1. Planti taim, long wanem rot Jehova i save bekim ol beten bilong ol wokman bilong em?

 YU SAVE olsem Jehova inap yusim yu long bekim beten bilong wanpela i beten strong? Yu ken helpim narapela maski yu wanpela elda, kongrigesen sevan, painia, o wanpela pablisa long kongrigesen. Na tu, yu ken givim helpim maski yu yangpela o lapun o yu wanpela brata o sista. Taim wanpela husat i laikim Jehova i singaut long Em i helpim em, planti taim God bilong yumi i save yusim ol elda na ol narapela gutpela wokman long stap olsem “helpim bilong strongim” dispela man o meri. (Kol. 4:11) Yumi amamas tru long mekim wok bilong Jehova na ol bratasista bilong yumi long kain rot olsem! Yumi ken mekim olsem taim wanpela bikpela sik i kamap, wanpela disasta, o taim ol man i mekim nogut long yumi.   

2. Wai na yumi inap pilim hatwok long helpim ol narapela taim bikpela sik i kamap?

² Taim wanpela bikpela sik i kamap, dispela inap mekim na i hatwok long yumi helpim narapela narapela. Olsem, ating yumi laik visitim ol pren bilong yumi, tasol em i no seif long mekim olsem. Ating yumi laik invaitim ol lain em ol i gat hevi bilong mani long kaikai wantaim yumi, tasol em i no seif tu long mekim olsem. Yumi laik helpim ol narapela, tasol yumi inap hatwok long mekim olsem sapos ol wanfamili bilong yumi yet i karim hevi. Maski i olsem, yumi laik helpim ol bratasista bilong yumi, na Jehova i amamas taim yumi mekim samting yumi inap mekim bilong helpim ol. (Prov. 3:27; 19:17) Yumi ken mekim wanem?

3. Yumi kisim wanem skul long pasin bilong ol elda long kongrigesen bilong Desi? (Jeremaia 23:4)

³ Samting ol elda i ken mekim. Sapos yu wanpela elda, kisim  save gut long ol sipsip. (Ritim Jeremaia 23:4.) Desi, em sista yumi bin kamapim tok bilong em long atikol i go pinis, em i tok: “Long pastaim, ol elda long wok autim tok grup bilong mipela i save autim tok wantaim mi na ol narapela na ol i save joinim mipela long ol narapela taim bilong kisim amamas.” b Ol samting ol dispela wasman i mekim i opim rot long ol inap helpim Desi bihain long COVID-19 pendemik i kamap na sampela long famili bilong em i dai long dispela sik.   

4. (a) Ol elda i bin mekim wanem na dispela i opim rot long ol inap helpim Desi? (b) Ol elda i kisim wanem skul?

⁴ Desi i tok: “Mi save gut long ol elda olsem ol pren, olsem na mi inap tokim ol long hau mi pilim na ol samting mi tingting planti long en.” Ol elda i kisim wanem skul? Lukautim gut ol lain i stap aninit long lukaut bilong yu paslain long wanpela hevi i kamap. Kamap pren bilong ol. Sapos wanpela bikpela sik i kamap na dispela i pasim yu long i go lukim ol, orait painim ol narapela rot long toktok wantaim ol. Desi i tok: “Sampela taim, narapela narapela elda i save ringim mi o salim ol teks mesis long mi long seim de. Mi pilim tru ol skripsa ol i serim wantaim mi, maski mi save gut long ol dispela skripsa.”

5. Olsem wanem ol elda inap kisim save long ol samting ol bratasista i nidim na helpim ol?

⁵ Wanpela rot em yu ken kisim save long ol samting em ol bratasista i nidim em long givim ol gutpela askim long ol. (Prov. 20:5) Olsem wanem? Ol i gat inap kaikai, ol marasin, na ol narapela samting? O i luk olsem kampani inap pinisim ol long wok o ol i no gat inap mani long baim wanpela ples slip? O ol i nidim helpim bilong yumi long askim gavman long givim helpim sapos i gat kain rot olsem? Desi i kisim helpim long ol samting bilong skin long ol wanbilip bilong em. Tasol moa yet, helpim em i kisim long ol elda long sait bilong bilip na long bel na tingting, dispela i helpim em tru long karim ol hevi i painim em. Em i tok: “Ol elda i beten wantaim mi. Maski mi no inap tingim ol tok ol i mekim, mi inap tingim hau mi bin pilim. Em rot Jehova i yusim bilong tokim mi olsem, ‘Yu no stap wanpis.’”—Ais. 41:10, 13.

6. Planti bratasista long kongrigesen inap mekim wanem bilong helpim ol narapela? (Lukim piksa.)

⁶ Samting ol narapela i ken mekim. I stret yumi ken ting olsem ol elda i mas i go pas long yumi. Tasol Jehova i kirapim yumi olgeta long strongim ol narapela na helpim ol. (Gal. 6:10) Maski liklik samting yumi mekim bilong soim pasin laikim, dispela inap mekim bikpela samting long  wanpela husat i sik. Wanpela liklik pikinini inap raitim kat o droim wanpela piksa na salim i go bilong strongim wanpela brata. Wanpela yangpela inap helpim wanpela sista long mekim wanpela wok o baim ol samting bilong em long stua. Ating ol narapela long kongrigesen i ken kukim sampela kaikai bilong wanpela husat i sik na bringim i go long haus bilong em. Tru tumas, taim wanpela bikpela sik i kamap na i spred i go long olgeta hap, olgeta long kongrigesen bai nidim tok bilong strongim ol. Ating bihain long miting yumi ken lusim sampela haptaim long toktok wantaim ol bratasista o toktok wantaim ol long rot bilong vidio konferens. Na ol elda tu i nidim tok bilong strongim ol. Sampela Witnes i bin salim tenkyu kat i go long ol elda, em planti taim ol i save bisi tru long taim wanpela bikpela sik i kamap. Yumi amamas tru taim yumi mekim samting bilong “wok yet long mekim isi bel bilong narapela narapela na strongim narapela narapela”!—1 Tes. 5:11.

7. Bihain long disasta i kamap, olsem wanem dispela inap kamapim ol hatwok?

⁷ Taim disasta i kamap, wantu tasol dispela inap mekim bikpela senis long laip bilong wanpela. Ol man inap lusim ol samting bilong ol, haus bilong ol, na tu, wanpela ol i laikim inap dai long kain ol bikpela hevi olsem. Ol dispela bikpela hevi i save painim tu ol bratasista Kristen bilong yumi. Yumi ken mekim wanem bilong helpim ol?

8. Ol elda na ol het bilong famili i ken mekim wanem paslain long wanpela disasta i kamap?

⁸ Samting ol elda i ken mekim. Ol elda, helpim ol bratasista bilong yupela long redi gut paslain long wanpela disasta i kamap. Helpim ol bratasista long kongrigesen long save long wanem samting ol i ken mekim bilong stap seif na hau ol i ken kontektim ol elda. Margaret, em yumi kamapim tok bilong em long atikol i go pinis, em i tok: “Ol elda bilong mipela i bin mekim tok bilong helpim kongrigesen na ol i tokim mipela olsem haptaim bilong bikpela paia i no pinis yet. Ol i tok sapos gavman i tok long mipela i mas lusim ples o taim ol samting i go nogut moa, orait mipela i mas hariap long lusim ples.” Dispela toksave i kamap long taim stret bikos 5-pela wik bihain long en wanpela bikpela bus paia i kamap. Long taim bilong famili lotu, ol het bilong famili i ken mekim riviu long samting wan wan long famili i ken mekim. Sapos yu na ol pikinini bilong yu i redi gut, yupela i no inap pret taim wanpela disasta i kamap.

9. Olsem wanem ol elda i ken oganaisim gut ol samting paslain na bihain long disasta i kamap?

⁹ Sapos yu wanpela grup ovasia, orait yu mas kisim kontek infomesen bilong olgeta insait long grup bilong yu paslain long wanpela disasta i kamap. Mekim wanpela lista na oltaim apdetim dispela lista. Taim yu mekim olsem, orait taim disasta i kamap yu bai redi long helpim wan wan pablisa long samting ol i nidim. Hariap long givim dispela infomesen long kodineta bilong lain elda, na em bai givim long wasman sekit. Taim ol brata i wok bung wantaim, dispela inap kamapim gutpela samting. Bihain long paia, wasman sekit bilong Margaret i no slip inap 36 aua, em i bisi long oganaisim wok bilong ol elda taim ol i wok long kontektim na lukautim inap olsem 450 bratasista em ol i mas lusim haus bilong ol. (2 Kor. 11:27) Long dispela rot, ol i givim ples slip long olgeta em ol i nidim hap bilong i stap long en.   

10. Bilong wanem ol elda i tingim wok sepeding olsem bikpela samting? (Jon 21:15)

¹⁰ Bilong givim helpim long sait bilong bilip na long bel na tingting em wanpela wok ol elda Kristen i save mekim. (1 Pita 5:2) Long taim bilong disasta, pastaim ol elda i ken mekim olgeta samting ol inap mekim na bai wan wan brata na sista i stap seif na ol i gat kaikai, ol klos, na ples bilong slip. Tasol planti mun bihain long disasta, ol lain  em ol i abrusim bagarap ol bai nidim yet helpim long sait bilong bilip na long bel na tingting. (Ritim Jon 21:15.) Harold, em wanpela memba bilong Brens Komiti na em i bin toktok wantaim planti bratasista em ol i karim hevi long disasta, em i tok: “Sampela haptaim i mas lus long ol i kisim gen strong. Ating ol inap kirap long mekim gen ol nomol samting, tasol taim ol i tingim gen ol wanfamili bilong ol i bin dai, wanpela samting i dia tumas, o wanpela taim nogut ol i bin bungim, dispela memori inap i stap longpela taim wantaim ol. Em inap mekim na ol i krai na bel hevi. Dispela i no makim olsem ol i sot long bilip, nogat. Em nomol filing yumi ol man i save pilim.”

11. Ol famili inap nidim yet wanem ol samting?

¹¹ Ol elda i ken tingim dispela tok olsem yupela i mas “krai wantaim ol man i krai.” (Rom 12:15) Ating ol bratasista i abrusim bagarap, ol inap nidim tok bilong strongim ol olsem Jehova i laikim yet ol na ol bratasista Kristen bilong ol tu i laikim ol. Ol elda i ken helpim ol famili long holim yet pasin bilong ol long mekim ol samting bilong bilip olsem beten, stadi, go long ol miting, na insait long wok autim tok. Na tu, ol elda i ken kirapim ol papamama long helpim ol pikinini bilong ol long putim tingting long ol samting em nogat wanpela disasta inap bagarapim. Ol papamama, kirapim ol pikinini bilong yupela long tingim olsem, oltaim Jehova bai stap olsem Pren bilong ol na oltaim em bai redi long helpim ol. Na stori gut long ol olsem ol i ken stap yet insait long wanpela bikpela lain famili—ol bratasista—i stap long olgeta hap bilong graun em ol i redi long helpim ol.—1 Pita 2:17.

12. Ol narapela i ken mekim wanem bilong helpim wok bilong disasta rilif? (Lukim piksa.)

¹² Samting ol narapela i ken mekim. Sapos wanpela disasta i kamap klostu long hap bilong yu, orait askim ol elda long hau yu ken helpim. Ating inap liklik haptaim yu ken givim ples slip long ol lain em haus bilong ol i bagarap o long ol konstraksen volantia. Ating yu ken givim kaikai na ol samting em ol pablisa i nidim. Sapos wanpela disasta i kamap long wanpela longwe ples, yu ken helpim. Hau yu ken mekim olsem? Yu ken mekim olsem long rot bilong beten long ol lain i karim hevi. (2 Kor. 1:8-11) Yu ken sapotim rilif wok long rot bilong givim donesen long sapotim wok i kamap long olgeta hap bilong graun. (2 Kor. 8:2-5) Sapos rot i op long yu inap i go long hap i nidim helpim, orait askim ol elda long yu ken mekim wanem bilong volantia. Sapos ol i singautim yu long givim helpim, ating yu bai kisim sampela trening na bai ol i ken yusim yu long wanem hap na long wanem taim ol i nidim helpim bilong yu.   

13. Ol bratasista i bungim wanem ol hevi long ol kantri we ol i tambuim wok bilong yumi?

¹³ Long ol kantri we ol i tambuim wok bilong yumi, pasin birua i mekim na laip i hatwok moa. Ol bratasista long ol dispela kantri i save bungim hevi bilong mani, sik, na tu, wanpela ol i laikim inap dai. Gavman i putim tambu long wok bilong yumi, olsem na ating em i hatwok long ol elda i go lukim ol narapela o toktok wantaim ol lain em ol i nidim ol tok bilong strongim ol. Dispela em samting i kamap long Andrei, em yumi stori long em long atikol i go pinis. Wanpela sista long grup bilong autim tok em i stap long en, em i karim hevi long sait bilong mani. Bihain em i insait long wanpela kar eksiden. Em i kisim sampela operesen na em i no inap wok. Maski i gat tambu na pendemik i stap yet, ol brata i mekim ol samting ol inap mekim bilong helpim em, na Jehova i lukim ol samting i wok long kamap.

14. Olsem wanem ol elda inap stap gutpela eksampel long pasin bilong trastim Jehova?

¹⁴ Samting ol elda i ken mekim. Andrei i beten na mekim samting em inap mekim. Jehova i mekim wanem? Em i opim rot long ol wanbilip em ol i stap fri long mekim ol samting long givim helpim. Sampela i kisim sista i go lukim dokta long ol medikal apoinmen bilong em. Ol narapela i givim mani bilong helpim em. Jehova i kirapim ol long mekim samting ol inap mekim, na em i blesim pasin bilong ol long strongim bel na wok bung wantaim. (Hib. 13:16) Ol elda, taim gavman i putim tambu long wok bilong yumi, orait askim ol narapela long helpim. (Jer. 36:5, 6) Bikpela samting moa, trastim Jehova. Em i ken helpim yu long lukautim ol bratasista long ol samting ol i nidim helpim.

15. Olsem wanem yumi ken stap wanbel yet wantaim ol bratasista taim ol man i mekim nogut long yumi?

¹⁵ Samting ol narapela i ken mekim. Taim gavman i putim tambu, ating yumi mas bung long ol liklik grup. Olsem na em i bikpela samting moa long yumi mas stap bel isi wantaim ol narapela. Birua bilong yumi em Satan, na i no ol bratasista bilong yumi. No ken tingim rong bilong ol bratasista bilong yu, na yu mas hariap long stretim ol hevi i kamap namel long yupela. (Prov. 19:11; Efe. 4:26) Go pas long helpim narapela narapela. (Tai. 3:14) Helpim em ol narapela i givim long dispela sista i nidim helpim, dispela i mekim bikpela samting long ol bratasista long grup bilong autim tok. Ol i pas gut wantaim olsem wanpela famili.—Sng. 133:1.

16. Olsem Kolosi 4:3, 18 i kamapim, olsem wanem yumi ken helpim ol bratasista bilong yumi em ol man i mekim nogut long ol?

 ¹⁶ Planti tausen bratasista Kristen bilong yumi i mekim wok bilong Jehova maski gavman i putim ol tambu long wok bilong yumi. Sampela i stap long kalabus bikos long bilip bilong ol. Yumi ken tingim ol long beten, ol famili bilong ol, na tu, ol narapela em ol i daunim laik bilong ol long helpim ol dispela bratasista long sait bilong bilip, ol samting bilong skin, na long kot samting. c (Ritim Kolosi 4:3, 18.) Beten bilong yu i gat bikpela strong!—2 Tes. 3:1, 2; 1 Tim. 2:1, 2.

17. Yu ken mekim wanem nau bilong redi long pasin birua inap painim yumi long bihain?

¹⁷ Yu na famili bilong yu i ken redi nau long pasin birua inap painim yumi long bihain. (Apo. 14:22) No ken traim long piksaim olgeta samting nogut we inap painim yumi long bihain. Mekim ol samting bilong strongim pasin pren bilong yu wantaim Jehova na helpim ol pikinini bilong yu long mekim olsem tu. Sapos sampela taim yu tingting planti, orait kamapim bel bilong yu long God. (Sng. 62:7, 8) Olsem wanpela famili, stori long ol risen na yu ken trastim em. d Taim disasta i kamap, pasin bilong yu long redi paslain long disasta na pasin bilong yu long trastim Jehova bai helpim ol pikinini bilong yu long strongim bel na stap bel isi.

18. Yumi bai kisim wanem gutpela samting long bihain?

¹⁸ Bel isi bilong God i save mekim yumi pilim seif tru. (Fili. 4:6, 7) Long rot bilong en, Jehova i mekim isi bel bilong yumi taim yumi bungim hevi bilong ol bikpela sik, ol disasta, na taim ol man i mekim nogut long yumi. Em i save yusim ol elda bilong yumi em ol i save wok hat tru bilong lukautim yumi. Na em i opim rot long yumi olgeta inap helpim narapela narapela. Dispela bel isi em yumi kisim long nau bai redim yumi long bungim ol bikpela hevi bai kamap, na tu, em bai redim yumi long bungim “traipela hevi tru.” (Mat. 24:21) Long dispela taim, bai yumi gat wok long holimpas yet bel isi bilong yumi na helpim ol narapela long mekim olsem tu. Tasol bihain long dispela taim, yumi bai no inap bungim ol hevi we i mekim na yumi tingting planti. Yumi bai enjoim samting em Jehova i laik bai yumi kisim—bel isi bilong i stap oltaim oltaim.—Ais. 26:3, 4.