Jehova i kirapim lain Israel long kamap ol manmeri holi. Bilong strongim dispela tok, em i tokim ol olsem: “Yupela i no ken raun na mekim tok i krungutim gutnem bilong narapela man. Na yupela i no ken mekim samting we inap bagarapim laip bilong narapela man. Mi Jehova.”—Wkp. 19:2, 16.

Dispela tok “mekim samting we inap bagarapim” i kamapim mining stret bilong en long tok Hibru, tasol dispela tok i makim wanem? Wanpela buk bilong ol Juda we i stori long Buk Wok Pris, i tok: “Dispela hap bilong ves . . . em i no isi long kamapim mining stret bilong en bikos em i hatwok long save long mining tru bilong dispela tok Hibru we i makim ‘no ken sanap antap, klostu, o sait.’”

Sampela saveman i ting dispela ves i konek wantaim ves 15, we i tok: “Taim yupela i mekim kot, yupela i mas mekim stretpela kot. Yupela i no ken mekim wansait pasin long ol rabisman o helpim maniman long winim kot. Yupela i mas mekim stretpela kot na skelim ol man.” (Wkp. 19:15) Sapos olsem, orait tok i stap long ves 16 olsem no ken “mekim samting we inap bagarapim” narapela man inap makim olsem, lain bilong God i no ken bagarapim wanpela wanwok long sait bilong kot, wok bisnis, o long ol hevi insait long famili, na ol i no ken paulim ol samting bilong helpim ol yet. Em tru olsem yumi no ken mekim ol dispela samting, tasol i gat narapela rot long kliagut moa long tok i stap long ves 16.

Skelim kirap bilong dispela ves. God i kirapim lain bilong em long no ken raun na mekim tok i krungutim gutnem bilong narapela man. Tingim olsem, pasin bilong krungutim gutnem i no makim tasol pasin bilong tok baksait, tasol em tru olsem tok baksait tu inap kamapim ol hevi. (Prov. 10:19; Ekl. 10:12-14; 1 Tim. 5:11-15; Jems 3:6) Planti taim, man bilong krungutim gutnem bilong narapela em i save mekim ol tok we em i min long mekim bilong bagarapim gutnem bilong dispela man. Dispela kain man inap stap olsem giaman witnes bilong narapela, maski pasin em i mekim inap bagarapim laip bilong dispela man o meri. Tingim, ol man bilong krungutim gutnem i bin stap olsem ol giaman witnes na sutim tok long Nabot, olsem na ol i mekim pasin i no stret long em na stonim em. (1 Kin. 21:8-13) Yes, man bilong krungutim gutnem i ken mekim samting we inap bagarapim laip bilong narapela man, olsem tok i stap long namba tu hap bilong Wok Pris 19:16 i stori long en.

Na tu, wanpela man inap krungutim gutnem bilong narapela man bikos em i heitim dispela man. Long 1 Jon 3:15, Baibel i tok: “Olgeta man husat i heitim brata bilong ol, ol i kilman, na yupela i save olsem i no gat wanpela kilman i gat laip oltaim i stap long em.” Na tu, bihain long God i kolim tok i stap long ves 16, em i tok: “Yu no ken heitim brata bilong yu long bel bilong yu.”—Wkp. 19:17.

Olsem na narakain tok i stap long Wok Pris 19:16 i givim strongpela tok lukaut long ol Kristen. Yumi no ken holim tingting kranki na yumi no ken krungutim gutnem bilong narapela man. Sapos yumi no laikim wanpela o yumi bel nogut long em na nau dispela i kirapim yumi long “mekim samting we inap bagarapim” em, olsem krungutim gutnem bilong em, dispela inap soim klia olsem yumi heitim em. Ol Kristen i mas sakim tru dispela pasin.—Mat. 12:36, 37.