Long kain situesen olsem, kongrigesen bai tingim olsem fes marit i pinis taim dispela man i marit gen na tingim dispela nambatu marit olsem marit i pasim man na meri wantaim. Bilong kliagut long as na yumi tok olsem, yumi ken skelim tok Jisas i mekim long divos na long marit gen.

Long Matyu 19:9, Jisas i tokaut long wanpela rot tasol bilong katim marit em Baibel i orait long en. Em i tok: “Sapos meri i no mekim pasin pamuk na man i katim marit na maritim narapela meri, orait dispela man i mekim pasin adaltri.” Long tok bilong Jisas, yumi lainim olsem (1) pasin pamuk em wanpela rot tasol Baibel i makim olsem man i ken divos, na (2) sapos meri i no mekim pasin pamuk na man i divosim meri na maritim narapela, dispela i no stret wantaim tok bilong Baibel na man i mekim pasin adaltri. a

Yu ting tok bilong Jisas i makim olsem man husat i mekim pasin pamuk na divosim meri bilong em, Baibel i orait long em i ken marit gen? Nogat, i no olsem. Taim man marit i mekim pasin adaltri, meri i no gat asua i ken wokim disisen olsem em i laik fogivim man bilong em o em i no laik stap moa wantaim em. Sapos meri i no fogivim em na i divosim em aninit long lo bilong gavman, orait tupela wantaim i stap fri long marit gen taim ol i divos pinis.

Tasol ating poroman i no gat asua i gat laik long lukautim marit bilong em na em i tokaut olsem em i redi long fogivim man bilong em. Tasol olsem wanem sapos man bilong em husat i bin mekim pasin adaltri i no orait long meri bilong em i fogivim em na em yet i strong long kisim divos aninit long lo bilong gavman? Poroman marit i no gat asua i redi long fogivim em na stap yet long dispela marit, em as na olsem Baibel i makim dispela man marit i no fri long marit gen. Sapos em i strong long mekim samting em Baibel i no orait long en na maritim narapela maski em i no fri long mekim olsem Baibel i tok, orait em i mekim pasin adaltri gen, olsem na ol elda long kongrigesen bai kamapim gen wanpela komiti bilong harim kot long em.​—1 Kor. 5:1, 2; 6:9, 10.

Taim man i no fri long marit olsem Baibel i makim na em i marit gen, kongrigesen bai gat wanem tingting long fes marit bilong em na long em i marit gen? Fes marit i stap yet na i no bruk olsem Baibel i tok maski em i marit gen? Poroman i no gat asua inap makim olsem em bai fogivim o divosim man bilong em? Kongrigesen i mas tingim dispela man i marit gen olsem em i marit long pasin adaltri?

Long bipo, kongrigesen i bin holim tingting olsem long kain situesen olsem, dispela marit em pasin adaltri taim poroman marit i no gat asua i stap laip yet, em i no marit gen, na em i no gat asua long pasin pamuk. Tasol Jisas i no bin stori long poroman marit i no gat asua taim em i bin stori long divos na marit gen. Jisas i stori long man i kisim divos we i no stret wantaim tok bilong Baibel na maritim narapela na dispela em pasin  adaltri. Long kain taim olsem, man i divos na marit gen, i olsem em i mekim pasin adaltri na dispela i pinisim fes marit bilong em.

Taim man i divos na marit gen, dispela i pinisim fes marit bilong em, olsem na fes meri bilong em husat i no gat asua i no gat rot moa long fogivim man o long makim olsem em i no laik stap moa wantaim man. So meri i no gat wok long karim hevi bilong fogivim man o long makim olsem em i no laik stap moa wantaim olpela man bilong em. Na tu, taim meri i no gat asua em i dai, marit gen, o em i mekim pasin pamuk, dispela i no inap mekim sampela samting long tingting em kongrigesen i gat long dispela man husat i marit gen. b

Long eksampel yumi stori long en antap, man marit i mekim pasin adaltri, dispela i mekim na ol i divos. Tasol olsem wanem sapos man marit i no mekim pasin adaltri, tasol em i kisim divos na em i marit gen? O olsem wanem sapos man marit i no mekim pasin pamuk paslain long divos, tasol em i mekim olsem bihain long divos na em i marit gen maski meri bilong em i no gat asua i redi long fogivim em? Long ol dispela eksampel, man i bin divos na marit gen, na dispela em pasin adaltri, so dispela i pinisim fes marit. Man i marit gen long nupela poroman na dispela i pasim tupela wantaim aninit long lo bilong gavman. Olsem Wastaua bilong Novemba 15, 1979, pes 32 i tok: “Nau em i marit gen, em i no inap lusim tasol na go bek long olpela marit bilong em, olpela marit i bruk pinis taim man i kisim divos, mekim pasin adaltri, na marit gen.”

Dispela nupela save i no daunim dispela tingting olsem marit em samting holi long ai bilong God, na tu, em i no daunim dispela tingting olsem pasin adaltri em bikpela rong tru. Man i divosim meri bilong em husat i no bin mekim pasin pamuk na em i maritim narapela meri taim em i no stap fri long mekim olsem Baibel i makim, orait bai i gat wanpela komiti bilong harim kot long em long pasin adaltri. (Sapos nupela meri em i maritim em wanpela sista Kristen, orait ol elda bai kamapim tu komiti bilong harim kot bilong stretim em long pasin adaltri.) Tru kongrigesen bai i no holim tingting olsem dispela man i marit long pasin adaltri, tasol dispela man i no inap kisim ol wok insait long kongrigesen inap planti yia na inap long ol manmeri husat i bel hevi long pasin nogut em i mekim i lusim tingting o nau ol i kirap gen long rispektim em. Paslain long ol elda i laik givim sampela wok long em, ol i mas skelim tu i stap na tingting bilong olpela poroman marit husat i no gat asua na ol liklik pikinini bilong tupela em man marit i bin lusim ol na i go marit gen.​—Mal. 2:14-16.

Man bai karim bikpela hevi tru taim em i divos nating we Baibel i no orait long en na em i marit gen. Olsem na ol Kristen i bihainim savetingting taim ol i kisim tingting bilong Jehova na tingim marit olsem samting i holi.​—Ekl. 5:4, 5; Hib. 13:4.