Lo 22:25-27 i kamapim klia risen na man i gat asua. Na tu, dispela lo i soim klia risen na meri i no gat asua. Yumi ken skelim gut dispela lo.

Ol ves paslain i stori long wanpela man i bungim wanpela meri “long taun” na i slip wantaim em; ol i bin makim dispela meri long maritim narapela man. Long ai bilong ol manmeri, dispela meri i marit pinis, olsem na dispela man i gat asua long mekim pasin adaltri. Olsem wanem long meri? “Em i no bin singaut bikmaus long taun.” Sapos meri i bin singaut, ol narapela bai harim na helpim em. Tasol em i no singaut bikmaus. Olsem na meri tu i gat asua long mekim pasin adaltri; tupela wantaim i gat asua.—Lo 22:23, 24.

Orait, Lo i stori long narapela sait bilong dispela hevi, olsem: “Sapos wanpela man i bungim meri ol i bin makim bilong maritim narapela man long sampela hap ausait long taun na em i holimpasim strong dispela meri na slip wantaim em, orait yupela i mas kilim i dai dispela man, tasol yupela i no ken mekim wanpela samting long dispela meri. Dispela meri i no bin mekim wanpela sin we i stret long em i mas i dai. Dispela keis i wankain olsem wanpela man i paitim narapela man na kilim em i dai. Dispela man i bin bungim dispela meri long wanpela ples ausait long taun, na dispela meri i bin singaut bikmaus, tasol i no gat man i stap bilong helpim em.”—Lo 22:25-27.

Taim kain hevi olsem i kamap, ol jas i save bilipim stori bilong meri. Wai? Long tingting bilong ol jas, ating meri i bin “singaut bikmaus, tasol i no gat man i stap bilong helpim em.” Olsem na meri i no gat asua long mekim pasin adaltri. Tasol man bai i gat asua long reip na pasin adaltri bikos em i “holimpasim strong dispela meri na slip wantaim em,” em meri ol i bin makim long maritim narapela man.

Dispela lo i soim klia olsem meri i no gat asua, tasol man i gat asua long reipim meri na mekim pasin adaltri. Yumi ken bilip tru olsem ol jas i “painimaut gut” long olgeta samting i kamap, na ol i mekim disisen i stret wantaim lo em God i bin tokaut klia long en inap planti taim.—Lo 13:14; 17:4; Kis. 20:14.