1-2. Olsem ekspiriens bilong Angelito i kamapim, yumi olgeta wan wan i mas mekim wanem?

OLSEM WANEM? Papamama bilong yu ol i Witnes Bilong Jehova? Sapos olsem, dispela i no makim olsem yu kisim pinis pasin bilong pas gut wantaim Jehova, nogat. Maski papamama i mekim wok bilong God o nogat, yumi olgeta wan wan i mas mekim sampela samting na bai yumi inap kamap pren bilong Jehova.

² Tingim ekspiriens bilong wanpela brata, nem bilong em Angelito. Em i kamap bikpela insait long wanpela Witnes famili. Taim em i stap tineja, em i pilim olsem em i no pas gut wantaim God. Em i tok: “Mi mekim wok bilong Jehova bikos mi laik bihainim famili bilong mi.” Tasol bihain Angelito i lusim sampela haptaim long ritim Tok Bilong God na tingim tingim ol dispela tok, olsem na em i kisim pasin bilong beten oltaim long Jehova. Dispela i givim wanem skul long em? Angelito i tok: “Mi luksave olsem mi mas save gut long Papa bilong mi, Jehova, na long dispela rot tasol mi inap i go klostu long em.” Ekspiriens bilong Angelito i kirapim yumi long tingim sampela bikpela askim: Olsem wanem pasin bilong kisim save long Jehova i narapela kain long pasin bilong save gut long em? Olsem wanem yumi inap save gut long Jehova?

3. Olsem wanem pasin bilong kisim save long Jehova i narapela kain long pasin bilong save gut long em?

³ Taim yumi lain long nem bilong God, o sampela tok em i bin autim, o sampela samting em i bin mekim, yumi inap tok olsem yumi kisim save long Jehova. Tasol yumi mas mekim  sampela samting moa na bai yumi inap save gut long em. Yumi mas lusim sampela haptaim long kisim save long Jehova na ol naispela pasin bilong em. Long dispela rot, yumi inap kliagut long risen bilong ol tok em i autim na ol samting em i mekim. Dispela bai helpim yumi long save olsem God i orait long ol tingting, disisen, na pasin bilong yumi, o nogat. Taim yumi save long ol samting Jehova i laik bai yumi mekim, orait yumi mas mekim ol dispela samting.

4. Taim yumi skelim ol eksampel long Baibel, hau bai dispela i helpim yumi?

⁴ Sampela man inap tok bilas long yumi taim yumi laik mekim wok bilong Jehova, na ol inap birua long yumi taim yumi bung wantaim ol manmeri bilong God. Tasol sapos yumi trastim Jehova, em bai i no inap givim baksait long yumi. Taim yumi trastim God, dispela bai strongim pasin pren bilong yumi wantaim em, na dispela pasin pren bai i stap oltaim. Yu ting yumi inap save gut long Jehova na pas gut wantaim em? Yes, yumi inap mekim olsem! Eksampel bilong Moses na King Devit i soim klia olsem yumi inap save gut long God. Taim yumi skelim stori bilong ol, yumi bai kisim bekim bilong 2-pela askim: Olsem wanem ol inap save gut long Jehova? Yumi inap kisim wanem skul long eksampel bilong ol?

5. Moses i bin mekim wanem disisen?

⁵ Moses i mekim wok bilong God. Taim Moses i gat 40 krismas samting, em i mekim disisen long bung wantaim lain Hibru, em ol manmeri bilong God, na em i no laik bai ol man i kolim em olsem “pikinini bilong Fero.” (Hib. 11:24) Moses i lusim biknem na namba em i holim. Em i stap long sait bilong ol Hibru, em lain i mekim wok sleiv long Isip, na Fero inap belhat na mekim nogut long em bikos Fero i gat bikpela namba na strong na ol Isip i tingim em olsem wanpela god. Tasol Moses i gat strongpela bilip! Em i trastim Jehova. Dispela i strongim pasin pren bilong em wantaim God, na dispela pasin pren bai i stap oltaim.—Prov. 3:5.

6. Yumi inap kisim wanem skul long eksampel bilong Moses?

⁶ Yumi inap kisim wanem skul? Wankain olsem Moses, yumi olgeta i gat disisen long mekim: Yumi bai mekim wok bilong God na bung wantaim ol manmeri bilong em, o nogat? Ating yumi mas daunim sampela laik bilong yumi yet na mekim wok bilong God, na yumi ekspektim pasin birua long han bilong ol man husat i no save long Jehova. Tasol sapos yumi trastim Papa bilong yumi long heven, yumi ken bilip tru olsem em bai sambai long yumi!

7-8. Moses i no stop long kisim save long wanem samting?

⁷ Moses i no stop long kisim save long ol pasin bilong Jehova, na em i mekim laik bilong God. Taim Jehova i tokim Moses long lidim lain Israel na lusim kalabus long Isip, Moses i pret na planti taim em i tokim God olsem em i no fit long mekim dispela wok. God i soim bikpela pasin sori, na em i helpim Moses. (Kis. 4:10-16) Olsem na Moses inap autim ol strongpela tok long Fero. Moses i lukim hau Jehova i yusim bikpela pawa bilong em long kisim bek lain Israel na bagarapim na pinisim Fero na lain ami bilong em long Solwara Retsi.—Kis. 14:26-31; Sng. 136:15.

⁸ Moses i lidim lain Israel na ol i lusim Isip, tasol oltaim ol i komplein long ol liklik samting. Jehova i stap isi na em i no les kwik long lain Israel—Em i bin kisim bek ol long wok sleiv. (Sng. 78:40-43) Moses i  lukim tu olsem Jehova i soim pasin daun tru taim Em i bihainim laik bilong Moses na senisim tingting bilong Em.—Kis. 32:9-14.

9. Hibru 11:27 i stori olsem wanem long pasin pren namel long Moses na Jehova?

⁹ Bihain long lain Israel i lusim Isip, Moses i pas gut tru wantaim Jehova na i olsem em inap lukim Papa bilong em long heven. (Ritim Hibru 11:27.) Olsem na Baibel i tok: “Jehova i save toktok wantaim Moses olsem man i save toktok wantaim narapela man.”—Kis. 33:11.

10. Sapos yumi laik save gut long Jehova, yumi mas mekim wanem?

¹⁰ Yumi inap kisim wanem skul? Sapos yumi laik save gut long Jehova, yumi mas kisim save long ol pasin bilong em, na tu, yumi mas mekim laik bilong em. Long nau, Jehova i laik “kisim bek olgeta kain man na em i laik bai ol i kisim stretpela save long tok i tru.” (1 Tim. 2:3, 4) Wanpela rot bilong mekim laik bilong God em olsem, yumi mas skulim ol narapela long Jehova.

11. Taim yumi skulim ol narapela long Jehova, olsem wanem yumi yet inap save gut moa long em?

¹¹ Taim yumi skulim ol narapela long Jehova, yumi yet bai save gut moa long em. Yumi luksave long pasin sori bilong Jehova taim em i stiaim yumi go long ol manmeri i gat gutpela bel. (Jon 6:44; Apo. 13:48) Taim yumi stadi wantaim ol manmeri na ol i lusim ol pasin nogut na kisim ol nupela pasin, dispela i helpim yumi long luksave olsem Tok Bilong God i gat pawa. (Kol. 3:9, 10) Rot i op yet long ol manmeri long kisim save long God na bai em inap kisim bek ol, na dispela i soim klia olsem God i no les kwik.—Rom 10:13-15.

12. Olsem Kisim Bek 33:13 i kamapim, Moses i askim long wanem samting? Wai?

¹² Moses i tingim pasin pren bilong em wantaim Jehova olsem samting i dia tumas. Moses i mekim ol strongpela wok long nem bilong God, tasol long pasin rispek em i kamapim askim bilong em long save gut moa long Jehova. (Ritim Kisim Bek 33:13.) Long dispela taim, Moses i winim pinis 80 krismas, tasol em i save olsem i gat planti samting moa em i mas lainim long Papa bilong em long heven.

13. Wanem wanpela rot bilong soim olsem yumi tingim tru pasin pren bilong yumi wantaim God?

¹³ Yumi inap kisim wanem skul? Maski yumi mekim wok bilong Jehova inap planti yia pinis, yumi no ken ting olsem pasin pren bilong yumi wantaim God em samting nating. Sapos yumi tingim tru dispela pasin pren, yumi bai toktok wantaim God long rot bilong beten.

14. Wai na beten em i bikpela samting bilong helpim yumi long kisim sampela save moa long God?

¹⁴ Sapos yu laik pas gut moa wantaim pren bilong yu, orait oltaim yu mas toktok wantaim em. Olsem tasol, oltaim yu mas beten long God na no ken pret long autim ol tingting tru i stap long bel bilong yu. (Efe. 6:18) Krista em wanpela sista i stap long Teki, na em i tok: “Taim mi beten na autim tingting bilong mi na mi luksave long hau Jehova i helpim mi, dispela i strongim moa yet pasin bilong mi long laikim na trastim em. Mi luksave long ol samting Jehova i mekim bilong bekim ol beten bilong mi, na dispela i helpim mi long tingim Jehova olsem Papa na Pren bilong mi.”

15. Jehova i stori olsem wanem long pasin bilong King Devit?

¹⁵ King Devit i bon insait long lain em ol i dediket long God Jehova. Tasol Devit i no bihainim nating pasin bilong famili bilong em long mekim lotu. Devit i mekim ol  samting bilong strongim pasin pren bilong em wantaim God, na Jehova i laikim em tru. Jehova i kolim Devit olsem “man i save mekim ol samting i stret wantaim ol tingting i stap long bel bilong [Em].” (Apo. 13:22) Devit i mekim wanem na bai em inap i go klostu long Jehova?

16. Taim Devit i lukim kriesen, dispela i givim wanem save long em long Jehova?

¹⁶ Devit i lukim kriesen na dispela i givim save long em long Jehova. Taim Devit i stap yangpela yet, em i lusim bikpela haptaim long stap ausait na lukautim ol sipsip bilong Papa. Ating long dispela taim, em i stat long tingim tingim ol samting Jehova i bin wokim. Taim Devit i lukluk i go antap long skai long nait, em i lukim planti tausen sta, na tu, em i luksave long ol pasin bilong Man i bin wokim ol sta. Olsem na Devit i tok: “Skai i tokaut long biknem bilong God; olgeta samting i stap long skai i tokaut long ol samting em i bin wokim long han bilong em.” (Sng. 19:1, 2) Taim Devit i skelim hau Jehova i bin wokim ol manmeri, em i luksave olsem savetingting bilong God i nambawan tru. (Sng. 139:14) Taim Devit i kisim sampela save moa long ol samting Jehova i bin wokim, em i luksave olsem savetingting bilong God i antap moa na i winim tru tingting bilong em.—Sng. 139:6.

17. Yumi inap kisim wanem skul taim yumi tingim tingim kriesen?

¹⁷ Yumi inap kisim wanem skul? Yumi mas amamas long lukim kriesen. Dispela graun i gat planti naispela samting em Jehova i bin wokim, olsem na yumi mas amamas tru long ol dispela samting! Long olgeta de, tingim tingim olsem wanem kriesen—ol diwai na plaua, ol animal, na ol manmeri—i givim save long yu long Jehova. Long olgeta wan wan de, yu bai kisim planti moa save long gutpela Papa bilong yu. (Rom 1:20) Na long olgeta de, pasin bilong yu long laikim God bai kamap strong moa.

18. Olsem Buk Song sapta 18 i kamapim, Devit i luksave long wanem samting?

¹⁸ Devit i luksave olsem Jehova i helpim em. Taim Devit i lukautim ol sipsip bilong Papa, laion na bea i no bagarapim ol, na Devit i luksave olsem Jehova i bin helpim em long kilim ol dispela strongpela wel animal. Taim Devit i pait na daunim Goliat, em strongpela soldia, em i luksave olsem Jehova i helpim em. (1 Sml. 17:37) Taim King Sol i jeles na Devit i ranawe, Devit i luksave olsem Jehova yet i bin kisim em bek. (Sng. 18, supaskripsen) Sapos Devit i gat pasin antap, em bai pilim olsem em i mekim olgeta dispela samting long strong bilong em yet. Tasol Devit i gat pasin daun, olsem na em i luksave olsem Jehova i bin helpim em.—Sng. 138:6.

19. Yumi inap kisim wanem skul long eksampel bilong Devit?

¹⁹ Yumi inap kisim wanem skul? Yumi mas askim Jehova long helpim yumi, na yumi mas mekim sampela samting moa. Yumi mas luksave long wanem taim em i helpim yumi na hau em i givim helpim. Pasin daun bai helpim yumi long luksave olsem yumi no gat strong long mekim olgeta samting, olsem na Jehova i save helpim yumi long mekim ol dispela samting. Taim yumi luksave long hau Jehova i helpim yumi, pasin bilong yumi long pas gut wantaim em bai kamap strong moa. Isaac em wanpela brata long Fiji, na em i bin mekim wok bilong Jehova inap planti yia. Em i tok: “Taim mi tingim bek laip bilong mi, mi inap luksave long hau Jehova i bin helpim mi kirap long taim mi stadi long Baibel na i kam inap long nau. Olsem na mi bilip tru olsem Jehova em Man i stap tru.”

20. Yumi inap kisim wanem skul long pasin bilong Devit long pas gut wantaim God?

 ²⁰ Devit i bihainim ol pasin bilong Jehova. Jehova i wokim yumi na em inapim yumi wantaim save bilong bihainim ol pasin bilong em. (Stt. 1:26) Taim yumi kisim sampela save moa long ol pasin bilong Jehova, dispela bai helpim yumi long bihainim gut ol pasin bilong em. Devit i save gut tru long Papa bilong em long heven, olsem na em i bihainim pasin bilong Papa long olgeta samting em i mekim long ol narapela. Tingim wanpela eksampel. Devit i mekim sin long Jehova taim em i mekim pasin adaltri wantaim Batseba na kilim man bilong Batseba i dai. (2 Sml. 11:1-4, 15) Tasol Jehova i marimari long Devit bikos em tu i bin marimari long ol narapela. Devit i pas gut tru wantaim Jehova, olsem na lain Israel i laikim tru Devit taim em i stap king, na Jehova i yusim eksampel bilong Devit long givim skul long ol narapela king bilong Israel.—1 Kin. 15:11; 2 Kin. 14:1-3.

21. Olsem Efesus 4:24 na 5:1 i kamapim, wanem ol gutpela samting bai kamap taim yumi “bihainim pasin bilong God”?

²¹ Yumi inap kisim wanem skul? Yumi mas “bihainim pasin bilong God.” Taim yumi mekim olsem, yumi helpim yumi yet, na tu, yumi inap save gut long God. Taim yumi bihainim ol pasin bilong God, yumi soim klia olsem yumi ol pikinini bilong em.—Ritim Efesus 4:24; 5:1.

22-23. Jehova bai mekim wanem sapos yumi bihainim skul yumi kisim long em?

²² Olsem yumi skelim pinis, yumi inap kisim save long Jehova long rot bilong kriesen na tok bilong em long Baibel. Long Baibel, yumi inap kisim skul long planti eksampel bilong ol wokman bilong God husat i gat strongpela bilip, olsem Moses na Devit. Jehova i givim ol samting yumi nidim bilong kisim save long em. Olsem na yumi yet i mas wok strong long kisim helpim long rot bilong ol samting em i givim.

²³ Oltaim yumi bai kisim save long Jehova. (Ekl. 3:11) Yumi bai kisim planti save, tasol yumi mas yusim gut save yumi kisim. Sapos yumi bihainim skul yumi kisim na yumi kamapim ol pasin bilong Papa, Em bai wok yet long kam klostu long yumi. (Jems 4:8) Long rot bilong Baibel, em i tok promis olsem em bai no inap tru long givim baksait long ol man i painim em.