Wanpela taim, wanpela sista long Nu Silan i watsim dispela vidio “Tingim Ol Arapela” we i stori long Jehova i save sori long ol narapela na mekim pasin sori long ol. (Ais. 63:​7-9) Sista bilong yumi i laik bihainim samting em i lainim long rot bilong helpim narapela. Long dispela seim de, em i go long stua long baim kaikai na em i bungim wanpela tarangumeri i no gat haus, na sista i tokim em olsem em i laik baim kaikai bilong em. Dispela meri i orait long em i mekim olsem. Taim dispela sista i go baim kaikai na em i kam bek, em i yusim dispela liklik nius Yu Ting Pen na Hevi Bai Pinis? long autim tok long dispela meri.

Dispela meri i krai. Em i tok em i kamap bikpela olsem wanpela Witnes, tasol em i lusim tok i tru inap planti yia i go pinis. Tasol i no longtaim i go pinis, em i wok long beten askim Jehova long helpim em long kam bek long Em. Dispela sista i givim dispela meri wanpela Baibel na em i stretim rot bilong em long stadi. a

Yumi ken bihainim pasin bilong Jehova long mekim pasin sori long ol manmeri, dispela i makim tu ol wanblut bilong yumi na ol bratasista bilong yumi insait long kongrigesen. Na yumi ken mekim pasin sori taim yumi painim ol rot bilong autim tok long ol narapela.