1-3. (a) Olsem wanem ol Kristen i soim olsem ol i tingim tru pasin bilong bung wantaim? (Lukim piksa long kirap bilong stadi.) (b) Yumi bai skelim wanem samting long dispela stadi?

TAIM Corinna i gat 17 krismas, polis bilong Soviet Yunion bilong bipo i arestim mama bilong em na salim em i go long banis kalabus bilong lain Soviet. Bihain, ol polis i arestim Corinna na salim em i go kalabus long Saibiria. Dispela ples i stap planti tausen kilomita longwe long hap em Corinna i stap long en. Ol i mekim em i kamap sleiv, na sampela taim ol i fosim em long wok ausait taim ples i kol nogut tru, na klos bilong em i no gat strong long daunim kol. Maski ol birua i mekim hatpela pasin, Corinna na narapela sista i tingting strong long i go long miting bilong kongrigesen.

² Corinna i tok: “Mitupela i save lusim ples wok long apinun na wokabaut i go long hap bilong kisim tren we i stap 25 kilomita longwe long hap mipela i stap long en. Tren i save lusim dispela hap long 2 klok long moning, na mipela i save ron inap 6-pela aua. Taim mipela i lusim tren, mipela i save wokabaut gen inap 10 kilomita bilong i go long ples bilong miting.” Ol i pilim olsem wanem long hatwok ol i mekim? Corinna i tok: “Long miting, mipela i save stadi long Wastaua na singim  ol song bilong Kingdom. Ol dispela samting i save strongim tru bilip bilong mipela.” Maski ol i no kamap long ples wok inap 3-pela de, maneja bilong fam i no luksave olsem Corinna na pren bilong em i no stap.

³ Oltaim ol manmeri bilong Jehova i save tingim tru pasin bilong bung wantaim. Bihain tasol long kongrigesen Kristen i kamap nupela, ol disaipel bilong Jisas i kirap long “putim tingting bilong ol i go long . . . helpim narapela narapela.” (Apo. 2:42) Ating yu tu i holim wankain tingting olsem ol na yu laik tru long i go oltaim long ol miting bilong kongrigesen. Em tru olsem kain kain samting i save kamap na i laik pasim rot bilong ol Kristen long i go long ol miting. Kain olsem, wok mani, bisi long mekim planti samting, na skin i pilim taiet. Wanem samting bai kirapim yumi long daunim ol dispela hevi na bihainim yet gutpela pasin bilong i go oltaim long ol miting? ^[1] Olsem wanem yumi inap helpim ol Baibel sumatin bilong yumi na ol narapela long luksave olsem em i bikpela samting long i go oltaim long ol miting? Long dispela stadi, yumi bai skelim 8-pela risen bilong bung wantaim long lotu. Yumi ken putim ol dispela risen long 3-pela grup. Taim yu go long ol miting, olsem wanem yu kisim helpim? Olsem wanem ol narapela i kisim helpim? Jehova i pilim olsem wanem? ^[2]

4. Taim yumi bung wantaim, olsem wanem dispela i helpim yumi long kisim save long Jehova?

⁴ Miting i skulim yumi. Olgeta miting bilong kongrigesen i helpim yumi long kisim save long Jehova, God bilong yumi. Inap olsem 2-pela yia nau, planti kongrigesen i stadi long buk Go Klostu Long Jehova long Baibel Stadi Bilong Kongrigesen. Taim yu kisim save long ol pasin bilong God na harim ol gutpela komen bilong ol bratasista, yu ting dispela i bin strongim pasin bilong yu long laikim Papa bilong yu long heven? Na tu, save bilong yumi long Baibel i kamap bikpela moa taim yumi putim gut yau long ol tok i kamap long miting, ol soim, na ol Baibel ritim bilong wik. (Neh. 8:8) Tingim ol gutpela save yu kisim long olgeta wan wan wik taim yu ritim Baibel na mekim wok painimaut bilong redim ol bikpela tok yu laik kamapim!

5. Olsem wanem ol miting i helpim yu long yusim ol samting yu lainim long Baibel na pasin bilong yu long autim tok i kamap gutpela moa?

⁵ Ol miting i skulim yumi long bihainim ol stiatok bilong Baibel long olgeta samting yumi mekim long laip bilong yumi. (1 Tes. 4:9, 10) Ol tok bilong Wastaua Stadi i bilong helpim ol manmeri bilong God. Olsem wanem? Wastaua Stadi i bin kirapim yu long skelim gen ol mak yu putim bilong winim, na fogivim ol wanbilip, na mekim ol beten bilong yu i kamap gutpela moa? Ol miting namel long wik i skulim yumi long mekim wok autim tok. Yumi kisim skul long olsem wanem yumi inap autim gutnius na skulim gut ol man long ol stiatok bilong Baibel.—Mat. 28:19, 20.

6. Olsem wanem ol miting i save strongim yumi na helpim yumi long sanap strong?

⁶ Miting i strongim yumi. Ol samting bilong dispela graun inap paulim tingting bilong yumi, mekim yumi bel hevi, na nogutim yumi long sait bilong bilip. Tasol ol miting bilong kongrigesen i save strongim yumi. (Ritim Aposel 15:30-32.) Long planti miting, yumi save skelim gen truim bilong ol tok profet bilong Baibel. Dispela i save strongim bilip bilong yumi long truim bilong ol tok promis bilong Jehova long ol samting bai kamap bihain. Taim ol brata i sanap long pletfom na mekim tok, dispela i save strongim yumi. Tasol i gat ol narapela lain tu husat i save strongim yumi. Taim ol wanbilip bilong yumi i bekim tok long miting na pilim tru ol tok ol i singim, dispela i save strongim tru yumi. (1 Kor. 14:26) Na tu, taim yumi toktok wantaim ol bratasista paslain na bihain long ol miting, yumi pilim olsem ol narapela i tingim tru yumi na dispela i save givim nupela strong long yumi.—1 Kor. 16:17, 18.

7. Bilong wanem em i bikpela samting long yumi mas go long ol miting?

⁷ Opim rot bilong holi spirit long stiaim yumi. Jisas Krais i tok: “Man i gat yau, em i mas harim tok holi spirit i mekim long ol kongrigesen.” (Rev. 2:7) Yes, Jisas i yusim holi  spirit long stiaim kongrigesen. Holi spirit bai helpim yumi long sakim ol traim, na strongim na redim yumi long mekim wok autim tok, na helpim yumi long mekim ol gutpela disisen. Olsem na yumi mas mekim olgeta samting yumi inap mekim bilong kisim holi spirit, na dispela i makim tu olsem yumi mas i go oltaim long olgeta miting bilong kongrigesen.

8. Taim ol bratasista i lukim yumi go long ol miting, na harim ol bekim bilong yumi na singim ol song, olsem wanem dispela inap helpim ol? (Lukim blok “Em i Save Kisim Bel Isi Long Miting.”)

⁸ Yumi inap soim ol bratasista olsem yumi laikim ol. Tingim ol hevi i painim sampela bratasista long kongrigesen bilong yu. Aposel Pol i tok: “Yumi wan wan i mas tingim ol arapela namel long yumi”! Pol i tok moa olsem, sapos yumi tingim tru ol narapela, orait “yumi no ken lusim pasin bilong bung wantaim.” (Hib. 10:24, 25) Taim yu go long miting, dispela i soim klia olsem yu tingim tru ol wanbilip na yu amamas long lusim sampela haptaim bilong yu long i stap wantaim ol. Na tu, taim yu bekim tok na singim ol song long miting, dispela bai strongim ol wanbilip bilong yu.—Kol. 3:16.

9, 10. (a) Stori long olsem wanem tok bilong Jisas long Jon 10:16 i helpim yumi long save olsem em i bikpela samting long bung wantaim ol bratasista. (b) Sapos yumi go oltaim long ol miting, olsem wanem dispela inap helpim wanpela em famili bilong em i birua long em?

⁹ Yumi inap pas gut wantaim ol wanbilip. (Ritim Jon 10:16.) Jisas i kolim em yet olsem wasman, na ol disaipel bilong em i stap olsem wanpela lain sipsip. Tingim: Sapos 2-pela sipsip i stap antap long maunten, na narapela 2-pela sipsip i stap long veli, na narapela sipsip i kaikai gras long narapela hap, yu ting yumi inap kolim dispela 5-pela sipsip olsem wanpela lain sipsip? Lain sipsip i save bung wantaim na stap aninit long lukaut bilong wasman. Olsem tasol, yumi no inap bihainim Wasman bilong yumi sapos yumi stap yumi yet. Yumi mas bung wantaim ol arapela wanbilip Kristen bambai yumi inap stap olsem “wanpela lain sipsip i gat wanpela wasman.”

¹⁰ Taim yumi go long miting, yumi strongim pasin wanbel namel long lain brata bilong yumi. (Sng. 133:1) Sampela wanbilip bilong yumi i bin karim hevi bilong papamama na ol wanblut i givim baksait long ol. Tasol Jisas i tok promis olsem em bai givim ol wanpela famili husat bai laikim ol na lukautim ol. (Mak 10:29, 30) Taim yu go oltaim long ol miting, yu inap stap olsem papa, mama, brata, na susa bilong ol kain lain olsem! Mobeta dispela i kirapim yumi long i go long olgeta miting!

11. Taim yumi go long ol miting, yumi mekim wanem ol samting bilong litimapim biknem bilong Jehova?

¹¹ Yumi litimapim biknem  bilong Jehova. Jehova em Krieta bilong yumi, olsem na i stret long yumi litimapim nem bilong em, givim glori long em, tok tenkyu long em, na givim ona long em. (Ritim Revelesen 7:12.) Taim yumi beten, singsing, na stori long Jehova long ol miting bilong yumi, yumi mekim ol samting i stret long yumi mas mekim long God—yumi lotuim em. Yumi tingim tru gutpela wok yumi inap mekim—yumi givim ona long Man husat i bin mekim planti samting tru bilong helpim yumi.

12. Jehova i pilim olsem wanem taim yumi bihainim tok bilong em na go long olgeta miting?

¹² I stret tu long yumi mas bihainim tok bilong Jehova. Em i tok yumi no ken lusim pasin bilong bung wantaim, na moa yet long dispela haptaim bilong pinis. Olsem na Jehova i amamas taim yumi bihainim dispela tok. (1 Jon 3:22) Em i luksave na em i tingim tru hatwok bilong yumi long i go long olgeta miting.—Hib. 6:10.

13, 14. Long taim bilong ol miting, olsem wanem yumi go klostu long Jehova na Jisas?

¹³ Yumi soim Jehova olsem yumi laik i go klostu long em na Pikinini bilong em. Long ol miting bilong yumi, Nambawan Bikpela Tisa i skulim yumi long rot bilong ol tok i stap long Baibel. (Ais. 30:20, 21) Taim ol nupela man i kam long ol miting bilong yumi, ol inap tok: “Tru tumas, God i stap namel long yupela.” (1 Kor. 14:23-25) Jehova i save yusim holi spirit long blesim ol miting na stiaim program bilong miting. Olsem na long taim bilong miting, i olsem yumi putim yau long tok i kam long God, na pilim tru pasin bilong em long lukautim yumi. Dispela i save kirapim yumi long i go klostu long em.

¹⁴ Jisas i tok: “Taim tupela o tripela i bung long nem bilong mi, orait mi stap namel long ol.” (Mat. 18:20) Tok bilong Jisas i stret long ol miting bilong yumi. Jisas i stap olsem het bilong kongrigesen, na em i “wokabaut namel” long ol kongrigesen bilong ol manmeri bilong God. (Rev. 1:20–2:1) Tingim! Long taim bilong ol miting, Jehova na Jisas i mekim bikpela wok bilong strongim yumi. Yu ting Jehova i pilim olsem wanem taim em i lukim olsem yumi laik tru long i go klostu long em na Pikinini bilong em?

15. Taim yumi go long ol miting, olsem wanem yumi soim God olsem yumi laik bihainim tok bilong em?

¹⁵ Yumi soim olsem yumi sapotim wok bos bilong God. Maski Jehova i tokim yumi long i go long ol miting, em i no fosim yumi long mekim ol samting yumi kisim save long en. (Ais. 43:23, 24) Olsem na yumi yet i mas soim Jehova olsem yumi laikim em na yumi sapotim tru wok bos bilong em. (Rom 6:17) Ating wanpela bosman long ples wok inap putim presa long yumi mas lusim ol miting bambai yumi ken mekim wok ovataim. Gavman inap putim lo i tambuim yumi long bung wantaim long mekim lotu. Olsem na ol inap strong long yumi mas baim sampela fi sapos yumi brukim dispela lo, na ol inap putim yumi long kalabus, o kilim yumi i dai. O ating yumi laik mekim sampela samting bilong kisim amamas na yumi no laik i go long miting. Long kain taim olsem, yumi mas mekim disisen: Yumi bai stap daun long husat? (Apo. 5:29) Taim yumi sapotim wok bos bilong God, yumi mekim em i belgut.—Snd. 27:11.

16, 17. (a) Hau yumi inap save olsem ol miting i bikpela samting tru long ol Kristen long pastaim? (b) Brata George Gangas i pilim olsem wanem long ol miting Kristen?

¹⁶ Bihain long bikpela mirakel i kamap long Pentikos 33 C.E., ol Kristen i no lusim pasin bilong bung wantaim, nogat. “Ol i wok yet long putim tingting bilong ol i go long ol tok bilong ol aposel, na long helpim narapela narapela.” (Apo. 2:42) Tok Grik ol i tanim olsem “putim tingting bilong ol i go” i makim olsem man i wok hat tru long sanap strong na karim hevi. Gavman Rom i  mekim wok bos na ol lida bilong lotu Juda i birua long ol Kristen, olsem na i hatwok tru long ol Kristen i go long ol miting. Maski i olsem, ol i no surik long bung wantaim.

¹⁷ Planti wokman bilong Jehova long nau i soim olsem ol i tingim tru ol miting Kristen. Brata George Gangas i bin stap memba bilong Gavening Bodi winim 22 yia, na em i tok: “Mi pilim olsem taim mi bung wantaim ol bratasista, dispela i save givim amamas tru long mi na strongim mi. Mi save amamas long i go i stap long Haus Kingdom paslain tru long miting i kirap, na lusim Haus Kingdom bihain long olgeta arapela bratasista i lusim Haus Kingdom. Mi save pilim wanpela kain amamas taim mi toktok wantaim ol manmeri bilong God. Taim mi stap wantaim ol, mi save pilim olsem mi stap wantaim famili tru bilong mi, na mipela i stap long paradais long sait bilong bilip.” Em i tok moa: “Oltaim nidel bilong kampas i save poin i go long not, na olsem tasol, bel na tingting bilong mi i laik tru long i go long ol miting.”

18. (a) Yu pilim olsem wanem long ol miting bilong yumi? (b) Yu tingting strong long mekim wanem?

¹⁸ Olsem wanem? Bel na tingting bilong yu i laik tru long lotuim Jehova? Sapos olsem, orait yu mas sanap strong na givim bel yet long i go long olgeta miting. Long dispela rot, yu bai soim klia olsem yu wanbel long tok bilong King Devit, em i tok: “Bikpela, mi laikim tru haus bilong yu.”—Sng. 26:8.