1. Taim yumi stori long bilip bilong Abraham, yumi inap givim wanem askim long yumi yet?

 EM TRU olsem planti manmeri i save long stori bilong Abraham, tasol planti ol i no save gut long em. Tasol yu save gut long stori bilong Abraham. Olsem, yu save olsem Baibel i kolim Abraham olsem “papa bilong olgeta man em God i kolim ol stretpela man.” (Rom 4:11) Tasol yu inap tingting olsem, ‘Mi inap bihainim lek mak bilong Abraham na i gat wankain strongpela bilip olsem em i bin gat?’ Yes, yu ken mekim olsem.

2. Wai na em i bikpela samting long yumi mas stadi long eksampel bilong Abraham? (Jems 2:​22, 23)

² Wanpela rot yumi ken kisim wankain strongpela bilip olsem Abraham em long stadi long eksampel bilong em. Abraham i bihainim tok bilong God, na em i muv i go stap long wanpela longwe ples, em i stap long ol haus sel inap planti yia, na em i redi long givim pikinini em i laikim tumas, em Aisak, olsem ofa i go long God. Ol dispela samting em i mekim i kamapim klia olsem em i gat strongpela bilip. Abraham i bilip na em i mekim ol gutpela wok na dispela i opim rot long God i orait long em na em i kamap pren bilong Em. (Ritim Jems 2:​22, 23.) Jehova i laik bai yumi olgeta, na yu tu, i kisim ol wankain blesing olsem Abraham i bin kisim. Olsem na em i kirapim Pol na Jems, em tupela man bilong raitim Baibel long stori long eksampel bilong Abraham. Yumi ken stori long eksampel bilong Abraham olsem i stap long Rom sapta 4 na Jems sapta 2. Dispela tupela sapta wantaim i kamapim wanpela bikpela poin long stori bilong Abraham.

3. Pol na Jems wantaim i kamapim tok bilong wanem skripsa?

³ Pol na Jems wantaim i kamapim tok bilong Stat 15:​6, we i tok: “[Abraham] i bilip long Jehova na God i tingim em olsem stretpela man.” Jehova i save tingim wanpela man olsem stretpela man  taim Em i amamas long em. Yumi amamas tru long save olsem God inap tingim wanpela sinman olsem stretpela man! Tru tumas, yu laik bai God i tingim yu olsem stretpela man, na em i ken tingim yu olsem stretpela man. Nau yumi bai kisim save long risen na Jehova i tingim Abraham olsem stretpela man, na yumi mas mekim wanem bilong God i ken tingim yumi tu olsem ol stretpela man.

4. Wanem samting i pasim yumi long kamap ol stretpela manmeri?

⁴ Long pas Pol i raitim long ol Kristen long Rom, em i tok olgeta manmeri i gat sin. (Rom 3:23) So man i mas mekim wanem na bai God i tingim em olsem stretpela man na orait long em? Bilong helpim olgeta Kristen long bekim dispela askim, Pol i stori long Abraham.

5. I gat wanem risen na God i kolim Abraham olsem stretpela man? (Rom 4:​2, 4)

⁵ Jehova i kolim Abraham olsem stretpela man taim em i stap long graun bilong Kenan. Wai na Jehova i kolim Abraham olsem stretpela man? Yu ting em i kolim Abraham olsem stretpela man bikos em i bihainim gut Lo Bilong Moses? Nogat. (Rom 4:13) God i givim dispela Lo long lain Israel winim 400 yia bihain long em i kolim Abraham olsem stretpela man. Sapos olsem, orait i gat wanem risen na God i kolim Abraham olsem stretpela man? Jehova i soim bikpela pasin helpim long Abraham na em i kolim em olsem stretpela man bikos long bilip bilong em.—Ritim Rom 4:​2-4.

6. Olsem wanem Jehova i tingim wanpela sinman olsem stretpela man?

⁶ Pol i tok moa olsem taim wanpela man i bilip long God, “orait bilip bilong dispela man i mekim na God i tingim em olsem stretpela man.” (Rom 4:5) Pol i tok moa olsem: “Devit tu i toktok long amamas bilong man em God i tingim olsem stretpela man, na i no long wok dispela man i mekim. Em i tok: ‘Ol man em ol i bin brukim ol lo na God i fogivim ol na i karamapim sin bilong ol, ol i ken amamas. Man em Jehova i no save tingim ol sin bilong em, em i ken amamas.’” (Rom 4:​6-8; Sng. 32:​1, 2) God i save fogivim o karamapim ol sin bilong ol man husat i bilip long em. Em i save fogivim tru ol na em i no save tingim gen ol sin bilong ol. Em i save tingim ol dispela manmeri olsem ol i no gat asua na ol i stretpela manmeri bikos long bilip bilong ol.

7. Wai na God i tingim ol wokman bilong em long bipo olsem ol stretpela man?

⁷ God i tingim Abraham, Devit, na ol narapela gutpela wokman bilong em long bipo olsem ol stretpela man taim ol i stap yet olsem ol sinman. Ol i bilip long God, olsem na em i tingim ol olsem ol stretpela man, na moa yet taim em i skelim ol wantaim ol man em ol i no bilip long em. (Efe. 2:12) Olsem Pol i kamapim klia long pas em i bin raitim, yumi mas i gat bilip bilong kamap pren bilong God. Abraham na Devit i stap olsem pren bilong God bikos ol i bilip long em. Yumi tu i ken kamap pren bilong God sapos yumi bilip long em.

8-9. Sampela man i mekim wanem ol tok long ol pas em Pol na Jems i bin raitim, na bilong wanem?

⁸ Inap planti handret yia, ol lida bilong lotu i tok pait long olsem wanem pasin bilong bilip na mekim ol gutpela wok i poroman wantaim. Sampela pris pasto i tok sapos yu laik God i kisim bek yu, bilip tasol long Bikpela Jisas Krais. Ating yu bin harim ol i tok, “Kisim Jisas long laip bilong yu na bai yu kisim laip.” Ol pris pasto inap kamapim tok bilong Pol olsem: “God i tingim [man] olsem stretpela man, na i no long wok dispela man i mekim.” (Rom 4:6) Tasol ol narapela i tok olsem God inap kisim bek yu taim yu raun na lukim ol ples em ol sios i ting olsem ol i ples holi na yu mekim ol gutpela wok. Ol inap kamapim tok  bilong Jems 2:24 olsem: “Long ol wok man i mekim, God bai kolim em stretpela man, na i no long rot bilong bilip tasol.”

⁹ Ol man i gat narapela narapela bilip long dispela, olsem na sampela saveman bilong Baibel i ting olsem Pol na Jems i no wanbel long samting man i mas mekim na bai God i kolim em olsem stretpela man. Ol pris pasto inap tok olsem Pol i tok man i mas i gat bilip na bai God i kolim em olsem stretpela man, tasol Jems i tok man i mas mekim ol gutpela wok na bai God i orait long em. Wanpela saveman bilong lotu i tok: “Jems i no kliagut long risen na Pol i tok [God inap kolim man olsem stretpela man] long rot bilong bilip tasol na i no long ol wok em i mekim.” Tasol Jehova i kirapim Pol na Jems wantaim long raitim stori long ol samting ol i bin mekim. (2 Tim. 3:16) Olsem na i mas i gat wanpela rot bilong kamapim klia olsem ol tok bilong tupela i no pait, tasol ol i wanbel wantaim. I gat wanpela rot i stap, em long skelim gut ol tok i stap paslain na bihain.

10. Pol i tok long wanem samting taim em i stori long “pasin bilong bihainim lo”? (Rom 3:​21, 28) (Lukim tu piksa.)

¹⁰ Long Rom sapta 3 na sapta 4, Pol i stori long “pasin bilong bihainim lo.” Em i tok long Lo Bilong Moses we God i bin givim long lain Israel long Maunten Sainai. (Ritim Rom 3:​21, 28.) Long taim bilong Pol, i luk olsem sampela Juda Kristen i hatwok long luksave olsem God i pinisim pasin bilong bihainim Lo Bilong Moses na ol wok em Lo i tok long ol i mas mekim. Olsem na Pol i stori long eksampel bilong Abraham bilong kamapim klia olsem i no gat wok moa long man i “bihainim lo” na bai God i ken kolim em olsem stretpela man, nogat. Man i mas i gat bilip na bai God i kolim em stretpela man. Dispela i strongim yumi bikos em i helpim yumi long save tru olsem God i ken kolim yumi olsem ol stretpela  man. Dispela i makim olsem yumi ken kisim pasin bilong bilip long God na long Krais, na dispela bai opim rot long God i orait long yumi.    

11. Jems i stori long wanem “ol wok”?

¹¹ “Ol wok” em Jems sapta 2 i stori long en, ol i no wankain long “pasin bilong bihainim lo” em Pol i stori long en. Jems i stori long ol wok o ol samting em ol Kristen i save mekim long olgeta wan wan de long laip bilong ol. Ol dispela wok inap kamapim klia olsem Kristen i bilip tru long God, o nogat. Yumi ken skelim tupela eksampel em Jems i bin stori long en.

12. Olsem wanem Jems i kamapim klia olsem bilip i poroman wantaim pasin bilong mekim ol gutpela wok? (Lukim tu piksa.)

¹² Long fes eksampel, Jems i tok ol Kristen i mas mekim wankain pasin long olgeta man. Em i kamapim klia dispela poin taim em i stori long gutpela pasin wanpela man i mekim long wanpela maniman na em i luk daun long wanpela rabisman. Jems i tok dispela kain man inap tok olsem em i gat bilip, tasol em i mekim wanem ol wok bilong soim olsem em i gat bilip? (Jems 2:​1-5, 9) Long narapela eksampel, Jems i stori long wanpela husat i lukim ‘wanpela brata o sista i sot long klos o kaikai,’ tasol em i no givim helpim. Maski dispela man i tok em i gat bilip, em i no mekim ol gutpela wok bilong soim olsem em i gat bilip, olsem na bilip bilong em i samting nating. Olsem Jems i tok: “Sapos bilip i stap nating, na i no kamapim ol gutpela wok, orait dispela bilip i dai pinis.”—Jems 2:​14-17.

13. Olsem wanem Jems i kamapim klia olsem yumi mas mekim ol gutpela wok bilong soim olsem yumi gat bilip? (Jems 2:​25, 26)

¹³ Jems i stori long Rahap olsem em i stap gutpela eksampel long pasin bilong bilip na mekim ol gutpela wok. (Ritim Jems 2:​25, 26.) Rahap i bin harim stori long ol samting Jehova i mekim  na em i luksave olsem Em i wok long helpim lain Israel. (Jos. 2:​9-11) Rahap i soim olsem em i gat bilip long rot bilong ol samting em i mekim—em i lukautim tupela man Israel em ol i kam lukstil na ol i no kisim bagarap long han bilong ol birua. Olsem na God i kolim Rahap olsem stretpela meri wankain olsem em i bin tok long Abraham, maski dispela meri i no gutpela olgeta na em i no bilong lain Israel. Eksampel bilong Rahap i kamapim klia olsem em i bikpela samting long yumi mas mekim ol gutpela wok bilong soim olsem yumi gat bilip.

14. Olsem wanem ol tok bilong Pol na Jems i wanbel wantaim?

¹⁴ Pol na Jems wantaim i stori long pasin bilong bilip na mekim ol gutpela wok long narapela narapela rot. Pol i tokim ol Juda Kristen olsem Jehova i no inap orait long ol sapos ol i bihainim tasol Lo Bilong Moses. Jems i kamapim klia olsem olgeta Kristen i mas soim olsem ol i gat bilip long rot bilong mekim ol gutpela pasin long ol narapela.

15. Wanem sampela rot yumi ken kamapim klia olsem yumi gat bilip? (Lukim tu ol piksa.)

¹⁵ Jehova i no tokim yumi olsem sapos yumi laik bai em i kolim yumi olsem ol stretpela man, yumi mas mekim ol wankain samting olsem Abraham i bin mekim, nogat. I gat planti rot em yumi ken kamapim klia olsem yumi gat bilip long rot bilong ol wok yumi mekim. Yumi ken welkamim ol nupela lain i kam long ol miting na helpim ol bratasista em ol i nidim tru helpim, na tu, yumi ken mekim ol gutpela pasin long famili bilong yumi, em ol samting Jehova i orait long en na em bai blesim yumi. (Rom 15:7; 1 Tim. 5:​4, 8; 1 Jon 3:18) Na wanpela gutpela wok we i kamapim klia olsem yumi gat bilip em pasin bilong yumi long givim bel tru long autim gutnius. (1 Tim. 4:16) Long rot bilong ol samting yumi mekim, yumi olgeta i ken kamapim klia olsem  yumi bilip olsem olgeta tok promis bilong Jehova bai kamap tru na ol samting em i tokim yumi long mekim ol i gutpela. Na sapos yumi mekim olsem, yumi ken save tru olsem God bai tingim yumi olsem ol stretpela man na em bai kolim yumi olsem ol pren bilong em.

16. Abraham i bilip na wet long wanem samting?

¹⁶ Rom sapta 4 i kamapim narapela bikpela skul yumi ken kisim long pasin bilong Abraham: em pasin bilong bilip na wet. Jehova i tok promis olsem Abraham bai kamap “papa bilong planti lain manmeri” na ol bai kisim blesing long rot bilong em. Piksaim long tingting gutpela samting tru em Abraham i bilip na wet long en! (Stt. 12:3; 15:5; 17:4; Rom 4:17) Tasol Abraham i gat 100 krismas na Sara i gat 90 krismas, na dispela pikinini em God i tok promis long en i no kamap yet. Long tingting bilong yumi ol man, ating i luk olsem Abraham na Sara i no inap karim pikinini. Dispela inap traim tru bilip bilong Abraham. Tasol “Abraham i wet na bilip olsem em bai kamap papa bilong planti lain manmeri.” (Rom 4:​18, 19) Na tru tumas, God i inapim dispela tok promis. Abraham i kamap papa bilong Aisak, em dispela pikinini ol i wet inap longpela taim long kisim.—Rom 4:​20-22.

17. Hau yumi save olsem God inap kolim yumi olsem ol stretpela man na yumi inap kamap pren bilong em?

¹⁷ God inap orait long yumi na kolim yumi olsem ol stretpela man na ol pren bilong em, wankain olsem em i bin mekim long Abraham. Na Pol i bin kamapim klia dispela taim em i tok: “Dispela tok i stap long Rait Holi olsem, ‘God i tingim em olsem stretpela man,’ dispela tok i no bilong Abraham tasol, nogat, em bilong yumi tu, ol lain em God i makim bilong kolim olsem stretpela manmeri. Long wanem, yumi bilip long dispela Man husat i bin kirapim bek Jisas.” (Rom 4:​23, 24) Olsem Abraham, yumi mas i gat bilip na mekim ol gutpela wok, na tu, yumi mas i gat pasin bilong bilip na wet long Jehova i truim ol tok promis bilong em. Pol i mekim sampela tok moa long Rom sapta 5 bilong stori long pasin bilong yumi long bilip na wet, yumi bai skelim dispela long atikol i kamap bihain.