1. Sampela inap pilim olsem wanem long stap laip oltaim?

 PLANTI manmeri i save was gut long kaikai ol i kisim na ol i save eksasais olgeta taim bilong ol i ken stap helti. Tasol ol i no gat tingting olsem ol bai stap laip oltaim. Sapos ol i gat laik long stap laip oltaim, dispela bai i olsem wanpela driman nating bikos bihain ol bai kamap lapun na ol hevi bilong lapun bai painim ol. Maski i olsem, Jisas i tok olsem yumi ol man inap stap “laip oltaim” olsem tok bilong em long Jon 3:16 na 5:24 i kamapim.

2. Jon sapta 6 i tok wanem long laip oltaim? (Jon 6:​39, 40)

² Wanpela taim Jisas i wokim mirakel na em i givim bret na pis long planti tausen manmeri. a Em narakain samting em i mekim, tasol tok em i mekim long de bihain i mekim planti manmeri i kirap nogut tru. Dispela bikpela lain manmeri i bihainim em i go long Kaperneam klostu long nambis bilong Galili, na long dispela hap em i tokim ol olsem ol manmeri bai kirap bek na ol bai stap laip oltaim. (Ritim Jon 6:​39, 40.) Tingim tok Jisas i mekim taim yu tingim samting bai painim ol famili na pren bilong yu em ol i dai pinis. Tok bilong Jisas i makim olsem planti manmeri em ol i dai pinis, ol bai kirap bek na yu na ol wanfamili na ol pren bilong yu bai amamas long stap laip oltaim. Tasol planti man i hatwok long kliagut long ol narapela tok Jisas i mekim i stap long Jon sapta 6. Nau yumi ken skelim gut ol dispela tok.

3. Olsem Jon 6:51 i kamapim, Jisas i tok wanem long em yet?

 ³ Bihain long Jisas i wokim mirakel na givim kaikai long bikpela lain manmeri long Kaperneam, dispela i kirapim ol long tingim mana em Jehova i givim long ol tumbuna papa bilong ol long ples drai nating. Baibel i kolim dispela mana olsem “bret bilong heven.” (Sng. 105:40; Jon 6:31) Jisas i stori long mana bilong givim wanpela bikpela skul long ol manmeri. God i wokim mirakel na givim mana olsem kaikai long lain Israel, tasol ol manmeri i kaikai mana, bihain ol i dai. (Jon 6:49) Tasol Jisas i kolim em yet olsem “bret tru i kam long heven,” “bret God i givim,” na “bret bilong laip.” (Jon 6:​32, 33, 35) Jisas i helpim ol manmeri long luksave olsem mana i kam long heven i no wankain long em yet. Em i tok: “Mi dispela bret i gat laip na i lusim heven na i kam daun. Sapos man i kaikai dispela bret em bai stap oltaim.” (Ritim Jon 6:51.) Ol dispela Juda i kirap nogut tru. Hau na Jisas i ken tok olsem em yet i “bret” i gutpela olgeta i kam long heven na em i winim mana em God i bin wokim mirakel na givim long ol tumbuna papa bilong ol? Jisas i mekim wanpela tok bilong helpim ol long kliagut long tok bilong em olsem: “Bret mi givim, em bodi bilong mi.” Wanem mining bilong dispela tok bilong em? Em i bikpela samting long yumi kliagut long tok em i mekim bikos dispela bai soim hau yumi na ol wanfamili bilong yumi i ken kisim laip oltaim. Nau yumi ken skelim mining bilong tok Jisas i mekim.

BRET I GAT LAIP NA BODI BILONG EM

4. Wai na sampela manmeri i kirap nogut long tok Jisas i mekim?

⁴ Sampela manmeri i kirap nogut long harim tok Jisas i mekim olsem em bai givim “bodi bilong [em], na . . . bai ol manmeri bilong graun i ken kisim laip.” Yu ting ol i kisim tingting olsem em bai givim bodi tru tru bilong em yet long ol bilong kaikai? (Jon 6:52) Lukim narapela tok Jisas i mekim we ol i kirap nogut moa long en, olsem: “Sapos yupela i no kaikai bodi bilong Pikinini bilong man na dringim blut bilong em, orait yupela bai i no gat laip i stap long yupela.”—Jon 6:53.

5. Wai na yumi ken save olsem tok bilong Jisas i no makim olsem ol man bai dring blut tru tru bilong em?

⁵ Long taim bilong Noa, God i tambuim ol man long kaikai blut. (Stt. 9:​3, 4) Bihain Jehova i givim dispela wankain tambu long Lo em i givim long lain Israel. Sapos wanpela man i kaikai blut, orait ol “i mas kilim em i dai.” (Wkp. 7:27) Jisas i save bihainim dispela Lo. (Mat. 5:​17-19) So em bai no stret long ting olsem em i kirapim dispela bikpela lain manmeri Juda long kaikai bodi tru tru na dring blut tru tru bilong em. Tasol long dispela narakain tok Jisas i mekim, em i skulim ol manmeri long hau ol bai kisim “laip i stap oltaim.”—Jon 6:54.

6. Hau yumi ken save olsem tok Jisas i mekim long kaikai bodi na dring blut i no makim bodi tru tru na blut tru tru bilong em?

⁶ Jisas i laik kamapim wanem poin long hia? I klia tru olsem dispela tok bilong Jisas em wanpela tok piksa, wankain olsem tok em i mekim long meri Samaria, olsem: “Man i dring long wara mi givim em, nek bilong em bai i no inap drai gen. Wara mi givim long em bai kamap olsem hulwara insait long em na givim laip oltaim long em.” (Jon 4:​7, 14) b Tok bilong Jisas i no makim olsem meri Samaria bai kisim laip oltaim long rot bilong dringim wanpela kain wara tru tru, nogat. Olsem tasol, em i no tok dispela bikpela lain manmeri long Kaperneam bai stap laip oltaim sapos ol i  kaikai bodi tru tru na dring blut tru tru bilong em, nogat.

NARAPELA TAIM JISAS I MEKIM WANKAIN TOK

7. Sampela man i tok wanem long tok bilong Jisas i stap long Jon 6:53?

⁷ Sampela lotu lain i tok olsem dispela tok bilong Jisas long Jon 6:53 long kaikai bodi bilong em na dring blut bilong em i makim samting ol i mas mekim long Kaikai Bilong Bikpela, long wanem, ol tok em i mekim long hia i wankain long ol tok em i mekim long Kaikai Bilong Bikpela. (Mat. 26:​26-28) Ol i tok olsem olgeta manmeri i kam long Kaikai Bilong Bikpela, ol i mas kaikai bret na dring wain ol i tilim long ol. Yu ting i stret long mekim olsem? Em i bikpela samting long yumi mas painimaut sapos dispela tok ol i mekim em i tru o nogat, bikos long olgeta yia planti milion manmeri long olgeta hap bilong graun i save kam long dispela bung yumi mekim. Yumi bai lukim olsem sampela samting long ol tok Jisas i mekim long Jon 6:53 em i no wankain long ol tok Jisas i mekim long Kaikai Bilong Bikpela.

8. Wanem sampela samting i no wankain long dispela tupela bung? (Lukim tu ol piksa.)

⁸ Yumi ken stori long tupela samting i no wankain long dispela tupela bung. Namba 1, long wanem taim na long wanem ples Jisas i mekim tok i stap long Jon 6:​53-56? Em i mekim dispela tok long bikpela lain Juda i stap long Galili long yia 32 C.E. Em inap wanpela yia paslain long Jisas i mekim Kaikai Bilong  Bikpela long Jerusalem. Namba 2, em i mekim dispela tok long husat? Planti manmeri i bin putim yau long Jisas long Galili, ol i tingting tasol long kisim kaikai bilong pulapim bel na ol i no gat tingting long kisim save long Jehova o long Kingdom bilong em. (Jon 6:26) So taim Jisas i mekim wanpela tok we ol i no kliagut long en, wantu tasol ol i lusim bilip long em. Sampela disaipel bilong em tu i stop long bihainim em. (Jon 6:​14, 36, 42, 60, 64, 66) Samting i kamap long dispela taim i no wankain long samting i bin kamap wanpela yia bihain, long 33 C.E., taim Jisas i mekim Kaikai Bilong Bikpela. Long dispela bung bilong Kaikai Bilong Bikpela, 11-pela gutpela aposel bilong em i stap wantaim em, maski ol i no kliagut long olgeta tok em i skulim ol long en. Maski i olsem, ol dispela gutpela aposel i no wankain olsem ol manmeri long Galili, ol i bilip tru olsem Jisas em i Pikinini Bilong God na em i kam daun long heven. (Mat. 16:16) Em i tok amamas long ol olsem: “Yupela i bin pas wantaim mi taim ol traim i painim mi.” (Luk 22:28) Dispela tupela samting yumi skelim i helpim yumi long luksave olsem tok Jisas i mekim long Jon 6:53 i no makim samting bai kamap long Kaikai Bilong Bikpela. Na i gat sampela tok moa i sapotim dispela tingting.

YU TU I INSAIT LONG EN

9. Tok Jisas i mekim long Kaikai Bilong Bikpela i go long wanem lain?

⁹ Long Kaikai Bilong Bikpela, Jisas i tilim bret i no gat yis long ol aposel bilong em na em i tokim ol olsem dispela i makim bodi bilong em. Na bihain em i givim wain long ol na em i tok dispela i makim “blut bilong mi i strongim kontrak.” (Mak 14:​22-25; Luk 22:20; 1 Kor. 11:24) Dispela kontrak em i bikpela samting. Dispela nupela kontrak em i mekim em “kontrak wantaim lain Israel” husat bai stap wantaim em long “Kingdom Bilong God,” na em i no bilong olgeta lain manmeri. (Hib. 8:​6, 10; 9:15) Long dispela taim, ol aposel i no kliagut long dispela tok, tasol klostu nau God bai makim ol long holi spirit na ol bai insait long dispela nupela kontrak we ol bai stap wantaim Jisas long heven.—Jon 14:​2, 3.

10. Olsem wanem tok Jisas i mekim long Galili i no wankain long tok em i mekim long Kaikai Bilong Bikpela? (Lukim tu piksa.)

¹⁰ Tingim olsem tok Jisas i mekim long Kaikai Bilong Bikpela, tok bilong em i go tasol long dispela “liklik lain sipsip.” Dispela ol aposel i stap wantaim em long rum, ol i fes lain long insait long dispela liklik grup. (Luk 12:32) Ol dispela aposel i bung wantaim em long dispela apinun na ol narapela manmeri em ol bai insait long dispela liklik grup, ol tasol bai kisim bret na wain. Em ol dispela lain tasol bai stap wantaim Jisas long heven. Narapela samting i no wankain em olsem: Long Galili Jisas i mekim tok i go long bikpela lain manmeri, tasol long Kaikai Bilong Bikpela, em i toktok tasol long ol aposel bilong em. So tok em i mekim long Galili i go long planti manmeri tru.

11. Jisas i mekim wanem tok long Galili na dispela i soim olsem em i no toktok long wanpela liklik grup bilong ol manmeri?

¹¹ Taim Jisas i stap long Galili long 32 C.E., em i toktok long ol Juda em ol i laik em i givim bret long ol bilong kaikai. Tasol em i stiaim tingting bilong ol i go long samting i gutpela moa winim kaikai tru tru. Em i stori long samting we inap givim laip oltaim long ol. Na Jisas i tok olsem ol manmeri em ol i dai, ol bai kirap bek long las de na ol bai stap laip oltaim. Em i no mekim dispela tok long wanpela liklik lain olsem tok em i bin mekim long taim bilong Kaikai Bilong Bikpela, nogat. Long Galili, em i  helpim ol manmeri long tingim blesing em olgeta manmeri inap kisim. Em as na em i tok: “Sapos man i kaikai dispela bret em bai stap oltaim. Na bret mi givim, em bodi bilong mi, na mi givim bai ol manmeri bilong graun i ken kisim laip.”—Jon 6:51.

12. Yumi mas mekim wanem bilong kisim laip oltaim em Jisas i tok long en?

¹² Jisas i no tokim ol Juda long Galili olsem olgeta manmeri i stap laip long graun bai kisim laip oltaim, nogat. Em i tok ol manmeri i “kaikai dispela bret,” em ol manmeri husat i bilip long em, ol tasol bai kisim laip oltaim. Planti manmeri em ol i kolim ol yet olsem ol Kristen, ol i ting ol bai kisim laip oltaim sapos ol i “bilip long [Jisas]” na tingim em olsem seivia bilong ol na em tasol. (Jon 6:29) Tasol ol i mas mekim sampela samting moa. Sampela manmeri namel long dispela bikpela lain long Galili, ol i bin bilip long Jisas, tasol bihain ol i lusim em. Wai na ol i mekim olsem?

13. Ol man i mas mekim wanem bilong kamap disaipel tru bilong Jisas?

¹³ Planti manmeri insait long dispela bikpela lain em Jisas i bin givim kaikai long ol, ol i amamas long bihainim em tasol bikos long ol samting em i givim long ol. Ol i amamas tasol long ol mirakel Jisas i wokim bilong oraitim sik bilong ol, givim fri kaikai long ol, na skulim ol long ol tok em ol i gat laik long harim. Tasol Jisas i soim olsem sapos ol i laik kamap ol disaipel tru bilong em, orait ol i mas mekim sampela samting moa. Em i no kam long graun bilong givim tasol ol samting bilong skin em ol man i nidim, nogat. Ol i mas bihainim singaut bilong em olsem “kam long mi” long rot bilong harim na bihainim olgeta samting em i skulim ol long en.—Jon 5:40; 6:44.

14. Yumi mas mekim wanem samting bilong kisim helpim long bodi na blut bilong Jisas?

 ¹⁴ Jisas i tokim dispela bikpela lain manmeri olsem em i bikpela samting long ol i mas bilip. Ol i mas bilip long wanem samting? Ol i mas bilip long strong bilong bodi na blut bilong em bilong baim bek ol manmeri em klostu nau em bai givim olsem sakrifais. Em i bikpela samting long ol Juda long dispela taim long holim dispela bilip, na em i bikpela samting tu long yumi long nau. (Jon 6:40) Tru tumas, bilong kisim helpim long bodi na blut bilong Jisas olsem Jon 6:53 i stori long en, yumi mas bilip long dispela pe bilong baim bek ol man. Rot i op long planti manmeri tru i ken i gat dispela bilip.—Efe. 1:7.

15-16. Jon sapta 6 i ken helpim yumi long tingim wanem ol gutpela blesing?

¹⁵ Ol tok i stap long Jon sapta 6 i bikpela samting long yumi na ol wanfamili bilong yumi. Em i kamapim klia olsem Jisas i save tingim tru ol manmeri. Taim Jisas i stap long Galili, em i oraitim ol sikman, skulim ol manmeri long Kingdom, na em i givim kaikai long planti manmeri tru em ol i stap hangre. (Luk 9:11; Jon 6:​2, 11, 12) Bikpela samting moa, em i skulim ol manmeri olsem em yet em i “bret bilong laip.”—Jon 6:​35, 48.

¹⁶ Ol manmeri em Jisas i kolim ol olsem “ol arapela sipsip” ol i no save kisim bret na wain long Kaikai Bilong Bikpela em yumi save mekim long olgeta yia. (Jon 10:16) Maski i olsem, bodi na blut bilong Jisas Krais i helpim ol tu. Ol bai kisim dispela helpim taim ol i bilip long pe bilong ofa bilong em long baim bek ol manmeri. (Jon 6:53) Tasol ol manmeri em ol i kisim bret na wain, ol i kamapim klia olsem ol i insait long nupela kontrak na ol bai mekim wok king wantaim Jisas long Kingdom bilong heven. So maski yumi bilong lain God i bin makim o lain arapela sipsip, ol tok i stap long Jon sapta 6 i bilong helpim yumi olgeta. Em i kamapim klia olsem em i bikpela samting long yumi mas bilip na bai yumi kisim laip oltaim.