1-2. (a) Satan i mekim wanem bilong giamanim ol manmeri? (b) Long dispela atikol, yumi bai stori long wanem samting?

SATAN em “papa bilong pasin giaman” na em i giamanim ol manmeri kirap long taim bilong Adam na Iv na i kam inap long nau. (Jon 8:44) Sampela tok giaman i stori long samting i kamap long ol man taim ol i dai na ol i stap olsem wanem bihain long ol i dai. Ol dispela tok giaman i as bilong planti kastam long nau. Olsem na taim wanfamili o wanpela long komiuniti i dai, planti bratasista i “pait strong long holimpas” bilip i stret wantaim tok bilong Baibel.—Jut 3.

² Sapos ol kain traim olsem i painim yu, wanem samting inap helpim yu long sanap strong long bilip na bihainim tok bilong Baibel? (Efe. 6:11) Hau bai yu inap strongim na mekim gut bel bilong wanbilip taim ol narapela i fosim em long insait long ol kastam em God i no orait long en? Dispela atikol bai stori long olsem wanem Jehova i helpim yumi. Pastaim yumi ken skelim tok Baibel i mekim long dai.

3. Namba 1 tok giaman i kamapim wanem samting?

³ God i wokim ol manmeri bilong i stap laip oltaim na i no bilong i dai. Adam na Iv i mas bihainim tok bilong Jehova bambai ol inap stap laip oltaim. Jehova i tok: “Yu no ken kaikai prut bilong diwai bilong givim save long wanem samting i gutpela na wanem samting i nogut. Long de yu kaikai prut bilong en, tru tumas bai yu dai.” (Stt. 2:16, 17) Tasol Satan i kamapim hevi. Long rot bilong wanpela snek, em i tokim Iv: “Tru tumas, yutupela i no inap i dai.” Iv i bilipim dispela tok giaman na em i kaikai prut. Bihain Adam tu i kaikai dispela prut. (Stt. 3:4, 6)  Olsem na olgeta manmeri i gat sin na dai i painim ol.—Rom 5:12.

4-5. Olsem wanem Satan i giamanim yet ol manmeri?

⁴ Adam na Iv i dai olsem God i bin tok. Tasol Satan i no lusim pasin bilong tok giaman. Bihain em i kamapim sampela moa tok giaman. Wanpela tok giaman em olsem, taim man i dai, wanpela hap bilong bodi i stap laip yet long ples spirit. Kirap long bipo yet na i kam inap long nau, dispela tok giaman i kamapim planti moa tok giaman.—1 Tim. 4:1.

⁵ Wai na planti manmeri i bilipim ol dispela tok giaman? Ol dispela tok i inapim laik na filings bilong ol manmeri. God i wokim yumi bilong i stap laip oltaim, olsem na yumi no laik i dai. (Ekl. 3:11) Dai i olsem wanpela birua.—1 Kor. 15:26.

6-7. (a) Yu ting Satan i pasim rot bilong kisim stretpela save long samting i kamap long man taim em i dai? Eksplenim. (b) Olsem wanem tok bilong Baibel i helpim yumi na yumi no pret long daiman?

⁶ Maski Satan i wok strong long kamapim ol tok giaman, ol manmeri i kisim stretpela save long samting i kamap long man taim em i dai. Long nau, planti manmeri moa i gat stretpela save na ol i autim tok bilong Baibel long dispela samting. Ol i save olsem ol daiman bai kirap bek. (Ekl. 9:5, 10; Apo. 24:15) Dispela save i mekim gut bel bilong yumi, na yumi no tingting planti na pret nating long ol tok giaman. Yumi no pret long ol daiman, na tu, yumi no tingting planti long wanem samting i painim ol. Yumi save olsem ol i no stap laip moa na ol i no inap mekim nogut long wanpela man. I olsem ol i slip indai olgeta. (Jon 11:11-14) Yumi save tu olsem ol daiman i no save olsem longpela haptaim i lus. Taim ol i kirap bek, ol bai pilim olsem ol i dai nau tasol na kirap bek, maski ol i dai inap planti handret yia pinis.

⁷ Baibel i stori long samting i kamap long man taim em i dai, na ating yu wanbel olsem dispela tok em i klia na i stret olgeta! Dispela tok bilong Baibel i narapela kain olgeta long ol tok giaman bilong Satan! Ol tok giaman bilong Satan i paulim ol manmeri na i bagarapim gutnem bilong Krieta. Yumi laik kliagut moa long olsem wanem ol tok giaman bilong Satan i kamapim hevi, olsem na yumi bai skelim ol dispela askim: Olsem wanem ol tok giaman bilong Satan i bagarapim gutnem bilong Jehova? Olsem wanem ol dispela tok i daunim bilip bilong yumi long ofa bilong Krais long baim bek yumi? Olsem wanem ol dispela tok i putim bikpela hevi moa long ol manmeri?

8. Olsem Jeremaia 19:5 i kamapim, olsem wanem tok giaman bilong Satan i bagarapim gutnem bilong Jehova?

⁸ Tok giaman bilong Satan i bagarapim gutnem bilong Jehova. Wanpela tok giaman em olsem, ol daiman i kisim bikpela pen long paia. Dispela tok i bagarapim gutnem bilong God! Em i gat pasin laikim, tasol tok giaman i kirapim ol man long ting olsem God i gat hatpela pasin olsem Satan. (1 Jon 4:8) Yu pilim olsem wanem long dispela tok giaman? Yu ting Jehova yet i pilim olsem wanem? Em i heitim tru olgeta kain hatpela pasin.—Ritim Jeremaia 19:5.

9. Olsem wanem ol tok giaman bilong Satan i daunim bilip bilong yumi long ofa bilong Krais olsem Jon 3:16 na 15:13 i stori long en?

⁹ Ol tok giaman bilong Satan long dai i daunim bilip bilong yumi long ofa bilong Krais long baim bek yumi. (Mat. 20:28) Narapela tok giaman bilong Satan em olsem: Taim ol man i dai, wanpela hap bilong ol i stap laip yet. Sapos i olsem, olgeta man bai stap laip oltaim. Bai i no gat wok long Krais i givim laip bilong em olsem pe bilong baim bek yumi bambai yumi inap kisim laip oltaim. Tingim, ofa bilong Krais em bikpela samting tru i kamapim klia pasin laikim bilong em long olgeta manmeri. (Ritim Jon 3:16; 15:13.) Tingim hau Jehova na Jisas i pilim long ol tok giaman we i daunim tru pe bilong baim bek yumi!

10. Olsem wanem ol tok giaman bilong Satan i kamapim planti moa pen na hevi?

¹⁰ Ol tok giaman bilong Satan i kamapim planti moa pen na hevi. Ating sampela papamama i bel sori long pikinini i dai, na lotu i tokim ol olsem God i kisim pikinini i go bilong kamap ensel long heven. Yu ting dispela tok giaman i pinisim bel sori o em i mekim ol i bel sori moa yet? Ol man i yusim bilip giaman bilong helpaia long sapotim pasin bilong ol long pasim ol man long pos na kukim ol long paia taim ol i agensim bilip bilong lotu. Wanpela buk i stori long strafe em Kot Bilong Spen i givim long bipo. Dispela buk i tok, sampela lida bilong dispela kot i bilip olsem ol i helpim ol man long kisim “liklik skul bilong helpaia,” na ol i ting dispela inap kirapim ol manmeri long tanim bel paslain long ol i dai na bai ol i no ken i go long helpaia. Long planti kantri, ol manmeri i pilim olsem ol i mas lotuim ol tumbuna husat i dai pinis, onarim ol, o amamasim ol na bai ol i kisim blesing. Ol narapela i laik mekim gut bel bilong ol tumbuna bambai ol i no ken kisim panismen. Tasol sori tru, ol tok giaman bilong Satan i no mekim gut bel bilong ol manmeri. Ol dispela tok giaman i mekim na ol manmeri i pret na tingting planti.

11. Ol wanfamili na ol pren inap mekim wanem bilong fosim yumi long sakim tok bilong Baibel?

¹¹ Sapos yumi laikim tru God na tok bilong em long Baibel, dispela bai strongim yumi long bihainim tok bilong Jehova. Yumi bai mekim olsem maski ol wanfamili o pren i fosim yumi long insait long ol kastam bilong tingim ol daiman, em ol kastam i no stret wantaim tok bilong Baibel. Ol inap semim yumi na tok olsem yumi no laikim o rispektim ol daiman. O ol inap tok olsem pasin bilong yumi bai kirapim daiman long mekim nogut long ol manmeri i stap laip. Hau bai yumi inap sambai long tok bilong Baibel? Yumi ken skelim sampela stiatok bilong Baibel.

12. Wanem ol kastam i no stret wantaim tok bilong Baibel?

¹² Strongim tingting long “stap longwe” long ol bilip na kastam em Baibel i tambuim. (2 Kor. 6:17) Long wanpela kantri long Karibian, planti manmeri i bilip olsem taim man i dai, “tewel” bilong em inap stap yet na panisim ol man husat i bin mekim nogut long em. Wanpela  buk i tok dispela “tewel” inap “kamapim trabel long komiuniti.” Long Afrika, sapos i gat mira na ol poto long haus bilong man i dai, orait ol i mas karamapim mira na tanim ol poto i go feisim wol. Wai na ol i mekim olsem? Sampela man i tok ol daiman i no ken lukim ol yet! Yumi lotuim Jehova, olsem na yumi stap longwe tru long ol bilip na kastam we i sapotim ol tok giaman bilong Satan!—1 Kor. 10:21, 22.

13. Olsem Jems 1:5 i tok, yu mas mekim wanem sapos yu gat tupela tingting long wanpela bilip o kastam?

¹³ Sapos yu gat tupela tingting long wanpela bilip o kastam, beten askim Jehova long givim yu savetingting. (Ritim Jems 1:5.) Bihain, yusim ol pablikesen bilong yumi long mekim wok painimaut. Sapos yu nidim sampela moa helpim, orait toktok wantaim ol elda long kongrigesen. Ol i no inap tokim yu stret long samting yu mas mekim, tasol ol inap kamapim ol stiatok bilong Baibel we inap stiaim yu long mekim gutpela disisen. Taim yu mekim ol dispela samting, i olsem yu trenim “gut tingting” na bai yu inap “kliagut long wanem samting i stret na wanem samting i no stret.”—Hib. 5:14.

14. Yumi inap mekim wanem na bai yumi no pundaunim ol narapela?

¹⁴ “Yupela i mas mekim olgeta samting bilong givim glori long God. Yupela i no ken mekim sampela pasin i pundaunim” ol narapela. (1 Kor. 10:31, 32) Taim yumi laik mekim disisen long insait long wanpela kastam, yumi mas tingim ol narapela, na moa yet ol wanbilip bilong yumi, ol bai pilim olsem wanem long disisen bilong yumi. Yumi nolaik tru long pundaunim ol narapela! (Mak 9:42) Yumi mas tingim tu ol narapela em ol i no Witnes—yumi no ken mekim ol i bel hevi. Pasin laikim bai kirapim yumi long soim rispek taim yumi toktok wantaim ol, na dispela bai givim biknem long Jehova. Yumi no ken tok pait o tok bilas long ol kastam. Tingim, pasin laikim i gat bikpela strong! Taim yumi tingim ol narapela, rispektim ol, na soim pasin laikim, dispela pasin inap kirapim ol long senisim tingting.

15-16. (a) Wai na i gutpela long toksave long ol narapela long bilip bilong yu? Stori long ekspiriens. (b) Tok bilong Pol long Rom 1:16 i kirapim yumi long mekim wanem?

¹⁵ Toksave olsem yu wanpela Witnes Bilong Jehova. (Ais. 43:10) Sapos ol wanblut na ol neiba i save olsem yu lotuim God Jehova, dispela bai opim rot na ol i no inap putim bikpela hevi tumas long yu. Francisco i stap long Mosambik, na em i tok: “Taim mi na meri bilong mi, Carolina, i kisim save long tok i tru, mipela i tokim famili bilong mipela olsem mipela bai lusim pasin bilong lotuim daiman. Tasol  wanpela traim i kamap taim susa bilong Carolina i dai. Wanpela kastam bilong ples em long wasim bodi bilong daiman. Taim ol i wasim pinis bodi, ol bai kapsaitim dispela wara na wanblut tru bilong daiman bai slip 3-pela de long dispela hap ol i kapsaitim wara long en. Ol i ting dispela pasin bai mekim isi bel bilong daiman. Famili bilong Carolina i ekspektim em long bihainim dispela kastam.

¹⁶ Francisco na Carolina i mekim wanem? Francisco i tok: “Mipela i laikim Jehova na mipela i laik bai em i belgut, olsem na mipela i no bihainim dispela kastam. Famili bilong Carolina i kros nogut tru. Ol i sutim tok olsem mipela i no rispektim ol daiman, na ol i tok famili i no inap moa long visitim o helpim mipela. Pastaim yet mipela i bin stori gut long ol bilip bilong mipela, olsem na taim ol i kros i stap, mipela i no stori gen long dispela samting. Sampela wanblut i sambai long mipela na ol i tokim famili bilong Carolina olsem mipela i bin stori pinis long bilip bilong mipela. Bihain, ol wanblut bilong Carolina i no kros moa na ol i kamap wanbel gen wantaim mipela. Sampela wanblut i kam stret long haus na askim mipela long ol buk na nius bilong Baibel.” Dispela ekspiriens i soim klia olsem yumi no ken sem long sambai long stretpela save long samting i kamap long man taim em i dai.—Ritim Rom 1:16.

17. Olsem wanem yumi inap stap olsem trupela pren bilong wanbilip taim em i krai sori?

¹⁷ Taim wanblut o pren bilong wanpela wanbilip i dai, yumi mas wok strong long stap olsem “trupela pren” bilong wanbilip, na “kamap olsem brata bilong [em] long taim bilong hevi.” (Prov. 17:17) Hau bai yumi inap stap olsem “trupela pren” sapos ol wanfamili i putim presa long wanbilip bilong yumi long bihainim kastam we i no stret wantaim tok bilong Baibel? Yumi ken skelim 2-pela tok bilong Baibel we inap helpim yumi long mekim gut bel bilong ol wanbilip.

18. (a) Bilong wanem Jisas i aiwara? (b) Yumi inap kisim wanem skul long pasin bilong Jisas?

¹⁸ “Krai wantaim ol man i krai.” (Rom 12:15) Ating yumi no save long wanem tok yumi bai mekim taim man i krai sori. Sampela taim, aiwara bilong yumi i gat bikpela strong moa winim toktok yumi inap mekim. Lasarus em pren  bilong Jisas. Taim Lasarus i dai, tupela susa bilong em, Maria na Marta, na ol pren tu i krai sori long em. Bihain long 4-pela de, Jisas i go kamap na “aiwara bilong [em] i pundaun” maski em i save olsem em bai kirapim bek Lasarus. (Jon 11:17, 33-35) Aiwara bilong Jisas i kamapim klia tingting bilong Papa. Dispela i soim klia tu olsem Jisas i laikim tru dispela famili, na ating dispela i mekim gut bel bilong Maria na Marta. Olsem tasol, taim ol bratasista i pilim olsem yumi laikim na tingim ol, ol i save olsem ol i no stap wanpis; ol i gat planti gutpela pren husat i tingim ol na sambai long ol.

19. Taim yumi mekim gut bel bilong wanbilip, hau bai yumi inap bihainim tok bilong Eklisiastis 3:7?

¹⁹ “Taim bilong pasim maus na taim bilong toktok.” (Ekl. 3:7) Narapela rot bilong mekim gut bel bilong wanbilip taim em i krai sori i olsem, yumi ken putim gut yau long em. Larim wanbilip i kamapim ol samting i stap long tingting bilong em, na no ken bel hevi taim em i mekim “planti toktok nabaut.” (Jop 6:2, 3) Ating em i bel hevi tru bikos ol wanblut em ol i no Witnes, ol i putim presa long em. Yu ken beten wantaim em. Long beten, yu ken askim “Man Bilong Harim ol prea” long strongim wanbilip na helpim em long holim stretpela tingting. (Sng. 65:2) Sapos inap, ritim Baibel wantaim em. O ritim wanpela atikol long ol pablikesen bilong yumi, kain olsem laip stori we inap strongim em.

20. Yumi bai stori long wanem samting long neks atikol?

²⁰ Yumi amamas tru olsem yumi gat stretpela save long samting i kamap long man taim em i dai, na yumi amamas tu long save olsem ol daiman bai kirap bek long matmat! (Jon 5:28, 29) Olsem na toktok na pasin bilong yumi i mas sambai long stretpela save bilong Baibel, na oltaim yumi mas autim dispela save long ol narapela. Neks atikol bai stori long narapela rot bilong Satan long pasim ol manmeri long kisim stretpela save—wok bilong ol spirit nogut. Yumi bai kisim save long wai na yumi mas abrusim ol pasin na ol amamas we i sapotim tok giaman bilong Satan.