1, 2. (a) Bilong wanem ol manmeri long taim bilong aposel Pol i save toktok planti long pasin bilong i stap sleiv na i stap fri? (b) Pol i stiaim tingting bilong ol manmeri i go long husat bambai ol i kisim pasin bilong i stap fri tru?

OL MANMERI bilong Rom long taim bilong ol aposel i amamas long tokaut olsem ol i sapotim ol lo, stretpela pasin, na pasin bilong i stap fri. Maski i olsem, Gavman Rom i kisim strong na biknem long rot bilong ol wok em ol sleiv i mekim. Insait long wanpela haptaim, 30 pesen bilong populesen bilong Rom em ol sleiv. Olsem na ol manmeri na ol Kristen long dispela taim i toktok planti long pasin bilong i stap fri na wok sleiv.

² Pas Pol i raitim i stori planti long pasin bilong i stap fri. Tasol taim em i mekim wok autim tok, em i no stori long pasin bilong i stap fri long wok bos bilong ol man, em samting ol manmeri long taim bilong em i laikim. Pol na ol wanbilip i no laik kisim helpim long ol oganaisesen bilong ol man o ol gavman, nogat. Ol i wok strong long helpim ol narapela long kisim save long gutnius bilong Kingdom Bilong God na ofa bilong baim bek man long rot bilong Krais Jisas. Pol i stiaim tingting bilong ol wanbilip bilong em long bilip long Man i as bilong pasin bilong i stap fri tru. Long namba 2 pas Pol i raitim i go long ol Kristen long Korin, em i tok: “Jehova  em i spirit. Taim holi spirit bilong Jehova i stap, man i stap fri.”—2 Kor. 3:17.

3, 4. (a) Pol i mekim wanem tok paslain long em i mekim tok long 2 Korin 3:17? (b) Yumi mas mekim wanem bambai yumi kisim pasin bilong stap fri em Jehova i as bilong en?

³ Long namba 2 pas Pol i raitim long ol Kristen long Korin, em i stori tu long pes bilong Moses i lait tumas bihain long Moses i sanap long ai bilong ensel bilong Jehova long Maunten Sainai. Ol manmeri i lukim Moses na ol i pret, olsem na Moses i karamapim pes bilong em wantaim laplap. (Kis. 34:29, 30, 33; 2 Kor. 3:7, 13) Pol i tok: “Tasol taim man i tanim i go long Jehova, orait dispela laplap i tekewe.” (2 Kor. 3:16) Tok bilong Pol i makim wanem samting?

⁴ Olsem yumi stori pinis long stadi i kamap paslain, Jehova em Krieta bilong olgeta samting, olsem na em wanpela tasol i stap fri tru long mekim olgeta samting long laik bilong em. Taim man i tanim i go long Jehova, “holi spirit bilong Jehova i stap,” na dispela i mekim man i stap fri. Sapos yumi laik stap amamas na kisim helpim long pasin bilong i stap fri, orait yumi mas “tanim i go long Jehova.” Dispela i makim olsem yumi mas kisim save long Jehova na pas gut wantaim em. Ol Israel long ples drai nating i no luksave olsem ol samting Jehova i mekim i bilong helpim ol long i stap fri long sait bilong bilip. Bel na tingting bilong ol i pas na ol i tingting tasol long pasin bilong i stap fri long wok sleiv ol i mekim long Isip.—Hib. 3:8-10.

5. (a) Holi spirit bilong Jehova i mekim yumi i stap fri long wanem ol samting? (b) Olsem wanem yumi save olsem pasin bilong i stap kalabus o sleiv i no inap pinisim pasin bilong i stap fri em Jehova i as bilong en? (c) Yumi bai bekim wanem ol askim?

⁵ Taim holi spirit bilong Jehova i mekim yumi stap fri, dispela i winim tru pasin bilong i stap fri long mekim wok sleiv. Holi spirit bilong Jehova i mekim yumi stap fri long kalabus bilong sin na dai, na tu, yumi stap fri long ol lotu giaman na ol pasin nogut bilong ol. (Rom 6:23; 8:2) Dispela pasin bilong i stap fri em nambawan tru! Man husat i kalabus o mekim wok olsem sleiv bilong ol narapela man, em bai stap amamas sapos em i gat dispela pasin bilong i stap fri. (Stt. 39:20-23) Dispela i kamap tru long Sista Nancy Yuen na Brata Harold King. Tupela i stap kalabus inap planti yia bikos ol i stap strong long bilip. Yu ken lukim ekspiriens bilong ol long JW Brodkas (Lukim INTERVIEWS AND EXPERIENCES > ENDURING TRIALS.) Olsem wanem yumi inap soim olsem yumi amamas tru long pasin bilong yumi long i stap fri? Yumi ken mekim wanem bilong yusim gut dispela pasin bilong i stap fri?

6. Olsem wanem lain Israel i soim olsem ol i no amamas long pasin bilong i stap fri em Jehova i as bilong en?

⁶ Taim yumi kisim wanpela presen i dia tumas, dispela bai kirapim yumi long soim tenkyu bilong yumi long man i givim presen. Tasol lain Israel i no soim tenkyu bilong ol taim Jehova i kisim bek ol na ol i stap fri long wok sleiv long Isip. Sampela mun bihain long God i kisim bek ol, ol i tingim bek kaikai na wara ol i save kisim long Isip, na ol i komplein long mana Jehova i givim long ol. Na tu, ol i laik i go bek long Isip. Ol i tingim ‘pis, kukamba, na melen na olkain anian’ olsem bikpela samting moa winim pasin bilong i stap fri long lotuim God tru, em Jehova. Olsem na Jehova i kros tru long ol. (Nam. 11:5, 6, 10; 14:3, 4) Yumi inap kisim bikpela skul long dispela stori!

7. (a) Olsem wanem Pol i mekim pasin i stret wantaim tok em i mekim long 2 Korin 6:1? (b) Olsem wanem yumi inap bihainim pasin bilong Pol?

 ⁷ Aposel Pol i kirapim ol Kristen long tingim pasin bilong i stap fri olsem bikpela samting. Jehova i givim dispela pasin bilong i stap fri long rot bilong Pikinini bilong em Jisas Krais. (Ritim 2 Korin 6:1.) Pol i no amamas na bel i kotim em long pasin bilong i stap kalabus long sin na dai. Tasol em i tokaut olsem: “Mi tenkyu long God long rot bilong Jisas Krais, Bikpela bilong yumi!” Bilong wanem Pol i tok olsem? Em i tokim ol wanbilip Kristen: “Lo bilong dispela spirit i save givim laip long ol manmeri husat i pas wantaim Krais Jisas, dispela lo i mekim na yupela no kalabus moa long lo bilong sin na dai.” (Rom 7:24, 25; 8:2) Yumi ken bihainim eksampel bilong Pol na soim olsem samting Jehova i mekim bilong helpim yumi long i stap fri long kalabus bilong sin na dai em bikpela samting. Long rot bilong ofa bilong baim bek man, yumi inap mekim wok bilong God wantaim klinpela maus bilong bel na yumi amamas long mekim olsem.—Sng. 40:8.

8, 9. (a) Aposel Pita i mekim wanem tok lukaut long yusim pasin bilong i stap fri? (b) Wanem ol hevi inap painim yumi long nau?

⁸ Yumi mas soim olsem yumi tenkyu long pasin bilong i stap fri, na tu, yumi no ken yusim dispela pasin bilong i stap fri long mekim wok nogut. Aposel Pita i tok lukaut long yumi no ken yusim pasin bilong i stap fri olsem rot bilong inapim ol laik bilong bodi. (Ritim 1 Pita 2:16.) Dispela tok lukaut i kirapim yumi long tingim samting i painim lain Israel long ples drai nating. Samting i painim lain Israel inap kamap long yumi, moa yet long dispela taim yumi stap long en. Satan na ol manmeri bilong dispela graun i kamapim ol naispela samting bilong pulim tingting bilong yumi. Ol i mekim olsem long rot bilong klos na bilas, kaikai, ol amamas, na ol narapela samting. Planti taim ol bisnis i yusim piksa bilong man o meri i luk nais tru bilong edvetaisim ol samting bambai dispela i kirapim yumi long baim ol samting em yumi no nidim. Em isi tru long yumi inap yusim pasin bilong i stap fri long inapim ol laik bilong yumi!

⁹ Tok lukaut bilong Pita i makim tu ol kain samting olsem ediukesen na wok mani. Olsem, ol narapela i putim presa long planti yangpela long nau long go long bikpela skul. Ol i kirapim ol yangpela long tingim olsem sapos ol i go long yunivesiti, dispela bai opim rot long ol inap kisim wok mani i gat bikpela pe na kisim biknem. Na tu, planti wok painimaut i soim olsem ol lain i go long bikpela skul i kisim gutpela wok mani we i gat bikpela pe, winim ol lain husat i no go long bikpela skul. Ol yangpela i tingting planti long i stap bilong ol long bihain na ol i larim ol kain tingting olsem i pulim ol. Tasol ol yangpela na papamama bilong ol i mas tingim wanem samting?

10. Yumi mas tingim wanem samting taim yumi yusim pasin bilong i stap fri long mekim ol disisen?

¹⁰ Sampela man i ting olsem ol yet i gat wok long mekim disisen long sait bilong skul o wok mani samting, olsem na ol i stap fri long makim wanem ol samting ol i laik mekim na maus bilong bel i orait long en. Ating ol i tingim tok em Pol i mekim long ol Kristen long Korin long sait bilong kaikai, em i tok: “Mi stap fri long mekim ol samting, tasol mi no laik bai maus bilong bel bilong narapela man i skelim dispela pasin bilong mi long i stap fri long mekim samting.” (1 Kor. 10:29) Em tru olsem yumi stap fri long mekim disisen long sait bilong skul o wok mani samting, tasol yumi mas tingim olsem pasin bilong yumi long i stap fri em i gat mak bilong en, na ol disisen yumi mekim inap kamapim gutpela samting o samting nogut. Olsem na Pol i kirapim tok bilong em olsem: “I orait long mekim olgeta samting, tasol i no gutpela long mekim olgeta samting. I orait long mekim olgeta samting, tasol i no olgeta samting inap strongim yumi.” (1 Kor. 10:23) Dispela i helpim yumi long luksave olsem i gat sampela bikpela samting em yumi mas tingim taim yumi yusim pasin bilong yumi  long i stap fri long mekim disisen long laip bilong yumi.

11. Bilong wanem God i helpim yumi long i stap fri long sin na dai?

¹¹ Taim Pita i tok lukaut long pasin bilong yusim nabaut fridom bilong yumi, em i stori tu long risen na yumi kisim dispela fridom. Em i kirapim yumi long yusim pasin bilong yumi long i stap fri olsem “wokboi bilong God.” Olsem na risen na Jehova i larim yumi stap fri long lo bilong sin na dai long rot bilong Jisas, em long helpim yumi bambai yumi inap dediketim laip bilong yumi olsem ol “wokboi bilong God.”

12. Noa na famili bilong em i soim wanem eksampel em yumi ken bihainim?

¹² Sapos yumi no laik yusim pasin bilong i stap fri long mekim wok nogut na kalabus gen long tingting na pasin bilong dispela graun, orait yumi mas givim bel long mekim ol wok lotu. (Gal. 5:16) Tingim stori bilong Noa na famili bilong em. Ol i stap long haptaim we i pulap long pasin bilong pait na pasin pamuk. Maski i olsem, ol i no bihainim laik na pasin bilong ol manmeri long dispela taim. Wanem samting i helpim ol long stap gut long God? Ol i bisi long mekim ol wok em Jehova i tokim ol long mekim—wokim sip, bungim kaikai bilong ol yet na ol animal, na autim tok long ol narapela. Baibel i tok: “Noa i mekim olgeta samting olsem God i tokim em.” (Stt. 6:22) Wanem samting i kamap? Noa na famili bilong em i abrusim bagarap we i painim ol manmeri long taim bilong ol.—Hib. 11:7.

13. Jisas i kisim wanem asainmen na em i givim dispela wok long ol disaipel bilong em?

¹³ Jehova i tokim yumi long mekim wanem long nau? Olsem ol disaipel bilong Jisas, yumi kliagut long wok God i givim long yumi. (Ritim Luk 4:18, 19.) Long nau, god bilong dispela graun i pasim tingting bilong planti manmeri long rot bilong lotu, mani, na ol amamas bilong dispela graun. (2 Kor. 4:4) Yumi kisim gutpela blesing tru long bihainim eksampel bilong Jisas na helpim ol manmeri long kisim save na lotuim Jehova, em God i mekim man i stap fri tru. (Mat. 28:19, 20) Pasin bilong kisim save long God na lotuim em i gat hatwok bilong en. Long  sampela kantri, ol manmeri i no laik kisim save long God, na sampela taim ol i birua long yumi. Yumi wan wan i ken askim yumi yet olsem, ‘Mi inap yusim pasin bilong mi long i stap fri long sapotim tru wok bilong Kingdom?’

14, 15. Ol manmeri bilong Jehova i kamapim wanem kain pasin long sait bilong wok autim tok? (Lukim piksa long kirap bilong stadi.)

¹⁴ Yumi amamas long lukim olsem sampela bratasista i luksave olsem taim i sot pinis, na ol i holim liklik samting tasol bambai ol inap mekim wok autim tok fultaim. (1 Kor. 9:19, 23) Sampela bilong ol i mekim wok autim tok long hap ol i stap long en; sampela i go helpim wok autim tok long hap i sot long ol pablisa. Rekod i soim olsem long 5-pela yia i go pinis, namba bilong ol painia oltaim i winim 1 milion 1 handret tausen. Na tu, winim 250 tausen bratasista long olgeta hap bilong graun i insait long wok autim tok fultaim. Dispela i soim olsem ol bratasista i yusim gut pasin bilong i stap fri long mekim wok bilong Jehova!—Sng. 110:3.

¹⁵ Wanem samting i helpim ol dispela bratasista long yusim gut pasin bilong ol long i stap fri? Tingim stori bilong John na Judith. Insait long 30 yia, tupela i mekim wok bilong God long narapela narapela kantri. Ol i tingim Skul Bilong Wok Painia i kamap long 1977, na dispela skul i kirapim ol bratasista long mekim wok autim tok long hap i sot long ol pablisa. Tupela i laik tingim tasol wok bilong autim tok, olsem na John i senisim wok mani bilong em planti taim bambai ol i holim liklik samting tasol. Taim tupela i go long narapela kantri, tupela i luksave olsem pasin bilong beten long Jehova i helpim ol long karim hevi bilong lainim nupela tokples, lain long nupela kalsa, na lain long nupela weda. Tupela i pilim olsem wanem long ol yia ol i mekim wok autim tok? John i tok: “Mi givim bel tru long mekim wanpela gutpela wok tru, na i no gat wanpela wok i kain olsem dispela wok. Mi go klostu tru long Jehova, wankain olsem pikinini i pas gut wantaim papa bilong em. Nau mi kliagut long tok bilong Jems 4:8, em i tok: ‘Yupela i mas i go klostu long God, na em bai kam klostu long yupela.’ Mi save olsem mi painim pinis samting em mi wok long painim—mi pilim olsem laip bilong mi i gat as bilong en.”

16. Olsem wanem planti tausen bratasista i yusim gut pasin bilong ol long i stap fri?

¹⁶ Sampela i no gat wankain sindaun olsem bilong John na Judith, olsem na ol i mekim wok fultaim inap sotpela haptaim. Maski i olsem, planti bratasista i volantia long mekim ol wok konstraksen long olgeta hap bilong graun. Olsem, taim ol i wokim hetkota long Warwick, New York, inap olsem 27 tausen bratasista i redi long lusim wok bilong ol inap 2-pela wik o 1-pela yia olgeta bambai ol i helpim dispela wok. Planti bilong ol i lusim wok mani na haus bilong ol bambai ol i go sapotim dispela wok. Dispela em gutpela eksampel tru long yumi inap yusim pasin bilong i stap fri long litimapim nem bilong Jehova, em God i save mekim man i stap fri!

17. Ol lain i yusim gut pasin bilong i stap fri bai kisim wanem blesing long bihain?

¹⁷ Yumi amamas tru olsem yumi kisim save long Jehova, na yumi amamas long i stap fri insait long lotu i tru. Yumi ken mekim ol gutpela disisen bilong soim olsem yumi tenkyu tru long dispela pasin bilong i stap fri. Yumi no laik mekim wok nogut long pasin bilong i stap fri, nogat. Yumi mas yusim gut pasin bilong i stap fri taim rot i op, na mekim olgeta samting yumi inap mekim bilong lotuim Jehova. Sapos yumi mekim olsem, orait yumi ken wet long lukim truim bilong tok promis bilong Jehova, em i tok: “Olgeta samting God i bin wokim bai lusim dispela kalabus bilong bagarap, na ol bai kisim dispela pasin bilong i stap fri i nambawan tru olsem bilong ol pikinini bilong God.”—Rom 8:21.