Aposel Pol i raitim pas i go long wanwok elda bilong em Timoti na em i tok: “Long ai bilong God na Krais Jisas na ol ensel em God i bin makim, mi tokim yu long bihainim ol dispela tok na no ken larim tingting yu holim pinis o wansait pasin i bosim samting yu mekim.”—1 Tim. 5:21.

Pastaim, yumi bai stori long wanem ol ensel i no insait long dispela lain ensel. I klia tru olsem dispela i no makim lain 144,000. Long dispela taim Pol i raitim pas i go long Timoti, kirap bek bilong ol Kristen God i bin makim bilong kisim laip long heven i no stat yet. Ol aposel na ol narapela Kristen em God i bin makim, ol i no kamap spirit yet, so dispela “ol ensel em God i bin makim” i no makim ol.—1 Kor. 15:​50-54; 1 Tes. 4:​13-17; 1 Jon 3:2.

Na tu, dispela “ol ensel em God i bin makim” i no makim ol bikhet ensel em ol i bin sakim tok bilong God long taim bilong Bikpela Tait. Ol dispela ensel i bin stap long sait bilong Satan na ol i kamap ol spirit nogut na ol i kamap birua bilong Jisas. (Stt. 6:2; Luk 8:​30, 31; 2 Pita 2:4) Bihain ol bai kalabus long hul i no gat as inap 1,000 yia na bihain long en ol bai bagarap wantaim Satan.—Jut 6; Rev. 20:​1-3, 10.

“Ol ensel em God i bin makim” em Pol i stori long ol, em ol ensel long heven husat i save sapotim “God na Krais Jisas” em dispela wankain ves i stori tu long tupela.

I gat planti planti tausen gutpela ensel. (Hib. 12:​22, 23) Yumi no ken ting olsem olgeta i save mekim ol wankain wok long wankain taim. (Rev. 14:​17, 18) Tingim, wanpela taim wanpela ensel tasol i kisim wok bilong kilim i dai 185,000 soldia bilong ol Asiria. (2 Kin. 19:35) Ating sampela ensel i kisim wok bilong go na “rausim olgeta samting i save pundaunim man na ol manmeri husat i save brukim lo” long Kingdom bilong Jisas. (Mat. 13:​39-41) Ol narapela ensel em “ol bai bungim lain bilong em, em lain God i bin makim” i go long heven. (Mat. 24:31) Na ol narapela ensel bai “was long [yumi] long olgeta wokabaut bilong [yumi].”—Sng. 91:11; Mat. 18:10; 4:11; Luk 22:43.

“Ol ensel em God i bin makim” em 1 Timoti 5:21 i stori long ol, ating ol i gat ol spesel wok bilong lukautim kongrigesen bilong lain bilong God. Ol tok i stap paslain na bihain long dispela ves i soim gutpela edvais Pol i givim long wok ol elda i mas mekim na samting kongrigesen i mas mekim bilong soim rispek long ol. Long sait bilong ol elda, ol i “no ken larim tingting [ol i] holim pinis o wansait pasin i bosim samting [ol i] mekim” na ol i mas tingting gut paslain long ol i wokim wanpela disisen. Wanpela bikpela risen na ol i mas bihainim gut edvais Pol i givim em bikos ol i mekim ol samting “long ai bilong God na Krais Jisas na ol ensel em God i bin makim.” So em i klia tru olsem sampela ensel i kisim wok bilong lukautim gut kongrigesen, lukautim wok autim tok, na bringim ripot i go bek long Jehova.—Mat. 18:10; Rev. 14:6.