Nogat. Taim Satan i tokim Iv long kaikai prut bilong diwai em God i tambuim, em i no tok olsem bodi bilong Iv bai dai na wanpela hap bilong bodi em ol man i no inap lukim long ai, em bai stap laip yet long narapela hap, nogat. Long rot bilong snek, Satan i tok sapos Iv i kaikai prut bilong dispela diwai, “tru tumas, [em] i no inap i dai.” I olsem Satan i tok Iv bai stap laip yet na stap amamas moa, na em bai no nidim God long stiaim em.—Stt. 2:17; 3:3-5.

Olsem na sapos dispela bilip giaman bilong tewel i no save dai i no bin kamap long Gaden Iden, orait wanem taim dispela bilip i kamap? Yumi no save long wanem taim stret dispela bilip i kamap. Tasol yumi save olsem olgeta lotu giaman i pinis bihain long Bikpela Tait long taim bilong Noa. I no gat wanpela bilip giaman i bin stap bihain long Bikpela Tait bikos Noa na famili bilong em, ol tasol i abrusim bagarap, na em ol lain i mekim lotu i tru.

Ating dispela bilip olsem ol man i gat tewel i no save dai i kamap bihain long taim bilong Bikpela Tait. Taim God i paulim tokples bilong ol manmeri long Babel na ol manmeri i go nabaut long “olgeta hap bilong graun,” ol i bringim tu dispela bilip giaman olsem ol man i gat tewel i no save dai. (Stt. 11:8, 9) Maski dispela bilip i kamap long wanem taim, yumi save olsem Satan, “papa bilong pasin giaman,” em yet i as bilong dispela bilip na em i amamas olsem dispela bilip i go long planti hap bilong graun.—Jon 8:44.