1. Paslain liklik long Jisas i dai, em i mekim wanem tok long dispela man nogut i hangamap klostu long em? (Luk 23:39-43)

 JISAS na tupela man nogut i hangamap klostu long em, ol i karim bikpela pen tru taim ol i pilim olsem klostu nau laip bilong ol bai pinis. (Luk 23:32, 33) Dispela tupela man nogut i bin mekim ol tok nogut long Jisas, so i klia tru olsem ol i no disaipel bilong em. (Mat. 27:44; Mak 15:32) Tasol wanpela bilong tupela i tanim bel. Em i tok: “Jisas, tingim mi taim yu kam insait long Kingdom bilong yu.” Na Jisas i tokim em: “Mi tok tru long yu tude, yu bai stap wantaim mi long Paradais.” (Ritim Luk 23:39-43, ftn.) I no gat wanpela samting i soim olsem dispela man nogut i bin bilip long ol tok long “Kingdom bilong heven” em Jisas i bin autim tok long en. Na Jisas i no bin tok olsem dispela man bai go insait long Kingdom. (Mat. 4:17) Jisas i tok long Paradais bai kamap long graun long bihain. Wai na yumi ken tok olsem?

2. Wanem samting i soim olsem dispela man nogut husat i tanim bel em i wanpela man Juda?

² Ating dispela man nogut husat i tanim bel em i wanpela man Juda. Dispela man nogut i tokim narapela man nogut olsem: “Yu kisim wankain hevi olsem em na yu no pret liklik long God, a?” (Luk 23:40) Ol Juda i save lotuim wanpela God, tasol ol man bilong ol narapela kantri i save lotuim planti god. (Kis. 20:2, 3; 1 Kor. 8:5, 6) Sapos ol dispela man nogut i bilong narapela kantri, ating dispela man nogut bai mekim kain askim olsem, “Yu no pret liklik long ol god, a?” Na tu, God i no salim Jisas i kam bilong helpim ol man bilong ol arapela lain, nogat, em i salim em i kam bilong helpim “ol sipsip bilong lain Israel i lus pinis.” (Mat. 15:24) God i bin kamapim klia long lain Israel olsem em bai kirapim bek ol man i dai pinis. Dispela man nogut husat i tanim bel, ating em i save long dispela, na olsem tok bilong em i kamapim, em i kliagut olsem Jehova bai kirapim bek Jisas long dai na em bai mekim wok king long  Kingdom Bilong God. I klia tru olsem dispela man i laik bai God i kirapim em bek long dai.

3. Dispela man nogut i tanim bel, ating em i tingim wanem samting taim Jisas i tok long Paradais? Stori long dispela. (Stat 2:15)

³ Dispela man nogut i tanim bel, em i wanpela man Juda, olsem na ating em i save long stori bilong Adam na Iv na Paradais em Jehova i bin putim ol long en. So ating dispela man nogut i luksave olsem dispela Paradais em Jisas i tok long en, em i wanpela naispela gaden tru hia long graun.—Ritim Stat 2:15.

4. Tok Jisas i mekim long wanpela bilong ol dispela man nogut i mas kirapim yumi long tingim wanem samting?

⁴ Tok Jisas i mekim long wanpela bilong ol dispela man nogut i mas kirapim yumi long tingim laip long Paradais bai olsem wanem. Yumi ken skelim ol samting bai kamap long dispela Paradais long rot bilong skelim ol samting aninit long gutpela wok king bilong King Solomon. Na yumi ken save tru olsem Jisas, em man i winim Solomon, em bai wok wantaim ol wanwok bilong em long kamapim ol gutpela samting long dispela graun. (Mat. 12:42) So i klia tru olsem “ol arapela sipsip” i mas save long ol samting ol i mas mekim bambai ol i ken winim mak na stap laip oltaim long Paradais.—Jon 10:16.

5. Yu laik bai laip long Paradais i olsem wanem?

⁵ Yu tingim wanem samting taim yu tingim laip long Paradais? Ating yu tingim wanpela naispela pak wankain olsem gaden Iden. (Stt. 2:7-9) Na yu tingim tok profet em Maika i raitim long ol manmeri bilong God olsem “olgeta wan wan bai sindaun aninit long rop wain na diwai fik bilong em yet.” (Mai. 4:3, 4) Na ating yu tingim tu ol stori Baibel i mekim olsem bai i gat planti kaikai tru long graun. (Sng. 72:16; Ais. 65:21, 22) So yu inap piksaim long tingting olsem yu stap long wanpela naispela gaden, na yu sindaun klostu long tebol we i pulap long planti naispela kaikai. Yu ken piksaim long tingting olsem win yu pulim i gat naispela smel bilong ol diwai na plaua samting. Na yu harim nek bilong ol manmeri i lap taim ol famili na ol pren na ol manmeri i kirap bek i bung na amamas tru long stap wantaim. Olgeta dispela samting ol i no driman nating. Tru tumas, ol dispela samting bai kamap tru long graun. Tasol laip long Paradais bai i gat sampela wok em yumi mas mekim.

6. Bai yumi mekim wanem wok long Paradais? (Lukim piksa.)

⁶ Jehova i wokim yumi bilong yumi ken amamas long mekim ol wok bilong yumi. (Ekl. 2:24) Yumi bai bisi tru long mekim ol wok insait long dispela Wan Tausen Yia Bilong Krais i Stap King. Ol manmeri em ol i abrusim bagarap long taim bilong traipela hevi tru, na tu, planti milion manmeri em ol i kirap bek, ol bai nidim klos, kaikai, na ples slip. Yumi bai mekim planti gutpela wok bilong helpim ol long kisim ol samting ol i nidim. Wankain olsem Adam na Iv i gat wok bilong mekim long dispela gaden em God i putim ol long en, yumi tu i gat wok bilong mekim graun i  kamap Paradais. Tingim bikpela amamas yumi bai kisim taim yumi skulim planti milion manmeri i kirap bek long kisim stretpela save long Jehova na ol samting em i tingting pinis long mekim. Na tu, long helpim planti bilipman em ol i bin stap paslain long taim bilong Jisas long kisim planti save moa.

7. Yumi ken bilip tru long wanem samting, na bilong wanem?

⁷ Yumi ken bilip tru olsem long dispela Paradais bai kamap bihain, laip bilong yumi bai i gat bel isi, yumi bai i gat olgeta samting yumi nidim, na ol samting bai ron gut. Bilong wanem yumi tok olsem? Long wanem, Jehova i bin helpim yumi long lukim laip bai olsem wanem aninit long wok king bilong Pikinini bilong em. Yumi ken lukim dispela long stori bilong wok king bilong King Solomon.

8. Olsem wanem tok bilong Buk Song 37:10, 11, 29 i bin kamap tru bihain long King Devit i bin raitim ol dispela tok? (Lukim “Askim Bilong Ol Rida” long dispela nius.)

⁸ God i bin kirapim King Devit long raitim stori long laip bai olsem wanem taim wanpela gutpela king i gat savetingting i mekim wok king. (Ritim Buk Song 37:10, 11, 29.) Planti taim yumi save ritim tok bilong Buk Song 37:11 long ol narapela taim yumi stori long Paradais bai kamap long bihain. I gat gutpela risen na yumi mekim olsem, long wanem, Jisas i bin kolim ol tok bilong dispela skripsa long Bikpela Tok Long Maunten, na em i soim olsem ol tok bilong en bai kamap tru long bihain. (Mat. 5:5) Tasol ol tok bilong Devit i soim laip bai olsem wanem long taim bilong King Solomon. Taim Solomon i mekim wok king long Israel, ol manmeri bilong God i stap bel isi tru na ol i gat planti samting long “graun i gat planti milk na hani.” God i bin tok: “Sapos yupela i wokabaut yet long ol lo bilong mi . . . bai mi mekim yupela i stap bel isi long graun bilong yupela, na taim yupela i slip bai yupela i no pret long wanpela samting.” (Wkp. 20:24; 26:3, 6) Ol dispela tok promis i bin kamap tru taim Solomon i mekim wok king. (1 Sto. 22:9; 29:26-28) Na Jehova i tok promis olsem ol man nogut ol bai “i no stap moa.” (Sng. 37:10) Tru tumas, ol tok i stap long Buk Song 37:10, 11, 29 i bin kamap tru long bipo na ol bai kamap tru long bihain tu.

9. Kwin bilong Seba i tok wanem long wok king bilong King Solomon?

 ⁹ Kwin bilong Seba i harim stori bilong bel isi na gutpela sindaun bilong ol manmeri long Israel taim Solomon i mekim wok king. Dispela kwin bilong wanpela longwe kantri i bin i go long Jerusalem bilong lukim ol dispela samting long ai bilong em yet. (1 Kin. 10:1) Bihain long em i lukluk raun long kingdom bilong Solomon, em i tok: “Mi harim hap stori tasol. . . . Ol manmeri bilong yu i ken stap amamas, na ol wokman bilong yu em oltaim ol i save sanap long ai bilong yu na harim savetingting bilong yu, ol i ken amamas!” (1 Kin. 10:6-8) Tasol dispela gutpela sindaun aninit long wok king bilong Solomon i olsem piksa tasol bilong ol samting Jehova bai mekim long ol manmeri i stap aninit long wok king bilong Pikinini man bilong Em Jisas.

10. Long wanem ol rot em Jisas i winim Solomon?

¹⁰ Jisas i winim Solomon long planti samting. Solomon i no gutpela olgeta, na em i mekim planti popaia long wok king bilong em na bihain ol dispela popaia bilong em i kamapim hevi long lain bilong God. Tasol Jisas em King i gutpela olgeta na em i no save mekim ol popaia. (Luk 1:32; Hib. 4:14, 15) Jisas i bin karim planti hevi tru em Satan i bin putim long em na em i winim ol dispela hevi. Krais i bin pruvim olsem em i no inap mekim sin o mekim wanpela samting bilong nogutim ol manmeri i stap aninit long em. Em gutpela blesing tru long Jisas i stap King bilong yumi.

11. Jisas bai kisim wanem helpim?

¹¹ Jisas wantaim lain 144,000 bai mekim wok king na lukautim ol manmeri na long inapim ol samting em Jehova i tingting pinis long mekim long dispela graun. (Rev. 14:1-3) Ol dispela manmeri i bin karim planti pen na hevi taim ol i stap olsem man na meri long graun, so ol bai pilim tru ol hevi bilong yumi. Ol dispela wanwok bilong Jisas bai mekim wanem wok tru?

12. Jehova bai givim wanem wok long lain 144,000?

¹² Jisas na ol wanwok bilong em bai mekim bikpela wok tru, winim ol wok em Solomon i bin mekim. Dispela king bilong Israel i gat wok bilong lukautim planti milion manmeri bilong wanpela kantri. Tasol lain husat bai mekim wok king long Kingdom Bilong God, ol bai helpim na lukautim planti bilion manmeri i stap long graun olgeta. Tru tumas, Jehova i givim bikpela wok tru long lain 144,000!

13. Ol manmeri em ol bai mekim wok king wantaim Jisas, ol bai mekim wanem spesel wok?

¹³ Olsem Jisas, lain 144,000 bai mekim wok king na pris. (Rev. 5:10) Aninit long Lo Bilong Moses, bikpela wok bilong lain pris em long lukautim ol manmeri long sait bilong helt, na tu, ol i gat wok long lukautim ol manmeri long sait bilong bilip. Lo i olsem “sedo tasol bilong ol gutpela samting bai kamap bihain,” olsem na i stret yumi ken ting olsem ol wanwok bilong Jisas bai mekim dispela spesel wok bilong lukautim ol manmeri bilong God long sait bilong helt na long sait bilong bilip. (Hib. 10:1) Nau yet yumi no save, tasol yumi ken wet na lukim hau ol dispela king na pris bai wok wantaim ol manmeri i stap aninit long Kingdom Bilong God long graun. Wanem rot em Jehova bai stretim em yumi no save, tasol yumi ken bilip tru olsem long dispela Paradais, ol manmeri i stap long graun bai kisim ol tok ol i nidim bilong stiaim ol.—Rev. 21:3, 4.

14. “Ol arapela sipsip” na ol brata bilong Krais i stap olsem wanem long nau?

¹⁴ Jisas i kolim ol manmeri husat bai mekim wok king wantaim em olsem “liklik lain sipsip.” (Luk 12:32) Em i tok tu long namba 2 grup we em i kolim ol olsem “ol arapela sipsip.” Dispela tupela grup i stap wanbel wantaim olsem wanpela  lain sipsip. (Jon 10:16) Dispela tupela grup i kirap pinis long wok wantaim, na ol bai mekim olsem yet taim Paradais i kamap long graun. Long dispela taim, ol manmeri insait long “liklik lain sipsip” bai stap long heven na ol manmeri long “ol arapela sipsip,” ol bai amamas long stap laip long graun inap oltaim oltaim. Tasol i gat sampela samting em “ol arapela sipsip” i mas mekim long nau bilong winim mak long stap long Paradais.

15. (a) Long wanem rot “ol arapela sipsip” i wok gut wantaim ol brata bilong Krais? (b) Olsem wanem yu ken bihainim pasin bilong dispela brata long stua? (Lukim piksa.)

¹⁵ Dispela man nogut i bin tanim bel, em i dai paslain long em inap soim klia olsem em i pilim tru ol gutpela samting Krais i mekim bilong helpim em. Tasol yumi ol manmeri insait long “ol arapela sipsip,” yumi gat planti rot nau bilong soim olsem yumi pilim tru ol samting Jisas i bin mekim bilong helpim yumi. Olsem, yumi soim olsem yumi laikim em long pasin yumi mekim long ol brata bilong Krais em God i bin makim long holi spirit. Jisas i tok em bai skelim ol sipsip long pasin ol i mekim long ol brata bilong em. (Mat. 25:31-40) Yumi ken sapotim ol brata bilong Krais long rot bilong givim bel tru long helpim ol long mekim wok bilong autim tok na kamapim ol disaipel. (Mat. 28:18-20) Bilong mekim olsem, yumi laik yusim gut ol tul bilong mekim Baibel stadi em ol i redim bilong yumi, kain olsem buk Stap Amamas Oltaim! Sapos yu no kirap yet long mekim Baibel stadi wantaim wanpela, orait i gutpela yu putim mak long kirapim Baibel stadi wantaim planti manmeri em yu bungim ol long wok autim tok.

16. Yumi mas mekim wanem long nau long stap aninit long Kingdom Bilong God?

¹⁶ I no gat wok long yumi wet inap long Paradais i kamap na nau yumi kamap kain man na meri em Jehova i laik bai ol i stap long Paradais. Long nau yet, yumi ken mekim onest pasin long toktok na long pasin bilong yumi na balensim gut ol narapela samting long laip bilong yumi. Na yumi ken stap gut long Jehova, long poroman marit bilong yumi, na long ol wanbilip Kristen. Taim yumi wok long bihainim gut ol lo bilong God long olgeta de long dispela taim nogut, em bai isi moa long yumi bihainim ol dispela lo taim yumi stap long Paradais. Na tu, yumi ken kisim ol pasin na mekim ol samting bilong soim olsem  yumi redi long stap long dispela taim. Lukim atikol “Yu Redi Long ‘Kisim Graun Olgeta’?” i stap long dispela magasin.

17. Yu ting i stret long larim ol sin yumi bin mekim long bipo i daunim yumi long nau? Stori long dispela.

¹⁷ Yumi mas wok strong tu long lusim tingting long bel hevi em yumi pilim bikos long ol bikpela sin yumi bin mekim long bipo. Tasol yumi no ken givim eskius na ting olsem ofa bilong Jisas bai karamapim ol sin bilong yumi na “long laik bilong yumi yet, yumi bihainim pasin bilong mekim sin.” (Hib. 10:26-31) Taim yumi tanim bel tru long wanpela bikpela sin yumi bin mekim na kisim helpim em Jehova i givim long yumi na senisim ol pasin bilong yumi, orait yumi ken save tru olsem em i fogivim tru yumi. (Ais. 55:7; Apo. 3:19) Tingim tok Jisas i mekim long ol Farisi olsem: “Mi no kam bilong singautim ol stretpela man, nogat, mi kam bilong singautim ol sinman.” (Mat. 9:13) Ofa bilong baim bek man i gat bikpela strong long karamapim olgeta sin bilong yumi.

18. Taim yu bungim dispela man nogut i dai klostu long Jisas, yu laik stori wantaim em long wanem samting?

¹⁸ Yu inap piksaim yu yet long Paradais na yu wok long toktok wantaim dispela man nogut husat i bin toktok wantaim Jisas? Ating yutupela bai stori long ol samting em ofa bilong Jisas i mekim long yutupela. Na ating yu bai tokim em long stori long yu long wanem samting i bin kamap long ol laspela aua bilong laip bilong Jisas long graun na em i bin pilim olsem wanem taim Jisas i bekim askim bilong em. Na tu, ating em bai laik askim yu long laip i bin olsem wanem long dispela laspela haptaim long graun bilong Satan. Em bai gutpela blesing tru long stadi long Tok Bilong God wantaim kain man olsem!—Efe. 4:22-24.

19. Wai na long Paradais bai i gat planti samting long mekim? (Lukim fran pes piksa.)

¹⁹ Long Paradais bai i gat planti samting long mekim. Yumi bai bungim planti manmeri i gat kain kain bekgraun na yumi bai gat planti wok long mekim. Tasol nambawan samting tru, long olgeta de bai yumi wok yet long kisim save long Papa bilong yumi long heven na enjoim ol samting em i givim long yumi. Yumi no inap sot long kisim save long em, na bai yumi kisim planti save moa long ol samting em i bin wokim. Taim yumi stap laip longpela taim, pasin bilong yumi long laikim God bai kamap strong moa. Yumi tenkyu tru long Jehova na Jisas long givim yumi dispela naispela tok promis olsem yumi inap stap laip oltaim long Paradais!