Yu bin ritim gut ol Wastaua bilong dispela yia? Orait, lukim sapos yu inap bekim ol dispela askim:

Jehova i save mekim wanem pasin long ol meri na long dispela rot em i stap gutpela piksa yumi ken bihainim?

Em i save mekim wankain pasin long ol meri, em i no save mekim gut long ol man tasol na luk daun long ol meri, nogat. God i save putim yau long ol meri, em i save tingim tru filings bilong ol na ol samting ol i tingting planti long en. Na em i save trastim ol long mekim wok bilong em.—w24.01, p. 15-16.

Hau yumi ken bihainim tok bilong Efesus 5:7 olsem: “Yupela i no ken poroman wantaim ol”?

Aposel Pol i givim tok lukaut long yumi olsem yumi no ken bung wantaim ol lain em ol inap mekim na yumi pilim hatwok long bihainim ol lo bilong God. Dispela i makim ol lain em yumi lusim haptaim long stap wantaim ol, na tu, ol lain em yumi toktok wantaim ol long sosel midia.—w24.03, p. 22-23.

Yumi mas was gut long wanem kain ol stori giaman?

Yumi mas was gut long ol stori em yumi no save sapos ol i tru o nogat, em ol pren bilong yumi i tokim yumi long en, ol E-meil em yumi kisim long ol lain em yumi no save long ol, na ol apostet em ol i giaman olsem ol i amamas long kisim save long tok i tru.—w24.04, p. 12.

Wanem ol samting em yumi save long en na i no save long en long hau Jehova bai jasim King Solomon na ol manmeri em ol i dai long taun Sodom na Gomora na long Bikpela Tait?

Yumi no save sapos tru tru Jehova i bin bagarapim ol dispela manmeri inap oltaim, o nogat. Tasol yumi save olsem em i save long olgeta samting na em i gat bikpela pasin marimari.—w24.05, p. 3-4.

God i olsem “Bikpela Ston” na hau dispela i strongim yumi? (Lo 32:4)

Jehova i olsem ples hait em yumi ken ron i go long en. Yumi ken trastim em bikos oltaim em i save inapim ol tok promis bilong em. Na em i save stap wankain, em i no save senisim ol pasin bilong em na ol samting em i tingting pinis long mekim.—w24.06, p. 26-28.

Wanem samting i ken helpim yu taim yu muv i go long nupela kongrigesen?

Bilip long Jehova, em bai helpim yu wankain olsem em i bin helpim ol wokman bilong em long bipo. No ken skelim nupela kongrigesen bilong yu wantaim olpela kongrigesen. Insait long ol wok bilong nupela kongrigesen bilong yu, na traim long kisim ol nupela pren.—w24.07, p. 26-28.

Yumi kisim wanem ol skul long 3-pela tok piksa em Matyu sapta 25 i stori long en?

Tok piksa bilong ol sipsip na ol meme i skulim yumi olsem em i bikpela samting long holimpas bilip na stap gut long God. Tok piksa bilong ol savemeri i kamapim klia olsem yumi mas redi na was i stap. Na tok piksa bilong ol talen i soim olsem em i bikpela samting long yumi mas givim bel na wok strong tru.—w24.09, p. 20-24.

Taua long tempel bilong Solomon i go antap inap long wanem mak?

Long 2 Stori 3:​4, sampela olpela manuskrip long bipo i raitim “120,” na dispela i makim olsem taua i go antap inap 53 mita. Tasol ol narapela rait yumi inap trastim i gat dispela rait olsem “20 kiubit,” na dispela i makim olsem taua i go antap inap 9 mita. Taim yumi skelim bikpela bilong wol, i stret long yumi tok olsem dispela taua i go antap inap 9 mita.—w24.10, p. 31.

Kongrigesen sevan i mas stap “man bilong wanpela meri tasol” na dispela i makim wanem samting? (1 Tim. 3:12)

Dispela i makim olsem em i mas maritim wanpela meri tasol na em i no ken mekim pasin pamuk. Na tu, em i no ken aigris long ol narapela meri.—w24.11, p. 19.

Wai na tok bilong Jisas long Jon 6:53 i no makim samting ol i mas mekim long Kaikai Bilong Bikpela?

Jon 6:53 i tok long ol man i mas kaikai bodi bilong Jisas na dring blut bilong em. Jisas i mekim dispela tok long ol Juda long Galili long 32 C.E., em ol i mas bilip long em. Tasol em i bin mekim Kaikai Bilong Bikpela inap wanpela yia bihain long Jerusalem. Long dispela bung, Jisas i toktok long ol disaipel em ol bai wok king wantaim em long heven.—w24.12, p. 10-11.