Mining bilong tok Hibru long dispela skripsa inap makim ol manmeri nogut o ol manmeri bilong God. Olsem na ol i bihainim 3-pela risen na mekim senis long ol tok bilong dispela skripsa long nupela edisen:

1. Ol tok bilong nupela edisen long dispela skripsa i stret wantaim pasin bilong mekim tok. Mining bilong namba 1 tok i stap long ves 12 i kamapim klia husat lain tru em Buk Song 144:12-15 na ol ves i stap paslain i stori long en. Namba 1 tok bilong ves 12 long tok Hibru em asher, na dispela tok i gat narapela narapela mining. Dispela tok inap makim ol tok yumi save yusim bilong makim ol manmeri. Kain olsem, “husat”. Long olpela edisen, ol i kolim namba 1 tok bilong ves 12 olsem “husat.” Dispela i mekim na i olsem ol gutpela blesing em ves 12 i go long ves 14 i stori long en i kamap long ol manmeri nogut em ol ves i kamap paslain i stori long ol. Tasol dispela tok asher inap makim tu risen na wanpela samting i kamap, na ol inap trensletim olsem “long dispela rot,” “bambai,” o “olsem na.” Long nupela edisen bilong New World Translation bilong 2013 long tok Inglis na ol narapela tokples, ol i yusim dispela tok “olsem na.”

2. Nupela senis i stret wantaim ol narapela tok bilong dispela skripsa. Taim dispela tok “olsem na” i stap long ves 12, dispela i kamapim klia olsem olgeta blesing em ves 12 i go ves 14 i stori long en, em ol samting i painim ol stretpela manmeri—ol lain husat i askim God long “kisim bek” ol long han bilong ol man nogut (ves 11). Dispela senis i stret tu long ves 15 bikos dispela tok “amamas” soim olsem gutpela samting i kamap. Olsem na ol gutpela blesing em skripsa i stori long en i kamap long wanpela lain tasol—em ol manmeri “God bilong ol em Jehova.” (NW ) Na tu, olpela rait Hibru i no gat ol kain sain olsem kotesen mak. Olsem na ol lain i trensletim tok i mas kliagut long mining bilong tok, stail bilong raitim ol poem long tok Hibru, ol tok i stap paslain na bihain, na ol tok bilong Baibel we i stori long wankain samting.

3. Senis bilong tok bilong nupela edisen i stret wantaim ol narapela tok bilong Baibel we i stori long ol blesing em ol manmeri i stap gut long God bai kisim. Taim senis i kamap long trenslesen bilong dispela tok asher, dispela i stret na i kamapim klia strongpela bilip bilong Devit olsem God bai kisim bek lain Israel long han bilong ol birua, na blesim ol bambai ol i stap amamas na stap gut. (Wkp. 26:9, 10; Lo 7:13; Sng. 128:1-6) Kain olsem, Lo 28:4 i tok: “God bai i givim yupela planti pikinini na mekim planti kaikai moa i kamap long gaden bilong yupela na givim yupela planti bulmakau na sipsip.” Yes, aninit long wok king bilong pikinini bilong Devit, em Solomon, ol manmeri i stap bel isi na ol i stap gut. Ol gutpela samting i kamap long wok king bilong Solomon i makim ol gutpela blesing bai kamap taim Mesaia i mekim wok king.—1 Kin. 4:20, 21; Sng. 72:1-20.

Senis i kamap long trenslesen bilong Buk Song 144 i no senisim save yumi gat long ol tok bilong Baibel, nogat. Dispela senis i mekim na Buk Song 144 i kamapim klia samting em ol wokman bilong Jehova i bilip na wet long en—God bai bagarapim ol manmeri nogut na ol stretpela manmeri bai stap bel isi na stap gut oltaim.—Sng. 37:10, 11.