1. Long wanem taim Jisas i bin wokim fes mirakel bilong em? Stori long dispela.

 PIKSAIM long tingting ol samting i bin kamap klostu long pinis bilong yia 29 C.E., taim Jisas i kirap long mekim wok autim tok bilong em. Ol i bin singautim Jisas, mama bilong em Maria, na sampela disaipel bilong em i go long wanpela marit kaikai i bin kamap long Kana, em wanpela viles i stap long hap not bilong Nasaret, em asples bilong Jisas. Maria em i pren bilong dispela famili, so i luk olsem em i helpim long lukautim ol manmeri i kam long marit. Tasol long taim bilong marit kaikai, wanpela hevi i kamap we inap semim tru dispela famili na tupela yangpela marit—wain i pinis. b I luk olsem planti manmeri moa i kam winim namba em ol i ting long en. Maria i go long pikinini bilong em na i tok: “Ol i no gat wain.” (Jon 2:1-3) Jisas i mekim wanem? Em i mekim wanpela narakain samting—em i wokim mirakel na tanim wara i kamap “gutpela wain.”​—Jon 2:9, 10.

2-3. (a) Jisas i mekim wanem wok long strong bilong em long wokim ol mirakel? (b) Taim yumi skelim ol mirakel Jisas i wokim, olsem wanem dispela inap helpim yumi?

² Jisas i wokim planti mirakel taim em i mekim wok bilong em long graun. c Em i yusim strong bilong em long wokim ol mirakel bilong helpim planti tausen manmeri. Olsem, taim yumi tingim tupela mirakel bilong em—wanpela em i givim kaikai long 5,000 man na narapela em i givim kaikai long 4,000 man—yumi bai luksave olsem ating em i givim kaikai long winim 27,000 manmeri  taim yumi tingim namba bilong ol meri na ol pikinini tu. (Mat. 14:15-21; 15:32-38) Long dispela tupela taim, em i bin oraitim planti manmeri em ol i bin sik. (Mat. 14:14; 15:30, 31) Piksaim long tingting bikpela amamas em ol dispela manmeri i bin pilim taim Jisas i wokim mirakel na oraitim ol na givim kaikai long ol!

³ Long nau, yumi inap lainim planti samting long ol mirakel Jisas i bin wokim. Long dispela atikol, yumi bai stori long sampela skul yumi inap kisim long ol dispela mirakel we i ken strongim bilip bilong yumi. Na bihain yumi bai stori long hau yumi ken bihainim pasin daun na pasin marimari em Jisas i bin soim taim em i wokim ol dispela mirakel.

4. Ol mirakel bilong Jisas i strongim bilip bilong yumi long husat?

⁴ Ol mirakel Jisas i wokim i strongim bilip bilong yumi long em na long Papa bilong em. Yes, Jehova em i As bilong strong em Jisas i yusim bilong wokim ol mirakel. Aposel 10:38 i tok: “God i bin makim em [Jisas] long holi spirit na givim strong long em, na em i go long olgeta ples na mekim gut long ol man na oraitim olgeta man em Devil i daunim ol. Em inap mekim olgeta dispela samting, long wanem, God i stap wantaim em.” Yumi ken tingim tu olsem long olgeta tok na pasin Jisas i mekim na ol mirakel em i wokim, em i bihainim stret tingting na pasin bilong Papa bilong em. (Jon 14:9) Yumi ken stori long 3-pela skul yumi inap kisim long ol mirakel bilong Jisas.

5. Wanem samting i kirapim Jisas long wokim ol mirakel? (Matyu 20:30-34)

⁵ Namba 1, Jisas na Papa bilong em i laikim tru yumi. Taim Jisas i stap long graun, em i laikim tru ol manmeri na em i kamapim klia dispela taim em i yusim strong bilong em long wokim ol mirakel bilong pinisim pen na hevi bilong ol. Wanpela taim, tupela aipas man i singaut long Jisas i oraitim ol. (Ritim Matyu 20:30-34.) Lukim olsem Jisas “i sori tru” na em i oraitim tupela. Tok Grik em ol i tanim olsem “sori tru” i makim bikpela bel sori tru em man i pilim insait tru long bel. Jisas i pilim bikpela bel sori tru na em i laikim tru ol manmeri, na dispela i kirapim em long givim kaikai long ol manmeri na long oraitim man i gat sik lepra. (Mat. 15:32; Mak 1:41) Yumi ken save tru olsem Jehova em i God bilong “pasin sori,” na Pikinini bilong em, tupela i laikim tru yumi na ol i pilim tru pen na hevi yumi save karim. (Luk 1:78; 1 Pita 5:7) Tru tumas, ol i gat laik tru long rausim olgeta pen na hevi i save painim yumi ol manmeri!

6. God i givim strong long Jisas long mekim wanem?

⁶ Namba 2, God i givim strong long Jisas long pinisim olgeta pen na hevi bilong ol manmeri. Long rot bilong ol mirakel Jisas i mekim, em i soim olsem em i gat strong long pinisim ol pen na hevi i save painim yumi we yumi yet i no gat strong long pinisim. Olsem, em i gat strong long helpim yumi long lusim kalabus bilong sin em yumi kisim long tupela tumbuna bilong yumi, na tu, em bai pinisim ol samting nogut sin i save kamapim olsem pen na hevi, na sik na dai. (Mat. 9:1-6; Rom 5:12, 18, 19) Ol mirakel em i wokim i soim olsem em inap oraitim “olgeta kain sik” na kirapim bek ol man i dai pinis. (Mat. 4:23; Jon 11:43, 44) Na tu, em i gat strong long daunim strong bilong traipela win na ren na daunim strong bilong ol spirit nogut. (Mak 4:37-39; Luk 8:2) Yumi amamas tru long save olsem Jehova i givim kain strong olsem long Pikinini bilong em!

7-8. (a) Ol mirakel bilong Jisas i strongim bilip bilong yumi long wanem samting? (b) Yu yet i laik lukim wanem mirakel long nupela taim God bai kamapim?

⁷ Namba 3, yumi ken bilip tru olsem ol gutpela blesing aninit long Kingdom Bilong God bai kamap tru. Ol mirakel Jisas i wokim i skulim yumi long ol bikpela samting em bai mekim taim em  i mekim wok olsem King bilong Kingdom Bilong God long heven. Skelim ol samting em klostu nau yumi bai kisim aninit long wok king bilong Krais. Yumi bai i gat gutpela helt tru, long wanem, Jisas bai rausim olgeta kain sik na ol bagarap bilong bodi we i wok long painim yumi ol manmeri long nau. (Ais. 33:24; 35:5, 6; Rev. 21:3, 4) Yumi no inap stap hangre o karim moa ol bikpela hevi bilong netrol disasta. (Ais. 25:6; Mak 4:41) Yumi bai amamas tru long welkamim ol pren na famili bilong yumi i kirap bek long “matmat.” (Jon 5:28, 29) Yu yet i laik lukim wanem mirakel long nupela taim God bai kamapim?

⁸ Long ol mirakel Jisas i wokim, em i soim olsem em i gat pasin daun na pasin bilong sori tru long ol man—em ol pasin yumi mas bihainim. Yumi laik stori long tupela mirakel Jisas i wokim, kirap wantaim mirakel Jisas i wokim long kaikai bilong marit long Kana.

9. Jisas i mekim wanem long kaikai bilong marit? (Jon 2:6-10)

⁹ Ritim Jon 2:6-10. Taim wain i pinis long dispela kaikai bilong marit, yu ting Jisas i gat wok long mekim sampela samting? Nogat. I no gat wanpela tok profet i bin tok olsem Mesaia bai wokim wain long rot bilong mirakel. Tasol piksaim long tingting hau yu bai pilim taim ol dring i pinis long marit pati bilong yu. Jisas i sori tru long famili, na moa yet long dispela yangpela man na meri bilong marit, na em i laik helpim ol bambai ol i no ken kisim sem. So  olsem yumi stori pinis long kirap bilong atikol, em i wokim wanpela mirakel. Em i tanim 390 lita bilong wara i kamap gutpela wain tru. Ating em i mekim olsem bambai sampela i ken stap yet bilong ol i ken yusim long bihain o ating bihain tupela yangpela marit i ken salim bilong kisim mani. Dispela tupela nupela marit i amamas tru long dispela samting!

10. Wanem sampela bikpela poin i stap long stori bilong Jon sapta 2? (Lukim tu piksa.)

¹⁰ Skelim sampela bikpela poin i stap long stori bilong Jon sapta 2. Yu luksave olsem Jisas yet i no pulapim ol sospen ston wantaim wara? Em i no mekim samting bilong ol man i ken givim biknem long em, nogat, em i tokim ol wokman long pulapim wara long ol sospen. (Ves 6, 7) Na bihain long Jisas i tanim wara i kamap wain, em yet i no kisim sampela wain i go long man bilong bosim kaikai, nogat. Em i tokim ol wokman long mekim olsem. (Ves 8) Jisas i no kisim kap wain na holim i go antap long ai bilong ol manmeri i kam long marit kaikai na mekim tok bilong apim nem bilong em yet olsem, ‘Teistim sampela wain em mi wokim nau tasol!’

11. Yumi inap kisim wanem skul long mirakel bilong Jisas?

¹¹ Yumi inap kisim wanem skul long mirakel bilong Jisas we em i tanim wara i kamap wain? Yumi kisim skul long mekim pasin daun. Jisas i no apim nem bilong em yet long dispela mirakel em i wokim, na em i no save apim nem bilong em yet long ol wok em i mekim, nogat tru. Long olgeta taim, em i save givim glori na biknem i go long Papa bilong em. (Jon 5:19, 30; 8:28) Sapos yumi bihainim pasin bilong Jisas na daunim yumi yet, yumi no inap litimapim nem bilong yumi yet long ol wok yumi mekim. Maski yumi mekim wanem ol wok bilong Jehova, yumi no laik litimapim nem bilong yumi yet, nogat, yumi laik litimapim nem bilong gutpela God yumi mekim wok bilong em. (Jer. 9:23, 24) I stret em i kisim biknem na yumi mas litimapim nem bilong em. Yumi yet i no inap tru long mekim wanpela gutpela wok sapos Jehova yet i no helpim yumi long mekim olsem!​—1 Kor. 1:26-31.

12. Wanem narapela rot yumi ken bihainim pasin daun bilong Jisas? Stori long dispela.

¹² Lukim narapela rot we yumi ken bihainim pasin daun bilong Jisas. Piksaim long tingting dispela stori: Wanpela elda i lusim bikpela haptaim long helpim wanpela kongrigesen sevan long redim fes pablik tok bilong em. Dispela i mekim na yangpela brata i mekim naispela tok na kongrigesen i amamas long em. Bihain long miting, wanpela i kam lukim dispela elda na i tok, ‘Brata i mekim naispela pablik tok, a?’ Yu ting i stret elda i ken tok: ‘Yes, em bikos mi lusim bikpela haptaim long helpim em?’ O yu ting long pasin daun em i ken tok: ‘Yes, em i mekim naispela tok. Mi amamas tru long em’? Taim yumi gat pasin daun, yumi no save litimapim nem bilong yumi yet long ol gutpela samting yumi mekim bilong helpim ol narapela. Yumi belgut long save olsem Jehova i lukim na em i tingim tru pasin yumi mekim. (Skelim Matyu 6:2-4; Hib. 13:16) Tru tumas, yumi amamasim Jehova taim yumi mekim pasin daun wankain olsem Jisas i bin mekim.​—1 Pita 5:6.

13. Jisas i lukim wanem samting klostu long taun Nain na em i mekim wanem? (Luk 7:11-15)

¹³ Ritim Luk 7:11-15. Piksaim long tingting samting i bin kamap long wanpela haptaim namel long wok autim tok bilong Jisas. Em i raun i go long Nain, em wanpela taun bilong ol Galili i stap klostu long Sunem, em hap we profet Elisa i kirapim bek pikinini man bilong wanpela meri klostu 900 yia i go pinis. (2 Kin. 4:32-37) Taim Jisas i go klostu long geit, em i lukim wanpela lain i krai sori na wokabaut i go bilong planim wanpela daiman. Em i sori tru long samting  em i lukim—wanpela pikinini man tasol bilong wanpela wido meri i dai. Dispela mama i krai sori em i no stap wanpis, nogat, bikpela lain manmeri long taun i kam wantaim em. Jisas i stopim ol na em i mekim wanpela narakain samting bilong helpim dispela mama i wok long krai sori—Jisas i kirapim bek pikinini man bilong em! Dispela em fes wan bilong 3-pela mirakel bilong kirap bek em Jisas i bin mekim em Ol Gutnius i stori long ol.

14. Wanem sampela bikpela poin i stap long stori bilong Luk sapta 7? (Lukim tu piksa.)

¹⁴ Skelim sampela bikpela poin i stap long stori bilong Luk sapta 7. Yu luksave olsem Jisas i “lukim” dispela mama i krai sori na bihain “em i sori tru long em”? (Ves 13) Jisas i lukim mama i wok long krai sori na wokabaut long fran bilong ol man i karim bodi bilong pikinini man bilong em, dispela i mekim na Jisas i pilim sori tru long em. Jisas i no pilim sori tasol long dispela mama, nogat, em i mekim pasin sori long em. Long gutpela pasin, em i mekim tok bilong mekim isi bel bilong mama olsem: “No ken krai moa.” Na bihain em i mekim wanpela samting bilong helpim em. Em i kirapim bek pikinini man bilong em na “givim em bek long mama bilong em.”​—Ves 14, 15.

15. Yumi ken kisim wanem skul long mirakel Jisas i wokim?

¹⁵ Yumi ken kisim wanem skul long mirakel Jisas i wokim bilong kirapim bek pikinini man bilong wido meri? Yumi kisim skul olsem yumi mas mekim pasin sori long ol man husat i krai sori. Tru yumi no inap kirapim bek man i dai pinis olsem Jisas i bin mekim. Tasol olsem Jisas, yumi ken lukim gut ol samting i kamap bambai yumi ken mekim pasin sori long ol man i krai sori. Yumi ken go pas long mekim pasin sori long rot bilong ol tok na pasin yumi mekim bilong helpim ol na mekim gut bel bilong ol. d (Prov. 17:17; 2 Kor. 1:3, 4; 1 Pita 3:8) Ol liklik tok na pasin yumi mekim inap mekim bikpela samting moa long ol.

16. Olsem piksa ol i ektim i soim, yumi inap kisim wanem skul long ekspiriens bilong wanpela mama em pikinini bilong em i dai i no longtaim i go pinis?

¹⁶ Tingim dispela stori. Sampela yia i go pinis,  taim wanpela sista i wok long mekim singsing long miting bilong kongrigesen, em i lukim narapela mama i wok long krai. Dispela singsing i stori long kirap bek, na liklik pikinini meri bilong dispela mama i bin dai i no longtaim i go pinis. Sista i save long dispela samting, olsem na em i go klostu long em, putim han i go raunim em na em i singsing wantaim em inap long singsing i pinis. Bihain dispela mama i tok: “Mi pilim tru pasin laikim bilong ol bratasista.” Em i amamas tru olsem em i bin go long miting. Em i tok: “Yumi save kisim helpim bilong strongim yumi long Haus Kingdom.” Yumi ken save tru olsem Jehova i lukim na em i tingim tru olgeta liklik samting yumi mekim bilong mekim pasin sori long ol man i krai sori, em “bel bilong ol i bagarap.”​—Sng. 34:18.

17. Yumi lainim wanem samting long dispela atikol?

¹⁷ Ol stori bilong ol mirakel bilong Jisas i stap long Ol Gutnius, ol i ken kamap olsem gutpela stadi projek bilong yumi. Ol i skulim yumi olsem Jehova na Jisas i laikim tru yumi, na Jisas i gat strong long pinisim olgeta pen na hevi bilong ol manmeri, na yumi ken bilip tru long ol gutpela promis em klostu nau Kingdom bai kamapim. Taim yumi skelim ol dispela stori, yumi ken tingim tingim long bel ol rot we yumi inap bihainim ol pasin bilong Jisas. I gutpela yu yet i wokim sediul na makim wanpela taim bilong mekim pesenel stadi projek o taim bilong Famili Lotu long stori long ol mirakel bilong Jisas! Lukim ol skul em yu yet i ken kisim na stori wantaim ol narapela long ol samting yu lainim. Yu bai i gat planti gutpela samting yu ken stori wantaim ol narapela long en.​—Rom 1:11, 12.

18. Bai yumi stori long wanem samting long neks atikol?

¹⁸ Klostu long pinis bilong wok autim tok bilong Jisas, em i wokim namba 3 mirakel bilong kirapim bek man i dai pinis. Tasol dispela mirakel i no wankain long ol narapela mirakel—em i kirapim bek wanpela gutpela pren bilong em bihain long em i dai inap 4-pela de. Yumi inap kisim wanem skul long stori bilong dispela mirakel long Ol Gutnius? Na olsem wanem yumi ken strongim bilip bilong yumi long kirap bek? Atikol i kamap bihain bai bekim ol dispela askim.