1-2. Hau yumi ken bihainim lek mak bilong Jisas? Stori long dispela.

TINGIM olsem yu wantaim sampela manmeri long wanpela grup i wokabaut long wanpela bikbus i gat graun malumalum long en. Wanpela asples man i stap olsem tua gaid na i soim rot long yupela. Em i wokabaut i go pas na yupela i bihainim lek mak bilong em. Sampela haptaim bihain, yupela i no lukim em moa! Tasol yupela i no pret, nogat. Yu wantaim ol narapela long grup i bihainim gut lek mak bilong dispela tua gaid!

² Yumi ol Kristen tru, i olsem yumi wok long wokabaut long wanpela bikbus—em dispela graun. Gutpela samting tru i olsem, Jehova i givim yumi wanpela tua gaid—em Pikinini bilong em Jisas Krais, na yumi wok long bihainim gut lek mak bilong em. (1 Pita 2:21) Wanpela Baibel referens i tok, Pita i yusim tok piksa long wanpela tua gaid long hia. Wankain olsem wanpela tua gaid i lusim lek mak bilong em, Jisas i lusim lek mak bilong em i stap bilong yumi ken bihainim. Bilong mekim olsem, yumi ken skelim tripela askim: Bihainim lek mak bilong Jisas i makim wanem? Wai yumi mas bihainim gut lek mak bilong Jisas? Na hau yumi ken bihainim gut lek mak bilong Jisas?

3. Wanem mining bilong dispela tok bihainim lek mak bilong wanpela?

³ Wanem mining bilong dispela tok bihainim lek mak bilong wanpela? Long Baibel, sampela taim dispela tok “wokabaut” na “lek” i save makim samting man i mekim long laip. (Stt. 6:9; Prov. 4:26) Pasin bilong wanpela man long stap olsem gutpela eksampel, dispela i stap olsem lek mak em i lusim bihain taim em i wokabaut. So long bihainim lek mak bilong wanpela, dispela i minim  olsem yumi bihainim eksampel bilong em—olsem, bihainim ol pasin bilong em.

4. Dispela tok bihainim lek mak bilong Jisas i makim wanem?

⁴ Dispela tok bihainim lek mak bilong Jisas i makim wanem? Em i makim olsem yumi mas bihainim eksampel bilong em. Long tim skripsa, aposel Pita i toktok long Jisas i stap olsem gutpela piksa long pasin bilong sanap strong na karim hevi, em samting yumi ken bihainim. Tasol i gat planti narapela rot tu we yumi ken bihainim eksampel bilong Jisas. (1 Pita 2:18-25) Tru tumas, laip olgeta bilong Jisas, olgeta tok em i mekim, na olgeta samting em i mekim, i stap olsem eksampel yumi ken bihainim.

5. Yu ting yumi ol sinman inap bihainim tru gutpela eksampel bilong Jisas? Stori long dispela.

⁵ Yumi ol sinman, olsem na yu ting yumi inap bihainim tru gutpela eksampel bilong Jisas? Yes, yumi ken. Pita i tokim yumi olsem “bihainim gut lek mak bilong [Jisas],” em i no tok bihainim stret. Olsem na maski yumi sinman, sapos yumi givim bes bilong yumi, yumi ken bihainim gut lek mak bilong Jisas. Taim yumi mekim olsem, yumi bihainim tok bilong aposel Jon, em i tok: “Wokabaut olsem Jisas i bin wokabaut.”—1 Jon 2:6.

6-7. Wai na yumi ken tok taim yumi bihainim gut lek mak bilong Jisas, dispela bai bringim yumi i go klostu moa long Jehova?

⁶ Taim yumi bihainim gut lek mak bilong Jisas, dispela bai bringim yumi go klostu moa long Jehova. Wai na yumi ken tok olsem? Namba 1, Jisas i stap nambawan gutpela eksampel tru na pasin bilong em i bin amamasim God. (Jon 8:29) So taim yumi bihainim lek mak bilong Jisas, yumi bai amamasim Jehova. Yumi ken save tru olsem Papa bilong yumi long heven bai kam klostu long yumi ol manmeri i wok strong long kamap pren bilong em.—Jems 4:8.

⁷ Namba 2, Jisas i bihainim gut tru pasin  bilong Papa bilong em. Olsem na i stret Jisas i ken tok: “Man i lukim mi, em i lukim Papa tu.” (Jon 14:9) Olsem, Jisas i bin sori tru long lepraman, em i bel sori long wanpela meri i karim bikpela sik inap longpela taim, na em i krai sori wantaim ol man i krai sori. So taim yumi bihainim ol pasin bilong Jisas na ol pasin em i mekim long ol narapela man, yumi wok long bihainim pasin bilong Jehova tu. (Mak 1:40, 41; 5:25-34; Jon 11:33-35) Taim yumi wok strong long bihainim ol pasin bilong Jehova, yumi bai go klostu moa long em.

8. Taim yumi bihainim lek mak bilong Jisas, olsem wanem dispela bai helpim yumi long “winim strong bilong dispela graun”?

⁸ Taim yumi bihainim gut lek mak bilong Jisas, dispela i mekim na ol samting nogut bilong dispela graun i no pulim nabaut tingting bilong yumi. Long laspela nait bilong Jisas long graun, em inap long tok olsem: “Mi winim pinis strong bilong dispela graun.” (Jon 16:33) Em i no larim ol samting bilong dispela graun olsem ol tingting, ol mak ol man i putim bilong winim, na pasin bilong ol man bilong dispela graun i pulim nabaut tingting bilong em. Oltaim Jisas i save tingim samting em i kam long dispela graun bilong mekim—em long givim biknem long Jehova. Olsem wanem long yumi? Long dispela graun, i gat planti samting inap pulim nabaut tingting bilong yumi. Tasol sapos yumi putim tingting olgeta long mekim wok bilong Jehova olsem Jisas i bin mekim, yumi tu bai “winim strong bilong dispela graun.”—1 Jon 5:5.

9. Yumi mas mekim wanem na bai yumi wokabaut yet long rot i go long laip oltaim?

⁹ Bihainim lek mak bilong Jisas bai bringim yumi i go long laip oltaim. Taim wanpela yangpela maniman i askim long wanem samting em i ken mekim bambai em i ken kisim laip oltaim, Jisas i tokim em: “Kam bihainim mi.” (Mat. 19:16-21) Jisas i tokim ol Juda husat i no bilip olsem em i Krais, em i tokim ol olsem: “Ol sipsip bilong mi i save . . . bihainim mi. Mi givim laip oltaim long ol.” (Jon 10:24-29) Nikodemus em wanpela memba bilong Sanhedrin husat i gat laik long kisim save long ol tok Jisas i skulim ol man long en. Jisas bin i tokim em: “Olgeta man husat i bilip long [mi] ol inap . . . kisim laip oltaim.” (Jon 3:16) Yumi bilip long Jisas taim yumi bihainim ol tok em i skulim ol man long en na yumi bihainim eksampel bilong em. Taim yumi mekim olsem, yumi bai wokabaut yet long rot i go long laip oltaim.—Mat. 7:14.

10. Yumi mas mekim wanem bilong “kisim save” gut moa long Jisas? (Jon 17:3)

¹⁰ Yumi mas save gut long Jisas bambai yumi ken bihainim gut lek mak bilong em. (Ritim Jon 17:3.) Dispela tok “kisim save” i makim olsem yumi mas wok yet long kisim save long Jisas. Na yumi mas wok yet long kisim save gut long em long rot bilong lain gut long ol pasin bilong em, tingting bilong em, na ol lo bilong em.  Maski yumi stap long tok i tru longpela taim, o nau tasol yumi kam insait long tok i tru, yumi mas wok yet long kisim save long Jehova na Pikinini bilong em.

11. Fopela pas bilong Ol Gutnius i stori long wanem samting?

¹¹ Jehova i putim fopela pas bilong Ol Gutnius long Baibel bambai yumi ken kisim save long Jisas. Ol Gutnius i stori long laip bilong Jisas na wok autim tok bilong em. Ol i tokim yumi long ol tok Jisas i mekim, soim yumi long ol pasin em i mekim, na ol i tokim yumi long ol samting Jisas i pilim. Dispela fopela buk i helpim yumi long “tingim gut” eksampel bilong Jisas. (Hib. 12:3) I olsem Ol Gutnius i gat lek mak bilong Jisas i stap long en. Olsem na taim yumi stadi long ol tok bilong Ol Gutnius, yumi inap save gut moa long Jisas. Taim yumi mekim olsem, yumi inap bihainim gut lek mak bilong em.

12. Yumi mas mekim wanem bilong pilim tru ol tok i stap long Ol Gutnius?

¹² Yumi mas ritim ol tok i stap long Ol Gutnius, tasol bilong pilim tru ol tok bilong en, yumi mas mekim sampela samting moa. Yumi mas lusim haptaim long stadi gut na tingim tingim tru long bel ol dispela tok yumi stadi long en. (Skelim Josua 1:8, futnot.) Yumi ken stori long 2-pela rot we i ken helpim yumi long tingim tingim ol tok bilong Ol Gutnius yumi ritim, na bihainim ol dispela tok.

13. Olsem wanem yu ken piksaim olsem stori bilong Ol Gutnius i kamap tru tru long nau?

¹³ Namba 1, piksaim olsem stori bilong Ol Gutnius i kamap tru tru long nau. Yusim imejinesen bilong yu long lukim, harim, na pilim ol samting i kamap. Bilong helpim yu long mekim olsem, yusim ol risets pablikesen em oganaisesen bilong Jehova i bin redim. Ritim stori na lukim ol tok i stap paslain na bihain long tok yu wok long stadi long en. Na painim ol infomesen i eksplenim bekgraun bilong dispela stori na ol samting i kamap. Skelim stori yu ritim wantaim wankain stori long narapela pas bilong Ol Gutnius. Sampela taim, wanpela man i raitim wanpela pas bilong Ol Gutnius i raitim sampela tok em narapela i no raitim.

14-15. Olsem wanem yumi ken bihainim ol tok bilong Ol Gutnius long laip bilong yumi?

 ¹⁴ Namba 2, bihainim ol tok i stap long Ol Gutnius long laip bilong yu. (Jon 13:17) Bihain long yu stadi gut long wanpela stori i stap long Ol Gutnius, askim yu yet: ‘I gat wanpela lesen long dispela stori em mi ken bihainim long laip bilong mi? Olsem wanem mi ken yusim dispela stori long helpim ol narapela?’ Traim long tingim wanpela man o meri em yu laik stori wantaim em long ol samting yu kisim save long en na long taim stret, mekim olsem long pasin laikim.

¹⁵ Nau yumi ken skelim hau yumi ken bihainim dispela 2-pela rot. Yumi bai skelim stori bilong dispela wido meri, em Jisas i bin lukim em insait long tempel.

16. Stori long wanem samting i kamap long Mak 12:41?

¹⁶ Piksaim long tingting olsem samting i kamap tru tru long nau. (Ritim Mak 12:41.) Piksaim dispela samting. Tude em Nisan 11, 33 C.E., na em sampela de tasol paslain long Jisas bai dai. Na Jisas i lusim dispela de olgeta long stap long tempel long skulim ol manmeri. Tasol ol bikman bilong lotu i kam na ol i laik putim hevi long em. Sampela i wok long kwestenim namba bilong em. Na sampela narapela i sutim ol strongpela askim long em. (Mak 11:27-33; 12:13-34) Nau Jisas i go sindaun long narapela sait bilong tempel. Long dispela hap ating em Banis Bilong Ol Meri—na em i lukluk i go na em i lukim kontribiusen boks i stap long wol. Em i sindaun na em i lukim planti manmeri i kam putim ol kontribiusen bilong ol. Em i lukim ol maniman i kam na putim planti koin. Ating em i stap klostu inap long em i ken harim ol koin i go pairap long as bilong kontribiusen boks.

17. Wido meri em Mak 12:42 i stori long em i mekim wanem?

¹⁷ Ritim Mak 12:42. Bihain liklik, Jisas i lukim wanpela meri i kam insait. Em “wido meri husat i sot long ol samting.” (Luk 21:2) Laip bilong em i gat planti hatwok tru long en, na em i no gat inap mani long baim ol samting em i nidim. Maski i olsem, em i go stret long kontribiusen boks na em i putim tupela liklik koin na yu no inap harim pairap bilong ol dispela koin. Tasol Jisas i save long samting em i putim—em tupela lepta koin, em liklik mani tru long dispela taim. Na dispela koin i no inap baim wanpela liklik pisin i no gat bikpela pe long en.

18. Long Mak 12:43, 44, Jisas i tok wanem long kontribiusen bilong wido meri?

¹⁸ Ritim Mak 12:43, 44. Jisas i pilim tru samting dispela wido meri i mekim. So em i singautim ol disaipel bilong em i kam na em i tokim ol: “Mani dispela wido meri i stap rabis i putim, em i winim mani olgeta arapela i putim long boks mani.” Na em i tok: “Olgeta arapela i gat planti mani i stap, na ol i putim sampela tasol, em olsem ekstra mani bilong ol. Tasol dispela meri em i sot tru, na em i putim olgeta mani bilong em, olsem olgeta samting em i holim.” Taim dispela wido meri i putim laspela mani bilong em long kontribiusen boks, em i putim laip bilong em yet long han bilong Jehova.—Sng. 26:3.

19. Yumi inap kisim wanem skul long tok Jisas i mekim long dispela wido meri i stap rabis?

¹⁹ Bihainim dispela tok long laip bilong yu. Askim yu yet: ‘Mi inap kisim wanem skul long tok Jisas i mekim long dispela wido meri i stap rabis?’ Tingim dispela wido meri. Em i laik givim planti samting long Jehova. Tasol em i no inap mekim olsem, so em i givim bes bilong em long Jehova. Jisas i save olsem Papa bilong em i tingim tru kontribiusen dispela meri i givim olsem samting i dia tumas. Wanpela bikpela samting yumi inap lainim long hia em olsem: Jehova i amamas taim yumi givim bes bilong yumi—taim yumi givim bel olgeta na laip olgeta long mekim wok bilong em. (Mat. 22:37; Kol. 3:23) Jehova i amamas taim em i lukim yumi givim bes bilong yumi! Dispela i makim taim na strong  yumi lusim bilong lotuim em, kain olsem yumi mekim wok autim tok na go long ol miting.

20. Hau yu ken bihainim skul yu kisim long stori bilong wido meri?

²⁰ Hau yu ken bihainim skul yu kisim long stori bilong wido meri? Traim long tingim sampela manmeri em ol i nidim ol tok bilong strongim ol olsem Jehova i amamas long ol wok ol i mekim. Olsem, yu save long wanpela lapun sista husat i bel hevi bikos em i sik o em i no gat strong na em i no mekim bikpela wok autim tok olsem bipo? O yu save long wanpela brata i gat sik inap longpela taim na dispela i mekim em bel hevi na em i no save kam long ol miting? Helpim ol kain lain olsem long rot bilong mekim “ol gutpela tok bilong strongim ol.” (Efe. 4:29) Stori wantaim ol long ol gutpela skul yu kisim long stori bilong wido meri. Ol dispela tok inap helpim ol long pilim olsem Jehova i amamas taim yumi givim bes bilong yumi. (Prov. 15:23; 1 Tes. 5:11) Taim yu tok amamas long ol narapela long ol i givim bes bilong ol long Jehova, maski em long ol liklik samting, yu bihainim gut lek bilong Jisas.

21. Yu yet i mas mekim wanem?

²¹ Yumi amamas tru olsem Ol Gutnius i stori long laip bilong Jisas na i kirapim yumi long bihainim pasin bilong em, na long bihainim gut lek mak bilong em! So i gutpela yu yet i stadi gut long Ol Gutnius long rot bilong pesenel stadi o long Famili Lotu bilong yu. Tingim, bilong ol kain stadi olsem i ken helpim yumi, yumi mas piksaim long tingting olsem ol dispela samting i kamap tru tru long nau, na bihainim ol tok yumi lainim long laip bilong yumi. Na tu, bilong bihainim ol pasin Jisas i mekim, yumi mas putim yau long ol tok em i mekim. Long neks atikol, yumi bai stori long ol skul yumi ken kisim long ol laspela tok Jisas i mekim paslain long em i dai.