Mi bon long 1927 long wanpela liklik taun klostu long Chicago, Illinois, long Amerika. Papa na Mama i gat 5-pela pikinini, em Jetha, Don, mi, Karl, na Joy. Mipela olgeta i tingting strong long givim bel olgeta long mekim wok bilong Jehova. Jetha i go long namba 2 klas bilong Skul Gileat long 1943. Don, Karl, na Joy i go wok long Betel long Brooklyn, New York. Don i go long 1944, Karl i go long 1947, na Joy i go long 1951. Gutpela eksampel bilong ol na eksampel bilong papamama bilong mipela i bin mekim bikpela samting tru long mi.

Papa na Mama i save ritim Baibel na ol i laikim God na ol i skulim mipela ol pikinini long mekim olsem tu. Tasol Papa i no rispektim moa ol lotu bihain long em i kamap soldia na i go long Yurop na insait long pait bilong Wol Woa 1. Mama i amamas tru olsem Papa i stap laip yet na em i kam bek long mipela, so em i tokim Papa olsem: “Karl, yumi go long lotu olsem yumi save mekim bipo.” Papa i tok: “Bai mi kisim yu go, tasol mi no inap go insait.” Mama i tok: “Bilong wanem?” Papa i tok: “Long taim bilong woa, ol bikman bilong wankain lotu, ol i stap long narapela narapela sait bilong pait na ol i blesim ol soldia na ol wepen! Ating God i stap long tupela sait wantaim, a?”

Bihain taim Mama i stap long haus lotu, tupela Witnes Bilong Jehova i kam long haus bilong mipela. Ol i givim Papa tupela buk bilong mekim Baibel stadi, nem bilong ol dispela buk em Light na ol i stori long Buk Revelesen. Papa i laik kisim save moa so em i orait long kisim ol dispela buk. Taim Mama i lukim ol dispela buk, em i kirap long ritim ol. Wanpela taim em i lukim toksave long wanpela lokol niuspepa i invaitim ol lain i laik stadi long Baibel long rot bilong dispela tupela buk Light. So Mama i go. Taim em i go kamap long haus ol i mekim Baibel stadi long en, wanpela meri i gat bikpela krismas i kam long dua. Mama i holim wanpela bilong ol dispela buk na em i askim dispela meri olsem: “Yupela i wok long stadi long dispela buk?” Dispela meri i tok: “Yes pikinini, kam insait.” Long wik bihain, Mama i kisim mipela olgeta pikinini i go wantaim em na mipela i mekim olsem long olgeta wik.

Long wanpela miting, kondakta i askim mi long ritim Buk Song 144:​15, dispela ves i tok ol manmeri i lotuim Jehova ol i ken amamas. Mi pilim tru ol dispela tok na tok bilong tupela narapela ves, em  1 Timoti 1:​11, em i tok Jehova em i “God bilong amamas,” na Efesus 5:1 we i kirapim yumi long “bihainim pasin bilong God.” Mi luksave olsem mi mas amamas long mi inap mekim wok bilong Krieta bilong mi na tok tenkyu long em i givim mi dispela blesing. Dispela tupela samting i bin stap olsem bikpela samting long laip olgeta bilong mi.

Kongrigesen mipela i save go long en i stap long Chicago na em longwe inap olsem 32 kilomita. Maski i olsem, mipela i save go na mi wok long lainim planti samting long Baibel. Mi inap tingim wanpela taim kondakta i makim Jetha long bekim tok. Mi harim bekim bilong Jetha na mi tingting olsem: ‘Mi save long dispela. Mi inap long putim han na bekim dispela tok.’ So mi kirap long redim ol bekim bilong mi yet na bekim ol tok long miting. Bikpela samting moa, mi kamap strong long bilip wankain olsem ol bratasista bilong mi i mekim. Mi kisim baptais long 1941.

Mi tingim yet kibung i kamap long Cleveland, Ohio long 1942. Ol bratasista long winim 50 ples long Amerika i konek long rot bilong fon long harim ol tok i kamap long kibung. Famili bilong mipela i stap long ol haus sel wantaim planti narapela famili long wanpela ples klostu long hap kibung i kamap long en. Wol Woa 2 i kamap long dispela taim, na pasin bilong birua long ol Witnes Bilong Jehova i go bikpela tru. Long ol apinun, mi save lukim ol brata i pakim kar na bai ol kar i no feisim ol haus sel na ol i save larim lait bilong kar i feis i go aut. Olgeta brata i pasim tok olsem wan wan brata bai sindaun insait long kar bilong ol yet na putim was long nait olgeta. Sapos ol birua i kam, ol brata i mas presim hon bilong kar na putim hetlait bilong kar na bai lait i sain strong long pes bilong ol birua na bai ol i no ken lukluk gut. Long dispela rot ol narapela brata bai ron i kam bilong helpim ol. Mi tingting olsem, ‘Lain bilong Jehova i redi gut long olgeta kain samting i kamap!’ Dispela i mekim bel bilong mi i stap isi na mi slip gut long nait, na i no gat hevi i bin painim mipela.

Planti yia bihain, taim mi tingim gen dispela kibung, mi luksave olsem mama bilong mi i no bin pret o tingting planti. Em i trastim tru Jehova na oganaisesen bilong em. Mi no inap tru long lusim tingting long gutpela eksampel bilong em.

Paslain liklik long dispela kibung i kamap, Mama i kamap painia oltaim. So long taim bilong kibung, em i putim gut yau long ol tok i stori long fultaim sevis. Taim mipela i wok long go bek long haus, em i tok: “Mi laik mekim yet wok painia, tasol mi no inap mekim olsem na long wankain taim mekim gut ol wok bilong haus.” So em i askim mipela long helpim em. Mipela i wanbel long mekim olsem, so Mama i makim mipela wan wan long klinim wanpela o tupela rum paslain long mipela i kaikai brekfas. Bihain long mipela i go long skul, em i save sekim haus bilong lukim olsem olgeta samting i stap orait paslain long em i go autim tok. Em i wanpela bisi meri, tasol oltaim em i lukautim gut mipela ol pikinini bilong em. Taim mipela i kam long haus long belo o bihain long skul i pinis, oltaim em i stap pinis long haus na wetim mipela. Sampela taim bihain long skul i pinis, mipela i save go autim tok wantaim em, na dispela i helpim mipela long luksave olsem wok painia em i bikpela samting.

Mi kirap mekim wok painia taim mi gat 16 krismas. Maski Papa i no kamap Witnes yet long dispela taim, em i laik save long wok autim tok bilong mi i go olsem wanem. Wanpela apinun, mi tokim em olsem maski mi givim bel olgeta long autim tok, mi no  painim yet wanpela husat i laik stadi long Baibel. Mi no mekim wanpela tok, na bihain mi askim em olsem: “Yu bai orait long mi stadi wantaim yu?” Em i lusim liklik haptaim long skelim tingting na em i tok: “Mi no inap tingim wanpela gutpela risen bilong tok nogat.” Yes, fes Baibel sumatin bilong mi em papa bilong mi. Dispela em wanpela gutpela blesing mi kisim!

Mipela i stadi long buk “The Truth Shall Make You Free.” Bihain long mipela i stadi inap sampela haptaim, mi luksave olsem Papa i wok long helpim mi long kamap gutpela sumatin na tisa. Olsem, wanpela nait mipela i ritim wanpela paragraf, na em i tok: “Mi klia long buk i tok wanem. Tasol hau na yu save olsem tok buk i mekim i stret?” Mi no redi long bekim dispela askim, so mi tokim em: “Mi no inap pruvim long yu long nau, tasol mi inap bekim dispela askim long neks stadi bilong yumi.” Na mi bin mekim olsem. Mi painim ol ves i sapotim poin mitupela i stori long en. Bihain long dispela, mi lain long mekim gut ol wok painimaut na bai mi inap redi gut paslain long mi stadi wantaim em. Dispela i helpim mi na Papa wantaim long kamap strong long bilip. Em i bihainim ol tok em i lainim na em i kisim baptais long 1952.

Mi lusim haus taim mi gat 17 krismas. Jetha a i kamap misineri, na Don i wok long Betel. Tupela i laikim tru asainmen bilong tupela, na dispela i bin strongim mi tru. So mi aplai long go long Betel na Skul Gileat na mi lusim ol samting long han bilong Jehova. Wanem gutpela samting i kamap? Ol i invaitim mi long go wok long Betel long 1946.

Insait long ol yia i go pinis, mi bin mekim planti narapela narapela asainmen long Betel, so mi lainim planti nupela samting. Insait long 75 yia mi wok long Betel, ol i bin skulim mi hau long wokim ol buk na mekim wok bilong akauns. Na tu, mi kisim save long hau long baim ol samting em Betel i nidim na hau long sipim ol samting i go long ol narapela kantri. Bikpela samting moa, mi amamas long ol tok bilong Baibel em yumi save harim long Betel Moning Wosip program na ol narapela tok o program bilong Baibel olsem ol Betel leksa.

Na tu, mi lainim planti samting long liklik brata bilong mi Karl, em i kam long Betel long 1947. Em i gutpela sumatin na tisa bilong Baibel. Wanpela taim mi askim em long helpim mi wantaim wanpela tok em mi bai mekim. Mi tokim Karl olsem mi bin bungim planti infomesen, tasol mi no save wanem infomesen mi bai yusim. Em i helpim mi long rot bilong wanpela askim, em i tok: “Joel, wanem tim bilong tok bilong yu?” Hariap tru mi kisim poin bilong tok bilong em—i gutpela moa long mi yusim ol infomesen i stret long tok bilong mi na ol narapela mi ken larim i stap. Dispela em gutpela skul mi no bin lusim tingting long en.

Bilong stap amamas long Betel, yumi mas insait tru long mekim wok autim tok, na dispela inap opim  rot long yumi bai gat ol gutpela ekspiriens. Wanpela ekspiriens mi ken tingim em olsem, wanpela apinun mipela i autim tok long Bronx long New York City. Mi na wanpela brata i go lukim wanpela meri em pastaim em i bin kisim nius Wastaua na Kirap! Mipela i kirapim tok olsem: “Long nau apinun, mipela i wok long helpim ol manmeri long kisim save long ol gutpela tok i stap long Baibel.” Em i tok: “Sapos yupela i kam bilong stori long Baibel, orait kam insait.” Mipela i ritim na stori long sampela skripsa i stori long Kingdom Bilong God na long nupela taim em klostu nau bai kamap. Em i pilim tru ol tok em i lainim, so em i invaitim sampela pren bilong em long joinim mipela long wik bihain. Bihain em na man bilong em i kamap ol wokman bilong Jehova.

Mi wok long painim wanpela poroman bilong maritim klostu 10-pela yia paslain long mi bungim meri bilong mi. Wanem samting i helpim mi long painim gutpela meri bilong maritim? Mi bin beten na mi tingting olsem, ‘Bihain long mi marit, mi laik bai mi na meri bilong mi i mekim wanem?’

Bihain long kibung i kamap long Yankee Stadium long 1953, mi bungim wanpela sista nem bilong em Mary Aniol. Tupela Jetha i bin stap long namba 2 klas bilong Skul Gileat, na tupela i bin mekim wok misineri wantaim long seim ples. Mary i amamas tru na em i stori long mi long ol misineri asainmen bilong em long Karibian na ol Baibel stadi em i bin mekim insait long ol yia i go pinis. Taim mipela i save gut moa long narapela narapela, mipela i luksave olsem mipela i putim ol wankain mak bilong bilip em mipela i laik winim. Mipela i laikim tru narapela narapela, olsem na mipela i marit long Epril 1955. Long planti rot, Mary em olsem presen Jehova i givim mi na em i stap gutpela piksa em mi ken bihainim. Em i amamas long mekim olgeta asainmen em i kisim. Em i wok hat tru, tingim tru ol narapela, na oltaim em i putim wok bilong Kingdom i stap nambawan samting long laip bilong em. (Mat. 6:33) Mitupela i mekim wok sekit inap 3-pela yia, na long 1958, ol i invaitim mitupela i go long Betel.

Mi kisim planti skul long Mary. Olsem, taim mipela i marit nupela, mipela i save mekim Baibel ritim wantaim; mipela i save ritim inap olsem 15 ves. Bihain long wanpela bilong mipela i ritim wanpela hap bilong Baibel, mipela bai stori long skul mipela i kisim long ol skripsa na hau mipela i ken bihainim ol dispela tok long laip bilong mipela. Planti taim Mary i save stori long mi long ol samting em i lainim long Skul Gileat o long taim em i mekim wok misineri. Ol dispela stori i helpim mi long mekim gut ol tok bilong mi na save long rot bilong strongim ol sista.—Prov. 25:11.

Gutpela poroman bilong mi Mary i dai long 2013. Mi misim em tru na mi wet long lukim em long nupela taim! Tasol long nau yet, mi tingting strong long wok yet long lainim planti samting moa na trastim yet Jehova long bel olgeta bilong mi. (Prov. 3:​5, 6) Mi kisim bel isi na amamas taim mi tingim ol samting em lain bilong Jehova bai mekim long nupela taim. Long dispela taim, Nambawan Bikpela Tisa bilong yumi bai lainim yumi long planti nupela samting, na tu, yumi bai save gut moa long ol pasin bilong Em! Yes, mi tenkyu tru olsem Jehova i wok yet long skulim mi long planti samting moa na long bikpela pasin helpim em i soim long mi long planti rot.