1. Jehova i laik bai yumi mekim wanem?

 WANPELA samting i save mekim tupela marit i amamas em taim bebi bilong ol i bon. Maski tupela i laikim tru nupela bebi bilong ol, ol i no laik bai dispela pikinini i stap bebi yet inap oltaim. Tupela bai tingting planti tru sapos bebi bilong ol i no gro na kamap bikpela. Olsem tasol, Jehova i amamas taim yumi kirap long wokabaut olsem ol disaipel bilong Jisas, tasol Em i no laik bai yumi stap yet olsem ol liklik pikinini long sait bilong bilip, nogat. (1 Kor. 3:1) Em i laik bai yumi “kamap olsem ol man i bikpela pinis” long bilip.—1 Kor. 14:20.

2. Yumi bai stori long wanem samting long dispela atikol?

² Wanem insait bilong dispela tok kamap Kristen i bikpela pinis? Olsem wanem yumi ken kamap strongpela Kristen? Ol strongpela kaikai bilong bilip i helpim yumi olsem wanem long kamap strongpela Kristen? Na wai na yumi mas sakim pasin hambak? Long dispela atikol, yumi bai kisim bekim bilong ol dispela askim.

KAMAP STRONGPELA KRISTEN I MAKIM WANEM SAMTING?

3. Wanem insait bilong dispela tok kamap Kristen i bikpela pinis?

³ Long Baibel, dispela tok Grik ol i tanim olsem “man i bikpela pinis” inap makim tu olsem “strongpela,” “gutpela olgeta,” na “inap tru.” a (1 Kor. 2:6) Yumi kamap bikpela pinis o strongpela Kristen taim yumi no stap moa olsem bebi long sait bilong bilip. Maski yumi kamap strong pinis long bilip, yumi mas wok yet long kamap strong moa. (1 Tim. 4:15) Yumi olgeta inap kamap ol strongpela Kristen, na dispela i makim tu ol yangpela. Tasol  wanem samting inap soim olsem wanpela Kristen i kamap strong long bilip?

4. Wanem samting i soim olsem wanpela Kristen i strong long bilip?

⁴ Wanpela Kristen husat i strong long bilip, em i save bihainim olgeta lo bilong God, em i no save makim na bihainim tasol ol lo em i laikim. Em tru olsem em i no gutpela olgeta na em bai mekim ol popaia. Maski i olsem, em i soim long olgeta samting em i mekim long wan wan de olsem ol tingting na pasin bilong em i stret wantaim laik bilong God. Em i kisim nupela pasin na oltaim em i wok strong long stretim tingting bilong em na bai tingting bilong em i stret wantaim tingting bilong God. (Efe. 4:​22-24) Em i lain pinis long mekim ol gutpela disisen we i stret wantaim ol lo na ol stiatok bilong Jehova, olsem na i no gat wok long em i gat wanpela longpela lista i gat ol lo bilong stiaim ol pasin bilong em. Taim em i mekim wanpela disisen, em i save bosim em yet bilong inapim dispela disisen em i bin mekim.—1 Kor. 9:​26, 27.

5. Kristen i no strong long bilip inap bungim wanem ol hevi? (Efesus 4:​14, 15)

⁵ Kristen husat i no strong long bilip, em isi long “pasin bilong giaman na trik [i] mekim [em] i paul” na ol nius i no tru na ol apostet i giamanim em. b (Ritim Efesus 4:​14, 15.) Em inap jeles, tok pait, bel hevi hariap, o pundaun long traim.—1 Kor. 3:3.

6. Wai na yumi ken tok pasin bilong kamap strong long bilip i wankain long pikinini i wok long kamap bikpela? (Lukim tu piksa.)

⁶ Olsem yumi stori pinis, Baibel i tok pasin bilong kamap strong long bilip i wankain long pikinini i wok long kamap bikpela. Liklik pikinini i no kliagut long planti samting, olsem na wanpela man i bikpela pinis i mas lukautim em na stiaim em. Yumi ken tok piksa olsem, wanpela mama inap tokim liklik pikinini meri bilong em long holim han bilong em taim ol i laik brukim rot. Taim pikinini meri i kamap bikpela, mama bai larim em yet i brukim rot, tasol em bai tokim pikinini bilong em long lukluk long tupela sait bilong abrusim ol kar. Taim dispela liklik pikinini i kamap bikpela pinis, em bai save long hau em yet inap abrusim kain ol hevi. Wankain olsem ol liklik pikinini i nidim helpim bilong ol man i bikpela pinis long abrusim bagarap, ol Kristen i no strong long bilip i nidim  helpim bilong ol strongpela Kristen long abrusim ol hevi inap painim ol long sait bilong bilip na mekim ol gutpela disisen. Tasol taim ol strongpela Kristen i laik mekim wanpela disisen, ol i save skelim ol stiatok bilong Baibel bilong kisim tingting bilong Jehova long dispela samting na bihain ol i save mekim gutpela disisen.

7. Yu ting ol strongpela Kristen i nidim helpim bilong ol narapela?

⁷ Yu ting dispela i makim olsem ol strongpela Kristen i no nidim helpim bilong ol narapela? Nogat. Sampela taim ol strongpela Kristen tu i mas askim ol narapela long helpim ol. Tasol wanpela husat i stap olsem pikinini long sait bilong bilip, em inap nidim ol narapela long tokim em long samting em i mas mekim o long mekim wanpela disisen we em yet i gat wok long mekim. Kristen husat i strong long bilip, em bai kisim helpim long savetingting na ekspiriens bilong ol narapela na long wankain taim em bai luksave olsem Jehova i laik bai em i “mekim ol samting em . . . yet i gat wok long mekim.”—Gal. 6:5.

8. Long wanem rot tupela strongpela Kristen i no wankain?

⁸ Ol manmeri i bikpela pinis ol i no luk wankain, olsem tasol ol strongpela Kristen i no gat ol wankain pasin. Olsem, sampela i gat savetingting, sampela i gat strongpela bel, sampela i gat pasin bilong givim samting, na sampela i save pilim hevi bilong ol narapela. Na tu, taim tupela strongpela Kristen i bungim wankain hevi, ol inap mekim narapela narapela disisen, tasol disisen bilong tupela wantaim i stret wantaim tok bilong Baibel. Planti taim dispela i save kamap taim Kristen i mas mekim samting i stret wantaim maus bilong bel bilong em. Olsem na tupela i no sutim tok long narapela narapela taim disisen bilong ol i no wankain. Ol i save wok strong long stap wanbel.—Rom 14:10; 1 Kor. 1:10.

OLSEM WANEM YUMI KEN KAMAP STRONGPELA KRISTEN?

9. Yu ting yumi inap stap nating tasol na kamap strong long bilip? Stori long dispela.

⁹ Taim yumi liklik, em nomol long yumi gro na kamap bikpela insait long sampela yia na em samting i save kamap nating. Tasol bilong kamap bikpela long sait bilong bilip, yumi mas mekim sampela samting na yumi no stap nating tasol. Olsem, ol bratasista long Korin i harim na bihainim gutnius, ol i kisim baptais, kisim holi spirit, na kisim helpim long ol tok aposel Pol i skulim ol long en. (Apo. 18:​8-11) Maski i olsem, sampela yia bihain long ol i kisim baptais, planti bilong ol i no strong yet long bilip. (1 Kor. 3:2) Yumi ken mekim wanem long abrusim dispela hevi?

10. Yumi mas mekim wanem bilong kamap strong long bilip? (Jut 20)

¹⁰ Bilong kamap strong long bilip, pastaim yumi mas kisim dispela laik bilong mekim olsem. Ol lain husat i “laikim pasin bilong sot long save” na ol i laik stap olsem pikinini yet long sait bilong bilip, ol bai no inap mekim ol samting bilong kamap strong long bilip. (Prov. 1:22) Yumi no laik kamap olsem ol man na meri em ol i bikpela pinis, tasol ol i wok yet long larim papamama bilong ol i mekim ol disisen bilong ol, nogat. Yumi yet i laik mekim ol samting bilong kamap strong long bilip. (Ritim Jut 20.) Sapos yu wok yet long mekim ol samting bilong kamap strong long bilip, orait beten askim Jehova long givim yu “dispela laik na strong long mekim ol samting em yet i laikim.”—Fili. 2:13.

11. I gat wanem ol samting i stap bilong helpim yumi long kamap strong long bilip? (Efesus 4:​11-13)

¹¹ Jehova i givim ol samting bilong helpim yumi long kamap strong long bilip. Ol man i mekim wok olsem ol wasman na ol tisa insait long kongrigesen Kristen, ol i redi long helpim yumi long kamap olsem ol “man i bikpela pinis” long sait bilong bilip, na winim wankain “mak  em Krais i bin winim, em dispela mak i inap olgeta.” (Ritim Efesus 4:​11-13.) Na tu, Jehova i givim yumi holi spirit bilong helpim yumi long kisim “tingting bilong Krais.” (1 Kor. 2:​14-16) Na moa yet, God i kirapim ol man long raitim fopela Gutnius bilong skulim yumi long ol tingting, toktok, na ol pasin Jisas i bin mekim taim em i stap long graun. Taim yu bihainim tingting na ol pasin bilong Jisas, yu ken winim mak yu putim long kamap strong long bilip.

WOK BILONG OL STRONGPELA KAIKAI BILONG BILIP

12. “Ol as bilip bilong Krais” i makim wanem samting?

¹² Bilong kamap strong long bilip, yumi mas kisim save long “ol as bilip bilong Krais,” em ol as bilip olgeta Kristen i mas save long en, na tu, yumi mas kisim save long sampela samting moa. Sampela bilong ol as bilip yumi olgeta i save long en em pasin bilong tanim bel, bilip, kisim baptais, na kirap bek. (Hib. 6:​1, 2) Ol dispela as bilip na planti moa i stap olsem faundesen bilong ol samting em ol Kristen tru i bilip long en. Olsem na aposel Pita i stori long ol dispela samting taim em i autim tok long bikpela lain manmeri long Pentikos. (Apo. 2:​32-35, 38) Bilong kamap ol disaipel bilong Krais, yumi mas kisim save long ol dispela as bilip na bihainim. Olsem, Pol i tok man husat i sakim bilip bilong kirap bek em i sakim olgeta bilip Kristen. (1 Kor. 15:​12-14) Tasol yumi no ken ting olsem yumi mas kisim save long ol as bilip na yumi ting dispela em inap, nogat.

13. Yumi mas mekim wanem bilong kisim helpim long ol strongpela kaikai bilong bilip olsem Hibru 5:14 i stori long en? (Lukim tu piksa.)

¹³ Ol as bilip i no wankain long ol strongpela kaikai bilong bilip. Ol strongpela kaikai bilong bilip o ol strongpela tok i tru bilong Baibel i makim ol lo na ol stiatok bilong Jehova we i helpim yumi long kliagut long tingting bilong em. Bilong kisim helpim long ol dispela kaikai bilong strongim bilip, yumi mas stadi long Tok Bilong God, tingim tingim long bel, na bihainim gut ol dispela tok. Taim yumi mekim olsem, yumi skulim yumi yet long mekim ol disisen we i amamasim Jehova. c—Ritim Hibru 5:14.

14. Olsem wanem Pol i helpim ol Korin long kamap strong long bilip?

¹⁴ Ol Kristen i no strong long bilip, ol i save hatwok long mekim gutpela disisen taim i no  gat wanpela lo long Baibel i kolim stret samting ol i mas mekim. Sapos i no gat lo long Baibel i kolim stret samting ol i mas mekim, sampela inap pilim olsem ol i ken mekim wanem samting ol i laik mekim. Ol narapela inap askim long wanpela lo taim i no gat wok long ol i bihainim wanpela lo. Olsem, ol Kristen long Korin i askim Pol long kolim stret wanpela lo we i stori olsem ol bai kisim ol kaikai ol i ofaim long ol imis o nogat. Pol i no tokim ol long samting ol i mas mekim, nogat, em i tokim ol olsem olgeta wan wan i gat “rait long mekim” samting i stret wantaim maus bilong bel bilong ol. Em i kolim sampela stiatok we inap helpim olgeta wan wan long mekim samting i stret wantaim maus bilong bel bilong ol, tasol long wankain taim ol i no ken pundaunim ol narapela. (1 Kor. 8:​4, 7-9) Long dispela rot, Pol i helpim ol Korin long kamap strong long bilip na bai ol i ken yusim save bilong ol long skelim ol samting na ol i no larim ol narapela i stiaim ol o painim ol lo i stori long dispela samting.

15. Olsem wanem Pol i helpim ol Hibru Kristen long mekim ol samting bilong kamap strong long bilip?

¹⁵ Yumi kisim bikpela skul long ol tok Pol i raitim i go long ol Hibru Kristen. Sampela bilong ol “i no . . . kisim strongpela kaikai [bilong bilip], nogat.” Ol i “kirap gen long dring susu.” (Hib. 5:12) Ol i no kisim save na bihainim ol nupela save bilong tok i tru em Jehova i skulim ol long en long rot bilong kongrigesen. (Prov. 4:18) Olsem, planti Juda Kristen i strong yet long bihainim Lo Bilong Moses maski inap 30 yia i go pinis ofa bilong Krais i bin pinisim dispela Lo. (Rom 10:4; Tai. 1:10) Insait long dispela 30 yia, em bikpela haptaim inap long ol Juda Kristen i luksave olsem i no gat wok moa long ol i bihainim dispela Lo! Ol man husat i ritim pas Pol i raitim i go long ol Hibru, ol inap wanbel olsem dispela buk i gat ol strongpela tok i tru long en. Pas bilong em i helpim ol dispela Kristen long strongim bilip bilong ol long lotu Kristen na em i strongim bel bilong ol long wok yet long autim tok, maski ol Juda i birua long ol.—Hib. 10:​19-23.

SAKIM PASIN HAMBAK

16. Yumi mas kamap strong long bilip na yumi mas mekim wanem narapela samting?

¹⁶ Yumi mas givim bel olgeta long kamap strong long bilip na holim strong dispela pasin. Dispela i makim olsem yumi mas sakim pasin hambak. (1 Kor. 10:12) ‘Oltaim yumi mas skelim’ yumi yet bilong save olsem yumi wok yet  long kamap strong long bilip o nogat.—2 Kor. 13:5.

17. Olsem wanem pas Pol i raitim i go long ol Kolosi i soim olsem ol i mas wok yet long stap strong long bilip?

¹⁷ Long pas Pol i raitim i go long ol Kolosi, em i stori gen olsem ol i mas wok yet long stap strong long bilip. Maski ol i kamap ol Kristen i bikpela pinis long sait bilong bilip, Pol i tok lukaut long ol olsem ol i no ken larim tingting bilong dispela graun i pulim ol. (Kol. 2:​6-10) Epafras i save gut long olgeta insait long kongrigesen na oltaim em i save beten olsem ol i ken “kamap strong olgeta” o ol i ken kamap strongpela Kristen. (Kol. 4:12) Yumi kisim wanem skul long dispela? Pol na Epafras i save olsem bilong stap yet olsem strongpela Kristen, yumi mas askim God long helpim yumi na yumi mas mekim ol samting bilong strongim yet pasin pren bilong yumi wantaim Em. Ol i laik bai ol Kolosi i stap yet olsem ol strongpela Kristen, maski ol i bungim wanem ol hevi.

18. Wanem samting inap kamap long wanpela strongpela Kristen? (Lukim tu piksa.)

¹⁸ Pol i tok lukaut long ol Hibru olsem wanpela strongpela Kristen inap mekim ol samting na God i no orait moa long em inap oltaim. Sapos em i no laik harim tok bilong Jehova na bihainim, em inap i go longwe tru long God na nau i no gat rot long em inap tanim bel na bai God i ken fogivim em. Gutpela tru olsem ol Hibru i no bin bungim dispela hevi. (Hib. 6:​4-9) Olsem wanem long ol Kristen long nau em ol i kamap slek long bilip o ol i raus long kongrigesen, tasol bihain ol i tanim bel? Pasin bilong ol long daunim ol yet na tanim bel i soim olsem ol i no wankain long ol Kristen em Pol i stori long ol olsem God i no inap orait moa long ol. Tasol taim ol i kam bek long Jehova, ol i mas kisim helpim em i givim long ol. (Ese. 34:​15, 16) Ol elda inap stretim rot long wanpela strongpela Kristen i ken helpim ol long kamap strong gen long bilip.

19. Yumi mas putim wanem mak?

¹⁹ Sapos yu putim mak long mekim ol samting bilong kamap strong long bilip, yu ken winim dispela mak! Wok yet long kisim save long ol strongpela kaikai bilong bilip na kisim tingting wankain olsem bilong Jehova. Na sapos yu kamap wanpela strongpela Kristen pinis, orait mekim olgeta samting bilong stap yet olsem wanpela Kristen i bikpela pinis long sait bilong bilip.