1. Yumi olgeta i mas mekim wanem?

YU TING yu bai amamas long ran long resis sapos yu pilim sik o taiet, na yu save olsem dispela resis i gat hatwok bilong en? Ating nogat. Tasol aposel Pol i tok olgeta trupela Kristen i stap long wanpela resis. (Hib. 12:1) Na yumi olgeta, yangpela o lapun, yumi gat strong o yumi pilim taiet, yumi mas ran yet i go inap long pinis sapos yumi laik kisim prais em Jehova i laik givim long yumi.—Mat. 24:13.

2. Olsem 2 Timoti 4:7, 8 i kamapim, wai na Pol i mekim tok i stap long dispela ves?

² Pol inap mekim dispela tok bikos em i bin stap strong na “ran long dispela resis i go inap long pinis bilong en.” (Ritim 2 Timoti 4:7, 8.) Tasol Pol i toktok long wanem kain resis?

3. Pol i toktok long wanem kain resis?

³ Sampela taim Pol i kolim sampela samting long ol resis i save kamap long Grik bilong bipo long skulim ol Kristen long sampela bikpela samting. (1 Kor. 9:25-27; 2 Tim. 2:5) Planti taim em i tok laip bilong ol Kristen i olsem wanpela resis. (1 Kor. 9:24; Gal. 2:2; Fili. 2:16) Man i save stat long ran long dispela “resis” taim em i dediketim em yet long Jehova na kisim baptais. (1 Pita 3:21) Em i kamap long pinis bilong resis taim Jehova i givim em prais bilong laip oltaim.—Mat. 25:31-34, 46; 2 Tim. 4:8.

4. Long dispela atikol, yumi bai stori long wanem samting?

⁴ Taim yumi skelim longpela resis bilong spots na laip bilong ol Kristen, wanem sampela samting i wankain long ol? Yumi ken skelim 3-pela samting. Namba 1: Yumi mas bihainim stretpela rot. Namba 2: Yumi mas putim tingting i go long pinis bilong  resis. Namba 3: Yumi mas daunim ol hevi i painim yumi long rot.

5. Yumi mas bihainim wanem rot? Bilong wanem?

⁵ Sapos ol man i laik ran long wanpela resis, ol i mas bihainim stret rot em ol bosman i makim. Olsem tasol, sapos yumi laik kisim prais bilong laip oltaim, yumi mas bihainim pasin Kristen. (Apo. 20:24; 1 Pita 2:21) Tasol Satan na ol lain i bihainim eksampel bilong em, ol i laik bai yumi “poroman [yet] wantaim ol” na ran long rot nogut. (1 Pita 4:4) Ol i tok bilas long laip bilong yumi na ol i tok rot ol i go long en i gutpela moa, ol i stap fri. Tasol tok bilong ol i no tru.—2 Pita 2:19.

6. Yu kisim wanem skul long eksampel bilong Brian?

⁶ Ol lain husat i ran wantaim ol lain em Satan i bosim, i no longtaim ol i luksave olsem rot ol i ran long en i no helpim ol long stap fri, nogat, ol i stap kalabus. (Rom 6:16) Skelim eksampel bilong Brian. Papamama bilong em i strongim em long bihainim pasin Kristen. Tasol taim em i kamap tineja, em i holim 2-pela tingting. Brian i mekim disisen long ran wantaim ol lain i bihainim pasin bilong Satan. Em i tok: “Mi no luksave olsem dispela tok giaman i pulim mi long mekim kain kain pasin nogut na mi kalabus tru long ol dispela pasin. Mi stat long kisim drak na alkohol na mekim pasin pamuk. Long ol yia bihain, mi traim ol drak i gat bikpela strong moa na mi kalabus tru long planti drak. . . . Mi stat long salim ol drak na bai mi inap lukautim mi yet.” Bihain, Brian i mekim disisen long bihainim ol lo bilong Jehova. Em i senisim rot em i ran long en na em i kisim baptais long 2001. Long nau em i amamas tru olsem em i bihainim pasin Kristen. *

7. Olsem Matyu 7:13, 14 i kamapim, i gat wanem 2-pela rot?

⁷ Em i bikpela samting tru long yumi mas makim stretpela rot! Satan i laik bai yumi olgeta i lusim liklik rot “i go long laip” na go long bikpela rot we planti manmeri i ran long en. Planti manmeri i laikim dispela rot na em isi tru long ran long en. Tasol em “rot i go long bagarap.” (Ritim Matyu 7:13, 14.) Sapos yumi laik ran yet long stretpela rot na yumi no laik bai wanpela samting i pulim tingting bilong yumi, orait yumi mas trastim Jehova na bihainim tok bilong em.

8. Sapos man i ran long resis na em i pundaun, em i save mekim wanem?

⁸ Ol lain i ran long rot i longpela tru, ol i save lukluk stret long rot i stap long fran na  bai ol i no ken pundaun. Tasol man i ran klostu inap bamim ol o ol yet inap putim lek long hul i stap long rot. Sapos ol i pundaun, ol i save kirap na ran yet long resis. Ol i no save putim tingting long samting i mekim ol i pundaun, nogat, ol i save putim tingting long pinis bilong resis na prais ol inap kisim.

9. Sapos yumi pundaun, yumi mas mekim wanem?

⁹ Long resis bilong yumi, planti taim yumi inap pundaun, yumi mekim popaia long toktok o pasin bilong yumi. O, ol wanlain i ran wantaim yumi inap mekim ol popaia we i bagarapim bel bilong yumi. Dispela samting bai kamap. Yumi olgeta i sinman, na yumi olgeta i ran long rot i liklik tru, em rot i go long laip. Olsem na sampela taim yumi bai “bamim” narapela narapela. Pol i tok sampela taim “i gat as na wanpela i gat tok long narapela.” (Kol. 3:13) Tasol yumi no ken tingting long ol samting i pundaunim yumi, nogat, yumi mas putim tingting i go long prais yumi bai kisim. Sapos yumi pundaun, yumi mas kirap na wok yet long ran. Sapos yumi kros na bel hevi na yumi no laik kirap na ran gen, yumi no inap kamap long pinis bilong resis na yumi no inap kisim prais. Na tu, yumi bai pasim rot bilong ol narapela husat i ran long liklik rot i go long laip.

10. Hau bai yumi no ken “mekim wanpela samting i pundaunim” ol narapela?

¹⁰ Sapos yumi no laik “mekim wanpela samting i pundaunim” ol narapela, orait yumi mas redi long bihainim laik bilong ol sapos inap, na yumi no ken strong tumas long bihainim laik bilong yumi yet. (Rom 14:13, 19-21; 1 Kor. 8:9, 13) Yumi no olsem ol man i ran long resis bilong spots. Ol i resis wantaim ol narapela, na olgeta wan wan i laik bai ol tasol i winim prais. Ol i tingim laik bilong ol yet tasol. Olsem na ol inap pusim ol narapela i go long sait na bai ol yet inap ran long fran. Tasol yumi no olsem ol bikos resis bilong yumi i no bilong daunim ol narapela. (Gal. 5:26; 6:4) Yumi laik tru long helpim planti manmeri moa long ran wantaim yumi na kamap long pinis bilong resis na kisim prais bilong laip. Olsem na yumi laik bihainim edvais bilong Pol na yumi ‘no tingim laik bilong yumi yet tasol, nogat, yumi tingim tu laik bilong ol arapela.’—Fili. 2:4.

11. Man i ran long resis i save putim tingting i go long wanem samting? Bilong wanem?

¹¹ Ol man i ran long resis i save lukluk long  rot i stap long fran, na tu, ol i save lukluk long pinis bilong resis. Maski ol i no lukim yet pinis bilong resis long ai tru bilong ol, ol i piksaim long tingting olsem ol i kamap long pinis bilong resis na ol i kisim prais. Ol i tingim prais ol bai kisim na dispela i strongim ol long ran yet long resis.

12. Jehova i tok promis long givim wanem samting long yumi?

¹² Long resis bilong yumi, Jehova i tok promis long givim prais long ol manmeri i kamap long pinis bilong resis—ol bai kisim laip oltaim long heven o long paradais long graun. Baibel i kamapim sampela stori long dispela prais, olsem na yumi inap piksaim laip yumi bai kisim. Sapos yumi tingim gut prais yumi inap kisim, yumi no inap larim wanpela samting i pundaunim tru yumi.

13. Yumi gat wanem narapela helpim we ol manmeri bilong graun i no gat?

¹³ Ol man i ran long resis bilong ol Grik, ol i mas daunim ol hevi—ol i mas ran yet maski ol i pilim taiet o pilim pen long bodi. Ol i yusim strong bilong ol yet na trening ol i bin kisim. Yumi olsem ol bikos yumi tu i kisim trening long wei bilong ran long resis bilong yumi. Tasol yumi gat narapela helpim we ol i no gat. Yumi inap kisim strong long Man i gat bikpela strong moa. Sapos yumi bilip long Jehova, em i tok em bai trenim yumi na strongim yumi!—1 Pita 5:10.

14. Olsem wanem tok bilong 2 Korin 12:9, 10 inap helpim yumi long sanap strong na karim hevi?

¹⁴ Pol i bin karim planti hevi. Ol narapela i toknogutim em na birua long em, na sampela taim em i pilim olsem bodi bilong em i no gat strong, na em i karim hevi em i kolim olsem “wanpela nil i sutim skin.” (2 Kor. 12:7) Em i no larim ol dispela hevi i mekim na em i givap, nogat, em i larim ol dispela hevi i strongim em long bilip moa long Jehova. (Ritim 2 Korin 12:9, 10.) Pol i holim stretpela tingting, olsem na Jehova i strongim em na em inap sanap strong na karim olgeta hevi.

15. Sapos yumi bihainim pasin bilong Pol, dispela inap opim rot bilong wanem samting?

¹⁵ Yumi holimpas bilip, olsem na ol birua inap toknogutim yumi o mekim nogut long yumi. Na tu, yumi inap karim hevi bilong bikpela sik o yumi pilim taiet na bodi no gat strong moa. Tasol sapos yumi bihainim eksampel bilong Pol, olgeta dispela hevi inap opim rot bilong yumi long kisim helpim i kam long Jehova.

16. Maski sapos bodi bilong yu no strong moa, yu inap mekim wanem?

¹⁶ Olsem wanem? Yu slip tasol long bet o yu sindaun long wilsia? Ol skru bilong lek i no strong moa o ai bilong yu no inap lukim gut ol samting? Sapos olsem, yu ting yu inap ran wantaim ol yangpela na ol lain i gat gutpela helt? Yes, yu inap mekim olsem! Planti lapun na ol lain i gat sik i wok long ran long dispela rot i go long laip. Ol i no inap ran long strong bilong ol yet. Ol i kisim strong i kam long Jehova; ol i kisim dispela strong taim ol i putim yau long ol miting long rot bilong telefon o vidio. Na ol i autim tok long ol dokta, nes, na ol wanblut.

17. Jehova i pilim olsem wanem long ol lain em helt bilong ol i no gutpela tumas na bodi no gat strong moa?

¹⁷ Maski helt bilong yu i no gutpela tumas na bodi no gat strong moa, no ken ting olsem dispela bai pasim yu long ran long rot i go long laip. Jehova i laikim yu bikos yu bilip long em na yu sanap strong long bilip. Long nau, yu bai nidim tru helpim bilong em, na em i no inap givim baksait long yu. (Sng. 9:10) Em bai kam klostu moa long yu. Skelim tok bilong wanpela sista husat i karim bikpela hevi long  sait bilong helt: “Planti hevi moa i bungim mi long sait bilong helt, na mi no gat planti rot moa long autim tok. Tasol mi save olsem Jehova bai belgut long liklik hatwok bilong mi, na dispela i givim amamas long mi.” Taim bel hevi i daunim yu, no ken ting olsem yu stap wanpis. Tingim eksampel bilong Pol, na tingim ol tok em i mekim bilong strongim yumi: “Mi amamas long ol samting mi no gat strong long en, . . . Taim mi no gat strong, long dispela taim mi gat strong tru.”—2 Kor. 12:10.

18. Wanem bikpela hevi i save painim sampela wokman bilong God?

¹⁸ I gat narapela hevi tu i save painim ol man i ran long resis bilong laip. Ol i karim hevi we ol narapela i no inap luksave o kliagut long en. Ating ol i bel hevi o tingting planti. Wai na kain bikpela hevi olsem i painim ol gutpela wokman na wokmeri bilong Jehova? Sapos han bilong man i bruk o em i sindaun tasol long wilsia, olgeta lain bai luksave long hevi bilong em na ol bai redi long helpim em. Tasol man i bel hevi o tingting planti, em i no inap soim olsem em i gat hevi. Bel hevi bilong em i wankain long bel hevi bilong man em han bilong em i bruk, tasol ol narapela i no inap luksave na soim pasin sori long em.

19. Yumi kisim wanem skul long eksampel bilong Mefiboset?

¹⁹ Sapos yu no gat strong long mekim sampela samting na yu pilim olsem ol narapela i no kliagut long tingting bilong yu, orait eksampel bilong Mefiboset inap strongim bel bilong yu. (2 Sml. 4:4) Em i karim hevi bilong stap olsem lek nogut man, na King Devit i no mekim stretpela pasin long em. Mefiboset i no gat asua long wanpela samting. Tasol em i no holim tingting kranki, nogat, em i amamas long ol gutpela samting i kamap long em. Em i tingim ol gutpela pasin Devit i bin mekim long em. (2 Sml. 9:6-10) Olsem na taim Devit i no mekim stretpela pasin long em, Mefiboset i holim yet stretpela tingting. Em i no larim pasin kranki bilong Devit i mekim em i bel hevi. Na em i no sutim tok long Jehova long pasin kranki bilong Devit. Mefiboset i putim tingting i go long samting em inap mekim bilong sapotim king em Jehova i bin makim. (2 Sml. 16:1-4; 19:24-30) Jehova i putim gutpela stori bilong Mefiboset long Baibel na bai eksampel bilong em inap helpim yumi.—Rom 15:4.

20. (a) Hevi bilong tingting planti inap mekim na sampela i pilim olsem wanem? (b) Ol inap bilip tru long wanem samting?

²⁰ Sampela bratasista i gat hevi bilong tingting planti, olsem na ol i save pret na wari taim ol i stap wantaim ol narapela. Ol inap pilim hatwok long stap namel long planti manmeri, tasol ol i save go yet long ol miting na ol  kibung. Ol i pilim hatwok long toktok long man ol i no save long en, tasol ol i save toktok wantaim ol manmeri ol i bungim long wok autim tok. Sapos wankain samting olsem i kamap long yu, orait tingim olsem yu no stap wanpis. Planti manmeri i gat ol wankain hevi olsem yu. Tingim olsem Jehova i amamas long pasin bilong yu long givim bel tru long mekim wok bilong em. Yu no givap, na dispela i soim olsem em i blesim yu na strongim yu. * (Fili. 4:6, 7; 1 Pita 5:7) Sapos yu mekim wok bilong Jehova maski yu gat sampela hevi long bodi o yu bel hevi, yu ken bilip tru olsem Jehova i belgut long yu.

21. Jehova bai helpim yumi, na yumi olgeta bai inap long mekim wanem?

²¹ Sampela samting long resis bilong spots i no wankain long resis em Pol i stori long en. Long resis bilong spots long taim bilong ol man i raitim Baibel, wanpela man tasol i save winim prais. Tasol long resis bilong ol Kristen, olgeta bai kisim prais bilong laip oltaim sapos ol i ran gut i go inap long pinis bilong resis. (Jon 3:16) Na long resis bilong spots, olgeta man bilong ran i mas gat strongpela bodi; sapos nogat, ol i no inap winim resis. Tasol long yumi, hevi bilong helt na lapun i mekim na bodi i no gat strong, tasol yumi ran yet long resis. (2 Kor. 4:16) Jehova bai helpim yumi, na yumi olgeta bai ran yet i go inap long pinis bilong resis!