YU AMAMAS long ol gutpela presen Jehova i givim yu, na yu amamas tu long pasin bilong i stap fri long makim wanem samting yu laikim. Baibel i tok wain em presen i kam long God na em i tok tu olsem: “Bret i samting bilong mekim man i amamas, na wain i save mekim man i amamas long laip bilong em.” (Ekl. 10:19; Sng. 104:15) Tasol ating yu luksave olsem sampela man i gat hevi long pasin bilong dring alkohol. Na tu, ol man long olgeta hap bilong graun na bilong kain kain kalsa i gat narapela narapela tingting long pasin bilong dring alkohol. So wanem samting inap helpim ol Kristen long mekim ol gutpela disisen long sait bilong dring alkohol?

Em tru olsem ples yumi stap long en na kalsa yumi kamap bikpela long en i no wankain, tasol taim yumi larim tingting bilong God i stiaim ol tingting na ol disisen yumi mekim, dispela bai helpim yumi long stap amamas.

Ating yu luksave olsem ol man long olgeta hap bilong graun i save dring alkohol oltaim na ol i save dring planti alkohol. Ating sampela i dring alkohol bikos em i mekim ol i pilim rileks. Ol narapela i dring alkohol bilong helpim ol long karim ol hevi. Na long sampela ples, ol man i dring planti alkohol bilong soim olsem ol i man tru na ol i gat strong.

Ol Kristen i kisim ol gutpela tok bilong stiaim ol i kam long Krieta bilong ol husat i gat pasin laikim. Olsem, em i givim tok lukaut long yumi long ol hevi inap kamap taim yumi dring planti alkohol. Ating yumi ritim tok i stap long Provep 23:​29-35 we i stori long ol samting man i dring planti alkohol i save mekim, na tu, ol hevi i save kamap long dispela. a Daniel em wanpela elda long Yurop, em i tingim bek laip bilong em paslain long em i kamap wanpela Kristen, na em i tok: “Mi save dring planti alkohol na dispela i stiaim mi long mekim ol disisen nogut na mi karim planti hevi long dispela, na taim mi tingim bek ol samting mi mekim, mi save bel hevi tru.”

Olsem wanem yumi ol Kristen inap mekim ol gutpela disisen long sait bilong dring alkohol bambai yumi inap abrusim ol hevi i kamap long pasin bilong dring planti alkohol? Yumi mas larim tingting bilong God i stiaim ol tingting na ol pasin bilong yumi.

Yumi ken skelim tok Baibel i mekim long pasin bilong dring alkohol na wanem astingting bilong sampela long dring alkohol.

Tok Bilong God i no tambuim pasin bilong dring liklik alkohol. Baibel i tok taim man i dring wain, dispela inap mekim em i amamas. Em i tok: “Kaikai na amamas, na dringim wain bilong yu na belgut.” (Ekl. 9:7) Jisas i bin dring wain, na ol narapela gutpela wokman bilong Jehova tu i bin dring wain.—Mat. 26:​27-29; Luk 7:34; 1 Tim. 5:23.

Em tru olsem Tok Bilong God i no tambuim pasin bilong dring liklik alkohol, tasol em i tambuim pasin bilong dring spak. Baibel i tokaut stret olsem: “Yupela i no ken dring planti wain na spak.” (Efe. 5:18) Na Baibel i tok tu olsem: “Ol spakman . . . bai i no inap i go insait long Kingdom Bilong God.” (1 Kor. 6:10) Yes, Jehova i tambuim tru pasin bilong dring planti alkohol na spak. Yumi no ken larim kalsa bilong yumi i stiaim pasin bilong yumi long dring alkohol, nogat. Yumi mas larim tingting bilong God i stiaim ol disisen yumi mekim.

Sampela i pilim olsem ol inap dring planti alkohol na ol i no inap spak. Tasol kain tingting olsem inap kamapim bikpela hevi. Baibel i kamapim klia olsem man o meri i “kalabus long pasin bilong dring planti wain,” em inap mekim ol bikpela sin na bagarapim pasin pren bilong em wantaim Jehova. (Tai. 2:3; Prov. 20:1) Na tu, Jisas i givim tok lukaut olsem man i “dring planti,” em bai no inap go insait long nupela taim God bai kamapim. (Luk 21:​34-36) Orait  ol Kristen inap mekim wanem bilong abrusim ol hevi i save kamap long man i dring planti alkohol?

Hevi inap kamap taim wanpela i larim kalsa em i kamap bikpela long en i stiaim tingting em i gat long pasin bilong dring alkohol. Ol Kristen i bihainim savetingting taim ol i mekim ol samting i amamasim Jehova long sait bilong kaikai na dring samting. Baibel i tok: “Maski yupela i kaikai o dring o mekim narapela samting, yupela i mas mekim olgeta samting bilong givim glori long God.” (1 Kor. 10:31) Hia em sampela askim na ol stiatok bilong Baibel yumi ken skelim:

Mi save dring alkohol na bai ol narapela i orait long mi? Kisim Bek 23:2 i tok: “Maski planti manmeri i mekim pasin nogut, yupela i no ken bihainim ol.” Jehova i givim tok lukaut long ol Israel olsem ol i no ken bihainim ol man i mekim ol pasin em God i no amamas long en. Dispela edvais i ken helpim ol Kristen long nau tu. Sapos yumi larim ol narapela i stiaim tingting na disisen yumi mekim long sait bilong alkohol, orait yumi inap sakim ol lo bilong Jehova na bagarapim pasin pren bilong yumi wantaim em.—Rom 12:2.

Mi save dring alkohol bilong soim strong bilong mi? Long sampela kalsa, ol i orait long ol man i dring alkohol long olgeta kain taim na dring spak. (1 Pita 4:3) Tasol tingim savetok i stap long 1 Korin 16:​13, em i tok: “Yupela i mas was i stap, sanap strong long bilip, stap olsem man tru, na kamap strong.” Tru tru alkohol inap helpim wanpela long kamap strong? Nogat tru. Alkohol inap daunim pasin bilong man long tingting gut na mekim ol gutpela disisen. Olsem na taim man i dring alkohol, dispela i no soim olsem em i gat strong, nogat, dispela i soim olsem em i no gat gutpela tingting. Aisaia 28:7 i tok man i dring alkohol i lusim stretpela rot na wokabaut kranki, na bihain em i pundaun.

Taim yumi was i stap na sanap strong long bilip, yumi inap kisim strong i kam long Jehova. (Sng. 18:32) Yumi mekim olsem long rot bilong was i stap long ol hevi inap kamap na mekim ol disisen we i no inap bagarapim pasin pren bilong yumi wantaim Jehova. Taim Jisas i stap long graun em i pas gut wantaim Jehova, na planti i rispektim em bikos em i gat pasin bilong strongim bel na strong long bihainim stretpela pasin.

Mi save dring alkohol bilong daunim ol wari bilong mi? Wanpela man bilong raitim song i tok:  “Taim wari na tingting planti i daunim mi, yu [Jehova] save strongim mi na mekim bel bilong mi i stap isi.” (Sng. 94:19) Sapos wari na tingting planti i daunim yu, orait kisim helpim long Jehova, na i no long alkohol. Wanpela rot bilong mekim olsem em long beten oltaim long Jehova. Na tu, planti i kisim gutpela helpim taim ol i kisim edvais long ol pren insait long kongrigesen em ol i strong long bilip. Taim man i dring alkohol bilong helpim em long karim ol hevi bilong em, dispela inap daunim pasin bilong em long tingting strong long bihainim stretpela pasin. (Hos. 4:11) Daniel em yumi stori pinis long em i tok: “Mi save tingting planti na wari, na bel i kotim mi. Mi dring alkohol bilong helpim mi long karim hevi bilong mi, tasol ol hevi i go bikpela moa na mi lusim ol pren na mi no moa rispektim mi yet.” Wanem samting i bin helpim Daniel? Em i tok: “Mi luksave olsem Jehova tasol inap helpim mi, na i no alkohol. Wantaim helpim bilong Jehova, mi inap karim na winim ol hevi bilong mi.” Tru tumas, oltaim Jehova i stap redi bilong helpim yumi, maski yumi pilim olsem i no gat rot bilong kisim helpim.—Fili. 4:​6, 7; 1 Pita 5:7.    

Sapos yu save dring alkohol sampela taim, orait yu ken skelim pasin bilong yu long dring alkohol long rot bilong askim yu yet olsem: ‘Wanpela long famili o wanpela gutpela pren i toktok long mi long pasin bilong mi long dring alkohol?’ Sapos olsem, orait dispela inap makim olsem yu wok long kisim wanpela pasin em yu no luksave long en. ‘Mi wok long dring planti alkohol moa winim long bipo?’ Dispela inap kamap long wanpela husat i no kalabus long pasin bilong dring alkohol, tasol ol samting em i mekim i soim olsem em inap kalabus long dispela pasin. ‘Mi save pilim hatwok long no ken dring alkohol insait long sampela de o winim sampela de?’ Sapos olsem, orait dispela inap makim olsem yu kalabus long pasin bilong dring alkohol. Na ating yu mas kisim helpim long dokta bambai yu ken daunim dispela hevi.

Pasin bilong dring alkohol inap kamapim planti hevi, olsem na sampela Kristen i makim olsem ol bai no inap dring alkohol. Ating ol narapela i no laik dring alkohol bikos ol i no laikim teis bilong en. Sapos wanpela pren bilong yu i mekim kain disisen olsem, orait yu ken mekim gutpela pasin long rot  bilong rispektim disisen bilong em na yu no ken sutim tok long em.

O ating yu yet i luksave olsem em i savetingting long putim sampela mak. Wanpela Kristen inap putim mak long hamas alkohol em bai dring. O em inap putim mak long hamas taim em bai dring alkohol, olsem wanpela taim insait long wanpela wik o kisim liklik alkohol long taim bilong kaikai. Ol narapela i putim mak long wanem kain alkohol ol bai kisim, olsem ol bai dring wain o bia inap long skel, tasol ol i no inap kisim ol strongpela dring, dispela i makim tu ol strongpela dring em ol i miksim jus o ol narapela fleiva long en. Taim wanpela i putim ol mak long sait bilong dring alkohol, dispela bai helpim em long mekim ol samting i stret wantaim ol mak em i putim. Na i no gat wok long wanpela strongpela Kristen i pilim sem taim em i mekim ol kain disisen olsem na em i tingting strong long bihainim ol dispela disisen.

Yumi mas tingim tu ol narapela taim yumi mekim ol disisen long sait bilong dring alkohol. Rom 14:21 i tok: “I no gutpela long kaikai mit o dring wain o mekim wanpela samting i pundaunim brata bilong yu.” Hau yu ken bihainim dispela stiatok? Yu ken mekim pasin laikim long ol narapela. Sapos yu luksave olsem taim yu dring alkohol dispela inap pundaunim ol narapela, orait pasin laikim bai kirapim yu long no ken dring alkohol long taim ol narapela i stap. Taim yu mekim olsem, yu soim olsem yu rispektim na laikim ol narapela na yu tingim ol tru na yu no tingim yu yet tasol.—1 Kor. 10:24.

Na tu, gavman inap putim ol lo long sait bilong dring alkohol na dispela inap stiaim disisen bilong ol Kristen. Ating ol dispela lo i makim hamas krismas man i mas winim bilong em i ken dring alkohol o ol i tambuim man long no ken dring alkohol taim em i draiv na yusim ol masin samting.—Rom 13:​1-5.

Jehova i onarim yumi long rot bilong larim yumi i enjoim ol presen em i givim long yumi. Dispela i makim tu presen bilong stap fri long makim wanem kaikai na dring yumi laik kisim. Ol disisen bilong yumi i ken soim olsem yumi amamas long dispela pasin bilong i stap fri em yumi kisim, na yusim long rot we i amamasim Papa bilong yumi long heven.