1. Wanpela liklik boi i tok wanem bilong soim olsem em i bilip long kirap bek?

 WANPELA liklik boi nem bilong em Matthew, em i gat wanpela bikpela sik, olsem na em i mas kisim planti operesen. Taim em i gat 7-pela krismas, em na famili bilong em i watsim wanpela program bilong JW Broadcasting^®. Long pinis bilong program, ol i lukim wanpela musik vidio i soim ol lain i welkamim ol wanfamili na ol pren bilong ol i kirap bek. b Bihain long ol i watsim program, Matthew i go long papamama bilong em, na em i holim han bilong ol na em i tok: “Lukim, Mami na Dedi! Maski mi dai, mi bai kirap bek. Yupela i ken wetim mi; olgeta samting bai orait.” Yu ken piksaim long tingting olsem papamama bilong em i amamas tru long save olsem pikinini bilong ol i gat strongpela bilip long kirap bek!

2-3. Wai na i gutpela long tingim tingim tok promis bilong kirap bek?

² I gutpela long yumi olgeta i tingim tingim tok promis bilong Baibel olsem bai i gat kirap bek long bihain. (Jon 5:28, 29) Bilong wanem? Bikos yumi no save long wanem taim yumi inap kisim wanpela bikpela sik na dai, o wanpela yumi laikim tumas inap dai. (Ekl. 9:11; Jems 4:13, 14) Bilip bilong yumi long kirap bek i ken helpim yumi long sanap strong na karim ol dispela hevi. (1 Tes. 4:13) Ol tok bilong Baibel i kirapim yumi long save olsem Papa bilong yumi long heven i save gut tru long yumi na em i laikim tru yumi. (Luk 12:7) Tingim, God Jehova i save gut tru long yumi wan wan, olsem na taim em i kirapim bek yumi, yumi bai holim yet ol wankain pasin bilong yumi na ol wankain memori. Jehova i laikim yumi tru, olsem na em i opim rot long yumi inap stap laip oltaim, na sapos yumi dai, em bai kirapim bek yumi!

³ Long dispela atikol, pastaim yumi bai stori long as na yumi ken bilip long tok promis bilong kirap bek. Bihain yumi  bai skelim wanpela stori bilong Baibel we inap strongim bilip bilong yumi, na dispela stori i kamapim ol tok i stap long tim skripsa bilong yumi, olsem: “Brata bilong yu bai kirap bek.” (Jon 11:23) Na laspela samting, yumi bai kisim save long hau yumi ken strongim bilip bilong yumi long kirap bek.

4. Bilong bilipim wanpela tok promis, yumi mas save long wanem samting? Stori long tok piksa.

⁴ Bilong bilipim wanpela tok promis, yumi mas save olsem man i mekim tok promis em i gat laik na em i gat strong, o save, long inapim dispela tok promis. Tingim dispela tok piksa: Piksaim long tingting olsem bikpela win na ren i kamap na i bagarapim tru haus bilong yu. Wanpela pren i kam long yu na em i promisim yu olsem, ‘Bai mi helpim yu long wokim gen haus bilong yu.’ Em i laik tru long helpim yu, na yu bilip olsem em i laik helpim yu. Sapos em i saveman bilong wokim haus na em i gat ol tul bilong wokim haus, orait yu save olsem em bai helpim yu. So yu bilipim tok promis bilong em. Orait olsem wanem long tok promis bilong God long kirap bek? Yu ting em i gat laik na em i gat strong long inapim dispela tok promis?

5-6. Wai na yumi ken bilip tru olsem Jehova i gat laik long kirapim bek ol man i dai pinis?

⁵ Yu ting Jehova i gat laik long kirapim bek ol man i dai pinis? Yes, em i laik tru long mekim olsem. Em i kirapim sampela man bilong raitim Baibel long raitim stori olsem bai i gat kirap bek long bihain. (Ais. 26:19; Hos. 13:14; Rev. 20:11-13) Na taim Jehova i mekim wanpela tok promis, oltaim em i save truim dispela tok promis. (Jos. 23:14) Jehova i laik tru long kirapim bek ol man i dai pinis. Wai na yumi tok olsem?

⁶ Tingim tok bilong bilipman Jop. Em i bilip tru olsem maski em i dai, Jehova bai i gat laik tru long lukim em i stap laip gen. (Jop 14:14, 15) Jehova i laik tru long lukim ol wokman bilong em husat i dai pinis. Em i laik tru long givim bek laip bilong ol, na bai ol i gat gutpela helt na stap amamas tru. Olsem wanem long planti bilion manmeri em ol i dai, tasol ol i no gat rot long kisim save long tok i tru long Jehova? God bilong yumi i laik kirapim bek ol tu. (Apo. 24:15) Em i laik bai ol tu i gat rot long stap pren bilong em na stap laip oltaim long graun. (Jon 3:16) Yes, Jehova i laik tru long kirapim bek ol man i dai pinis.

7-8. Wai na yumi ken bilip tru olsem Jehova i gat strong long kirapim bek ol daiman?

⁷ Yu ting Jehova i gat strong long kirapim bek ol daiman? Yes, em i gat strong long mekim olsem! Em i “God i Gat Olgeta Strong.” (Rev. 1:8) So em i gat bikpela strong long daunim ol birua, na dai tu. (1 Kor. 15:26) Dispela i strongim yumi na mekim isi bel bilong yumi. Tingim ekspiriens bilong Sista Emma Arnold. Long taim bilong Wol Woa 2, em na famili bilong em i karim ol bikpela hevi we i traim bilip bilong ol. Pikinini meri bilong em i bel hevi bikos ol wanfamili na ol pren bilong ol i dai long ol banis kalabus nogut bilong ol Natsi, olsem na Emma i mekim dispela tok bilong mekim isi bel bilong em. Em i tok: “Sapos dai em samting bilong i stap oltaim, orait ating em bai i gat bikpela strong moa, winim God, a?” Tru tumas, Jehova i gat bikpela strong moa winim olgeta samting! God i Gat Olgeta Strong i bin wokim olgeta samting i gat laip, olsem na em inap long givim bek laip long ol man i dai pinis.

⁸ Narapela risen na yumi bilip tru olsem God inap kirapim bek ol daiman em olsem, memori bilong em i ken holim planti infomesen na i no gat mak bilong en. Em i save kolim olgeta wan wan sta long nem bilong ol. (Ais. 40:26) Na tu, em i tingim ol man i dai pinis. (Jop 14:13; Luk 20:37, 38) Em i tingim gut olgeta liklik samting long ol manmeri em bai kirapim bek—olsem  lukluk na pasin bilong ol, ol ekspiriens bilong ol long laip, na ol memori bilong ol.

9. Wai na yu bilip long tok promis bilong Jehova olsem bai i gat kirap bek long bihain?

⁹ Yumi ken bilip tru long tok promis bilong Jehova olsem bai i gat kirap bek long bihain, long wanem, yumi save olsem em i gat laik tru na em i gat strong long inapim dispela tok promis. Tingim narapela risen na yumi ken bilipim tok promis bilong God long kirap bek: Jehova i bin kirapim bek sampela man i dai pinis long bipo. Long taim bilong ol man i raitim Baibel, em i givim strong long sampela bilipman, na Jisas tu, long kirapim bek ol daiman. Yumi ken stori nau long wanpela kirap bek Jisas i bin wokim em Jon sapta 11 i stori long en.

10. (a) Wanem samting i kamap long Betani taim Jisas i autim tok long Jordan? (b) Jisas i mekim wanem? (Jon 11:1-3)

¹⁰ Ritim Jon 11:1-3. Piksaim ol samting i kamap long Betani klostu long pinis bilong yia 32 C.E. Jisas i gat ol gutpela pren long dispela ples—em Lasarus na tupela sista bilong em, Maria na Marta. (Luk 10:38-42) Tasol Lasarus i sik, na tupela sista bilong em i wari. Olsem na ol i salim toksave i go long Jisas. Long dispela taim Jisas i stap long Jordan na bilong i go kamap long Betani, em i mas wokabaut inap 2-pela de. (Jon 10:40) Tasol sori tru, Lasarus i dai long wankain taim we man bilong kisim toksave i go kamap long Jisas. Maski Jisas i save olsem pren bilong em i dai, em i stap 2-pela de moa long Jordan na bihain em i go long Betani. So taim Jisas i kamap long Betani, Lasarus i slip long matmat inap 4-pela de pinis. Nau Jisas bai mekim wanpela samting bilong helpim ol pren bilong em na long givim glori long God.​—Jon 11:4, 6, 11, 17.

11. Dispela stori i givim wanem skul long yumi long pasin yumi mas mekim long ol pren bilong yumi?

¹¹ Dispela stori i skulim yumi long pasin yumi mas mekim long ol pren bilong yumi. Tingim dispela: Taim Maria na Marta i salim tok i go long Jisas, ol i no bin askim em long kam long Betani. Ol i tokim em tasol olsem gutpela pren bilong em i sik. (Jon 11:3) Taim Lasarus i dai, Jisas inap kirapim em bek maski em i stap longwe. Tasol nogat, Jisas i go long Betani bilong stap wantaim ol pren bilong em, Maria na Marta. Yu gat wanpela pren husat i redi long helpim yu maski yu no askim em long helpim yu? Sapos olsem, orait yu save tru olsem em bai helpim yu long “taim bilong hevi.” (Prov. 17:17) Olsem Jisas, yumi tu i ken stap gutpela pren bilong ol narapela! Orait nau yumi ken go bek long stori na lukim wanem samting i kamap bihain.

12. Jisas i mekim wanem tok promis long Marta, na wai na Marta i ken bilipim dispela tok promis? (Jon 11:23-26)

¹² Ritim Jon 11:23-26. Marta i harim olsem Jisas i kamap klostu long Betani. Olsem na wantu em i go bungim Jisas na em i tok: “Bikpela, sapos yu bin stap long hia, brata bilong mi i no inap i dai.” (Jon 11:21) Em tru olsem Jisas inap oraitim Lasarus. Tasol Jisas i laik mekim samting i narakain tru. Em i tok promis long Marta olsem: “Brata bilong yu bai kirap bek.” Na tu, em i mekim narapela tok bilong helpim  Marta long bilipim dispela tok promis, em i tok: “Kirap bek em mi yet na laip em mi yet.” Yes, God i givim strong long Jisas long givim bek laip long ol man i dai pinis. Pastaim, Jisas i kirapim bek wanpela liklik gel bihain tasol long em i dai, na tu, em i kirapim bek wanpela yangpela man long de em i bin dai. (Luk 7:11-15; 8:49-55) Tasol yu ting em inap kirapim bek wanpela man husat i bin dai inap 4-pela de pinis na bodi bilong em i wok long sting?

13. Olsem Jon 11:32-35 i kamapim, Jisas i mekim wanem taim em i lukim Maria na ol narapela i krai? (Lukim tu piksa.)

¹³ Ritim Jon 11:32-35. Piksaim samting i kamap. Maria, em narapela sista bilong Lasarus, i go bungim Jisas. Em i mekim wankain tok sista bilong em i bin mekim, em i tok: “Bikpela, sapos yu bin stap long hia, brata bilong mi i no inap i dai.” Em na ol narapela i stap wantaim em i bel hevi nogut tru. Jisas i lukim na harim ol i krai, na em i pilim bikpela bel sori tru. Em i sori tru long ol pren bilong em, olsem na em i krai. Em i kliagut long bikpela bel pen wanpela i pilim taim wanpela long famili i dai. Olsem na em i laik mekim samting bilong pinisim aiwara bilong ol!

14. Jisas i krai taim Maria i krai, na dispela i givim wanem skul long yumi long Jehova?

¹⁴ Jisas i krai taim em i lukim Maria i krai, na dispela i skulim yumi olsem Jehova em God bilong mekim pasin sori. Wai na yumi tok olsem? Olsem yumi bin stori long atikol i go pinis, Jisas i bihainim stret tingting na pasin bilong Papa bilong em. (Jon 12:45) So taim yumi ritim stori long Jisas i pilim bikpela bel sori taim em i lukim ol pren bilong em i krai, yumi save olsem Jehova tu i save pilim bikpela bel sori taim yumi bel hevi na krai. (Sng. 56:8) Dispela i kirapim yumi long go klostu moa long God bilong yumi, em God bilong mekim pasin sori!

15. Olsem Jon 11:41-44 i kamapim, wanem samting i kamap long matmat bilong Lasarus? (Lukim tu piksa.)

¹⁵ Ritim Jon 11:41-44. Jisas i go kamap long matmat bilong Lasarus na em i askim ol long rausim ston i karamapim dispela matmat. Tasol Marta i tok nogat bikos bodi bilong Lasarus bai smel. Jisas i tokim em: “Mi bin tokim yu pinis olsem sapos yu bilip, yu bai lukim glori bilong God.” (Jon 11:39, 40) Jisas i lukluk i go antap  long skai na em i beten long ai bilong ol manmeri. Em i laik givim ona long Jehova long samting em bai mekim. Orait Jisas i singaut strong olsem: “Lasarus, yu kam ausait!” Na Lasarus i kam ausait long matmat! Jisas i mekim samting em ol Juda i ting em i no inap long mekim.​—Lukim stadi nout long Jon 11:17 long Inglis Baibel.

16. Olsem wanem stori i stap long Jon sapta 11 i strongim bilip bilong yumi long kirap bek?

¹⁶ Stori i stap long Jon sapta 11 i strongim bilip bilong yumi long kirap bek. Bilong wanem yumi tok olsem? Tingim tok promis Jisas i mekim long Marta olsem: “Brata bilong yu bai kirap bek.” (Jon 11:23) Olsem Papa bilong em, Jisas i laik tru na em i gat strong long inapim dispela tok promis. Taim em i krai, dispela i kamapim klia olsem em i gat strongpela laik long kirapim bek ol man i dai pinis na tekewe bel hevi em dai i save kamapim. Na taim Lasarus i lusim matmat na i kam ausait, Jisas i soim olsem em i gat strong long kirapim bek ol daiman. Na tu, tingim tok Jisas i bin mekim long Marta, em i tok: “Mi bin tokim yu pinis olsem sapos yu bilip, yu bai lukim glori bilong God.” (Jon 11:40) Yumi gat ol gutpela risen long bilip tru olsem tok promis bilong God long kirap bek, em bai kamap tru. Tasol yumi ken mekim wanem ol samting bilong strongim dispela bilip?

17. Yumi mas tingim wanem samting taim yumi ritim ol stori bilong kirap bek long Baibel?

¹⁷ Ritim na tingim tingim long bel ol stori bilong kirap bek long bipo. Baibel i stori long 8-pela kirap bek i bin kamap long graun. c Yu ken stadi gut long ol wan wan stori bilong kirap bek. Taim yu mekim olsem, tingim olsem dispela em ol stori bilong ol man, ol meri, na ol pikinini em ol i bin stap tru. Luksave long ol skul yu ken kisim long ol dispela stori. Tingim hau wan wan stori i soim klia olsem God i gat laik na em i gat strong long kirapim bek ol daiman. Bikpela samting moa, tingim nambawan kirap bek,  em kirap bek bilong Jisas. Tingim, i gat planti handret aiwitnes i bin lukim em i kirap bek, na dispela i strongim tru bilip bilong yumi long kirap bek.​—1 Kor. 15:3-6, 20-22.

18. Olsem wanem yumi inap mekim gutpela wok long ol singsing i stori long bilip bilong kirap bek? (Lukim tu futnot.)

¹⁸ Mekim gutpela wok long “ol song bilong lotu” i stori long bilip bilong kirap bek. d (Efe. 5:19) Ol dispela singsing i mekim na yumi save tru olsem kirap bek bai kamap na ol i strongim bilip bilong yumi long dispela gutpela tok promis. Harim ol dispela singsing na prektis long singim ol, na stori long mining bilong ol tok bilong ol dispela singsing long taim bilong famili lotu. Tingim gut ol tok bilong ol dispela singsing na putim i go daun long bel bilong yu. Bihain sapos yu bungim wanpela hevi we yu inap lusim laip bilong yu o wanpela yu laikim tru i dai, orait holi spirit bilong Jehova bai helpim yu long tingim ol tok bilong ol dispela singsing na ol dispela tok bai mekim isi bel bilong yu na strongim yu.

19. Yumi inap piksaim long tingting wanem samting long kirap bek? (Lukim blok “ Bai Yu Givim Wanem Askim Long Ol?”)

¹⁹ Piksaim long tingting. Jehova i wokim yumi wantaim save bilong piksaim yumi yet long nupela taim. Wanpela sista i tok: “Oltaim mi save piksaim mi yet long nupela taim na i olsem mi ken smelim ol ros plaua long Paradais.” Piksaim long tingting olsem yu bungim ol bilipman na ol bilipmeri em ol i bin stap long taim bilong Baibel. Yu laik bungim husat? Yu bai givim wanem ol askim long ol? Na tu, piksaim long tingting olsem yu bungim ol wanfamili na ol pren bilong yu em ol i bin dai pinis. Piksaim ol samting i kamap olsem, ol fes tok yupela bai mekim, yupela i holimpasim narapela narapela na amamas na aiwara i pundaun.

20. Yumi mas tingting strong long mekim wanem?

²⁰ Yumi tenkyu tru long Jehova long tok promis bilong em long kirap bek! Yumi ken bilip tru olsem dispela tok promis bai kamap tru, long wanem, Jehova i laik tru na em i gat strong long inapim dispela tok promis. Yes, yumi olgeta i ken tingting strong long strongim yet dispela gutpela bilip bilong yumi. Taim yumi mekim olsem, yumi bai go klostu moa long God husat i tok promis long yumi wan wan olsem, ‘Ol wanfamili bilong yu bai kirap bek!’