Yu bin ritim gut ol Wastaua bilong dispela yia? Orait, lukim sapos yu inap bekim ol dispela askim:

Hau tok bilong Jems 5:11 olsem Jehova “i gat pasin bilong sori tru na marimari” i strongim bel bilong yumi?

Yumi save olsem Jehova i gat pasin marimari, olsem na em i redi long fogivim ol rong bilong yumi. Na tu, tok bilong Jems 5:11 i strongim bel bilong yumi olsem God i gat pasin bilong sori tru na em i laik helpim yumi. Yumi ken bihainim pasin bilong em.​—w21.01, p. 21.

Wai na Jehova i putim wok bilong stap olsem het?

Pasin laikim i kirapim em long mekim olsem. Pasin bilong mekim wok olsem het i helpim famili bilong Jehova long i stap bel isi, na mekim ol samting i ron gut. Olgeta wan wan long famili husat i bihainim dispela arensmen i save long husat i mas mekim ol fainol disisen na husat i mas go pas long inapim ol dispela disisen.​—w21.02, p. 3.

Wai na ol Kristen i mas was gut taim ol i yusim ol fon samting long salim ol teks mesis?

Sapos wanpela i laik yusim ol fon samting long salim ol teks mesis, em i mas makim gut ol poroman bilong em. I hatwok long mekim olsem taim yumi laik bung wantaim wanpela bikpela grup we yumi bai salim ol teks mesis i go i kam. (1 Tim. 5:13) Narapela hevi we inap kamap em yumi inap kamapim ol stori i no tru na yusim kontek infomesen bilong ol bratasista long wok bisnis samting.​—w21.03, p. 31.

Wanem sampela risen God i larim Jisas i karim pen na hevi na dai?

Namba 1 risen Jisas i mas hangamap na dai long diwai pos em long kisim bek ol Juda em ol i stap long mak bilong bagarap. (Gal. 3:10, 13) Namba 2 risen em Jehova i trenim Jisas long mekim wok olsem Hetpris long bihain. Namba 3 risen em taim Jisas i stap gut long God i go inap long em i dai, em i pruvim olsem ol manmeri i ken stap gut long God maski ol bikpela traim i painim ol. (Jop 1:9-11)​—w21.04, p. 16-17.

Yu ken mekim wanem maski i hatwok long painim ol man taim yu autim tok?

Yu ken autim tok long ol haptaim we ol i stap long haus. Yu ken traim autim tok long narapela lokesen. Na tu, yu ken traim narapela rot bilong autim tok em long raitim pas.​—w21.05, p. 15-16.

Wanem mining bilong tok aposel Pol i mekim olsem: “Mi bihainim lo na long dispela rot mi kamap olsem man i dai pinis long sait bilong lo”? (Gal. 2:19)

Lo Bilong Moses i kamapim klia olsem yumi ol man i gat sin, na tu, dispela Lo i stiaim lain Israel i go long Krais. (Gal. 3:19, 24) Dispela Lo i stiaim Pol long bilip long Krais. Em risen na Pol i “kamap olsem man i dai pinis long sait bilong lo”; i no gat wok moa long em i bihainim dispela lo.​—w21.06, p. 31.

Hau Jehova i stap gutpela eksampel long yumi long pasin bilong sanap strong na karim hevi?

Jehova i karim hevi long Satan i bagarapim gutnem bilong em, planti i sakim em na wok bos bilong em, sampela pikinini bilong em i sakim em, ol tok giaman bilong Satan, ol hevi i painim ol wokman bilong em, ol gutpela pren bilong em i dai, ol man nogut i mekim nogut long ol manmeri, na ol man i bagarapim graun na ol samting God i wokim.​—w21.07, p. 9-12.

Hau Josep i stap gutpela eksampel long pasin bilong no ken les kwik?

Ol brata bilong Josep i mekim pasin i no stret long em. Taim em i stap long Isip, ol man i sutim tok giaman long em na em i stap kalabus inap planti yia.​—w21.08, p. 12.

Hagai 2:6-9, 20-22 i mekim wanem tok piksa long seksekim ol kantri?

Ol kantri i no amamas long wok bilong autim tok bilong Kingdom, tasol planti manmeri i amamas long kisim save long tok i tru. Klostu nau God bai seksekim ol kantri taim em i bagarapim ol.​—w21.09, p. 15-19.

Wai na yumi no ken givap long mekim wok autim tok?

Jehova i lukim yumi givim bel long mekim dispela wok, na em i amamas tru. Sapos yumi no givap o i no les kwik, yumi bai kisim laip oltaim.​—w21.10, p. 25-26.

Olsem wanem Wok Pris sapta 19 i helpim yumi long bihainim dispela tok kaunsel: “Yupela i mas kamap holi long olgeta wokabaut bilong yupela”? (1 Pita 1:15)

I luk olsem ol i kisim tok bilong dispela ves long Wok Pris 19:2. Sapta 19 i stori long planti eksampel long hau yumi ken bihainim tok bilong 1 Pita 1:15 long laip bilong yumi.​—w21.12, p. 3-4.