1. Ol manmeri i holim wanem kain tingting long wok?

LONG ples yu stap long en, ol manmeri i holim wanem kain tingting long pasin bilong wok? Long planti kantri, ol manmeri i wok hat moa na ol i lusim bikpela haptaim long wok. Taim ol i wok hat tumas, ol i no gat taim bilong malolo, o lusim sampela haptaim long stap wantaim ol wanfamili, o kisim save long God. (Ekl. 2:23) Sampela manmeri i no laik tru long wok, na ol i save givim kain kain eskius.—Prov. 26:13, 14.

2-3. Jehova na Jisas i soim wanem gutpela eksampel long pasin bilong wok?

² Ol manmeri i holim kain kain tingting long pasin bilong wok, na tingting bilong ol i no wankain long tingting bilong Jehova na Jisas. Yumi save olsem Jehova em Man bilong wok. Jisas i tokaut long dispela samting na em i tok: “Papa bilong mi i wok i stap i kam inap long nau, na mi tu mi wok i stap.” (Jon 5:17) Tingim olgeta wok God i bin mekim taim em i wokim planti tausen ensel na ol sta na olgeta samting long ples antap. Na tu, yumi lukim planti naispela samting God i wokim long graun bilong yumi. Olsem na i stret tru long man bilong raitim song i tok: “O Jehova, yu bin wokim planti samting! Yu gat savetingting na yu wokim olgeta dispela samting. Ol samting yu bin wokim i pulap tru long graun.”—Sng. 104:24.

³ Jisas i bihainim pasin bilong Papa. Em i helpim wok taim God i mekim wok bilong “redim skai.” Em i stap wantaim Jehova “olsem wanpela saveman bilong wok.” (Prov. 8:27-31) Bihain tru, taim Jisas i stap long graun, em i mekim gutpela wok tru. Dispela wok i olsem kaikai bilong em, na i soim klia olsem God i bin salim em i kam.—Jon 4:34; 5:36; 14:10.

4. Yumi inap kisim wanem skul long Jehova na Jisas long pasin bilong malolo?

 ⁴ Jehova na Jisas i save mekim planti wok, olsem na yu ting dispela i makim olsem yumi no gat nid long malolo? Nogat, i no olsem. Jehova i no save pilim taiet, olsem na em i no gat nid long malolo. Baibel i tok bihain long Jehova i wokim ol samting long ples antap na ol samting long graun, “em i stop long wok na em i malolo.” (Kis. 31:17) Dispela i makim olsem Jehova i kisim amamas long lukim ol samting em i bin wokim. Taim Jisas i stap long graun, em i bin mekim planti wok, tasol em i makim taim bilong malolo na kaikai wantaim ol pren bilong em.—Mat. 14:13; Luk 7:34.

5. Wanem samting i putim hevi long ol manmeri bilong God?

⁵ Baibel i kirapim ol manmeri bilong God long kisim amamas long mekim wok. Ol i mas i gat pasin bilong wok, na ol i no ken stap olsem lesman. (Prov. 15:19) Ating yu mekim wok mani na bai yu inap lukautim famili bilong yu. Olgeta disaipel bilong Krais i mas mekim wok bilong autim gutnius. Maski i olsem, yu mas kisim sampela malolo. Tasol olsem wanem? Sampela taim yu pilim olsem yu sot long taim bilong mekim wok mani, autim tok, na malolo? Hau bai yumi inap save long skel bilong haptaim yumi ken lusim long wok na haptaim yumi ken lusim long kisim malolo?

6. Olsem wanem Mak 6:30-34 i soim olsem Jisas i holim stretpela tingting long wok na malolo?

⁶ Em i bikpela samting long yumi mas holim stretpela tingting long wok. King Solomon i tok: “I gat taim bilong . . . mekim olgeta wok.” Em i tok i gat taim bilong krai, lap, danis, planim kaikai, sanapim haus, na mekim ol narapela wok. (Ekl. 3:1-8) Tupela bikpela samting long laip em pasin bilong wok na malolo. Jisas i bin holim stretpela tingting long wok na malolo. Wanpela taim ol aposel i bisi tru long autim tok, olsem na “ol i no gat taim bilong kaikai.” Jisas i tok: “Yupela tasol kam wantaim mi long wanpela hap i no gat man na malolo liklik.” (Ritim Mak 6:30-34.) Maski sampela taim Jisas na ol disaipel i no gat taim bilong malolo, em i save olsem ol i mas malolo.

7. Taim yumi skelim ol samting i save kamap long Sabat, hau bai dispela i helpim yumi?

⁷ Sampela taim, yumi mas malolo o senisim ol samting yumi save mekim. Dispela i kamap klia long rot bilong wanpela samting God i bin tokim lain bilong em long bipo long tingim—Sabat bilong olgeta wik. Yumi no stap aninit long Lo Bilong Moses, tasol em gutpela long skelim ol samting i save kamap long Sabat. Dispela bai helpim yumi long skelim tingting bilong yumi yet long wok na malolo.

8. Olsem Kisim Bek 31:12-15 i kamapim, de Sabat em bilong mekim wanem?

⁸ Baibel i stori olsem God i wokim ol samting long graun insait long 6-pela “de,” na bihain em i malolo. (Stt. 2:2) Tasol Jehova i save amamas long wok, olsem na em “i wok [yet] i stap” long mekim ol narapela samting. (Jon 5:17) De malolo bilong Sabat i wankain long de bilong Jehova long malolo olsem Buk Stat i stori long en. God i tok Sabat i stap olsem wanpela sain namel long em na lain Israel. Em de bilong “malolo na i holi long Jehova.” (Ritim Kisim Bek 31:12-15.) Lo i tambuim olgeta lain long mekim wok long de Sabat, na dispela i makim olgeta manmeri, pikinini, sleiv, na ol animal. (Kis. 20:10) Dispela i opim rot bilong  ol manmeri long tingim gut moa pasin bilong lotuim God.

9. Long taim bilong Jisas, ol man i holim wanem tingting kranki long de Sabat?

⁹ De Sabat em bilong helpim ol manmeri bilong God, tasol planti lida bilong lotu long taim bilong Jisas i no holim stretpela tingting. Ol i tok, long de Sabat i tambu long kisim wit na oraitim ol sikman. (Mak 2:23-27; 3:2-5) Ol dispela tingting i no stret wantaim tingting bilong God, na Jisas i tokaut klia long dispela samting long ol manmeri husat i putim yau long em.

10. Long Matyu 12:9-12, yumi inap kisim wanem skul long tingting bilong Jisas long de Sabat?

¹⁰ Jisas na ol manmeri bilong lain Juda em ol i disaipel bilong em, ol i tingim Sabat bikos ol i stap aninit long Lo Bilong Moses. * Toktok bilong Jisas na ol samting em i mekim i soim olsem i no gat rong long mekim ol gutpela samting long de Sabat. Em i tokaut klia olsem: “I stret long mekim gutpela samting long de Sabat.” (Ritim Matyu 12:9-12.) Long tingting bilong em, i no gat rong long mekim ol gutpela pasin na gutpela wok long de Sabat. Ol samting Jisas i mekim i kamapim klia bikpela risen bilong de Sabat. Ol manmeri bilong God i no inap mekim wok, olsem na ol inap tingim gut wok lotu. Jisas i kamap bikpela insait long famili em ol i yusim de Sabat long strongim pasin bilong ol long i go klostu moa long God. Baibel i stori long samting Jisas i mekim  taim em i go long ples bilong em long Nasaret: “Olsem em i save mekim long de Sabat, em i go insait long sinagog, na em i sanap long ritim Rait Holi.”—Luk 4:15-19.

11. Olsem wanem Jisas i stap gutpela piksa long pasin bilong wok?

¹¹ Josep i stap olsem waspapa bilong Jisas, na yumi inap tok em i holim wankain tingting olsem God long pasin bilong wok, olsem na em i skulim Jisas long wok kapenta. (Mat. 13:55, 56) Ating Jisas i lukim Josep i wok hat long olgeta de na bai em inap kisim mani bilong lukautim famili. Bihain Jisas i tokim ol disaipel: “I stret wokman i kisim pe bilong em.” (Luk 10:7) Yes, Jisas i save pinis long pasin bilong wok hat.

12. Wanem ol skripsa i kamapim stretpela tingting yumi mas holim long pasin bilong wok?

¹² Aposel Pol tu em man bilong wok hat. Em i mekim bikpela wok bilong skulim ol man long Jisas na ol tok Jisas i bin skulim ol man long en. Maski i olsem, Pol i mekim wok bilong kisim mani bilong lukautim em yet. Ol Kristen long Tesalonaika i save long pasin bilong em long “hatwok na taitim bun tru” long mekim wok “long san na long nait” na bai em “i no ken putim hevi” long ol narapela. (2 Tes. 3:8; Apo. 20:34, 35) Ating Pol i tingim wok bilong em long samapim haus sel. Taim em i go long Korin, em i stap wantaim Akwila na Prisila na “wok wantaim [ol]” na “ol i save wokim ol haus sel.” Baibel i tok Pol i wok “long san na long nait,” tasol dispela i no makim olsem em i save wok tasol, nogat. Em i save malolo, kain olsem long de Sabat. Olsem na em inap autim tok long lain Juda, em ol tu i no wok long de Sabat.—Apo. 13:14-16, 42-44; 16:13; 18:1-4.

13. Eksampel bilong Pol inap givim wanem skul long yumi?

¹³ Aposel Pol i soim gutpela pasin yumi inap bihainim. Em i mas mekim wok mani, tasol oltaim em “insait long wok bilong autim gutnius bilong God.” (Rom 15:16; 2 Kor. 11:23) Em i kirapim ol narapela tu long autim tok long olgeta taim. Akwila na Prisila i stap olsem ol “wanwok bilong [em] long mekim wok bilong Krais Jisas.” (Rom 12:11; 16:3) Pol i strongim ol Kristen long Korin long tingim olsem “oltaim [ol] i mas bisi long mekim planti wok bilong Bikpela.” (1 Kor. 15:58; 2 Kor. 9:8) Na tu, Jehova i stiaim aposel Pol long raitim dispela tok: “Sapos man i no laik wok, orait em i no ken kaikai.”—2 Tes. 3:10.

14. Wanem mining bilong tok bilong Jisas long Jon 14:12?

¹⁴ Nambawan bikpela wok nau long dispela haptaim bilong las de em wok bilong autim tok na kamapim ol disaipel. Jisas i bin tok profet olsem ol disaipel bilong em bai mekim ol wok i bikpela moa winim wok em i bin mekim! (Ritim Jon 14:12.) Tok bilong em i no makim olsem yumi tu bai wokim ol mirakel olsem em i bin mekim, nogat. Taim yumi autim tok na skulim ol man, yumi bai mekim dispela wok long bikpela teritori moa, helpim planti manmeri moa, na mekim dispela wok inap longpela taim moa.

15. Yumi mas givim wanem ol askim long yumi yet? Bilong wanem?

¹⁵ Sapos yu mekim wok mani, askim yu yet olsem: ‘Ol lain long ples wok i save olsem mi man o meri bilong wok hat? Mi save givim bel tru long mekim wok na pinisim wok long taim stret?’ Sapos yu tok yes long dispela tupela askim, bosman bilong yu long ples wok bai trastim yu. Ol wanwok bilong yu bai amamas long putim yau taim yu autim tok bilong Kingdom. Taim yu  skelim wok bilong yu long autim tok na skulim ol man, askim yu yet olsem: ‘Mi gat nem olsem man o meri bilong givim bel long autim tok? Mi save redi gut paslain long mi go lukim ol gobek? Mi save go bek kwiktaim long stori wantaim ol man i amamas long putim yau? Mi save insait oltaim long mekim wok autim tok?’ Sapos yu bekim yes long ol dispela askim, yu bai kisim amamas long wok autim tok bilong yu.

16. Olsem wanem tingting bilong Jisas na ol aposel i no wankain long tingting bilong planti manmeri long nau long pasin bilong malolo?

¹⁶ Jisas i save olsem sampela taim em na ol aposel i mas malolo. Tasol planti manmeri long bipo na long nau tu i olsem maniman long tok piksa bilong Jisas. Dispela man i tokim em yet olsem: “Mi ken stap isi, kaikai, dring, na amamas.” (Luk 12:19; 2 Tim. 3:4) Em i tingting tasol long malolo na kisim amamas. Tasol Jisas na ol aposel i no tingting tasol long amamasim ol yet.

17. Taim yumi pinis long wok, yumi save mekim wanem long haptaim i stap yet?

¹⁷ Long nau, yumi traim long bihainim pasin bilong Jisas, olsem na taim yumi pinis long wok, yumi no tingting tasol long malolo, nogat. Yumi yusim haptaim bilong yumi yet long autim tok na go long ol miting. Wok bilong kamapim disaipel na go long miting em bikpela samting tru long yumi, olsem na oltaim yumi mekim ol dispela samting. (Hib. 10:24, 25) Maski yumi malolo na yumi raun i go long narapela hap, yumi bihainim yet pasin bilong i go long miting maski yumi go long wanem ples, na yumi painim rot bilong autim tok long ol manmeri yumi bungim.—2 Tim. 4:2.

18. Krais Jisas, em King bilong yumi, i laik bai yumi mekim wanem?

¹⁸ Yumi pilim tru gutpela pasin bilong Krais Jisas, em King bilong yumi. Em i laik bai yumi holim stretpela tingting long wok na malolo! (Hib. 4:15) Em i laik bai yumi malolo taim bodi bilong yumi i pilim taiet. Na tu, em i laik bai yumi wok hat long mekim wok bilong lukautim yumi yet na mekim tu gutpela wok bilong kamapim ol disaipel. Long neks atikol, yumi bai stori long wok Jisas i mekim bilong helpim yumi long lusim wanpela kalabus nogut.