1. “Dispela bel isi bilong God” em wanem samting, na olsem wanem yumi kisim helpim taim yumi kisim dispela bel isi? (Filipai 4:6, 7)

 I GAT wanpela kain bel isi em ol man bilong dispela graun i no save long en. Em “dispela bel isi bilong God,” em bel isi tru yumi save pilim taim yumi pas gut wantaim Papa bilong yumi long heven. Taim yumi kisim dispela bel isi bilong God, yumi no save pret long wanpela samting. (Ritim Filipai 4:6, 7.) Yumi save poroman gut wantaim ol narapela em ol i laikim em. Na yumi save pas gut wantaim “God bilong bel isi.” (1 Tes. 5:23) Taim yumi save gut long Papa bilong yumi, trastim em, na bihainim tok bilong em, bel isi bilong God i ken mekim isi bel bilong yumi na yumi no tingting planti taim yumi karim wanpela bikpela hevi.

2. Wai na yumi ken save tru olsem yumi ken kisim dispela bel isi bilong God?

² Yu ting yumi inap kisim bel isi bilong God taim yumi bungim wanpela bikpela hevi olsem bikpela sik, wanpela disasta, pait insait long kantri, o ol man i mekim nogut long yumi? Ol dispela bikpela hevi inap mekim yumi pret. Maski i olsem, Jisas i tokim ol disaipel bilong em olsem: “Yupela i no ken tingting planti na pret.” (Jon 14:27) I gutpela tru olsem ol brata na sista i bin bihainim dispela tok bilong Jisas. Jehova i helpim ol, na ol i bin stap bel isi taim ol i karim ol bikpela hevi i painim ol.

3. Olsem wanem epidemik o pendemik inap bagarapim bel isi bilong yumi?

³ Wanpela epidemik o pendemik inap senisim tru olgeta samting long i stap bilong yumi. Tingim samting em COVID-19 i mekim long planti manmeri. Long wanpela wok painimaut, ol i bin ripotim olsem winim 50 pesen bilong ol manmeri i hatwok long slip gut long nait long taim bilong dispela pendemik. Dispela bikpela sik i mekim na planti manmeri i tingting planti, kisim sik dipresen, kisim planti drak na alkohol samting, pait insait long marit, na ol i traim long suasaid. Sapos wanpela bikpela sik i kamap long hap yu stap long en, olsem wanem yu inap bosim pasin bilong tingting  planti na long wankain taim kisim bel isi bilong God?

4. Yumi save long tok profet bilong Jisas long las de, na olsem wanem dispela i bringim bel isi long yumi?

⁴ Jisas i tok profet olsem long taim bilong las de bai i gat ol bikpela sik o ol sik we i spred i go “long narapela narapela hap.” (Luk 21:11) Taim yumi save long dispela, olsem wanem dispela i ken mekim yumi stap bel isi? Yumi no kirap nogut long ol bikpela sik i kamap long olgeta hap. Yumi luksave olsem ol samting i kamap olsem Jisas i bin tok long en. Olsem na i gat as long yumi bihainim tok Jisas i mekim long ol manmeri i stap long taim bilong pinis olsem: “Yupela i no ken pret.”—Mat. 24:6.

5. (a) Olsem Filipai 4:8, 9 i kamapim, yumi mas beten long wanem samting taim wanpela bikpela sik i kamap? (b) Olsem wanem pasin bilong harim ol odio rekoding bilong Baibel i ken helpim yu?

⁵ Taim wanpela bikpela sik i kamap, em i isi long yumi tingting planti na pret. Dispela samting i bin painim wanpela sista nem bilong em Desi. b Bihain long ankol, kasen, na dokta bilong em i dai long COVID-19, em i wari olsem nogut em yet i kisim dispela sik na givim long lapun mama bilong em. Na tu, dispela pendemik i mekim na em i wari olsem ol bai rausim em long wok, so em i tingting planti long hau em bai painim mani bilong baim kaikai na ples slip samting. Ol dispela samting em i tingting planti long en i mekim na em i no inap slip long nait. Tasol Desi i kisim bek bel isi bilong em. Hau? Em i beten na kolim stret samting na askim Jehova long helpim em long stap isi na tingim ol gutpela samting. (Ritim Filipai 4:8, 9.) Em i putim yau long ol tok Jehova i mekim long em long rot bilong ol odio rekoding bilong Baibel. Em i tok: “Man bilong ritim tok i kolim isi ol tok na dispela i mekim mi daunim pasin bilong tingting planti na i kirapim mi long tingim pasin marimari bilong Jehova.”—Sng. 94:19.

6. Olsem wanem pesenel stadi na ol miting bilong kongrigesen i helpim yu?

⁶ Taim wanpela bikpela sik i kamap, dispela inap mekim na i hatwok long yu mekim ol samting em yu save mekim, tasol no ken larim dispela i pasim yu long mekim pesenel stadi bilong yu o go long ol miting. Ol ekspiriens bilong ol bratasista we i stap long ol pablikesen na ol vidio bilong yumi bai kirapim yu long tingim olsem ol bratasista bilong yu i holimpas pasin bilong ol long stap gut long God maski ol i bungim ol wankain hevi. (1 Pita 5:9) Ol miting bai helpim yu na oltaim bai yu tingim ol gutpela tok bilong Baibel. Na tu, ol miting bai opim rot long yu long strongim ol narapela na ol i ken strongim yu. (Rom 1:11, 12) Taim yu tingim hau Jehova i bin sapotim ol wokman bilong em taim ol i sik, pret, o taim ol i stap wanpis, dispela bai strongim bilip bilong yu na yu bai save tru olsem em bai strongim yu tu.

7. Yu inap kisim wanem skul long aposel Jon?

⁷ Mekim ol samting bilong toktok wantaim ol  bratasista bilong yu. Taim wanpela bikpela sik i kamap, dispela inap makim olsem yumi no ken go klostu long narapela narapela maski yumi stap wantaim ol wanbilip bilong yumi. Long kain taim olsem, yu inap pilim wankain olsem aposel Jon i bin pilim. Em i laik lukim pren bilong em Gaius. (3 Jon 13, 14) Tasol Jon i luksave olsem inap sampela haptaim em i no inap lukim Gaius. So Jon i mekim samting em inap mekim; em i raitim pas i go long Gaius. Sapos i hatwok long yu go visitim ol bratasista bilong yu na lukim ol, orait traim long toktok wantaim ol long rot bilong telefon, ol vidio kol, o long rot bilong teks mesis. Taim yu toktok wantaim ol wanbilip Kristen, yu no inap pret na yu bai stap bel isi. Toktok wantaim ol elda sapos yu wok long tingting planti long ol samting, na kisim tok ol i mekim bilong strongim yu.—Ais. 32:1, 2.

8. Olsem wanem wanpela disasta inap bagarapim bel isi bilong yu?

⁸ Sapos yu bin karim hevi long wanpela bikpela tait wara, graun i guria, o bikpela paia, yu inap tingting planti inap sampela haptaim bihain long dispela bikpela hevi i pinis. Sapos wanpela long famili bilong yu i bin dai, o haus samting bilong yu i bin bagarap, yu inap belhat na bel hevi long dispela na pilim olsem yu no gat hop. Dispela i no makim olsem yu laikim tumas mani kago o yu no gat bilip, nogat. Yu bin karim bikpela hevi tru, na sampela inap ting i stret long yu holim kain tingting olsem. (Jop 1:11) Maski ol bikpela hevi i painim yu, yu inap kisim bel isi. Hau yu ken mekim olsem?

9. Olsem wanem Jisas i redim yumi long ol bikpela hevi inap kamap?

⁹ Tingim ol tok profet Jisas i bin mekim. Ol man bilong dispela graun i ting olsem taim wanpela disasta i kamap, dispela i no inap mekim wanpela samting long ol, tasol yumi save olsem planti bikpela hevi bai kamap na sampela bilong ol dispela hevi inap mekim sampela samting long yumi. Jisas i tokim ol disaipel bilong em olsem “ol bikpela guria” na planti narapela disasta bai kamap paslain long pinis i kam. (Luk 21:11) Na tu, em i tok profet olsem “pasin bilong brukim lo bai i go bikpela,” olsem yumi lukim pasin raskol, pasin bilong pait, na ol teroris atek long nau. (Mat. 24:12) Jisas i no tok ol dispela hevi bai painim tasol ol manmeri em Jehova i no bin orait long ol, nogat. Planti gutpela wokman bilong Jehova i bin karim hevi long ol bikpela disasta. (Ais. 57:1; 2 Kor. 11:25) Ating Jehova i no inap wokim mirakel na seivim yumi long olgeta disasta, tasol em bai givim yumi ol samting yumi nidim bilong stap isi na stap bel isi.

10. Olsem wanem yumi soim bilip taim yumi redi nau paslain long wanpela disasta i kamap? (Provep 22:3)

¹⁰ Yumi bai pilim olsem em isi moa long stap isi long taim bilong imejensi sapos yumi bin redi paslain long hevi i kamap. Tasol pasin bilong redi paslain long hevi i kamap i makim olsem yumi no bilip long Jehova? Nogat tru. Taim yumi redi paslain long wanpela disasta i kamap, dispela i soim olsem yumi bilip olsem Jehova bai lukautim yumi. Wai na yumi tok olsem? Tok bilong God long Baibel i kirapim yumi long redi long ol disasta inap kamap. (Ritim Provep 22:3.) Na long rot bilong ol atikol long magasin, ol miting bilong kongrigesen, na ol toksave em yumi kisim long taim stret, planti taim oganaisesen bilong God i kirapim yumi long redi long wanpela imejensi. c Olsem wanem? Yumi trastim Jehova? Sapos yumi trastim Jehova, yumi bai bihainim ol dispela tok long nau—paslain long wanpela disasta i kamap.

11. Yu lainim wanem samting long stori bilong Margaret?

¹¹ Tingim stori bilong wanpela sista nem bilong em Margaret. Ol i givim toksave long em long lusim haus bilong em bihain long wanpela bikpela bus paia i kamap long hap bilong em. Planti manmeri tru i traim long lusim dispela hap long wankain  taim, olsem na i gat planti kar tru long rot na ol kar i kam pas pas long wanpela hap. Blakpela smok bilong paia i karamapim ples olgeta, na Margaret i trap insait long kar bilong em inap sampela haptaim. Tasol em i abrusim bagarap bikos em i bin redi gut. Long paus bilong em, em i gat wanpela mep em inap lukim bambai em i ken kisim narapela rot bilong lusim dispela hap. Long taim i no gat hevi, em i bin ron long dispela rot bambai em i ken bihainim isi tasol long taim bilong imejensi. Gutpela tru na Margaret i bin redi gut, olsem na em i abrusim bagarap.

12. Wai na yumi save bihainim ol tok yumi kisim bilong lukautim yumi?

¹² Bilong lukautim yumi na mekim ol samting i ron gut, ol gavman i save putim kefiu, o tokim yumi long lusim wanpela hap, o long mekim ol narapela samting bilong lukautim yumi. Sampela manmeri i mekim ol samting isi isi o ol i wet i stap liklik, long wanem, ol i laik holim yet ol samting ol i gat. Tasol ol Kristen i save mekim wanem? Baibel i tokim yumi olsem: “Yupela i mas tingim Bikpela na daun long olgeta wok bos em ol man i bin kamapim. Yupela i mas mekim olsem long king i stap nambawan tru, na long ol hetman em king i salim.” (1 Pita 2:13, 14) Na tu, oganaisesen bilong God i save givim yumi ol daireksen bilong yumi ken stap seif. Planti taim yumi save kisim toksave long givim ol nupela kontek infomesen bilong yumi long ol elda bambai ol i ken ringim yumi long taim bilong imejensi. Yu bin mekim olsem? Na tu, yumi inap kisim ol daireksen long wanem ples yumi ken i go stap long en, wanem taim yumi mas lusim wanpela hap, na kisim ol rilif saplai o olsem wanem na long wanem taim yumi ken helpim ol narapela. Sapos yumi no bihainim tok, samting yumi mekim inap bagarapim laip bilong yumi yet na laip bilong ol elda. Tingim olsem, ol dispela gutpela man ol i save lukautim yumi. (Hib. 13:17) Margaret i tok: “Mi bilip tru olsem mi bin bihainim daireksen bilong ol elda na oganaisesen na dispela i bin lukautim laip bilong mi.”

13. Planti Kristen em ol i no gat hap bilong stap, wanem samting i mekim ol amamas na ol i stap bel isi?

¹³ Planti bratasista em ol i no gat hap bilong stap bikos long disasta o woa o pait i kamap insait long kantri, ol i bin mekim olgeta samting ol inap mekim long lain long nupela sindaun bilong ol na wantu tasol ol i insait long ol wok tiokratik. Wankain olsem ol Kristen long pastaim em pasin birua i mekim na ol i go stap long ol narapela narapela hap, ol i wok yet long “autim gutnius bilong tok bilong God long ol hap ol i go long en.” (Apo. 8:4) Wok autim tok i helpim ol long putim tingting olgeta long Kingdom na ol i no  tingim tumas ol hatwok long sindaun bilong ol. Long dispela rot, ol i holimpas amamas na bel isi bilong ol.

14. Taim ol man i mekim nogut long yumi, olsem wanem dispela inap bagarapim bel isi bilong yumi?

¹⁴ Taim ol man i mekim nogut long yumi, dispela inap tekewe ol samting i save givim bel isi long yumi. Yumi save amamas na belgut taim yumi stap fri long bung wantaim, mekim wok autim tok, na mekim ol narapela wokabaut long i stap bilong yumi na yumi no pret long ol i arestim yumi. Taim dispela pasin bilong yumi long stap fri i tekewe, ating yumi inap tingting planti na pret long wanem samting bai kamap bihain. Em nomol long yumi pilim olsem. Tasol yumi mas was gut. Jisas i tok taim ol man i mekim nogut long ol disaipel bilong em, dispela inap pundaunim ol. (Jon 16:1, 2) So olsem wanem yumi ken holimpas bel isi bilong yumi taim ol man i mekim nogut long yumi?

15. Wai na yumi no ken pret long ol man i mekim nogut long yumi? (Jon 15:20; 16:33)

¹⁵ Baibel i tokim yumi olsem: “Olgeta man husat i laik bihainim pasin bilong givim bel tru long God olsem ol disaipel bilong Krais Jisas, ol man bai mekim nogut long ol tu.” (2 Tim. 3:12) Wanpela brata nem bilong em Andrei, em i hatwok long bilip olsem gavman i tambuim wok autim tok long kantri bilong em. Em i tingting: ‘I gat planti Witnes long hia. Hau gavman inap arestim mipela olgeta?’ Dispela tingting i mekim na Andrei i no stap bel isi, na em i wok long tingting planti. Ol narapela brata i lusim ol samting long han bilong Jehova na ol i no holim dispela tingting olsem gavman i no inap arestim ol. Ol i save olsem gavman inap arestim ol, tasol ol i no tingting planti wankain olsem Andrei. So em i traim long holim wankain tingting olsem ol dispela brata na lusim ol samting long han bilong God. Bihain em i kisim bel isi, na nau em i stap amamas maski ol hevi i stap yet. Yumi tu i ken mekim olsem. Jisas i tokim yumi olsem ol man bai mekim nogut long yumi, tasol em i tokim yumi tu olsem yumi ken stap gut long God.—Ritim Jon 15:20; 16:33.

16. Yumi mas bihainim wanem daireksen taim ol man i mekim nogut long yumi?

¹⁶ Taim gavman i tambuim wok bilong yumi o ol i putim strongpela tambu long en, ating yumi inap kisim yet ol instraksen i kam long brens ofis na long ol elda. Ol dispela instraksen i bilong lukautim yumi, na bilong helpim yumi long kisim yet  ol kaikai bilong strongim bilip, na bilong helpim yumi long wok yet long autim tok inap long mak bilong yumi. Wok strong long bihainim daireksen yu kisim, maski yu yet i no kliagut long wanem as na ol i givim dispela daireksen. (Jems 3:17) Na tu, no ken givim ol infomesen bilong ol bratasista o ol wok bilong kongrigesen long ol manmeri em ol i no gat rait long save long en.—Ekl. 3:7.

17. Olsem ol Kristen long taim bilong ol aposel, yumi mas tingting strong long mekim wanem?

¹⁷ Wanpela bilong ol nambawan risen na Satan i wok long pait long lain bilong God em bikos “ol i gat wok long tokaut long ol man long Jisas.” (Rev. 12:17) No ken larim Satan na ol manmeri bilong em i pretim yu. Pasin bilong autim tok na skulim ol man maski ol man i mekim nogut long yumi, dispela i save mekim yumi stap amamas na stap bel isi. Long taim bilong ol Kristen long bipo, taim ol bikman bilong lain Juda i tokim ol aposel long ol i mas stop long mekim wok autim tok, ol dispela bilipman i bihainim tok bilong God. Ol i wok yet long autim tok, na dispela wok i mekim ol amamas. (Apo. 5:27-29, 41, 42) Tasol taim i gat tambu long wok bilong yumi, yumi mas bihainim savetingting taim yumi autim tok. (Mat. 10:16) Sapos yumi givim bes bilong yumi, yumi bai kisim bel isi i save kam long pasin bilong amamasim Jehova na long tokim ol narapela long dispela gutnius bilong seivim laip bilong ol man.

18. Wai na em i gutpela long yumi mas tingim man em i As bilong bel isi bilong yumi?

¹⁸ Yu ken save tru olsem maski planti hevi i kamap na i givim hatwok tru long yumi, yumi ken stap bel isi. Long kain taim olsem, yumi mas tingim olsem bel isi yumi nidim em dispela bel isi bilong God, na em bel isi we Jehova tasol inap givim. Wet long God i helpim yu taim yu bungim hevi bilong bikpela sik i kamap, wanpela disasta o ol man i mekim nogut long yu. Pas gut wantaim oganaisesen bilong em. Tingim gutpela sindaun bai yu kisim long bihain. Taim yu mekim olsem, “God bilong bel isi bai stap wantaim” yu. (Fili. 4:9) Long neks atikol, yumi bai stori long hau yumi ken helpim ol wanbilip Kristen em ol i karim ol bikpela hevi long kisim bel isi bilong God.