1. Taim Adam na Iv i bikhet long gaden Iden, Jehova i mekim wanem tok bilong strongim ol manmeri?

KIRAP long taim Adam na Iv i mekim sin na i kam inap long nau, Jehova i soim olsem em i God bilong strongim ol narapela. Bihain long Adam na Iv i sakim tok bilong God, kwiktaim em i mekim wanpela tok promis bilong strongim yumi. Ol manmeri inap bilip na wetim gutpela samting bai kamap bihain. Taim ol manmeri i kliagut long tok promis i stap long Stat 3:15, ol inap save olsem, “dispela snek bilong bipo yet,” em Satan, na olgeta lain i stap aninit long wok bos bilong em bai bagarap na pinis olgeta.—Stt. 3:15; Rev. 12:9; 1 Jon 3:8.

2. Olsem wanem Jehova i strongim Noa?

² Noa em wokman bilong Jehova, na em i stap long haptaim we ol manmeri i mekim ol pasin nogut. Noa na famili bilong em tasol i lotuim Jehova. Olgeta manmeri i insait tru long pasin bilong pait na kilim man na olkain pasin pamuk. Dispela inap mekim na  Noa i bel hevi. (Stt. 6:4, 5, 11; Jut 6) Tasol Jehova i mekim ol tok bilong mekim isi bel bilong Noa, na dispela i helpim em long sanap strong na karim ol hevi na ‘wokabaut stret long ai bilong God.’ (Stt. 6:9, 10) Jehova i tokim Noa olsem Em bai bagarapim ol manmeri nogut, na tu, em i tokim Noa long ol samting em i mas mekim bambai famili bilong em i abrusim bagarap. (Stt. 6:13-18) Jehova i kamapim klia long Noa olsem em i God bilong strongim ol manmeri.

3. Josua i kisim wanem tok bilong strongim em? (Lukim piksa long kirap bilong stadi.)

³ Bihain, Josua i kisim wanpela bikpela asainmen. Em i mas bringim lain bilong God i go insait long Graun Bilong Promis. Em i mas pait na daunim ol ami bilong ol kantri i stap long dispela hap. Dispela inap mekim Josua i tingting planti. Olsem na Jehova i tokim Moses long mekim isi bel bilong Josua. God i tokim Moses: “Yu mas makim Josua long mekim wok na givim tok bilong helpim em na strongim em, long wanem, em bai go pas long ol manmeri na brukim Wara Jordan na em bai helpim ol long kisim dispela graun em nau yu bai lukim.” (Lo 3:28, NW ) Paslain long Josua i go pait long ol birua, Jehova i strongim em na tok: “Mi tokim yu pinis. Olsem na yu mas sanap strong na yu no ken pret, na yu no ken surik long wanpela samting. Long wanem, mi God, Bikpela bilong yu, bai mi go wantaim yu long olgeta hap.” (Jos. 1:1, 9) Dispela tok i strongim Josua!

4, 5. (a) Jehova i mekim wanem tok bilong strongim lain bilong em long bipo? (b) Olsem wanem Jehova i strongim Pikinini bilong em?

⁴ Jehova i save strongim yumi wan wan, na tu, em i save mekim ol tok bilong strongim yumi taim yumi bung wantaim. Jehova i tok profet long mekim isi bel bilong lain Juda husat i kalabus long Babilon. Em i tok: “Yupela i no ken pret, long wanem, mi God bilong yupela na mi stap wantaim yupela. Bai mi mekim yupela i kamap strong na bai mi helpim yupela. Bai mi was gut long yupela na long bikpela strong bilong mi bai mi daunim ol birua bilong yupela.” (Ais. 41:10) Ol Kristen long taim bilong ol aposel i bilip tru olsem God bai strongim ol, na i wankain tu long lain bilong Em long nau.—Ritim 2 Korin 1:3, 4.

⁵ Jisas i kisim tok bilong strongim em long Papa bilong em. Taim Jisas i kisim baptais, em i harim wanpela nek long skai i tok: “Dispela em i Pikinini bilong mi, mi laikim em tumas na mi amamas long em.” (Mat. 3:17) Ol dispela tok i strongim Jisas taim em i mekim wok autim tok!

6. Olsem wanem tok piksa bilong talen inap strongim yumi?

⁶ Jisas i bihainim eksampel bilong Papa bilong em. Em i mekim tok piksa long talen bilong tok profet long samting bai kamap long taim bilong las de, na dispela inap kirapim yumi long stap gut long God na mekim wok. Long tok piksa, bosman i tok amamas long wan wan gutpela wokboi olsem: “Yu gutpela wokboi, yu mekim gutpela wok tru! Yu bin lukautim gut sampela samting bilong mi. Olsem na mi bai makim yu long lukautim planti samting moa. Kam na amamas wantaim bosman bilong yu.” (Mat. 25:21, 23) Dispela tok i strongim yumi olgeta long stap gut yet long Jehova na mekim wok bilong em!

7. Jisas i givim wanem tok i strongim ol aposel bilong em, na moa yet long Pita?

⁷ Ol aposel bilong Jisas i tok pait namel long ol yet long husat i mas stap nambawan. Tasol Jisas i no les kwik na em i kirapim ol long kisim pasin daun na stap wokman bilong helpim ol narapela, na ol i no ken stap olsem bos. (Luk 22:24-26) Planti taim Pita i mekim ol pasin we i mekim Jisas i bel hevi. (Mat. 16:21-23; 26:31-35, 75) Tasol Jisas i no les long Pita, em i mekim ol tok bilong strongim em, na em i givim wok long Pita long strongim ol brata bilong em.—Jon 21:16.

8. Olsem wanem Hesekia i strongim ol ofisa na ol manmeri bilong Juda?

⁸ Paslain long Pikinini bilong Jehova i kam long graun na soim gutpela eksampel long pasin bilong strongim narapela, ol wokman bilong Jehova long bipo i bin mekim ol tok bilong strongim ol narapela. Taim ol Asiria i laik pait long ol manmeri long Jerusalem, Hesekia i bungim ol ofisa bilong ami na ol manmeri bilong Juda na em i strongim ol. “Ol manmeri i harim tok bilong king, na dispela tok i strongim bel bilong ol.”—Ritim 2 Stori 32:6-8.

9. Olsem wanem Buk Jop i skulim yumi long pasin bilong strongim narapela?

⁹ Jop i nidim tok bilong mekim isi bel bilong em. Maski i olsem, em i skulim 3-pela pren bilong em, husat “i no helpim [em] liklik,” long pasin bilong strongim narapela. Jop i tok sapos em i kisim ples bilong ol, ‘maus bilong em inap mekim planti toktok bilong strongim ol na mekim pen bilong ol i slek olgeta.’ (Jop 16:1-5) Bihain, Jop i kisim tok bilong strongim em long rot bilong Elihu na long Jehova yet.—Jop 33:24, 25; 36:1, 11; 42:7, 10.

10, 11. (a) Bilong wanem pikinini meri bilong Jepta i nidim tok bilong strongim em? (b) Long nau, husat ol lain i nidim tok bilong strongim ol?

¹⁰ Narapela eksampel we i stori long pasin bilong strongim narapela, em pikinini meri bilong Jepta. Paslain long Jepta i go pait long lain Amon, em i tok promis olsem sapos Jehova i helpim em long winim pait, namba 1 man i kam bungim em long rot taim em i winim pait na i kam bek long haus, em bai givim em bilong mekim wok long haus lotu sel bilong Jehova. Namba 1 man i kam bungim Jepta, em pikinini meri bilong em husat i amamas long papa i winim pait. Lewa bilong Jepta i bruk. Tasol Jepta i truim tok promis bilong em na em i salim pikinini bilong em i go long Silo na mekim wok long haus lotu sel long laip olgeta bilong em.—Het. 11:30-35.

¹¹ Em i hatwok tru long Jepta i truim tok promis bilong em, na ating pikinini meri bilong em tu i hatwok long mekim olsem. Tasol pikinini meri bilong Jepta i daunim laik bilong em yet na i redi long inapim tok promis bilong papa bilong em. (Het. 11:36, 37) Em i daunim laik bilong em long marit na kamapim ol pikinini. Sapos em i marit na kamapim ol pikinini, ol dispela pikinini inap holim nem bilong famili na graun bilong ol. Pikinini meri bilong Jepta i nidim tok bilong strongim em na mekim isi bel bilong em. Baibel i tok: “Dispela em i as bilong wanpela pasin ol Israel i save mekim. Ol yangpela meri bilong Israel i save lusim ples na i go na krai long pikinini meri bilong Jepta, dispela man bilong Gileat. Ol yangpela meri Israel i save mekim dispela pasin inap long 4-pela de long olgeta yia.” (Het. 11:39, 40) Ol Kristen husat i stap singel bambai ol i ken “tingim ol samting bilong Bikpela,” ol tu i nidim ol tok bilong strongim na mekim isi bel bilong ol.—1 Kor. 7:32-35.

12, 13. Olsem wanem Pita i ‘strongim ol brata bilong em’?

¹² Long nait paslain long Jisas i dai, em i tokim aposel Pita: “Saimon, Saimon, harim! Satan i tok em i laik kisim yupela bilong seksekim yupela olsem wit. Tasol mi beten strong bilong helpim yu bai bilip bilong yu i no ken pundaun. Na yu, taim yu kam bek, strongim ol brata bilong yu.”—Luk 22:31, 32.

 ¹³ Pita i stap olsem strongpela pos bilong kongrigesen long taim bilong ol aposel. (Gal. 2:9) Em i stap gutpela eksampel long pasin bilong strongim ol brata bilong em long taim bilong Pentikos na long ol narapela taim bihain. Klostu long pinis bilong wok autim tok bilong Pita, em i raitim pas i go long ol wanbilip Kristen, na em i tokim ol long as na em i raitim pas long ol. Em i tok: “Long dispela pas mi laik strongim yupela na tokaut klia olsem, dispela em i trupela bikpela pasin helpim bilong God, yupela i mas sanap strong long en.” (1 Pita 5:12) Ol pas Pita i raitim i strongim ol Kristen long bipo na long nau tu. Tru tumas, yumi nidim ol kain gutpela tok olsem bilong strongim yumi long bilip na wet long lukim truim bilong ol tok promis bilong Jehova!—2 Pita 3:13.

14, 15. Olsem wanem ol pas bilong aposel Jon i strongim tru ol Kristen inap planti handret yia?

¹⁴ Aposel Jon i stap tu olsem strongpela pos long kongrigesen Kristen long taim bilong ol aposel. Gutnius Bilong Jon i stori gut long wok autim tok bilong Jisas. Dispela Gutnius i bin strongim tru ol Kristen inap planti handret yia na i kam inap long nau. Gutnius Bilong Jon tasol i kamapim tok bilong Jisas, olsem pasin laikim em i mak bilong ol disaipel tru bilong em.—Ritim Jon 13:34, 35.

¹⁵ Tripela pas Jon i raitim i kamapim gutpela save bilong tok i tru. Taim sin i daunim yumi na yumi bel hevi, yumi kisim bel isi taim yumi ritim dispela tok olsem “blut bilong Jisas, . . . i rausim olgeta sin bilong yumi na mekim yumi i kamap klin.” (1 Jon 1:7) Sapos bel i wok yet long kotim yumi, ating yumi save aiwara na pilim tru dispela tok olsem “God i winim tru bel bilong yumi.” (1 Jon 3:20) Jon tasol i tok olsem “God em i pasin laikim.” (1 Jon 4:8, 16) Long namba 2 na namba 3 pas bilong Jon, em i tok amamas long ol Kristen husat i “wokabaut yet long tok i tru.”—2 Jon 4; 3 Jon 3, 4.

16, 17. Pol i givim wanem tok bilong strongim ol Kristen long taim bilong ol aposel?

 ¹⁶ Long taim bilong ol aposel, ating aposel Pol i bin mekim planti samting bilong strongim ol bratasista. I luk olsem taim lotu Kristen i kamap nupela, planti aposel i stap yet long Jerusalem, em ples we gavening bodi i stap long en. (Apo. 8:14; 15:2) Ol Kristen long Judia i autim tok bilong Krais long ol manmeri husat i bilip long wanpela God—ol i kisim dispela bilip long lotu Juda. Tasol holi spirit i salim aposel Pol long i go autim tok long ol manmeri bilong Grik na Rom, em ol i save lotuim planti god.—Gal. 2:7-9; 1 Tim. 2:7.

¹⁷ Pol i go autim tok long ol longwe ples, olsem Teki, Grik na Itali na kirapim ol kongrigesen namel long ol lain husat i no bilong lain Juda. Ol dispela nupela Kristen ‘i kisim hevi long han bilong ol wanlain bilong ol yet,’ na ol i nidim ol tok bilong strongim ol. (1 Tes. 2:14) Long yia 50 C.E. samting, Pol i raitim pas i go long nupela kongrigesen long Tesalonaika, em i tok: “Oltaim mipela i save tenkyu long God taim mipela i kolim nem bilong yupela long ol beten bilong mipela. Oltaim mipela i tingim ol wok em bilip bilong yupela i kirapim yupela long mekim na ol hatwok em pasin laikim i kirapim yupela long mekim . . . na yupela i sanap strong.” (1 Tes. 1:2, 3) Na tu, em i kirapim ol long strongim narapela narapela. Em i tok: “Wok yet long mekim isi bel bilong narapela narapela na strongim narapela narapela.”—1 Tes. 5:11.

18. Olsem wanem gavening bodi long taim bilong ol aposel i strongim Filip?

¹⁸ Gavening bodi long taim bilong ol aposel i strongim ol lain i go pas long kongrigesen, na tu, ol i strongim olgeta narapela Kristen. Taim Filip i autim tok bilong Krais long lain Samaria, lain gavening bodi i sambai long em. Ol i salim Pita na Jon long i go na beten long ol nupela Kristen i ken kisim holi spirit. (Apo. 8:5, 14-17) Filip na ol lain i kamap Kristen i kisim strong long rot bilong gavening bodi!

19. Taim gavening bodi i salim ol pas i go long ol kongrigesen, dispela i kamapim wanem gutpela samting?

¹⁹ Bihain, gavening bodi i mas skelim sapos ol Kristen husat i no bilong lain Juda i gat wok long bihainim Lo Bilong Moses na katim skin, o i no gat wok long ol i mekim olsem. (Apo. 15:1, 2) Long rot bilong holi spirit na pasin bilong skelim gut ol tok bilong Rait Holi, gavening bodi i luksave olsem i no gat wok moa long bihainim dispela Lo. Olsem na ol i raitim pas i go long ol kongrigesen na tokaut long dispela samting. Gavening bodi i salim ol brata i go long ol kongrigesen na givim ol pas long ol. Wanem gutpela samting i kamap? “Taim ol manmeri i ritim pinis, ol i amamas long dispela tok bilong strongim ol.”—Apo. 15:27-32.

20. (a) Long nau, Gavening Bodi i mekim wanem bilong strongim ol bratasista long olgeta hap? (b) Yumi bai bekim wanem askim long stadi i kamap bihain?

²⁰ Long nau, Gavening Bodi Bilong Ol Witnes Bilong Jehova i save givim ol tok bilong strongim ol memba bilong Betel famili, ol lain i mekim wok autim tok fultaim, na tu, ol bratasista bilong yumi long olgeta hap bilong graun. Olsem ol Kristen long taim bilong ol aposel—yumi amamas na kisim strong long rot bilong Gavening Bodi! Long 2015, Gavening Bodi i wokim nupela buklet Kam Bek Long Jehova. Dispela buklet i gat ol gutpela tok we inap strongim planti bratasista long olgeta hap bilong graun. Olsem wanem? Yu ting em wok bilong ol lain i go pas long kongrigesen tasol long bihainim eksampel bilong Jehova na givim ol tok bilong strongim ol narapela? Yumi bai kisim bekim bilong dispela askim long stadi i kamap bihain.