1-2. (a) God i tok wanem long 3-pela aposel bilong Jisas, na ol i mekim wanem? (b) Long dispela atikol, bai yumi stori long wanem samting?

BIHAIN long Pasova long 32 C.E., aposel Pita, Jems, na Jon i lukim wanpela narakain visen. Long wanpela maunten, ating em long Maunten Hermon, long ai bilong ol, bodi bilong Jisas i senis na i kamap narakain. “Pes bilong em i lait olsem san na klos bilong em i kamap waitpela olsem lait.” (Mat. 17:1-4) Klostu long pinis bilong dispela visen, ol dispela aposel i harim God i tok olsem: “Dispela em i Pikinini bilong mi, mi laikim em tumas na bel bilong mi i amamas long em. Harim tok bilong em.” (Mat. 17:5) Long laip olgeta bilong dispela 3-pela aposel, ol i kamapim klia olsem ol i bin harim tok bilong Jisas. Yumi tu i laik bihainim eksampel bilong ol.

² Long atikol paslain long dispela, yumi bin kisim save olsem bilong harim tok bilong Jisas na bihainim, yumi mas lusim sampela pasin yumi save mekim bipo. Long dispela atikol, yumi bai skelim 2-pela samting em Jisas i tok long yumi mas mekim.

3. Olsem Matyu 7:13, 14 i kamapim, yumi mas mekim wanem?

³ Ritim Matyu 7:13, 14. Long dispela ves, Jisas i tok i gat 2-pela rot, wanpela rot i “bikpela” na narapela rot i “liklik tru.” I no gat namba 3 rot. Yumi yet i mas makim wanem rot yumi laik wokabaut long en. Dispela em i bikpela disisen tru yumi mas mekim, long wanem, bilong kisim laip oltaim yumi mas wokabaut long wanpela bilong ol dispela rot.

4. Bai yu stori olsem wanem long “bikpela” rot?

⁴ Yumi mas tingim olsem dispela 2-pela rot i narapela narapela kain. Rot i “bikpela” em i isi long ol man i bihainim. Sori tru, planti manmeri i bihainim dispela rot na bihainim bikpela lain manmeri em ol i wokabaut long dispela rot. Ol i no luksave  olsem man i wok long kirapim ol manmeri long bihainim dispela rot em Satan, dispela Devil, na rot bilong em i bringim ol man i go long dai.—1 Kor. 6:9, 10; 1 Jon 5:19.

5. Sampela manmeri i mekim wanem ol senis bambai ol i ken luksave long rot i “liklik tru” na kirap wokabaut long en?

⁵ I gat narapela rot i no wankain long dispela “bikpela” rot, na dispela rot em i “liklik tru,” na Jisas i tok wan wan man tasol inap lukim dispela rot na bihainim. Wai? Bikos long neks ves, Jisas i givim tok lukaut long ol disaipel bilong em long ol profet giaman. (Mat. 7:15) Planti man i tok i gat planti tausen lotu, na klostu olgeta bilong ol dispela lotu i skulim ol man long tok i tru. I gat planti lotu, olsem na ol man i bel hevi o ol i konfius long wanem lotu i skulim ol man long tok i tru, na ol i no gat laik long painim rot i go long laip. Tasol ol man i ken painim dispela rot. Jisas i tok: “Sapos yupela i holimpas tok bilong mi, orait yupela i disaipel tru bilong mi, na yupela bai save long tok i tru, na tok i tru bai mekim yupela i kamap fri.” (Jon 8:31, 32) Mipela i laik tok amamas long yu olsem yu no bihainim dispela bikpela lain manmeri, nogat, yu painim tok i tru. Yu bin stadi gut long Tok Bilong God long kisim save long laik bilong em long yumi, na yu bin putim yau long ol tok Jisas i skulim ol man long en. Wanpela bilong ol samting yu lainim em olsem, yu kisim save olsem Jehova i laik bai yumi mas sakim ol tok em ol lotu giaman i skulim ol man long en, na sakim pasin bilong selebretim ol bikpela holide em lotu haiden i as bilong en. Na tu, yu bin kisim save olsem bilong mekim ol samting Jehova i laik yu mas mekim, na lusim ol pasin bilong dispela graun em Jehova i no orait long en, i gat hatwok bilong en. (Mat. 10:34-36) Na ating yu bin hatwok tru long mekim ol dispela senis. Tasol yu givim bel yet long mekim olsem bikos yu laikim Papa bilong yu long heven na yu laik bai em i orait long yu. Tru tumas, em i amamas long yu!—Prov. 27:11.

6. Olsem Buk Song 119:9, 10, 45, 133 i kamapim, wanem samting inap helpim yumi long wokabaut yet long liklik rot?

⁶ Taim yumi kirap wokabaut long liklik rot, wanem samting inap helpim yumi long wokabaut yet long en? Tingim dispela tok piksa. Ol i save wokim gad-reil—em liklik banis—long kona bilong ol rot i stap long ol maunten, na dispela i bilong lukautim draiva na kar bilong en. Dispela banis i bilong lukautim draiva na bilong helpim em long abrusim eksiden. I no gat wanpela draiva bai komplein olsem dispela banis i pasim ol! Ol stretpela lo bilong Jehova i stap long Baibel i kain olsem dispela gad-reil. Ol lo bilong em i bilong helpim yumi long wokabaut yet long dispela liklik rot.—Ritim Buk Song 119:9, 10, 45, 133.

7. Ol yangpela i mas i gat wanem tingting long dispela liklik rot?

⁷ Ol yangpela, sampela taim yu save pilim olsem ol lo bilong Jehova i pasim yu tumas? Satan i laik yu mas i gat kain tingting olsem. Em i laik bai yu putim tingting long ol manmeri husat i wokabaut long dispela bikpela rot na ol samting ol i mekim, long wanem, i luk olsem ol i enjoim laip. Em inap yusim ol samting em ol wanskul bilong yu i mekim o ol samting yu lukim long Intenet bilong mekim yu pilim olsem yu mis-aut long kisim bikpela amamas. Satan i laik bai yu ting olsem ol lo bilong Jehova i pasim yu long enjoim laip bilong yu. * Tasol tingim dispela: Satan i no laik bai ol manmeri husat i wokabaut long dispela bikpela rot i save long wanem samting em rot i kisim ol i go long en.  Tasol Jehova i laik yu save olsem laip bilong yu bai gutpela tru taim yu wokabaut yet long dispela liklik rot.—Sng. 37:29; Ais. 35:5, 6; 65:21-23.

8. Ol yangpela inap kisim wanem skul long eksampel bilong Olaf?

⁸ Tingim skul yu ken kisim long ekspiriens bilong wanpela yangpela brata, nem bilong em Olaf. * Ol wanskul bilong em i putim presa long em long mekim maritpasin. Taim em i eksplenim olsem em i wanpela Witnes Bilong Jehova na em i save bihainim ol stretpela lo bilong God long sait bilong maritpasin, sampela gels long klas bilong em i traim strong tru long kirapim em long mekim maritpasin wantaim ol. Tasol Olaf i sanap strong na sakim ol. Na i gat narapela presa tu em Olaf i feisim. Olaf i tok: “Ol tisa bilong mi i traim long kirapim mi long putim mak long go long yunivesiti bikos ol i tok ol narapela bai rispektim mi taim mi mekim olsem. Ol i tokim mi tu olsem, sapos mi no mekim olsem, orait laip bilong mi bai i no gat amamas bilong en.” Wanem samting i helpim Olaf long sakim ol dispela presa? Em i tok: “Mi kisim  pasin bilong pas gut wantaim ol bratasista insait long kongrigesen bilong mi. Ol i kamap olsem famili bilong mi. Na tu, mi wok long stadi gut moa long Baibel. Taim mi mekim pasin bilong stadi long Baibel i kamap gutpela moa, mi bilip tru olsem dispela em i tok i tru. Dispela i mekim na mi tingting strong long mekim wok bilong Jehova.”

9. Ol man i laik wokabaut yet long dispela liklik rot, ol i mas mekim wanem?

⁹ Satan i laik bai yu lusim dispela rot i go long laip. Em i laik bai yu joinim bikpela lain manmeri em ol i wokabaut long dispela bikpela rot, em rot “i go long bagarap.” (Mat. 7:13) Tasol yumi bai wokabaut yet long dispela liklik rot, sapos yumi wok yet long harim tok bilong Jisas na tingim dispela rot olsem samting bilong lukautim yumi. Nau yumi ken skelim narapela samting em Jisas i tok long yumi mas mekim.

10. Olsem Matyu 5:23, 24 i kamapim, Jisas i tok yumi mas mekim wanem?

¹⁰ Ritim Matyu 5:23, 24. Jisas i stori long wanpela wok bilong lotu we i bikpela samting tru long ol man Juda em ol i putim yau long tok em i mekim. Piksaim long tingting olsem wanpela man i go long tempel na nau em i redi long givim animal sakrifais bilong em i go long pris. Sapos long dispela taim stret em i tingim rong em brata bilong em i mekim long em, orait em i mas lusim dispela sakrifais na em i mas i “go.” Wai? Bikos i gat wanpela bikpela samting em i mas mekim paslain long em i givim ofa bilong em olsem presen i go long Jehova! Jisas i tokaut klia long dispela samting olsem: “Pastaim stretim tok wantaim brata bilong yu.”

11. Stori long samting em Jekop i mekim bilong stretim hevi na kamap wanbel wantaim brata bilong em Iso.

¹¹ Yumi inap lainim ol bikpela samting long pasin bilong stretim hevi na kamap wanbel taim yumi skelim wanpela samting i bin kamap long laip bilong bilipman Jekop. Taim Jekop i lusim ples bilong em na i go stap olsem tripman inap 20 yia, long rot bilong wanpela ensel God i tokim em long go bek long ples bilong em. (Stt. 31:11, 13, 38) Tasol i gat wanpela hevi. Bikbrata bilong em Iso i tingting long kilim em i dai. (Stt. 27:41) Jekop i “pret nogut tru na em i tingting planti” olsem brata bilong em i bel nogut yet long em. (Stt. 32:7) Jekop i mekim wanem bilong stretim hevi na kamap wanbel wantaim brata bilong em? Pastaim, em i beten strong long Jehova long dispela samting. Bihain em i salim ol presen i go long Iso. (Stt. 32:9-15) Na laspela samting, taim em i go bungim brata bilong em Iso, Jekop i go pas long soim ona long Iso. Em i brukim skru long Iso, i no 1-pela taim o 2-pela taim, nogat, inap 7-pela taim olgeta! Jekop i mekim pasin daun na pasin rispek, na long dispela rot em i kamap wanbel wantaim brata bilong em.—Stt. 33:3, 4.

12. Yumi kisim wanem skul long stori bilong Jekop?

¹² Yumi kisim skul long hau Jekop i redim ol samting bilong go bungim brata bilong em na hau em i bungim Iso. Long pasin daun, Jekop i askim Jehova long helpim em. Bihain em i bihainim beten bilong em na mekim ol samting bilong go bungim brata bilong em long pasin isi na long pasin wanbel. Taim tupela brata i bung, Jekop i no kros wantaim Iso long husat i rait na husat i rong, nogat. Jekop i tingting strong long stretim tok na stap wanbel wantaim brata bilong em. Hau yumi ken bihainim pasin bilong Jekop?

13-14. Sapos yumi rongim wanpela wanbilip, yumi mas mekim wanem?

¹³ Yumi ol manmeri i wokabaut long dispela rot i go long laip, yumi laik stap wanbel na bel  isi wantaim ol bratasista bilong yumi. (Rom 12:18) Yumi ken mekim wanem taim yumi luksave olsem yumi rongim wanpela wanbilip bilong yumi? Olsem Jekop, yumi ken toktok wantaim Jehova long rot bilong beten. Na yumi ken askim em long blesim ol samting yumi mekim bilong kamap wanbel wantaim brata bilong yumi.

¹⁴ Yumi mas lusim sampela haptaim long skelim yumi yet tu. Yumi ken givim kain askim long yumi yet olsem: ‘Mi redi long daunim mi yet na tok sori na kamap wanbel? Jehova na Jisas bai pilim olsem wanem taim mi go pas long stretim hevi na kamap wanbel wantaim brata o sista bilong mi?’ Bekim bilong ol dispela askim bai kirapim yumi long harim tok bilong Jisas, daunim yumi yet, go bungim wanbilip, na stretim tok na kamap wanbel. Taim yumi mekim olsem, yumi bihainim pasin bilong Jekop.

15. Taim yumi bihainim stiatok i stap long Efesus 4:2, 3, olsem wanem dispela inap helpim yumi long stretim hevi na kamap wanbel?

¹⁵ Piksaim long tingting samting inap kamap sapos Jekop i mekim pasin antap taim em i go lukim brata bilong em! Bikpela hevi tru inap kamap long dispela taim ol i bin bung. Taim yumi go lukim wanpela brata o sista bilong yumi long stretim hevi i bin kamap namel long yumi, yumi mas mekim olsem long pasin daun. (Ritim Efesus 4:2, 3.) Provep 18:19 i tok: “I hatwok moa long mekim kol bel bilong brata bilong yu taim em i kros, winim hatwok bilong daunim wanpela taun i gat strongpela banis, na ol tok pait inap brukim lain wankain olsem geit i gat ol ba long strongpela banis.” Taim yumi mekim pasin daun na yumi tok sori, yumi inap kisim bek brata bilong yumi, i olsem yumi inap go insait long dispela taun i gat “strongpela banis.”

16. Yumi mas tingim wanem samting, na bilong wanem?

¹⁶ Narapela samting, yumi mas tingim gut wanem tok yumi bai mekim na hau bai yumi mekim dispela tok. Taim yumi redi, yumi ken go toktok wantaim man yumi rongim na tingting strong long kamap wanbel wantaim em. Pastaim ating em inap mekim ol tok we yumi no amamas long harim. Em bai isi long yumi belhat o traim long strongim sait bilong yumi yet, tasol yu ting dispela inap helpim yumi long stretim hevi? Nogat tru, a? Tingim, pasin bilong stretim tok na kamap wanbel wantaim brata o sista bilong yumi, em i bikpela samting moa winim pasin bilong strongim sait long husat i rait na husat i rong.—1 Kor. 6:7.

17. Yu inap kisim wanem skul long stori bilong Gilbert?

 ¹⁷ Wanpela brata nem bilong Gilbert i wok strong long stap olsem man bilong kamapim pasin wanbel. Em i tok: “Mi gat bikpela bel hevi wantaim pikinini meri bilong mi. Winim tupela yia, mi wok strong tru long mekim tok long onest pasin na long pasin isi bilong stretim bek pasin pren bilong mitupela.” Gilbert i mekim wanem narapela samting? Em i tok: “Paslain long mi toktok wantaim em, mi save beten na mi save redim gut bel na tingting long wanem kain ol tok i no stret em bai mekim. Mi mas redi long fogivim em. Mi lain olsem mi no ken pait strong long raits bilong mi. Na mi kliagut olsem, wok bilong mi em long kamapim bel isi.” Wanem samting i kamap long dispela? Gilbert i tok: “Long nau, bel na tingting bilong mi i stap isi, long wanem, mi pas gut wantaim olgeta insait long famili bilong mi.”

18-19. Sapos yumi bin bagarapim bel bilong wanpela, yumi mas tingting strong long mekim wanem na bilong wanem?

¹⁸ Sapos yumi luksave olsem yumi rongim wanpela wanbilip Kristen, yumi mas tingting strong long mekim wanem? Bihainim tok bilong Jisas long stretim tok na kamap wanbel. Toktok wantaim Jehova long dispela samting na larim em i stiaim yu na helpim yu long rot bilong holi spirit bilong em, na bai yu ken stap olsem man bilong kamapim pasin wanbel. Taim yu mekim olsem, yu bai stap amamas na yu bai kamapim klia olsem yu wok long harim tok bilong Jisas.—Mat. 5:9.

¹⁹ Yumi amamas tru olsem Jehova i save stiaim yumi long rot bilong “het bilong kongrigesen,” em Jisas Krais. (Efe. 5:23) So yumi mas tingting strong long “harim tok bilong em” olsem aposel Pita, Jems, na Jon i bin mekim. (Mat. 17:5) Yumi bin stori long hau yumi ken mekim olsem long rot bilong stretim tok na stap wanbel wantaim ol wanbilip Kristen em yumi bin rongim ol. Taim yumi mekim olsem, na wokabaut yet long dispela liklik rot i go long laip, yumi bai stap amamas long nau na inap oltaim bihain.