Yu ting yu inap bekim ol dispela askim i kam long ol Wastaua bilong 2019?

Wanem mining bilong dispela tok promis bilong God: “I no gat wanpela samting bilong pait em ol i wokim bilong pait long yu inap bagarapim yu”? (Ais. 54:17)

Yumi ken bilip tru olsem God bai lukautim yumi na yumi no inap kisim bagarap long han bilong “ol hatpela bos i autim strong belhat bilong ol.” (Ais. 25:4, 5) Ol birua i no gat strong long stopim yumi long kisim blesing bilong i stap oltaim.—w19.01, p. 6-7.

Olsem wanem pasin God i mekim long lain Kenan na lain Israel i soim olsem em i no mekim wansait pasin?

God i givim strafe long ol manmeri i mekim olkain pasin sem o ol i mekim nogut tru long ol meri na ol pikinini. Em i blesim ol manmeri i bihainim tok bilong em na mekim fea pasin long narapela narapela.—w19.02, p. 22-23.

Yumi mas mekim wanem sapos yumi stap na wanpela i no wanbilip i beten?

Yumi ken stap isi na soim pasin rispek, tasol yumi no ken tok “amen” o holim han bilong narapela narapela. Yumi ken mekim beten bilong yumi yet long tingting.—w19.03, p. 31.

Olsem wanem pasin bilong abiusim pikinini em bikpela rong?

Man i abiusim pikinini em i mekim sin long pikinini, long kongrigesen, long gavman, na long God. Sapos lo bilong kantri i tok long ol i mas ripotim man i abiusim pikinini, orait ol elda i mas bihainim dispela lo.—w19.05, p. 9-10.

Olsem wanem yu inap senisim tingting bilong yu?

Rot bilong mekim: Toktok long Jehova long rot bilong beten. Tingim tingim tok bilong Baibel yu ritim, na skelim yu yet. Makim ol gutpela pren.—w19.06, p. 12.

Yumi ken mekim wanem bilong redi nau long ol birua bai mekim nogut long yumi?

Yumi mas strongim pasin bilong yumi long pas gut wantaim Jehova. Bilip tru olsem em i laikim yumi na em i no inap tru long givim baksait long yumi. Ritim Baibel long olgeta de na beten oltaim. Bilip tru olsem Kingdom bai kamapim ol blesing. Tingim tingim ol feiveret skripsa na ol song bilong givim biknem long God.—w19.07, p. 2-4.

Yumi ken mekim wanem na bai yumi inap helpim ol wanblut long kisim laip?

Em i bikpela samting long yumi mas pilim tingting bilong ol, soim gutpela pasin long ol, no ken les kwik long ol, na bihainim savetingting.—w19.08, p. 15-17.

Olsem wanem tok promis bilong Jisas long Matyu 11:28 i givim nupela strong long yumi?

Yumi gat ol gutpela Kristen ovasia, ol nambawan gutpela pren, na nambawan gutpela wok.—w19.09, p. 23.

Olsem wanem God inap givim yumi laik na strong bilong mekim ol samting? (Fili. 2:13)

Taim yumi ritim Tok Bilong God na tingim tingim, God inap kirapim laik bilong yumi long mekim wok bilong em na givim yumi strong long mekim wok. Em inap yusim holi spirit long mekim save bilong yumi i kamap gutpela moa.—w19.10, p. 21.

Yumi ken mekim wanem ol samting paslain long mekim wanpela bikpela disisen?

Faivpela rot em: Mekim gut wok painimaut. Beten long kisim savetingting. Skelim ol risen bilong yu. Tingim stret ol mak yu laik winim. Holim stretpela tingting.—w19.11, p. 27-29.

Taim Satan i toktok long Iv, yu ting em i kamapim bilip bilong tewel i no save dai?

Nogat. Satan i tokim Iv olsem em i no inap dai, na i no olsem bodi bilong Iv bai dai na wanpela hap bilong bodi bai stap laip yet long narapela hap, nogat. Olgeta bilip giaman i pinis bihain long Bikpela Tait. Ating dispela bilip i kamap paslain long God i paulim tokples bilong ol manmeri husat i wok long sanapim taua long Babel na salim ol i go nabaut.—w19.12, p. 15.