1-2. Wanem ol samting inap mekim na yumi krai?

 YUMI olgeta i save krai sampela taim. Taim sampela samting i kamap na i mekim yumi amamas tru, yumi inap krai bilong soim amamas. Ating yu bin krai taim wanpela bikpela samting o wanpela spesel samting i kamap long yu—olsem taim bebi bilong yu i bon, taim yu tingim wanpela gutpela memori, o taim yu lukim wanpela gutpela pren em yu no bin lukim em inap planti yia.

² Tasol planti taim yumi save krai bikos sampela samting i mekim yumi bel hevi tru. Olsem, yumi inap krai taim wanpela i bagarapim tru bel bilong yumi. Yumi inap krai taim yumi sik inap longpela taim na yumi karim bikpela pen o yumi krai sori taim wanpela yumi laikim i dai. Long kain taim olsem, yumi inap pilim wankain olsem profet Jeremaia i bin pilim taim ol Babilon i pait na daunim Jerusalem. Jeremaia i tok: “Aiwara i kapsait i kam daun olsem wara long ai bilong mi. Oltaim aiwara i ran i kam daun long ai bilong mi, na mi no malolo liklik long krai.”—Kra. 3:​48, 49.

3. Jehova i save pilim olsem wanem taim em i lukim ol wokman bilong em i karim pen na hevi? (Aisaia 63:9)

³ Jehova i lukim hamas aiwara yumi lusim taim yumi krai bikos long ol hevi i kamap na i mekim yumi bel hevi. Baibel i tokim yumi olsem em i save long ol pen na hevi yumi wan wan i karim, na em i save harim yumi taim yumi krai na askim em long helpim yumi. (Sng. 34:15) Jehova i save lukim yumi na harim beten bilong yumi, na em i mekim sampela samting moa. Olsem wanpela gutpela Papa, em i save pilim sori tru taim em i lukim ol pikinini bilong em i krai, na em i laik tru long helpim ol.—Ritim Aisaia 63:9.

4. Sampela eksampel long Baibel inap givim wanem skul long yumi long tingting bilong Jehova?

⁴ Long Baibel, Jehova i kamapim klia samting em i bin mekim  taim ol wokman bilong em i krai. Yumi inap luksave long dispela taim yumi skelim stori bilong Hana, Devit, na King Hesekia. Wanem samting i mekim na ol i krai? Jehova i mekim wanem taim ol i krai na askim em long helpim ol? Na olsem wanem eksampel bilong ol inap mekim isi bel bilong yumi taim yumi krai bikos yumi bel hevi, bikos narapela i no stap gut long yumi, o bikos yumi pilim olsem yumi no gat moa hop?

KRAI BIKOS YUMI BEL HEVI

5. Hana i pilim olsem wanem long sindaun bilong em?

⁵ Hana i bungim sampela hevi we i mekim em i bel hevi tru na em i krai. Wanpela bilong ol dispela hevi em olsem, man bilong em i gat 2-pela meri na namba 2 meri, Penina, i save heitim tru Hana. Samting i mekim na Hana i bel hevi moa em olsem, Penina i gat sampela pikinini, tasol Hana i no gat pikinini. (1 Sml. 1:​1, 2) Olgeta taim Penina i save tok bilas long Hana bikos em i no inap long karim pikinini. Yu bai pilim olsem wanem sapos yu bungim kain hevi olsem? Hana i bel hevi tru, olsem na “em i save krai na i no save kaikai,” na long bel em i “pilim nogut tru.”—1 Sml. 1:​6, 7, 10.

6. Hana i mekim wanem bilong kisim bel isi?

⁶ Hana i mekim wanem bilong kisim bel isi? Wanpela samting i helpim Hana em olsem, em i go long haus lotu sel em ples bilong mekim lotu i tru. Long dispela hap—ating em long wanpela hap klostu long rot i go insait long ples bung bilong haus lotu sel—“em i krai moa yet na em i beten long Jehova.” Em i beten na askim Jehova olsem: “Lukim mi wokmeri bilong yu na lukim hevi mi karim na tingim mi.” (1 Sml. 1:10b, 11) Hana i beten long Jehova na autim tingting na filings bilong em long Em. Ating Jehova i sori tru long lukim Hana, em pikinini meri i dia tumas long em, i bel hevi tru na em i krai!

7. Olsem wanem Hana i kisim bel isi taim em i autim tingting na filings bilong em long Jehova?

⁷ Hana i pilim olsem wanem bihain long em i beten na autim tingting na filings bilong em long Jehova na bihain long Hetpris Eli i mekim ol tok bilong strongim em? Baibel i tok: “Em i lusim [Hetpris Eli] na i go na em i kaikai na em i no bel hevi moa.” (1 Sml. 1:​17, 18) Maski ol samting long sindaun bilong Hana i no senis yet long dispela taim, em i kisim bel isi. Em i putim bel hevi bilong em long han bilong Jehova. Jehova i lukim bel hevi bilong Hana, em i harim krai bilong em, na bihain Em i blesim em na opim rot long em inap karim pikinini.—1 Sml. 1:​19, 20; 2:21.

8-9. Olsem i stret wantaim tok bilong Hibru 10:​24, 25, wai na yumi mas wok strong long go long ol miting Kristen? (Lukim tu piksa.)

⁸ Skul yumi kisim. Olsem wanem? Yu wok long karim wanpela bikpela hevi we i mekim yu bel hevi na aiwara i pundaun taim yu krai? Ating yu wok long krai sori long wanpela wanfamili o pren bilong yu i dai. Long kain taim  olsem, em nomol long yu laik stap yu yet. Tasol wankain olsem Hana i kisim bel isi na tok bilong strongim em taim em i go long haus lotu sel, yu tu inap kisim bel isi taim yu go long ol miting Kristen—maski sampela taim yu no pilim gut tumas. (Ritim Hibru 10:​24, 25.) Long ol miting, taim yumi putim yau long ol Baibel ves i stori long ol gutpela samting, Jehova i ken helpim yumi long kisim ol gutpela tingting na yumi no tingim moa ol samting i mekim yumi bel hevi. Dispela inap helpim yumi long bosim gut ol samting yumi pilim long bel, maski hevi yumi karim i no pinis hariap.

⁹ Long ol miting, yumi save amamas tu long bung wantaim ol wanbilip em ol i gat pasin sori, na ol gutpela tok ol i mekim na pasin laikim bilong ol i save strongim yumi. (1 Tes. 5:​11, 14) Tingim stori bilong wanpela spesel painia brata em meri bilong em i dai. Em i tok: “Mi save krai planti. Sampela taim, mi save sindaun long wanpela kona na krai tasol. Tasol ol miting bilong yumi i strongim mi tru. Ol gutpela tok bilong ol bratasista i save mekim gut bel bilong mi. Maski mi tingting planti na wari nogut tru paslain long mi go kamap long miting, oltaim mi save pilim gut taim mi stap long hap.” Taim yumi stap long ol miting bilong yumi, Jehova inap yusim ol bratasista long helpim yumi.

10. Olsem wanem yumi ken bihainim eksampel bilong Hana taim bel bilong yumi i bagarap tru?

¹⁰ Hana i kisim bel isi tu taim em i beten na tokim Jehova long hau em i pilim. Yu tu i ken “putim olgeta hevi bilong [yu] long han bilong” Jehova, na yu ken bilip tru olsem em bai putim yau long yu. (1 Pita 5:7) Wanpela sista em ol raskol i bin kilim i dai man bilong em, em i tok: “Mi pilim olsem lewa bilong mi i bruk i go liklik liklik na em i no inap kamap orait gen. Mi kisim bel isi taim mi beten long gutpela Papa bilong mi long heven, Jehova. Sampela taim, mi no save mi bai tok wanem, tasol em i kliagut long tingting bilong mi. Taim bel bilong mi i bagarap tru, mi save beten long kisim bel isi. Mi save pilim wanpela kain bel isi na tingting na bel bilong mi i save stap isi tru na mi inap mekim ol samting mi laik mekim.” Taim yu beten na kamapim bel na tingting bilong yu long Jehova, em i save sori tru long yu na em i kliagut long bel pen yu pilim. Maski ol hevi i mekim yu tingting planti i stap yet, Jehova inap mekim isi bel bilong yu na helpim yu long stap bel isi. (Sng. 94:19; Fili. 4:​6, 7) Na em bai blesim pasin bilong yu long sanap strong na karim hevi.—Hib. 11:6.

KRAI BIKOS WANPELA I NO STAP GUT LONG YUMI

11. Devit i pilim olsem wanem long ol bikpela hevi em i karim?

¹¹ Long laip bilong Devit, em i karim sampela bikpela hevi we i mekim na em i krai. Ol narapela i heitim em na ol man em i trastim ol i no stap gut long em. (1 Sml. 19:​10, 11; 2 Sml. 15:​10-14, 30) Wanpela taim em i tok: “Mi wari tumas na dispela i pinisim strong bilong mi; long nait olgeta mi krai na aiwara bilong mi i wasim bet bilong mi; mi krai moa yet na ples bilong mi long slip i pulap long aiwara.” Wai na Devit i pilim olsem? Em i tok: “Long wanem, ol man i mekim nogut long mi.” (Sng. 6:​6, 7) Ol pasin nogut ol narapela i mekim long Devit i mekim na em i pilim bikpela bel pen tru na em i krai planti.

12. Olsem Buk Song 56:8 i kamapim, Devit i bilip tru long wanem samting?

¹² Maski Devit i karim planti hevi, em i bilip tru olsem Jehova i laikim em. Em i tok: “Jehova bai harim krai bilong mi.” (Sng. 6:8) Long narapela taim, Devit i mekim dispela naispela tok i stap long Buk Song 56:8. (Ritim.) Ol dispela tok i kamapim klia olsem Jehova i laikim yumi na em i tingim yumi tru. Devit i pilim olsem Jehova i bungim ol aiwara bilong em na putim insait long wanpela beg wara o raitim ol  long wanpela buk. Em i save tru olsem Jehova i lukim em na tingim pen na hevi em i karim. Devit i bilip tru olsem gutpela Papa bilong em long heven i save long ol hevi em i karim, na i no dispela tasol, em i save tu long hau Devit i pilim taim em i karim ol dispela hevi.

13. Taim ol narapela i bagarapim bel bilong yumi, wanem samting inap mekim isi bel bilong yumi? (Lukim tu piksa.)

¹³ Skul yumi kisim. Olsem wanem? Yu wok long karim hevi long wanpela i bagarapim bel bilong yu o wanpela yu trastim i no stap gut long yu? Ating lewa bilong yu i bruk bikos prensip bilong yu wantaim wanpela o marit bilong yu i bagarap, o ating wanpela yu laikim i stop long lotuim Jehova. Wanpela brata em meri bilong em i mekim pasin adaltri na lusim em, em i tok: “Mi kirap nogut tru na mi no bilip olsem dispela samting i kamap. Mi pilim yusles, mi pilim sore, na mi belhat.” Sapos yu wok long karim hevi bikos wanpela yu trastim i no stap gut long yu o wanpela i bagarapim bel bilong yu, orait yu ken kisim bel isi long save olsem Jehova i no inap tru long lusim yu. Dispela brata i tok: “Mi luksave olsem pasin pren namel long ol manmeri inap bagarap, tasol Jehova em i olsem Bikpela Ston bilong yumi. Maski wanem samting i kamap, oltaim em bai stap bilong helpim yumi. Em i no inap lusim ol man i stap gut long em.” (Sng. 37:28) Na tu, tingim olsem pasin laikim bilong Jehova i winim tru pasin laikim bilong ol manmeri. Maski yu pilim bikpela bel pen tru taim wanpela yu trastim i no stap gut long yu, dispela i no senisim tingting Jehova i gat long yu. Yu dia tumas long em. (Rom 8:​38, 39) Poin em olsem: Maski ol man i mekim pasin i no stret long yu, Papa bilong yu long heven i laikim yu tru.

14. Tok bilong Buk Song 34:18 i strongim yumi olsem wanem?

¹⁴ Maski yumi bel hevi bikos wanpela yumi trastim i no stap gut long yumi, yumi inap kisim bel isi long tok bilong Devit long Buk Song 34:18. (Ritim.) Wanpela buk i tok dispela tok “ol manmeri bel bilong ol i bagarap” inap makim “ol manmeri em ol i no luk fowed long gutpela samting i painim ol.” Jehova i save mekim wanem long ol manmeri em ol i pilim olsem bikos bel bilong ol i bagarap tru? Olsem wanpela gutpela papa i save holim pikinini bilong em na mekim isi bel bilong em taim em i bel hevi, Jehova i “save stap klostu” long yumi—oltaim em i save sori na redi long helpim yumi taim yumi pilim olsem bel bilong yumi i bagarap tru bikos wanpela i no stap gut long yumi o wanpela yumi laikim i dai. Jehova i laik tru long mekim isi bel bilong yumi taim bel bilong yumi i bagarap na yumi pilim olsem yumi samting nating. Na em i givim yumi planti samting long luk fowed long en we inap helpim yumi long sanap strong na karim ol hevi bilong nau.—Ais. 65:17.

 KRAI BIKOS YUMI PILIM OLSEM I NO GAT HOP MOA

15. Wai na Hesekia i bel hevi tru na em i krai?

¹⁵ Taim King Hesekia bilong Juda i gat 39 krismas, em i painimaut olsem em i kisim bikpela sik we i no inap pinis. Profet Aisaia i bringim tok bilong Jehova i go long Hesekia na tokim em olsem em bai dai long dispela sik. (2 Kin. 20:1) I luk olsem Hesekia i no gat hop moa. Bel bilong em i bagarap tru taim em i harim dispela nius, na em i krai nogut tru. Em i beten strong long Jehova long helpim em.—2 Kin. 20:​2, 3.

16. Jehova i mekim wanem taim Hesekia i krai nogut tru na beten long em?

¹⁶ Taim Hesekia i krai nogut tru na em i beten, Jehova i pilim sori long Hesekia na em i tokim em olsem: “Mi harim prea bilong yu. Na mi lukim aiwara bilong yu. Nau bai mi mekim yu i kamap orait gen.” Long rot bilong Aisaia, Jehova i mekim pasin marimari na em i promis long skruim sampela moa yia long laip bilong Hesekia na kisim bek Jerusalem long han bilong ol Asiria.—2 Kin. 20:​4-6.

17. Olsem wanem Jehova i save helpim yumi taim yumi karim hevi bilong ol bikpela sik? (Buk Song 41:3) (Lukim tu piksa.)

¹⁷ Skul yumi kisim. Olsem wanem? Yu wok long karim hevi long wanpela bikpela sik na yu pilim olsem i no gat hop moa? Beten long Jehova, na yu ken krai tu taim yu mekim olsem. Baibel i tokim yumi olsem: “Papa bilong marimari na God bilong mekim isi bel bilong ol man long olgeta kain taim” bai mekim isi bel bilong yumi long olgeta hevi yumi karim. (2 Kor. 1:​3, 4) Long nau, yumi no ken ting olsem Jehova bai rausim olgeta hevi bilong yumi, tasol yumi ken bilip tru olsem oltaim em bai helpim yumi. (Ritim Buk Song 41:3.) Long rot bilong holi spirit bilong em, Jehova i save givim yumi strong, savetingting, na bel isi long karim ol hevi. (Prov. 18:14; Fili. 4:13) Na tu, long rot bilong Baibel, em i helpim yumi long bilip na wet long lukim dispela taim bihain we olgeta kain sik bai pinis olgeta.—Ais. 33:24.

18. Wanem skripsa i bin mekim isi bel bilong yu taim yu bungim wanpela hevi we i givim hatwok tru long yu? (Lukim blok “ Ol Gutpela Tok Bilong Pinisim Aiwara Bilong Yumi.”)

¹⁸ Ol tok bilong Jehova i bin mekim isi bel bilong Hesekia. Yumi tu inap kisim bel isi long Tok Bilong God. Jehova i bin lukautim gut ol gutpela tok i stap long Baibel bilong helpim yumi taim yumi bungim ol bikpela hevi. (Rom 15:4) Taim wanpela sista long Wes Afrika i painimaut olsem em i gat sik kensa, planti taim em i save krai. Em i tok: “Wanpela skripsa i save mekim isi bel bilong mi em Aisaia 26:3. Maski yumi no inap pasim ol hevi long painim yumi, dispela ves i strongim mi olsem Jehova i ken givim yumi dispela bel isi we inap helpim yumi long bosim gut tingting na pasin bilong yumi taim ol hevi i kamap.” Olsem wanem? I gat  wanpela skripsa we yu pilim olsem em i mekim isi bel bilong yu taim yu bungim ol hevi i traim tru bilip bilong yu, o ating i mekim na yu pilim olsem i no gat hop moa?

19. Wanem samting bai painim yumi long bihain?

¹⁹ Yumi stap klostu tru long pinis bilong las de, na yumi ken save olsem planti hevi moa bai kamap na i givim pen long yumi na mekim yumi krai. Tasol olsem yumi lainim long eksampel bilong Hana, Devit, na King Hesekia, Jehova i lukim ol aiwara bilong yumi taim yumi krai na em i pilim tru hevi bilong yumi. Ol aiwara bilong yumi i dia tumas long em. So taim yumi bungim ol hevi we i bagarapim tru bel bilong yumi, yumi mas beten na kamapim bel na tingting bilong yumi long Jehova. Oltaim yumi mas pas gut wantaim ol bratasista long kongrigesen. Na yumi ken wok yet long kisim bel isi long ol gutpela tok bilong mekim isi bel bilong yumi i stap long Baibel. Yumi ken save tru olsem, sapos yumi wok yet long sanap strong na karim hevi, Jehova bai blesim yumi. Dispela i makim tu samting em i tok promis long mekim olsem em bai “mekim drai aiwara” i stap long ai bilong yumi, em ol aiwara bilong pen na hevi. (Rev. 21:4) Olsem na long nupela taim, taim yumi krai, em bai krai bilong amamas tasol.