1. Taim yumi tingim tingim long bel tok promis bilong Jehova long givim yumi laip oltaim, dispela i save mekim wanem long yumi?

 JEHOVA i tok promis olsem ol manmeri i bihainim tok bilong em ol bai kisim “laip oltaim.” (Rom 6:23) Taim yumi tingim tingim long bel samting Jehova i laik mekim long yumi, pasin bilong yumi long laikim em i save kamap strong moa. Tingim dispela: Papa bilong yumi long heven i laikim yumi tru, olsem na i no gat wanpela samting bai tekewe yumi long em.

2. Olsem wanem tok promis bilong laip oltaim i helpim yumi?

² Tok promis bilong God long givim yumi laip oltaim i helpim yumi long karim ol hevi bilong yumi long nau. Maski ol birua bilong yumi i pretim yumi na tok long kilim yumi i dai, yumi no inap lusim bilip. Bilong wanem? Long wanem, wanpela risen em olsem sapos yumi stap gut long Jehova na yumi dai, em bai kirapim bek yumi long dai na yumi bai bilip tru olsem yumi no inap dai moa. (Jon 5:28, 29; 1 Kor. 15:55-58; Hib. 2:15) Wai na yumi ken bilip tru olsem yumi inap stap laip oltaim? Skelim ol dispela risen.

3. Wai na yumi ken save tru olsem Jehova inap givim laip oltaim long yumi? (Buk Song 102:12, 24, 27)

³ Yumi save olsem Jehova inap givim laip oltaim long yumi bikos em i As bilong laip na em i save stap oltaim oltaim. (Sng. 36:9) Em hia sampela skripsa bilong Baibel i kamapim klia olsem oltaim Jehova i bin stap na oltaim em bai stap. Buk Song 90:2 i tok Jehova i save stap “oltaim oltaim.” Buk Song 102 i mekim wankain tok. (Ritim Buk Song 102:12, 24, 27.) Na profet Habakuk i mekim dispela tok long Papa bilong yumi long heven olsem: “Jehova, yu save stap oltaim oltaim. God bilong mi, yu God Holi bilong mi, yu no save dai.”—Hab. 1:12.   

4. Bilong wanem yumi no ken wari sapos yumi hatwok long kliagut olsem Jehova i save stap oltaim oltaim? Stori long dispela.

 ⁴ Olsem wanem? Yu pilim hatwok long kliagut olsem Jehova i save stap “oltaim oltaim”? (Ais. 40:28) Planti narapela manmeri tu i hatwok long kliagut long dispela. Elihu i tok long God olsem: “Yumi no inap save em i stap laip hamas yia.” (Jop 36:26) Sapos yumi no kliagut long wanpela samting, dispela i no makim olsem dispela samting i no stap tru. Olsem, maski yumi no kliagut long hau pawa i wok, dispela i no makim olsem pawa i no stap, a? Olsem tasol, yumi ol man i no inap kliagut tru long hau Jehova i bin stap long bipo na oltaim em bai stap. Tasol dispela i no makim olsem God i no save stap oltaim oltaim. Maski yumi kliagut long dispela o nogat, dispela i no makim olsem God i no stap tru. (Rom 11:33-36) Na em i bin stap paslain long ol samting long yunives i kamap, olsem san na ol sta samting. Yumi save tru olsem Jehova “em Man Bilong Wokim graun long strong bilong em.” Yes, em i bin stap paslain long em i “pulim na opim skai i go bikpela olsem laplap.” (Jer. 51:15; Apo. 17:24) Wanem narapela risen na yumi ken save tru olsem yumi inap stap laip oltaim?

5. God i opim rot long tupela fes man na meri long kisim wanem gutpela samting?

⁵ Jehova i wokim ol samting long graun long ol inap stap laip inap sotpela haptaim, tasol ol man em i wokim ol bilong ol i ken stap oltaim oltaim. Em i opim rot long ol i stap laip oltaim na ol bai i no inap dai. Tasol Jehova i tok lukaut long Adam olsem: “Yu no ken kaikai prut bilong diwai bilong givim save long wanem samting i gutpela na wanem samting i nogut. Long de yu kaikai prut bilong en, tru tumas bai yu dai.” (Stt. 2:17) Sapos Adam na Iv i bin bihainim tok bilong Jehova, ol i no inap dai. I gat as long yumi bilip olsem, ating bihain Jehova inap larim ol i kaikai long dispela “diwai bilong laip.” Dispela inap makim olsem God i orait long ol bai stap “oltaim oltaim.” b—Stt. 3:22.

6-7. (a) Wanem narapela samting i soim olsem God i no wokim ol man bilong i dai? (b) Yu laik tru long mekim wanem samting long nupela taim? (Lukim ol piksa.)

⁶ Sampela saientis i painim evidens i soim olsem kru bilong yumi i ken holim planti moa infomesen winim ol infomesen yumi inap kisim save long en long laip bilong yumi long nau. Dispela em i narakain tru. Long 2010, wanpela atikol long nius Scientific American Mind i tok olsem kru bilong yumi inap holim olsem  2.5 milion gigabait bilong ol infomesen, dispela em i wankain olsem ol TV program em ol i rekodim insait long 3 milion aua o long winim 300 yia. Kru bilong yumi inap holim planti moa infomesen winim dispela namba. Dispela i soim olsem Jehova i wokim kru bilong yumi long holim planti moa infomesen winim ol infomesen yumi kisim save long en insait long 70 o 80 yia tasol.—Sng. 90:10.

⁷ Na tu, Jehova i wokim yumi wantaim strongpela laik bilong i stap laip. Baibel i tok long ol manmeri olsem God i “putim tingting bilong i stap laip oltaim oltaim long bel bilong ol.” (Ekl. 3:11) Dispela em wanpela risen na yumi tingim dai olsem wanpela birua. (1 Kor. 15:26) Olsem wanem? Taim yumi kisim wanpela bikpela sik, yumi save orait long dispela sik na givap tasol? Nogat. Yumi save go lukim dokta na ating kisim ol marasin bilong daunim dispela sik. Yumi save mekim olgeta samting yumi inap mekim bilong abrusim dai. Na taim wanpela yumi laikim i dai, maski em i yangpela o lapun, yumi save pilim bikpela bel pen tru inap longpela taim, a? (Jon 11:32, 33) Tru tumas, yumi ken stap laip oltaim na yumi gat strongpela laik bilong mekim olsem bikos Krieta bilong yumi i bin wokim yumi bilong stap laip oltaim. Na yumi gat ol gutpela risen bilong bilip olsem yumi ken stap laip oltaim. Yumi ken skelim sampela samting Jehova i bin mekim long bipo na long nau we i soim olsem em i no senisim tingting long laik bilong em long pastaim.

8. Taim yumi tingim laik bilong Jehova long yumi, olsem wanem tok bilong Aisaia 55:11 i strongim yumi?

⁸ Maski Adam na Iv i mekim sin na bringim dai long ol pikinini bilong ol, Jehova i no senisim  tingting long laik bilong em long pastaim. (Ritim Aisaia 55:11.) Em i gat laik yet olsem ol manmeri i stap gut long em ol bai stap laip oltaim. Yumi luksave long dispela taim yumi skelim ol tok na ol samting Jehova i bin mekim bilong inapim laik bilong em.

9. God i tok promis long mekim wanem? (Daniel 12:2, 13)

⁹ Jehova i tok promis olsem em bai kirapim bek ol man i dai pinis na em bai opim rot long ol i kisim laip oltaim. (Apo. 24:15; Tai. 1:1, 2) Bilipman Jop i save olsem Jehova i gat bikpela laik tru long kirapim bek ol man i dai pinis. (Jop 14:14, 15) Profet Daniel i save olsem God i opim rot long ol man inap kirap bek na stap laip oltaim. (Sng. 37:29; ritim Daniel 12:2, 13.) Na tu, ol Juda long taim bilong Jisas i save olsem Jehova inap givim “laip oltaim” long ol gutpela wokman bilong em. (Luk 10:25; 18:18) Planti taim Jisas i kolim dispela tok promis taim em i skulim ol manmeri, na Papa bilong em i bin kirapim bek em long dai.—Mat. 19:29; 22:31, 32; Luk 18:30; Jon 11:25.

10. Ol kirap bek i bin kamap long pastaim i kamapim klia wanem samting? (Lukim piksa.)

¹⁰ Jehova em Man Bilong Givim Laip na em i gat strong long kirapim bek ol man long dai. Em i givim strong long profet Elaija long kirapim bek pikinini man bilong wido meri bilong Sarefat. (1 Kin. 17:21-23) Bihain, God i helpim profet Elisa na em i kirapim bek pikinini man bilong wanpela meri Sunem. (2 Kin. 4:18-20, 34-37) Ol dispela kirap bek na ol narapela kirap bek i kamapim klia olsem Jehova i gat strong long kirapim bek ol man i dai pinis. Taim Jisas i stap long graun, em i kamapim klia olsem Papa bilong em i bin givim em strong long mekim olsem. (Jon 11:23-25, 43, 44) Nau Jisas i stap long heven na “God i givim [em] namba long bosim olgeta samting long heven na long graun.” Olsem na em i gat namba long inapim dispela tok promis olsem “olgeta man i stap long matmat” bai kirap bek na kisim laip na ol bai stap laip oltaim oltaim.—Mat. 28:18; Jon 5:25-29.

11. Olsem wanem ofa bilong baim bek man i opim rot long yumi inap stap laip oltaim?

¹¹ Bilong wanem Jehova i larim Pikinini em i laikim tru i karim bikpela pen na dai? Jisas i bekim dispela askim taim em i tok: “God i laikim tumas olgeta manmeri bilong graun, olsem na em i givim dispela Pikinini tru bilong em long ol bai olgeta man husat i bilip long em ol inap abrusim bagarap na kisim laip oltaim.” (Jon 3:16) Taim God i givim Pikinini bilong em olsem ofa bilong karamapim ol sin bilong yumi, em i opim rot long yumi inap kisim laip oltaim. (Mat. 20:28) Aposel Pol i kamapim klia dispela bikpela samting long laik bilong God taim em i tok: “Long rot bilong wanpela man, dai i kamap, olsem tasol long rot bilong wanpela man, ol man bai kirap bek long dai. Long rot bilong Adam ol man i save dai, olsem tasol long rot bilong Krais ol man bai kisim laip.”—1 Kor. 15:21, 22.

12. Olsem wanem Kingdom bai inapim laik bilong Jehova long yumi?

¹² Jisas i skulim ol disaipel bilong em long beten long Kingdom Bilong God i mas i kam na laik bilong God i mas kamap long graun. (Mat. 6:9, 10) Wanpela samting insait long laik bilong God em long ol manmeri i mas i stap laip oltaim long graun. Bilong inapim dispela laik, Jehova i makim Pikinini bilong em olsem King long Kingdom Bilong Mesaia. God i wok long bungim 144,000 manmeri long graun long wok wantaim Jisas long inapim laik bilong God.—Rev. 5:9, 10.

13. (a) Jehova i wok long mekim wanem long nau? (b) Olsem wanem yu insait long dispela?

¹³ Long nau, Jehova i wok long bungim “bikpela lain manmeri” na em i wok long skulim ol long stap aninit long Kingdom bilong  em. (Rev. 7:9, 10; Jems 2:8) Maski dispela graun i pulap long pasin bilong pret na ol woa, ol lain insait long dispela grup i wok strong long daunim pasin bilong heitim ol narapela, olsem ol man bilong narapela kantri na traib samting. Long rot bilong ol samting ol i mekim, ol i soim olsem ol i wok long paitim ol bainat bilong ol i kamap olsem ain bilong brukim graun. (Mai. 4:3) Ol i no insait long ol woa i kilim planti man i dai, nogat. Ol i wok long helpim ol manmeri long kisim save long “dispela laip em i laip tru” long rot bilong skulim ol long God tru na ol samting em i tingting pinis long mekim. (1 Tim. 6:19) Ol wanfamili inap birua long ol o ol inap karim hevi long sait bilong mani bikos ol i sapotim Kingdom Bilong God, tasol Jehova i save mekim ol samting na bai ol i gat ol samting ol i nidim. (Mat. 6:25, 30-33; Luk 18:29, 30) Ol dispela tok tru i strongim yumi olsem Kingdom Bilong God em i wanpela gavman tru na em bai wok yet long inapim laik bilong Jehova.

14-15. Olsem wanem tok promis bilong Jehova long pinisim tru dai bai kamap tru?

¹⁴ Long nau, Jisas i mekim wok king long heven na em bai truim olgeta tok promis Jehova i bin mekim. (2 Kor. 1:20) Kirap long 1914 na i kam, Jisas i wok long daunim ol birua bilong em. (Sng. 110:1, 2) Klostu nau, Jisas wantaim ol wanwok bilong em bai pinisim pait bilong ol  long daunim ol birua bilong ol na pinisim ol man nogut.—Rev. 6:2.

¹⁵ Long Wan Tausen Yia Bilong Jisas i Stap King, ol daiman bai kirap bek na ol man i bihainim tok bilong God bai kamap gutpela olgeta. Bihain long laspela traim, ol man em Jehova i kotim ol na em i tok ol i stretpela man ol “bai kisim graun olgeta, na ol bai stap oltaim long en.” (Sng. 37:10, 11, 29) Yumi amamas tru olsem, “dai, dispela laspela birua, em bai pinisim olgeta.”—1 Kor. 15:26.

16. Wanem nambawan samting i mas kirapim yumi long lotuim Jehova?

¹⁶ Olsem yumi stori pinis, Tok Bilong God em i as bilong dispela bilip yumi gat olsem yumi bai stap laip oltaim. Dispela bilip inap helpim yumi long stap gut long God long dispela taim bilong las de we i gat planti hevi. Tasol bilong amamasim Jehova, yumi mas i gat laik long stap laip oltaim, na tu, yumi mas mekim sampela samting moa. Nambawan risen na yumi laik stap gut long Jehova na Jisas em bikos yumi laikim tru ol. (2 Kor. 5:14, 15) Dispela pasin laikim i kirapim yumi long bihainim pasin bilong ol na long tokim ol narapela long ol samting yumi bilip na wet long en. (Rom 10:13-15) Taim yumi lain long putim laik bilong ol narapela i go pas long laik bilong yumi yet na mekim gut long ol, yumi kamap ol kain man na meri em Jehova i laik bai ol i stap pren bilong em inap oltaim oltaim.—Hib. 13:16.

17. Yumi wan wan i gat wanem wok? (Matyu 7:13, 14)

¹⁷ Olsem wanem? Yumi bai stap namel long ol lain i kisim laip oltaim? Jehova i opim rot long yumi inap kisim laip oltaim. Nau em wok bilong yumi long bihainim dispela rot i go long laip oltaim. (Ritim Matyu 7:13, 14.) Laip bai olsem wanem taim yumi stap laip oltaim? Yumi bai kisim bekim bilong dispela askim long neks atikol.