion manmeri bilong olgeta kantri i stap olsem “ol arapela sipsip.” (Jon 10:16) God i no makim ol long mekim wok king wantaim Jisas long heven. Ol i bilip long tok promis bilong Baibel olsem ol bai kisim laip oltaim long graun. Olsem wanem? Yu holim dispela bilip?

¹⁴ Long nau yet, yu wok long kisim sampela blesing em ol lain bilong go long heven i wok long kisim. Sapos yu bilip long ofa bilong Jisas, yu inap askim God long fogivim ol rong bilong yu. Long dispela rot, God bai orait long yu, na bel bilong yu bai i no gat tok. (Efe. 1:7; Rev. 7:14, 15) Tingim tu ol blesing yu kisim taim yu kamap fri long ol bilip giaman we i bin kalabusim yu inap planti yia. Jisas i tok: “Yupela bai save long tok i tru, na tok i tru bai mekim yupela i kamap fri.” (Jon 8:32) Yumi amamas tru long kisim dispela fridom!

15. Yumi bai kisim wanem fridom na blesing long bihain?

¹⁵ Yu ken bilip olsem yumi bai kisim bikpela moa fridom. Klostu nau, Jisas bai mekim bikpela wok bilong pinisim tru ol lotu giaman na ol gavman bilong graun. God  bai lukautim “bikpela lain manmeri” husat i mekim wok bilong em, na ol bai amamas long planti blesing taim dispela graun i kamap ples paradais. (Rev. 7:9, 14) Planti manmeri tru bai kirap bek na ol bai gat rot long kamap fri long olgeta hevi em sin bilong Adam i bin kamapim.—Apo. 24:15.

16. Olgeta lain man inap kisim wanem fridom long bihain?

¹⁶ Insait long Wan Tausen Yia, Jisas na ol wanwok bilong em bai helpim olgeta lain man long kamap gutpela olgeta long bodi na long sait bilong bilip. Ol manmeri bai kisim bikpela fridom long dispela haptaim, na em bai wankain olsem yia bilong Jubili bilong lain Israel. Olgeta manmeri long graun husat i stap gut long mekim wok bilong Jehova, ol bai kamap gutpela olgeta na lusim kalabus bilong sin.

17. Long tok profet bilong Aisaia 65:21-23, ol manmeri bilong God bai stap olsem wanem? (Lukim fran pes piksa.)

¹⁷ Wanpela tok profet i stori long laip bilong ol manmeri long graun bai i olsem wanem, na dispela tok i stap long Aisaia 65:21-23. (Ritim.) Long dispela taim, yumi no inap stap olsem ol lesman. Baibel i stori olsem long dispela taim, ol manmeri bilong God bai mekim gutpela wok i gat mining tru na i givim bel isi long ol. Yumi ken bilip tru olsem long pinis bilong Wan Tausen Yia, “olgeta samting God i bin wokim bai lusim dispela kalabus bilong bagarap, na ol bai kisim dispela pasin bilong i stap fri i nambawan tru olsem bilong ol pikinini bilong God.”—Rom 8:21.

18. Wai na yumi ken bilip tru olsem yumi bai stap amamas tru long bihain?

¹⁸ Jehova i bin stretim rot na bai lain Israel i gat haptaim bilong wok na haptaim bilong malolo, na wankain samting bai kamap long ol manmeri bilong God long haptaim bilong Wan Tausen Yia. Bai i gat taim bilong mekim wok lotu. Yumi save stap amamas taim yumi lotuim God, na long nupela taim tu, yumi bai kisim amamas long lotuim God. Yes, yumi ken bilip tru olsem insait long haptaim bilong Wan Tausen Yia, olgeta lain man bai amamas tru long gutpela wok ol i mekim, na tu, ol bai amamas tru long wok ol i mekim long sait bilong lotu.