1. Yumi mas mekim wanem bilong kamap strongpela Kristen?

 YUMI save kirap nogut long lukim olsem ol pikinini i save gro hariap na kamap bikpela man o meri. Ol pikinini i save gro tasol, na ol i no mekim wanpela hatwok bilong helpim ol long gro hariap. Tasol bilong kamap wanpela strongpela Kristen, yumi mas mekim sampela samting. b (1 Kor. 13:11; Hib. 6:1) Bilong kamap strongpela Kristen, yumi mas strongim pasin pren bilong yumi wantaim Jehova. Na tu, yumi nidim holi spirit taim yumi wok long kisim ol pasin bilong God, lainim sampela skil, na redi long ol wok yumi bai mekim long bihain.—Prov. 1:5.

2. (a) Yumi lainim wanem samting long tok bilong Stat 1:27? (b) Bai yumi stori long wanem samting long dispela atikol?

² Jehova i bin wokim man na meri. (Ritim Stat 1:27.) Olsem na bodi bilong man i no wankain long bodi bilong meri, tasol i gat sampela samting tu em ol i no wankain long en. Olsem, Jehova i wokim man na meri na em i givim wok bilong ol wan wan, olsem na ol i mas i gat ol pasin na ol skil bilong helpim ol long inapim ol dispela wok bilong ol. (Stt. 2:18) Long dispela atikol, yumi bai stori long wanem samting wanpela yangpela sista i ken mekim bilong kamap strongpela meri Kristen. Na long atikol i kamap bihain, yumi bai stori long wanem samting ol yangpela brata i ken mekim.   

3-4. Ol yangpela sista i ken bihainim ol gutpela eksampel bilong husat? (Lukim tu piksa.)

³ Baibel i stori long planti gutpela meri em ol i bin laikim Jehova na mekim wok bilong em. (Lukim atikol “Women in the Bible—What Can We Learn From Them?” long jw.org.) Olsem tim  skripsa bilong yumi i kamapim, ol i “mekim ol samting inap long skel, na long olgeta samting ol i mekim ol i kamapim bilip bilong ol.” Na tu, ol sista i ken lukim gutpela eksampel bilong ol strongpela meri Kristen long kongrigesen bilong ol yet na ol i ken bihainim pasin bilong ol.

⁴ Ol yangpela sista, i gutpela long yu luksave long sampela strongpela bilipmeri Kristen em yu ken bihainim pasin bilong ol. Lukim ol gutpela pasin bilong ol, na tingim hau yu ken mekim ol wankain pasin. Long ol paragraf i kamap bihain, yumi bai stori long 3-pela gutpela pasin em ol sista i mas i gat.

5. Wai na em i bikpela samting long wanpela strongpela meri Kristen i mas kisim pasin daun?

⁵ Bilong kamap wanpela strongpela Kristen, yumi mas mekim pasin daun. Sapos wanpela meri i gat pasin daun, em bai pas gut wantaim Jehova na stap gutpela pren bilong ol narapela. (Jems 4:6) Olsem, wanpela meri i laikim tru Jehova, long pasin daun em bai sapotim wok bilong ol man long stap het, olsem Papa bilong em long heven i bin makim. (1 Kor. 11:3) Dispela wok bilong stap olsem het i gat ol narapela wok bilong en tu em man i mas mekim insait long kongrigesen na insait long famili. c

6. Ol yangpela sista inap kisim wanem skul long Rebeka long mekim pasin daun?

⁶ Skelim stori bilong Rebeka. Em i gat savetingting na long laip olgeta bilong em, em i strongim bel na mekim sampela disisen na em i save long wanem taim na wanem pasin i stret long mekim. (Stt. 24:58; 27:​5-17) Maski i olsem, em i save rispek na daun long ol narapela. (Stt. 24:​17, 18, 65) Sapos yu daunim yu yet na sapotim arensmen em Jehova i putim wankain olsem Rebeka i bin mekim, yu bai stap olsem gutpela helpim long famili bilong yu yet na long kongrigesen.

7. Ol yangpela sista inap kisim wanem skul long Esta long bihainim gutpela tingting?

⁷ Pasin bilong bihainim gutpela tingting em narapela gutpela pasin em olgeta strongpela  Kristen i mas i gat. Baibel i tok olsem “savetingting i stap wantaim ol man i gat pasin daun.” (Prov. 11:2) Esta em wanpela meri i save stap gut long God na em i save bihainim gutpela tingting. Pasin bilong em long bihainim gutpela tingting i lukautim em na em i no mekim nabaut ol samting long laik bilong em. Em i putim gut yau na bihainim edvais i kam long kasen bilong em Mordekai husat i gat bikpela krismas moa winim Esta. (Est. 2:​10, 20, 22) Yu tu i ken soim olsem yu bihainim gutpela tingting long rot bilong askim ol narapela long gutpela edvais na bihainim.—Tai. 2: 3-5.

8. Olsem 1 Timoti 2:​9, 10 i kamapim, olsem wanem wanpela sista i ken bihainim gutpela tingting long sait bilong bilas na mekim gut skin?

⁸ Esta i soim olsem em i bihainim gutpela tingting long narapela rot tu. “Em i kamap naispela yangpela meri na em i luk nambawan tru,” tasol em i no yusim dispela long pulim ai o tinging bilong ol narapela. (Est. 2:​7, 15) Olsem wanem ol meri Kristen i ken kisim gutpela helpim long eksampel bilong Esta? Wanpela rot em ol i ken kisim gutpela skul i stap long 1 Timoti 2:​9, 10. (Ritim.) Aposel Pol i tokim ol meri Kristen long bilas long pasin i soim rispek na gutpela tingting. Tok Grik em ol i yusim long hia i makim olsem meri Kristen i bilas long pasin i soim rispek na i soim olsem em i tingim tingting ol narapela i gat long bilas bilong em. Mipela i tok amamas long yupela ol strongpela sista Kristen i save bihainim gutpela tingting long bilas bilong yupela!

9. Yumi inap kisim wanem skul long stori bilong Abigel?

⁹ Pasin bilong skelim gut ol samting em narapela gutpela pasin em olgeta meri Kristen i mas mekim. Pasin bilong skelim gut ol samting i makim wanem samting? Em i makim pasin bilong luksave long wanem pasin i rong na wanem pasin i rait na makim gutpela rot bilong bihainim. Skelim stori bilong Abigel. Man bilong em i mekim wanpela disisen nogut we inap kamapim bagarap long em yet na long olgeta wanhaus bilong em. Wantu tasol Abigel i mekim sampela samting. Pasin bilong em long skelim gut ol samting i lukautim laip bilong planti man. (1 Sml. 25:​14-23, 32-35) Pasin bilong skelim gut ol samting bai helpim yumi tu long luksave long wanem taim yumi ken toktok na wanem taim yumi no ken toktok. Na tu, em i helpim yumi long holim stretpela tingting taim yumi mekim ol samting bilong helpim ol narapela.—1 Tes. 4:11.

10-11. Olsem wanem yu ken helpim yu yet na ol narapela taim yu lain gut long rit na rait? (Lukim tu piksa.)

¹⁰ Wanpela meri Kristen i mas lainim sampela skil bilong lukautim em yet. Sampela skil em wanpela pikinini meri i lainim taim em i liklik, dispela inap lukautim em long laip olgeta bilong em. Skelim sampela eksampel.

¹¹ Lain gut long rit na rait. Long sampela kalsa, em i no bikpela samting long ol meri i lain long rit na rait. Tasol em i bikpela samting long  olgeta Kristen i mas lain gut long rit na rait. d (1 Tim. 4:13) So no ken larim wanpela samting i pasim yu long lain gut long rit na rait. Dispela inap helpim yu olsem wanem? Kain skil olsem inap helpim yu long kisim wanpela wok mani na holim inap longpela taim. Yu bai kamap gutpela sumatin na tisa bilong Tok Bilong God. Na bikpela samting moa, yu bai go klostu moa long Jehova taim yu ritim tok bilong em long Baibel na tingim tingim long bel.—Jos. 1:8; 1 Tim. 4:15.

12. Olsem wanem tok bilong Provep 31:26 inap helpim yu long kisim pasin bilong toktok gut?

¹² Kisim pasin bilong toktok gut wantaim ol narapela. Ol Kristen i mas lain long toktok gut wantaim ol narapela. Bilong mekim olsem, disaipel Jems i mekim tok bilong helpim yumi olgeta, em i tok: “Olgeta man i mas putim yau kwik long harim tok, na ol i no ken hariap long mekim toktok.” (Jems 1:19) Taim yu putim gut yau long ol narapela i toktok, yu soim olsem yu tingim ol tru na yu “pilim hevi” bilong ol. (1 Pita 3:8) Sapos yu no kliagut long tok o tingting narapela i kamapim, orait mekim ol gutpela askim. Na lusim sampela haptaim long tingting gut paslain long yu toktok. (Prov. 15:28) Askim yu yet: ‘Tok mi laik mekim em i tru na em inap strongim ol narapela? Tok mi mekim em i gutpela na i soim rispek?’ Kisim skul long ol strongpela sista Kristen em ol i gat gutpela pasin bilong toktok. (Ritim Provep 31:26.) Putim gut yau na tingim gut pasin bilong ol long toktok. Taim yu lain gut long pasin bilong toktok gut, orait pasin pren bilong yu wantaim ol narapela bai kamap gutpela moa.

13. Olsem wanem yu ken lain long lukautim gut haus? (Lukim tu piksa.)

¹³ Lain long lukautim gut haus. Long planti kantri, ol meri i save mekim olgeta wok bilong haus. Mama bilong yu o narapela sista i ken helpim yu long lain gut long mekim ol dispela wok. Wanpela sista, nem bilong em Cindy, i tok: “Wanpela gutpela presen tru Mama i givim long mi em long lainim mi long kisim amamas long mekim ol wok i gat hatwok bilong en. Mi lainim ol skil bilong kukim kaikai, klinim haus, samap, na baim ol samting, na dispela i mekim na em isi moa long mi inap lukautim mi yet na mekim bikpela wok moa bilong Jehova. Mama i skulim mi tu long mekim gutpela pasin long ol narapela, na dispela i opim rot long mi inap bungim planti brata na sista em ol i gat gutpela pasin na mi inap bihainim pasin bilong ol.” (Prov. 31:​15, 21, 22) Wanpela meri i save wok hat na mekim gutpela pasin long ol narapela, na em i lain long lukautim gut haus bilong em yet, em i stap olsem gutpela blesing long ol narapela long famili bilong em yet na long kongrigesen.—Prov. 31:​13, 17, 27; Apo. 16:15.

14. Yu kisim wanem skul long stori bilong Crystal, na yu mas tingting strong long mekim wanem?

¹⁴ Lain long lukautim yu yet. Em i bikpela samting long olgeta strongpela Kristen i mas lain long lukautim gut ol yet. (Fili. 4:11) Wanpela  sista, nem bilong em Crystal, i tok: “Papamama bilong mi i helpim mi long makim ol kos mi inap kisim long haiskul bambai mi ken lainim sampela skil bilong lukautim mi yet. Papa bilong mi i bin kirapim mi long kisim kos bilong akauns, na dispela i bin helpim mi tru.” Yu mas lainim sampela skil bilong helpim yu long kisim wanpela wok mani, na tu, yu ken traim long mekim baset na bihainim baset bilong yu. (Prov. 31:​16, 18) Putim tingting olgeta long winim ol mak bilong bilip yu putim long rot bilong abrusim dinau na amamas long ol liklik samting yu gat pinis.—1 Tim. 6:8.

15-16. Olsem wanem ol singel sista i dia tumas long ol narapela? (Mak 10:​29, 30)

¹⁵ Taim yu kisim ol pasin bilong God na lainim sampela gutpela skil, yu bai redi long mekim olgeta kain wok em yu kisim long bihain. Skelim sampela samting em yu inap mekim.

¹⁶ Yu inap stap singel inap sampela haptaim. Olsem Jisas i bin tok, sampela meri i makim olsem ol i laik stap singel, maski long kalsa bilong ol em i no orait long stap singel. (Mat. 19:​10-12) Ol narapela i stap singel bikos i gat ol narapela risen na ol i mekim olsem. Yu ken save tru olsem Jehova na Jisas i no save luk daun long ol singel Kristen. Long graun olgeta, ol singel sista i stap olsem ol gutpela blesing long kongrigesen bilong ol. Pasin bilong ol long laikim na tingim tru ol narapela i kirapim ol dispela meri Kristen long stap olsem ol sista na ol mama long sait bilong bilip long planti narapela.—Ritim Mak 10:​29, 30; 1 Tim. 5:2.

17. Wanpela yangpela sista i mas mekim wanem long nau bilong redi long insait long fultaim sevis?

¹⁷ Yu inap kamap wanpela fultaim sevan. Ol meri Kristen i save givim bel tru long autim gutnius long olgeta hap bilong graun. (Sng. 68:11) Yu laik wokim plen nau bilong insait long fultaim sevis? Yu ken mekim wok olsem wanpela painia, konstraksen volantia, o wok long Betel. Beten na tokim God long mak yu putim. Toktok wantaim ol narapela em ol i bin winim ol kain mak olsem, na kisim save long wanem samting yu mas mekim bilong winim mak. Na mekim wanpela plen we bai wok gut. Taim yu winim mak yu putim, dispela bai opim rot long yu inap mekim bikpela wok moa bilong Jehova.

18. Wai na wanpela sista i mas makim gut poroman em i laik maritim? (Lukim tu piksa.)

¹⁸ Yu inap makim olsem yu laik marit. Ol pasin na ol skil yumi bin stori long en bai helpim yu long kamap gutpela meri marit. Tru tumas, sapos  yu tingting long marit, i gutpela long yu skelim na makim gut poroman yu laik maritim. Em wanpela bilong ol bikpela disisen tru yu bai mekim. Tingim, yu bai stap aninit long wok bilong man yu bai maritim olsem het bilong famili. (Rom 7:2; Efe. 5:​23, 33) So askim yu yet: ‘Em i wanpela strongpela Kristen? Em i putim ol wok bilong Jehova i stap nambawan samting long laip bilong em? Em i save mekim ol gutpela disisen? Em i redi long tokaut long ol popaia bilong em? Em i save rispektim ol meri? Em i gat ol skil em i nidim bilong lukautim mi long sait bilong bilip, samting bilong skin, na bel na tingting? Em i save mekim gut ol wok bilong em? Olsem, em i mekim wanem ol wok long kongrigesen long nau, na em i mekim gut ol dispela wok o nogat?’ (Luk 16:10; 1 Tim. 5:8) Tru tumas, sapos yu laik painim wanpela gutpela man bilong maritim, yu yet i mas winim ol mak bilong stap olsem gutpela meri marit.

19. Bilong wanem meri marit i ken amamas olsem em i stap “helpim” bilong man bilong em?

¹⁹ Baibel i tok olsem gutpela meri marit em i “helpim” bilong man bilong em na em i “poroman” bilong em. (Stt. 2:18) Yu ting dispela i daunim meri marit? Nogat. Wok bilong meri long stap olsem helpim bilong man bilong em, em wanpela wok i onarim meri marit. Tingim, planti taim Baibel i tok long Jehova i stap olsem “helpim.” (Sng. 54:4; Hib. 13:6) Meri marit i stap olsem helpim tru bilong man bilong em taim em i sapotim em na helpim em long karimaut ol disisen em i mekim bilong famili. Na em i save laikim Jehova, olsem na em i save wok hat long givim gutnem long man bilong em. (Prov. 31:​11, 12; 1 Tim. 3:11) Yu ken redi nau long mekim ol dispela wok long bihain long rot bilong strongim pasin bilong yu long laikim Jehova, na stap olsem gutpela helpim long ol narapela long haus bilong yu na long kongrigesen.

20. Wanpela mama i ken mekim wanem gutpela samting long famili bilong em?

²⁰ Yu inap kamap mama. Bihain long yu marit, yu na man bilong yu inap i gat ol pikinini. (Sng. 127:3) So em gutpela long nau yet yu tingim wanem ol wok yu bai mekim bilong stap olsem gutpela mama. Ol pasin na ol skil em yumi stori long en long dispela atikol bai helpim yu sapos yu kamap wanpela meri marit na mama. Gutpela pasin, pasin laikim, na pasin bilong yu long i no les kwik bai helpim famili bilong yu long stap amamas na helpim ol pikinini bilong yu long pilim seif na pilim olsem yu laikim ol tru.—Prov. 24:3.   

21. Yumi pilim olsem wanem long ol sista bilong yumi, na bilong wanem? (Lukim fran pes piksa.)

²¹ Mipela i laikim yupela tru ol sista, long olgeta wok yupela i mekim bilong Jehova na lain bilong em. (Hib. 6:10) Yupela i save wok hat tru long kisim ol pasin bilong God, na lainim ol nupela skil bilong helpim yupela yet na helpim ol narapela, na redi long mekim ol wok yupela bai mekim long bihain. Yupela i dia tumas long oganaisesen bilong Jehova!