Yu bin ritim gut ol Wastaua bilong dispela yia? Orait, lukim sapos yu inap bekim ol dispela askim:

Dispela tok “kisim nupela tingting” i makim wanem? (Rom 12:2)

Em i makim olsem yumi mekim ol gutpela pasin, na i no dispela tasol. Em i makim tu olsem yumi skelim tru ol tingting i stap insait long bel bilong yumi na mekim ol senis bambai laip bilong yumi i stret wantaim ol lo bilong God.—w23.01, p. 8-9.

Hau yumi ken holim stretpela tingting taim yumi lukim ol samting i wok long kamap long dispela graun?

Yumi laik tru long save long hau ol samting i kamap long graun long nau i wok long truim ol tok profet bilong Baibel. Tasol yumi no laik kamapim nabaut ol tingting bilong yumi yet bikos dispela inap brukim lain insait long kongrigesen, mobeta yumi stori long ol tok i kam long rot bilong oganaisesen bilong Jehova. (1 Kor. 1:10)—w23.02, p. 16.

Long wanem rot baptais bilong Jisas i no wankain long baptais bilong ol disaipel bilong em?

Jisas i bon insait long wanpela lain i dediket pinis long God, olsem na i no gat wok long em i dediketim em yet long Jehova olsem yumi save mekim. Jisas em i gutpela olgeta, na em i no gat sin. I no gat wok long em i tanim bel long wanpela sin.—w23.03, p. 5.

Hau yumi ken helpim ol narapela long bekim tok long ol miting?

Yumi ken bekim ol sotpela tok, na bai ol narapela inap long bekim tok tu. Na tu, yumi ken abrusim pasin bilong stori long planti samting. Long dispela rot, ol narapela inap bekim tok na stori long ol narapela poin.—w23.04, p. 23.

“Bikrot Bilong Pasin Holi” em Aisaia 35:8 i stori long en i makim wanem samting?

Long bipo, dispela bikrot em profet Aisaia i stori long en em wanpela tok piksa na i makim raun bilong ol Juda i go bek long Jerusalem. Olsem wanem long taim bilong yumi? Inap planti handret yia paslain long 1919, ol i bin mekim ol samting bilong redim rot, olsem trensletim na prinim ol Baibel, na ol i mekim ol narapela samting tu. Lain bilong God i wokabaut long dispela “Bikrot Bilong Pasin Holi” we i bringim ol i go long paradais bilong bilip long nau, na em bai bringim ol i go kisim ol blesing aninit long Kingdom.—w23.05, p. 15-19.

Provep sapta 9 i mekim tok piksa long husat tupela meri bilong givim skul long yumi?

Buk Provep i stori long wanpela “longlong meri” em ol man i bihainim singaut bilong em ol bai go stap insait tru long “Matmat. Na em i stori tu long narapela meri i makim “trupela savetingting” em ol man i bihainim singaut bilong em ol bai “kliagut long ol samting” na ol bai kisim laip oltaim. (Prov. 9:​1, 6, 13, 18)—w23.06, p. 22-24.

Olsem wanem pasin daun bilong God i stap ples klia long pasin em i mekim long Lot?

Jehova i tokim Lot long ranawe lusim Sodom na go long ples maunten. Taim Lot i askim God sapos em orait long ol i ranawe i go hait long Soar, God i orait long dispela askim bilong em.—w23.07, p. 21.

Meri marit i ken mekim wanem sapos man bilong em i save lukim ponografi?

Em i mas tingim olsem em i no asua bilong em. Em i ken traim long putim tingting long pasin pren bilong em wantaim God na tingim tingim long bel stori bilong ol meri long Baibel em ol i bin kisim bel isi long God. Em i ken helpim poroman marit bilong em long stap longwe long ol samting i laik pulim em.—w23.08, p. 14-17.

Taim ol narapela i kwestenim ol bilip bilong yumi, olsem wanem gutpela tingting i ken helpim yumi long mekim pasin isi?

Yumi ken holim tingting olsem askim em man i givim long yumi em i gutpela rot bilong save long tingting bilong em. Dispela bai helpim yumi long bekim tok bilong em long pasin isi.—w23.09, p. 17.

Yumi inap kisim wanem skul long Maria long hau yumi ken kisim strong?

Taim Maria i save olsem em bai kamap mama bilong Mesaia, em i kisim strong long ol narapela. Gebriel na Elisabet i kamapim ol tok bilong Ol Skripsa bilong strongim Maria. Yumi tu i ken kisim strong long rot bilong ol wanbilip.—w23.10, p. 15.

Jehova inap bekim ol beten bilong yumi olsem wanem?

Em i promis long harim ol beten bilong yumi na tingim hau beten bilong yumi i stret wantaim samting em i tingting pinis long mekim. (Jer. 29:12) Em inap bekim ol wankain beten long narapela narapela rot, tasol oltaim em bai sapotim yumi.—w23.11, p. 21-22.

Rom 5:2 i stori long pasin bilong “bilip na wet,” so wai na ves 4 i stori gen long dispela pasin?

Taim man i harim gutnius, em inap bilip na wet long stap laip long Paradais long graun. Tasol taim em i sanap strong na karim ol pen na hevi na em i luksave olsem God i orait long em, pasin bilong em long bilip na wet bai kamap strong tru.—w23.12, p. 12-13.