1-2. Wai na Jisas i tingting planti na wari?

LONG laspela de bilong Jisas long i stap olsem man long graun, em i tingting planti na wari. Ol birua bai mekim nogut tru long em na kilim em i dai. Tasol i gat narapela samting tu i mekim na em i tingting planti na wari. Em i laikim tumas Papa bilong em na em i laik mekim Papa i belgut. Jisas i save olsem sapos em i sanap strong na karim bikpela hevi we i laik painim em, em bai mekim holi nem bilong Jehova. Jisas i laikim tru ol manmeri, na em i save olsem sapos em i stap gut long God i go inap long em i dai, dispela bai opim rot long ol manmeri inap kisim laip oltaim.

² Planti samting i putim presa long Jisas, tasol em i stap bel isi. Em i tokim ol aposel: “Mi givim bel isi bilong mi long yupela.” (Jon 14:27) Jisas i kisim “bel isi bilong God,” em bel isi man i kisim taim em i pas gut wantaim Jehova. Olsem na Jisas i no larim wari i daunim em.—Fili. 4:6, 7.

3. Long dispela stadi, yumi bai stori long wanem samting?

³ I no gat wanpela bilong yumi bai pilim wankain presa olsem Jisas i bin pilim, tasol hevi bai painim olgeta manmeri husat i kamap disaipel bilong Jisas. (Mat. 16:24, 25; Jon 15:20) Olsem Jisas, sampela taim yumi bai tingting planti na wari. Yumi inap mekim wanem na bai pasin bilong tingting planti na wari i no ken tekewe bel isi bilong yumi? Yumi bai stori long 3-pela samting Jisas i mekim taim em i stap long graun, na yumi bai stori tu long hau yumi inap bihainim eksampel bilong em taim hevi i painim yumi.

4. Tingim tok bilong 1 Tesalonaika 5:17 na stori long ol eksampel i soim olsem Jisas i beten planti taim paslain long em i dai.

⁴ Ritim 1 Tesalonaika 5:17. Long de Jisas bai dai, em i beten planti taim. Taim Jisas i kirapim bung bilong tingim dai bilong em, em i tok tenkyu long God long bret na wain. (1 Kor. 11:23-25) Paslain long ol i lusim rum ol i mekim Pasova long en, Jisas i beten wantaim ol disaipel. (Jon 17:1-26) Taim ol i go kamap long Maunten Oliv long wankain nait, Jisas i beten planti taim. (Mat. 26:36-39, 42, 44) Na tu, taim ol i nilim Jisas long pos, em i beten paslain long em i dai. (Luk 23:46) Long laspela de bilong Jisas long i stap laip long graun, em i beten long Jehova long olgeta samting i kamap.

5. Bilong wanem ol aposel i pret na ol i no strongim bel?

⁵ Jisas i beten askim Papa long sambai long em, olsem na em inap sanap strong na karim hevi. Tasol ol aposel i no holim strong pasin bilong beten. Olsem na taim traim i kamap, ol i pret na ol i no strongim bel. (Mat. 26:40, 41, 43, 45, 56) Taim yumi karim hevi, yumi bai stap gut long God sapos yumi bihainim eksampel bilong Jisas na “beten oltaim.” Yumi ken beten askim God long wanem samting?

6. Olsem wanem bilip inap helpim yumi long i stap bel isi?

⁶ Yumi ken beten askim Jehova long “mekim bilip bilong [yumi] i kamap bikpela moa.” (Luk 17:5; Jon 14:1) Yumi mas kamap strong moa long bilip bikos Satan bai traim olgeta man i stap olsem disaipel bilong Jisas. (Luk 22:31) Maski  planti hevi i painim yumi, olsem wanem bilip inap helpim yumi long i stap bel isi? Taim yumi mekim olgeta samting yumi inap mekim bilong karim hevi, bilip bai kirapim yumi long putim olgeta hevi long han bilong Jehova. Yumi bai stap bel isi bikos yumi bilip olsem God tasol i save long rot bilong helpim yumi.—1 Pita 5:6, 7.

7. Yu kisim wanem skul long tok bilong Robert?

⁷ Pasin bilong beten i helpim yumi long i stap bel isi maski yumi bungim kain kain hevi. Tingim stori bilong Robert, em elda i winim pinis 80 krismas. Em i tok: “Tok bilong Filipai 4:6, 7 i helpim mi long sanap strong na karim planti hevi. Mi bungim hevi bilong mani. Na tu, mi lusim wok elda inap sotpela haptaim.” Wanem samting i helpim Robert long stap bel isi? Em i tok: “Mi save beten hariap taim mi stat long wari na tingting planti. Mi pilim olsem sapos oltaim mi givim bel tru long beten, mi bai stap bel isi tru.”

8. Olsem Jon 8:29 i kamapim, wanem narapela samting i mekim na Jisas i stap bel isi tru?

⁸ Ritim Jon 8:29. Maski ol birua i mekim nogut long Jisas, em i stap bel isi tru bikos em i save olsem em i amamasim Papa. Em i bihainim tok bilong Papa maski i hatwok long mekim olsem. Em i laikim tru Jehova na em i yusim laip olgeta bilong em long mekim wok bilong Jehova. Paslain long em i kam long graun, em i stap “saveman bilong wok” na em i mekim wok bilong God. (Prov. 8:30) Taim em i stap long graun, em i givim bel tru long  skulim ol narapela long Papa bilong em. (Mat. 6:9; Jon 5:17) Dispela wok i givim bikpela amamas long Jisas.—Jon 4:34-36.

9. Taim yumi bisi long autim tok, hau bai dispela i helpim yumi long i stap bel isi?

⁹ Eksampel bilong Jisas i kirapim yumi long bihainim tok bilong Jehova na ‘oltaim yumi bisi long mekim planti wok bilong Bikpela.’ (1 Kor. 15:58) Taim yumi “lusim bikpela haptaim tru” long autim tok, yumi inap holim stretpela tingting long ol hevi i painim yumi. (Apo. 18:5) Long wok autim tok, yumi save bungim ol manmeri i karim bikpela hevi moa. Taim ol i lain long laikim Jehova na bihainim tok bilong em, laip bilong ol i kamap gutpela moa na ol i stap amamas tru. Dispela i save strongim bilip bilong yumi olsem Jehova bai lukautim yumi, olsem na yumi stap bel isi. Wanpela sista i bin i stap bel hevi tru na em i pilim olsem em i no gutpela. Tasol em i tok: “Taim mi bisi long autim tok, mi inap kontrolim tingting bilong mi na mi pilim amamas. Wok autim tok i helpim mi long pilim olsem mi stap klostu moa long Jehova.”

10. Yu kisim wanem skul long tok bilong Brenda?

¹⁰ Tingim eksampel bilong Brenda, em sista bilong yumi. Em na pikinini meri bilong em i kisim bikpela sik. Bodi bilong Brenda i no gat strong, olsem na em i sindaun tasol long wilsia. Sampela taim em i autim tok long ol haus, tasol em i lusim bikpela haptaim moa long raitim ol pas. Em i tok: “Taim mi luksave olsem sik bilong mi i no inap pinis long dispela taim nogut bilong nau, mi putim tingting olgeta i go long wok bilong God. Taim mi autim tok, mi no save wari na tingting planti. Dispela wok i kirapim mi long tingting tasol long helpim ol manmeri mi bungim long haus o mi raitim pas long ol. Na tu, oltaim dispela wok i kirapim mi long tingim hop bilong gutpela samting bai kamap bihain.”

11-13. (a) Olsem wanem ol aposel na ol narapela i stap olsem gutpela pren bilong Jisas? (b) Gutpela pasin bilong ol pren i helpim Jisas olsem wanem?

¹¹ Insait long haptaim we Jisas i mekim wok autim tok, ol aposel i stap gutpela pren bilong em. Ol i truim dispela savetok olsem: “I gat ol pren husat i save pas gut tru wantaim, winim pasin i stap namel long tupela brata.” (Prov. 18:24) Jisas i laikim tru ol dispela pren. Taim Jisas i stap long graun na mekim wok autim tok, ol brata tru bilong em i no bilip long em. (Jon 7:3-5) Wanpela taim ol wanblut bilong em i tok em i kamap longlong. (Mak 3:21) Long nait paslain long Jisas i dai, em i tokim ol aposel: “Yupela i bin pas wantaim mi taim ol traim i painim mi.”—Luk 22:28.

¹² Sampela taim ol aposel i bagarapim bel bilong Jisas, tasol em i no tingim popaia bilong ol, nogat. Em i tingim bilip bilong ol. (Mat. 26:40; Mak 10:13, 14; Jon 6:66-69) Long nait paslain long em i dai, em i tokim ol olsem: “Mi kolim yupela pren, long wanem, olgeta samting mi bin harim long Papa bilong mi, mi kamapim long yupela.” (Jon 15:15) Ol pren bilong Jisas i strongim em tru. Ol i helpim em long mekim wok autim tok na dispela i mekim em i amamas tru.—Luk 10:17, 21.

¹³ Ol narapela manmeri tu i stap pren bilong Jisas na ol i helpim em long autim tok, na mekim ol narapela samting. Sampela manmeri i singautim em i go kaikai wantaim ol. (Luk 10:38-42; Jon 12: 1, 2) Ol narapela i bihainim em long raun bilong em na yusim mani kago bilong ol yet long helpim em. (Luk 8:3) Jisas i gat ol gutpela pren bikos em yet i stap gutpela pren bilong ol. Em i mekim ol gutpela samting bilong helpim ol na em i no ekspektim ol long mekim samting ol i no gat strong long mekim. Maski Jisas i gutpela olgeta na ol pren bilong em i sinman, em i amamas long helpim ol i givim long em. Ol i helpim em long i stap bel isi tru.

14-15. (a) Olsem wanem yumi inap kisim ol gutpela pren? (b) Ol pren inap helpim yumi olsem wanem?

¹⁴ Ol gutpela pren bai helpim yumi long stap gut long Jehova. Nambawan rot bilong kisim ol gutpela pren em olsem yumi yet i mas i stap olsem gutpela pren. (Mat. 7:12) Baibel i kirapim yumi long yusim taim na strong bilong yumi long helpim ol narapela, moa yet ol manmeri i “sot” long ol samting. (Efe. 4:28) Olsem wanem? Yu save long wanpela long kongrigesen husat i nidim helpim? Yu inap go long stua na baim kaikai bilong pablisa husat i sik o lapun na em i no inap lusim haus? Yu inap givim kaikai long famili i gat hevi long sait bilong mani? Sapos yu save gut long yusim jw.org websait na JW Library app, yu inap helpim ol narapela long kongrigesen long yusim ol dispela tul? Taim yumi bisi tru long helpim ol narapela, yumi bai kisim bikpela amamas.—Apo. 20:35.

¹⁵ Taim hevi i painim yumi, ol pren bai sambai long yumi na yumi inap stap bel isi. Elihu i bin putim yau taim Jop i stori long ol hevi i painim em, na olsem tasol ol  pren bai putim gut yau taim yumi autim tingting na wari bilong yumi. (Jop 32:4) Yumi no ken ekspektim ol pren long mekim ol disisen bilong yumi. Taim ol i yusim stiatok bilong Baibel long givim edvais, savetingting bai kirapim yumi long putim gut yau long tok bilong ol. (Prov. 15:22) King Devit i daunim em yet na larim ol pren i helpim em. Taim hevi i painim yumi, yumi tu i mas daunim yumi yet na larim ol pren i helpim yumi. (2 Sml. 17:27-29) Ol dispela pren i olsem presen i kam long Jehova.—Jems 1:17.

16. Olsem Filipai 4:6, 7 i kamapim, wanem wanpela rot tasol bilong i stap bel isi?

¹⁶ Ritim Filipai 4:6, 7. Long “rot bilong Krais Jisas,” Jehova bai givim bel isi long yumi. Wai na Baibel i tok olsem? Wanpela rot tasol bilong i stap bel isi tru em olsem, yumi mas kliagut na bilip long wok bilong Jisas. Ofa bilong Jisas long baim bek ol man i opim rot na God inap fogivim olgeta sin bilong yumi. (1 Jon 2:12) Dispela i mekim yumi belgut! Jisas i stap King long Kingdom Bilong God, na em bai pinisim olgeta hevi em Satan na lain bilong em i putim long yumi. (Ais. 65:17; 1 Jon 3:8; Rev. 21:3, 4) Dispela i mekim yumi bilip strong long gutpela samting bai kamap! Jisas i givim bikpela wok long yumi, tasol em i stap wantaim yumi na sambai long yumi long dispela taim bilong las de. (Mat. 28:19, 20) Dispela i strongim tru bel bilong yumi! Taim yumi stap belgut, bilip strong long gutpela samting bai kamap, na yumi strongim bel, dispela bai helpim yumi long i stap bel isi.

17. (a) Ol Kristen i ken mekim wanem na bai ol inap stap bel isi? (b) Olsem Jon 16:33 i tok promis long en, yumi inap mekim wanem?

¹⁷ Taim ol bikpela hevi tru i painim yu, yu ken mekim wanem na bai yu inap stap bel isi? Yu ken bihainim pasin bilong Jisas. Namba 1: Beten oltaim. Namba 2: Bihainim tok bilong Jehova na givim bel tru long autim tok maski i hatwok long mekim olsem. Namba 3: Larim ol pren i helpim yu long taim bilong hevi. Long dispela rot, bel isi bilong God bai lukautim tingting na bel bilong yu. Olsem Jisas, yu tu bai winim olgeta kain hevi.—Ritim Jon 16:33.