1. Olsem Efesus 6:10-13 i kamapim, olsem wanem Jehova i soim olsem em i tingim tru yumi?

JEHOVA i tingim tru yumi ol wokman bilong em, olsem na em i helpim yumi long sakim ol birua. Ol nambawan birua em Satan na ol dimon. Jehova i toksave olsem yumi mas lukaut long ol dispela birua, na em i givim helpim yumi nidim bilong sakim ol. (Ritim Efesus 6:10-13.) Taim yumi kisim helpim i kam long Jehova na yumi bilip tru long em, yumi inap sanap strong na sakim Satan. Yumi inap holim wankain tingting olsem aposel Pol. Em i tok: “Sapos God i stap long sait bilong yumi, orait husat bai birua long yumi?”—Rom 8:31.

2. Long dispela atikol, yumi bai stori long wanem samting?

² Yumi stap olsem ol Kristen tru, olsem na yumi no bisi long Satan na ol dimon. Yumi bisi long kisim save long Jehova na mekim wok bilong em. (Sng. 25:5) Tasol yumi mas save long ol samting Satan i save mekim. Long dispela rot, yumi no inap larim em i giamanim yumi. (2 Kor. 2:11) Long dispela atikol, yumi bai stori long nambawan rot bilong Satan na ol dimon long giamanim ol man. Yumi bai stori tu long olsem wanem yumi inap sanap strong na sakim ol.

3-4. (a) Wanem ol samting i insait long wok bilong ol spirit nogut? (b) Hamas manmeri i bilip long wok bilong ol spirit nogut?

³ Wok bilong spirit nogut em nambawan rot bilong Satan na ol dimon long giamanim ol man. Ol man husat i mekim wok bilong ol spirit nogut, ol i pilim olsem ol i gat save na ol inap kontrolim sampela samting we ol man i no inap save o kontrolim. Sampela bilong ol i stap olsem glasman na sampela i gat save bilong astroloji—ol i ting ol sta, mun, na ol planet i stiaim laip  bilong ol man—ol i pilim olsem ol inap tokaut long ol samting bai kamap bihain. Sampela narapela i mekim ol man i ting olsem ol i toktok wantaim man i dai pinis. Ol narapela i mekim wok sanguma na mejik, na ol i kolim strafe bai painim ol narapela. *

⁴ Hamas manmeri i bilip long wok bilong spirit nogut? Long wanpela wok painimaut i kamap long 18 kantri long Latin Amerika na Karibian, wanpela long olgeta 3-pela 3-pela manmeri i bilip long mejik na sanguma, na ol i bilip tu olsem ol man inap toktok wantaim ol spirit. Narapela wok painimaut i kamap long 18 kantri long Afrika. Wanpela long olgeta 2-pela 2-pela manmeri i tok ol i bilip long sanguma. Maski yumi stap long wanem hap, oltaim yumi mas lukaut, nogut yumi pundaun long wok bilong spirit nogut. Satan i painim rot bilong “giamanim olgeta manmeri bilong graun.”—Rev. 12:9.

5. Jehova i pilim olsem wanem long wok bilong ol spirit nogut?

⁵ Jehova em “God bilong mekim pasin tru tasol.” (Sng. 31:5) Yu ting em i pilim olsem wanem long wok bilong ol spirit nogut? Em i heitim dispela samting! Jehova i tokim lain Israel: “Yupela i no ken kukim pikinini man o pikinini meri bilong yupela long paia, na yupela no ken mekim wok olsem man i save givim save long ol samting i stap hait, mejikman, na posinman, na yupela i no ken lukluk long ol mak bilong kisim save long ol samting bai kamap bihain, na yupela i no ken mekim marila, o go lukim man i save toktok wantaim ol daiman o man i save tokaut long ol samting bai kamap bihain, o man i save painimaut tingting bilong ol man i dai pinis. Man o meri i mekim ol dispela samting, ol i stingpela samting long ai bilong Jehova.” (Lo 18:10-12) Yumi ol Kristen i no stap aninit long Lo em Jehova i givim long lain Israel. Tasol yumi save olsem God i heitim yet wok bilong ol spirit nogut.—Mal. 3:6.

6. (a) Olsem wanem Satan i yusim wok bilong ol spirit nogut long bagarapim ol manmeri? (b) Olsem Eklisiastis 9:5 i kamapim, wanem samting tru i painim ol man taim ol i dai?

⁶ Jehova i tok lukaut long yumi long wok bilong ol spirit nogut bikos em i save olsem Satan i yusim dispela samting long bagarapim ol manmeri. Satan i yusim wok bilong ol spirit nogut long strongim ol tok giaman—dispela i makim tu tok giaman olsem ol daiman i stap laip long narapela hap. (Ritim Eklisiastis 9:5.) Na tu, Satan i yusim wok bilong ol spirit nogut long pretim ol manmeri na pulim ol long lusim Jehova. Em i laik bai ol manmeri i trastim ol spirit nogut na ol i no ken trastim Jehova.

7. Jehova i tokim yumi long wanem samting?

⁷ Olsem yumi stori pinis, Jehova i tokim yumi long ol samting yumi mas save long en na bai yumi inap abrusim tok giaman bilong Satan na ol dimon. Skelim sampela samting yumi ken mekim bilong sakim Satan na ol dimon.

8. (a) Wanem nambawan rot bilong sakim ol spirit nogut? (b) Olsem wanem Song 146:4 i kamapim klia tok giaman bilong Satan long samting i painim ol man taim ol i dai?

⁸ Ritim Tok Bilong God na tingim tingim. Dispela em nambawan rot bilong sakim ol tok giaman bilong ol spirit nogut. Tok Bilong God  i olsem bainat i sap tru na em bai kamapim klia ol tok giaman bilong Satan. (Efe. 6:17) Olsem, Satan i kamapim tok giaman olsem ol daiman inap toktok wantaim ol man, tasol Tok Bilong God i kamapim klia olsem dispela tok i no tru. (Ritim Buk Song 146:4.) Tok Bilong God i kamapim klia tu olsem Jehova tasol inap tokaut stret long ol samting bai kamap bihain. (Ais. 45:21; 46:10) Sapos oltaim yumi ritim Tok Bilong God na tingim tingim ol tok bilong en, yumi bai redi long sakim na heitim ol tok giaman em ol spirit nogut i laik bai yumi bilipim.

9. Yumi mas abrusim wanem ol wok bilong spirit nogut?

⁹ Sakim olgeta wok bilong spirit nogut. Yumi stap olsem ol Kristen tru, olsem na yumi no ken traim long mekim wanpela wok bilong ol spirit nogut. Olsem, yumi no ken visitim ol glasman o traim sampela kain rot bilong toktok wantaim ol daiman. Olsem yumi stori long atikol i kamap paslain, yumi mas abrusim ol kastam bilong fiuneral we ol man i bilip olsem daiman i stap laip long sampela hap. Yumi no ken bihainim pasin bilong glasim ol sta, mun, na ol planet bilong kisim save long ol samting bai kamap bihain. (Ais. 8:19) Olgeta dispela pasin i nogut tru na ol inap pulim yumi long toktok stret wantaim Satan na ol dimon.

10-11. (a) Long taim bilong ol aposel, sampela manmeri i mekim wanem taim ol i kisim save long tok i tru? (b) Olsem 1 Korin 10:21 i kamapim, wai na yumi mas bihainim eksampel bilong ol Kristen bilong pastaim? (c) Hau bai yumi inap bihainim eksampel bilong ol?

¹⁰ Rausim ol samting bilong wok kalt. Long taim bilong ol aposel, sampela manmeri bilong Efesus i bin insait long wok bilong ol spirit nogut. Taim ol i kisim save long tok i tru, ol i mekim bikpela senis. “Planti bilong ol husat i save wokim ol kain kain marila posin samting, ol i karim ol buk bilong ol i kam na kukim long ai bilong olgeta manmeri.” (Apo. 19:19) Ol dispela manmeri i gat strongpela tingting long sakim ol spirit nogut. Ol buk bilong wok mejik i gat bikpela pe long en. Tasol ol i no givim  ol dispela buk long ol narapela o putim prais na salim, nogat, ol i bagarapim ol dispela buk. Ol i tingting strong long mekim Jehova i belgut, na ol i no wari long bikpela pe bilong ol dispela buk.

¹¹ Hau bai yumi inap bihainim eksampel bilong ol dispela Kristen? Yumi mas rausim olgeta kain samting i insait long wok kalt. Em ol samting olsem paspas, nekles, o ol narapela samting ol manmeri i werim o holim i stap bilong lukautim ol yet na bai ol spirit nogut i no ken bagarapim ol.—Ritim 1 Korin 10:21.

12. Yumi mas givim wanem ol askim long yumi yet long sait bilong ol samting yumi kisim amamas long en?

¹² Skelim gut ol samting yu mekim bilong kisim amamas. Askim yu yet: ‘Mi save lukluk long Intenet na ritim ol buk, magasin, o atikol i stori long wok kalt? Olsem wanem long musik mi harim, ol muvi na TV program mi lukim, o vidio gem mi pilaim? Sampela bilong ol i stori long wok bilong ol spirit nogut? Ol i stori long ol vempaia, o daiman i wokabaut, o sampela kain spirit? Ol i kirapim mi long tingim wok mejik, posin, na marila olsem ol samting bilong amamas tasol na i no inap givim hevi long mi?’ Em tru olsem sampela tumbuna stori i no sapotim wok bilong ol spirit nogut. Tasol taim yu skelim ol samting yu kisim amamas long en, yu mas tingting strong long mekim disisen i helpim yu long stap longwe long ol samting Jehova i heitim. Yumi laik tru “bai maus bilong bel i no ken kotim” yumi long ai bilong God.—Apo. 24:16. *

13. Yumi no ken mekim wanem kain stori?

¹³ No ken stori long wok bilong ol dimon. Yumi mas bihainim eksampel bilong Jisas. (1 Pita 2:21) Paslain long Jisas i kam long  graun, em i bin stap long heven, na em i save gut long Satan na ol dimon. Tasol em i no save stori long ol samting ol dispela spirit nogut i bin mekim. Jisas i laik stap olsem witnes bilong Jehova, na i no olsem man bilong tokim ol narapela long Satan. Yumi mas bihainim pasin bilong Jisas na no ken mekim stori bilong ol dimon. Yumi laik bai ol stori bilong yumi i kamapim klia olsem “planti gutpela nius i pulap long bel” bilong yumi, em nius bilong tok i tru.—Sng. 45:1.

14-15. (a) Bilong wanem yumi no ken pret long ol spirit nogut? (b) Wanem samting i soim klia olsem Jehova i lukautim ol manmeri bilong em long nau?

¹⁴ No ken pret long ol spirit nogut. Yumi stap long taim nogut, olsem na hevi inap painim yumi. Eksiden, sik, o dai inap kamap wantu tasol. Tasol yumi no ken ting olsem ol spirit nogut i kamapim ol dispela hevi. Baibel i tok olgeta manmeri inap bungim hevi bilong “taim nogut na ol samting we man i no ting inap kamap.” (Ekl. 9:11) Jehova i soim olsem em i gat bikpela strong moa winim ol dimon. Olsem, God i no larim Satan long kilim Jop. (Jop 2:6) Long taim bilong Moses, Jehova i soim olsem strong bilong em i winim tru strong bilong ol pris i mekim olkain mejik long Isip. (Kis. 8:18; 9:11) Taim Jisas i kisim strong long han bilong Jehova, em i rausim Satan na ol dimon long heven na tromoi ol i kam daun long graun. Klostu nau, Jisas bai tromoi ol i go daun long hul i no gat as, na bai ol i no gat strong moa long bagarapim ol man.—Rev. 12:9; 20:2, 3.

¹⁵ Planti samting i soim klia olsem Jehova i lukautim ol manmeri bilong em long nau. Tingim: Yumi autim tok long olgeta hap bilong graun na skulim ol man long tok i tru. (Mat. 28:19, 20) Long dispela rot, yumi kamapim klia ol wok nogut bilong Satan. Sapos Satan inap, em bai stopim olgeta wok bilong yumi, tasol em i no gat strong long mekim olsem. Olsem na yumi no ken pret long ol spirit nogut. Yumi save olsem “ai bilong Jehova i save lukluk raun long olgeta hap bilong graun bilong em i ken soim strong bilong em long helpim ol man husat i givim bel olgeta long em.” (2 Sto. 16:9) Sapos yumi stap gut long Jehova, ol dimon i no inap mekim samting bilong bagarapim yumi inap oltaim oltaim.

16-17. Stori long eksampel bilong wanpela husat i strongim bel na sakim ol spirit nogut.

¹⁶ Yumi mas strongim bel bambai yumi inap sakim ol spirit nogut, na moa yet taim ol pren o wanblut i birua long yumi. Sapos yumi mekim olsem, Jehova bai blesim yumi. Tingim eksampel bilong Erica husat i stap long Gana. Erica i gat 21 krismas taim em i kirap stadi long Baibel. Papa bilong Erica em pris bilong wok mejik, olsem na ol narapela i ekspektim Erica long bihainim kastam bilong kaikai abus ol i sakrifaisim long ol god bilong papa bilong em. Tasol Erica i no bihainim dispela kastam, olsem na ol wanfamili i pilim olsem em i mekim pasin nogut long ol god. Famili bilong Erica i bilip olsem ol god bai panisim ol na mekim ol i kamap longlong na kisim sik.

¹⁷ Ol wanfamili i fosim Erica long bihainim kastam, tasol em i sanap strong na em i no bihainim dispela kastam. Olsem na ol i rausim em long haus. Sampela Witnes i larim Erica i go stap wantaim ol. Jehova i blesim Erica na givim nupela famili long em—ol wanbilip husat i kamap olsem brata na susa bilong em. (Mak 10:29, 30) Maski ol wanblut i rausim em long haus na kukim ol kago bilong em, Erica i stap gut long Jehova, kisim baptais, na nau em i mekim wok painia oltaim. Em i no pret long ol dimon. Erica i tingim famili bilong em, na em i tok: “Olgeta de mi beten olsem famili bilong mi bai kisim save long Jehova na ol inap kamap fri long mekim wok bilong God.”

18. Yumi bai kisim wanem ol blesing sapos yumi trastim Jehova?

¹⁸ I no yumi olgeta bai bungim ol kain hevi olsem. Tasol yumi olgeta i mas sakim ol spirit nogut na trastim Jehova. Sapos yumi mekim olsem, yumi bai kisim planti blesing, na ol tok giaman bilong Satan i no inap paulim yumi. Na tu, yumi no inap pret long ol dimon na larim dispela pret i pasim yumi long mekim wok bilong God. Yumi bai strongim pasin pren bilong yumi wantaim Jehova. Disaipel Jems i tok: “Daunim yupela yet na stap aninit long God; tasol yupela i mas sakim Devil, na em bai lusim yupela na ranawe. Yupela i mas i go klostu long God, na em bai kam klostu long yupela.”—Jems 4:7, 8.