1. Yumi ken bilip tru long wanem samting?

 YUMI lain bilong Jehova, olsem na yumi save tru olsem em i laikim yumi tru na em i laik yumi stap amamas. (Rom 8:35-39) Na yumi bilip tru olsem ol stiatok bilong Baibel i save helpim yumi taim yumi bihainim. (Ais. 48:17, 18) Tasol olsem wanem sapos yumi bungim ol hevi we yumi no ting em bai kamap?

2. Yumi inap bungim wanem ol hevi, na ol inap mekim yumi kisim wanem tingting?

² Olgeta wokman bilong Jehova i save karim ol hevi. Olsem, ating wanpela insait long famili inap bagarapim bel bilong yumi. Yumi inap i gat wanpela bikpela sik we i pasim yumi long mekim bikpela wok moa bilong Jehova. Yumi inap karim hevi bilong wanpela netrol disasta. O ol man i mekim nogut long yumi bikos long bilip bilong yumi. Taim yumi karim ol kain hevi, yumi inap kisim tingting olsem: ‘Wai na dispela samting i painim mi? Mi bin mekim wanpela rong? Dispela i makim olsem Jehova i no blesim mi?’ Sampela taim yu save pilim olsem? Sapos olsem, no ken bel hevi. Planti gutpela wokman bilong Jehova i bin pilim wankain olsem.​—Sng. 22:1, 2; Hab. 1:2, 3.

3. Yumi inap kisim wanem skul long tok bilong Buk Song 34:19?

³ Ritim Buk Song 34:19. Lukim tupela bikpela poin long dispela song: (1) Ol hevi i save painim ol stretpela man. (2) Jehova i save helpim yumi taim hevi i painim yumi. Long wanem rot Jehova i save helpim yumi? Wanpela rot em olsem, em i helpim yumi long holim stretpela tingting long laip bilong yumi long dispela haptaim bilong nau. Jehova i promis olsem taim yumi mekim wok bilong em yumi bai stap amamas, tasol em i no tok olsem laip bilong yumi bai no gat hevi long en. (Ais. 66:14) Em i laik bai yumi putim tingting i go long ol samting bai kamap bihain, em haptaim we laip bilong yumi bai gutpela olgeta na bai yumi stap amamas inap oltaim oltaim. (2 Kor. 4:16-18) Tasol  long nau, em i helpim yumi long karim ol hevi na mekim yet wok bilong em long olgeta wan wan de.​—Kra. 3:22-24.

4. Bai yumi stori long wanem samting long dispela atikol?

⁴ Yumi ken stori long ol skul yumi inap kisim long ol gutpela wokman bilong Jehova long taim bilong Baibel na long nau. Olsem yumi lukim, yumi inap bungim ol hevi we yumi no ting long en. Tasol taim yumi bilip na wetim Jehova long helpim yumi, oltaim em bai helpim yumi. (Sng. 55:22) Taim yumi stori long ol dispela eksampel, askim yu yet: ‘Mi bai mekim wanem taim ol dispela hevi i painim mi? Olsem wanem ol dispela stori i strongim pasin bilong mi long trastim Jehova? Mi inap kisim wanem ol skul em mi yet i ken bihainim?’

5. Jekop i karim wanem ol hevi long han bilong Laban? (Lukim fran pes piksa.)

⁵ Ol wokman bilong Jehova long taim bilong Baibel i karim ol hevi em ol i no bin ting long en. Tingim Jekop. Papa bilong em i tokim em long maritim wanpela pikinini meri bilong Laban, em wanpela wanblut i lotuim Jehova, na em i tok Jehova bai blesim em. (Stt. 28:1-4) So Jekop i bihainim tok bilong papa bilong em. Em i lusim graun bilong Kenan na raun i go long asples bilong Laban, husat i gat tupela pikinini meri, em Lea na Resel. Jekop i laikim tru yangpela pikinini meri bilong Laban em Resel, na em i wanbel long wok long Laban inap 7-pela yia bilong maritim Resel. (Stt. 29:18) Tasol ol samting i no kamap olsem Jekop i bin ting long en. Laban i trikim Jekop na em i givim bikpela pikinini meri bilong em Lea long Jekop i maritim em. Laban i larim Jekop i maritim Resel wanpela wik bihain, tasol bilong mekim olsem Jekop i mas wok long Laban inap 7-pela yia moa. (Stt. 29:25-27) Na tu, Laban i mekim pasin i no stret long ol wok bisnis bilong em wantaim Jekop. Laban i mekim pasin i no stret long Jekop inap 20 yia olgeta!​—Stt. 31:41, 42.

6. Jekop i karim wanem ol narapela hevi?

⁶ Jekop i karim ol narapela hevi tu. Em i gat bikpela famili, tasol planti taim ol pikinini man bilong em i no pas gut wantaim. Ol i salim brata bilong ol Josep olsem wanpela wokboi nating. Tupela pikinini man bilong Jekop em Simeon na Livai, ol i bin semim famili na bagarapim gutnem bilong Jehova. Na tu, meri bilong Jekop we em i save laikim tru, em Resel, em i dai taim em i karim namba 2 pikinini bilong tupela. Na wanpela bikpela hangre i bin kamap, olsem na Jekop i mas kisim famili bilong em na i go sindaun long Isip taim em i lapun pinis.​—Stt. 34:30; 35:16-19; 37:28; 45:9-11, 28.

7. Long wanem rot Jehova i soim Jekop olsem Em i orait long em?

⁷ Maski Jekop i karim olgeta dispela hevi, Jekop i bilip yet long Jehova na ol tok promis bilong Em. Na Jehova i soim Jekop olsem Em i orait long em. Olsem, maski Laban i mekim pasin giaman long Jekop, Jehova i blesim Jekop na em i gat planti samting tru. Na tingim hau Jekop i tenkyu tru long Jehova taim em i bungim gen pikinini bilong em Josep, long wanem, em i bin ting olsem Josep i bin dai inap planti yia i go pinis! Jekop i pas gut wantaim Jehova na dispela i helpim em long karim ol hevi bilong em. (Stt. 30:43; 32:9, 10; 46:28-30) Taim yumi pas gut wantaim Jehova, yumi tu i ken karim ol hevi i painim yumi em yumi no ting long en.   

8. King Devit i tingting long mekim wanem?

⁸ King Devit i no inap mekim olgeta wok bilong Jehova em i gat laik long mekim. Olsem, Devit i gat laik tru long wokim wanpela tempel bilong God bilong em. Em i tokim profet Natan long dispela laik bilong em. Na Natan i bekim tok bilong em olsem: “God tru i stap wantaim yu, olsem na wanem samting bel bilong yu i  kirapim yu long mekim, yu ken mekim tasol.” (1 Sto. 17:1, 2) Yumi ken piksaim long tingting olsem ol dispela tok i strongim tru bel bilong Devit. Olsem na ating em i kirap wantu tasol na mekim plen bilong mekim dispela bikpela projek.

9. Devit i mekim wanem taim em i kisim nius nogut?

⁹ I no longtaim, profet bilong Jehova i go bek long lukim Devit na em i bringim nius nogut i go long em. “Long dispela nait” yet Jehova i tokim Natan olsem Devit em i no man husat bai wokim dispela tempel, nogat, wanpela bilong ol pikinini man bilong em bai wokim. (1 Sto. 17:3, 4, 11, 12) Devit i mekim wanem taim em i kisim dispela tok? Em i senisim plen bilong em. Nau em i tingting strong long bungim mani na ol samting em pikinini man bilong em Solomon bai nidim bilong wokim dispela projek.​—1 Sto. 29:1-5.

10. Long wanem rot Jehova i blesim Devit?

¹⁰ Bihain tasol long Jehova i tokim Devit olsem em bai i no inap wokim tempel, Jehova i mekim wanpela kontrak wantaim em. Jehova i tok promis long Devit olsem wanpela pikinini bilong em bai mekim wok king inap oltaim. (2 Sml. 7:16) Long nupela taim, piksaim long tingting amamas em Devit bai pilim taim em i kisim save olsem em i enjoim laip aninit long Wan Tausen Yia bilong Jisas i stap king—em wanpela King i kamap long lain famili bilong em yet! Dispela stori i helpim yumi long lukim olsem, maski yumi no inap mekim olgeta wok bilong Jehova em yumi gat laik long mekim, God bilong yumi i gat ol narapela blesing em i laik givim long yumi em yumi no ting long en.

11. Long wanem rot Jehova i blesim wok bilong ol Kristen long taim bilong ol aposel, maski Kingdom i no kamap long taim we ol i ting long en? (Aposel 6:7)

¹¹ Ol Kristen long taim bilong ol aposel i karim hevi long sampela samting ol i ting bai kamap, tasol em i no kamap olsem ol i ting long en. Olsem, ol i gat laik tru long Kingdom Bilong God i mas kam, tasol ol i no save long wanem taim tru dispela samting bai kamap. (Apo. 1:6, 7) So ol i mekim wanem? Ol i bisi tru long mekim wok autim tok. Ol i lukim hau Jehova i blesim wok bilong ol taim ol i autim tok long planti ples moa.​—Ritim Aposel 6:7.

12. Ol Kristen long taim bilong ol aposel i mekim wanem taim bikpela hangre i kamap?

¹² Wanpela taim, bikpela hangre tru i kamap long “olgeta hap bilong graun.” (Apo. 11:28) Ol Kristen long taim bilong ol aposel tu i bin karim dispela hevi. Yu inap piksaim long tingting hau ol i bin sot tru long kaikai long dispela taim bilong bikpela hangre? I klia tru olsem ol het bilong famili i bin wari long hau ol bai lukautim famili bilong ol long kaikai samting. Dispela i mekim wanem long ol yangpela em ol i bin tingting long helpim wok autim tok long ol narapela hap? Yu ting ol i pilim olsem ol i mas surikim dispela plen bilong ol inap long hangre i pinis? Maski wanem samting i kamap long sindaun bilong ol, ol Kristen i redi long mekim ol senis. Ol i wok yet long autim tok long wanem wanem taim rot i op, na ol i wok yet long serim ol samting bilong ol wantaim ol wanbilip long Judia.​—Apo. 11:29, 30.

13. Ol Kristen i kisim wanem ol blesing long taim bilong bikpela hangre?

¹³ Ol Kristen i kisim wanem ol blesing long taim bilong bikpela hangre? Ol manmeri em ol i kisim ol rilif saplai, ol i luksave olsem Jehova i helpim ol. (Mat. 6:31-33) Ol i pilim olsem ol i pas gut moa wantaim ol wanbilip taim ol wanbilip i redi long helpim ol. Na ol wanbilip em ol i givim ol donesen o ol samting bilong sapotim dispela rilif wok, ol i pilim dispela amamas i kam long pasin bilong givim samting. (Apo. 20:35) Jehova i blesim ol, long wanem, ol i redi long mekim ol senis taim ol samting long sindaun bilong ol i senis.

14. Wanem samting i kamap long Barnabas na aposel Pol, na wanem gutpela samting i kamap long dispela? (Aposel 14:21, 22)

 ¹⁴ Planti taim ol man i mekim nogut long ol Kristen long taim bilong ol aposel, na sampela taim ol i mekim olsem long taim ol i no ting long en. Skelim samting i painim Barnabas na aposel Pol taim ol i autim tok long Listra. Pastaim ol man i amamas long harim tok ol i autim na ol i welkamim ol. Tasol bihain, sampela birua i “pulim tingting bilong ol manmeri” na ol dispela seim manmeri i stonim aposel Pol na lusim em i stap bilong em i ken dai. (Apo. 14:19) Tasol Barnabas na Pol i wok yet long autim tok long ol narapela hap. Wanem gutpela samting i kamap long dispela? Ol i “kamapim planti disaipel,” na ol tok na ol pasin bilong ol i strongim tru ol wanbilip bilong ol. (Ritim Aposel 14:21, 22.) Planti i kisim gutpela helpim, long wanem, Barnabas na Pol i no givap long autim tok taim ol man i mekim nogut long ol. Olsem tasol, taim yumi no givap long mekim ol wok Jehova i tokim yumi long mekim, Jehova bai blesim yumi.   

15. Yu kisim wanem skul long stori bilong Brata A. H. Macmillan?

¹⁵ Long ol yia paslain long 1914, lain bilong Jehova i ting sampela samting bai kamap. Olsem, tingim Brata A. H. Macmillan. Wankain olsem planti bratasista long dispela taim, Brata Macmillan i ting olsem klostu nau em bai kisim gutpela pe bilong em long go long heven. Long wanpela tok em i mekim long Septemba 1914, em i tok: “Ating dispela em laspela taim mi mekim pablik tok.” Tasol dispela em i no laspela tok bilong em. Bihain Brata Macmillan i tok: “Ating sampela bilong yumi i bin hariap tumas long ting olsem yumi bai go long heven long nau yet.” Em i tok moa olsem: “Samting yumi olgeta i gat wok long mekim, em long bisi yet long mekim wok bilong Bikpela.” Brata Macmillan i bin bisi tru long mekim wok bilong God. Em i givim bel tru long mekim wok autim tok. Em i mekim gutpela wok bilong strongim planti brata i stap long kalabus bikos ol i no laik insait long ami. Na em i bin go yet long olgeta miting bilong kongrigesen, maski em i lapun tru. Brata Macmillan i yusim taim bilong em long mekim wok bilong Jehova taim em i wet long kisim gutpela pe bilong em long heven, na dispela i helpim em olsem wanem? Paslain liklik long em i dai long 1966, em i tok: “Bilip bilong mi i stap strong yet long nau, na i no gat wanpela taim mi lusim bilip.” Em i stap gutpela piksa tru em yumi olgeta i ken bihainim long nau, na moa yet sapos yumi karim sampela hevi we i stap longpela taim!​—Hib. 13:7.

16. Wanem hevi i painim Herbert Jennings na meri bilong em wantu tasol? (Jems 4:14)

¹⁶ Planti wokman bilong Jehova i karim hevi bilong sik i painim ol wantu tasol. Olsem, long laip stori bilong Brata Herbert Jennings, b em i stori long hau em na meri bilong em i bin amamas tru long asainmen bilong ol olsem ol misineri long Gana. Tasol bihain, em i kisim wanpela bikpela sik bilong tingting. Brata Jennings i tingim tok bilong Jems 4:14, na em i tok: “Mipela i no bin tingting long tumora.” (Ritim.) Em i tok: “Sik i go bikpela, olsem na mipela i stretim rot bilong lusim Gana na ol gutpela pren bilong mipela na go bek long Kanada [bilong kisim medikal tritmen].” Jehova i helpim Brata Jennings na meri bilong em long mekim yet wok bilong Em, maski ol i karim hevi bilong sik.

17. Olsem wanem stori bilong Brata Jennings i helpim ol narapela wanbilip?

¹⁷ Ol tok Brata Jennings i mekim long laip stori bilong em i bin helpim tru ol narapela.  Wanpela sista i tok: “I no gat wanpela stori i bin kirapim tru bel bilong mi olsem dispela stori. . . . Taim mi ritim stori olsem sik bilong Brata Jennings i mekim na em i mas lusim wok autim tok fultaim, dispela i helpim mi long kisim stretpela tingting long hevi bilong mi.” Wanpela brata i gat wankain hevi, em i tok: “Mi bin mekim wok elda long kongrigesen inap 10-pela yia, tasol sik bilong tingting i mekim na mi mas lusim dispela gutpela wok bilong mi. Mi pilim olsem mi no inap mekim wanpela gutpela wok na dispela i mekim mi bel hevi, olsem na sampela taim mi no inap ritim ol laip stori. . . . Tasol pasin bilong Brata Jennings long stap strong na karim hevi i bin strongim bel bilong mi.” Dispela i kirapim yumi long tingim olsem, taim yumi sanap strong na karim ol hevi we i painim yumi wantu tasol, yumi ken strongim ol narapela. Maski ol samting long sindaun bilong yumi i senis, yumi ken stap yet olsem gutpela eksampel long pasin bilong bilip na sanap strong.​—1 Pita 5:9.

18. Olsem dispela piksa ol i ektim i soim, yu inap kisim wanem skul long stori bilong wanpela wido long Naijiria?

¹⁸ Ol disasta olsem COVID-19 pendemik i bin putim bikpela hevi long planti wokman bilong Jehova. Olsem, wanpela wido long Naijiria i bin sot tru long kaikai. Wanpela moning, pikinini meri bilong em i askim em long wanem samting ol bai kaikai bihain long ol i kukim dispela laspela kap rais. Sista i tokim pikinini meri bilong em olsem ol i no gat mani o kaikai, tasol ol i ken bihainim pasin bilong wido bilong Sarefat na redim dispela laspela kaikai na trastim tru Jehova. (1 Kin. 17:8-16) Paslain long ol i ken tingting long wanem samting ol bai kaikai long belo, ol i kisim kaikai samting i kam long ol wanbilip olsem ol rilif saplai. Ol i kisim planti kaikai tru inap long ol i ken kaikai winim 2-pela wik. Dispela sista i tok, em i no luksave olsem Jehova i wok long putim yau long tok em i mekim long pikinini meri bilong em. Tru tumas, taim yumi bilip na wet long Jehova i helpim yumi long taim yumi bungim ol hevi, dispela i ken helpim  yumi long pas gut moa wantaim em.​—1 Pita 5:6, 7.

19. Brata Aleksey Yershov i bin karim hevi bilong wanem pasin birua?

¹⁹ Insait long ol yia i go pinis, planti bratasista bilong yumi i bin karim hevi long ol man i mekim nogut long ol. Tingim stori bilong Brata Aleksey Yershov, em i save stap long Rasia. Long taim Brata Yershov i bin kisim baptais long 1994, lain bilong Jehova long dispela kantri i bin stap fri long mekim wok lotu bilong ol. Tasol insait long ol yia bihain long dispela, ol samting long Rasia i senis olgeta. Long 2020, polis i go long haus bilong Brata Yershov na ol i sekim olgeta samting na ol i kisim planti samting bilong em. Sampela mun bihain, gavman i arestim em na tok em i wanpela kriminal. Samting i nogut moa i olsem, wanpela man husat i priten long stadi long Baibel inap wanpela yia, em i mekim vidio rekoding long ol samting Brata Aleksey i mekim na nau kot i sasim Brata Aleksey long ol samting i kamap long dispela vidio. Dispela man i mekim pasin nogut tru!

20. Brata Yershov i mekim wanem bilong strongim pasin pren bilong em wantaim Jehova?

²⁰ Yu ting i gat gutpela samting i kamap long hevi i painim Brata Yershov? Yes. Pasin pren bilong em wantaim Jehova i kamap strong moa. Em i tok: “Mitupela meri bilong mi i save beten wantaim planti taim. Mi luksave olsem mi no inap karim dispela hevi long strong bilong mi yet, nogat, mi mas kisim helpim i kam long Jehova.” Em i tok moa olsem: “Pesenel stadi i helpim mi long daunim bel hevi. Mi save tingim tingim long bel eksampel bilong ol gutpela wokman bilong God long bipo. I gat planti stori long Baibel i kamapim klia olsem em i bikpela samting long stap isi na trastim Jehova.”

21. Yumi lainim wanem samting long dispela atikol?

²¹ Yumi lainim wanem samting long dispela atikol? Long laip bilong yumi long dispela graun, sampela taim ol samting yumi no ting long en i save kamap. Maski i olsem, oltaim Jehova i save helpim ol wokman bilong em taim ol i bilip na wet long em. Olsem tim skripsa bilong yumi i kamapim, “planti hevi i save painim stretpela man, tasol Jehova i save helpim em na ol dispela hevi i no save daunim em.” (Sng. 34:19) So i gutpela long yumi putim tingting olgeta i go long strong bilong Jehova long helpim yumi, na yumi no ken tingim tumas ol hevi i painim yumi. Na olsem aposel Pol, yumi ken tok: “Long olgeta samting, mi gat strong long rot bilong dispela man husat i save givim pawa long mi.”​—Fili. 4:13.