1-3. (a) Bilong wanem yumi save olsem yumi inap kamap pren bilongGod? (b) Yumi bai skelim stori bilong husat lain long dispela stadi?

INAP 3-pela taim, Baibel i kolim Abraham olsem pren bilong God. (2 Sto. 20:7; Ais. 41:8; Jems 2:23) Baibel i mekim dispela tok long Abraham tasol. Tasol yu ting Abraham tasol i stap olsem pren bilong Jehova? Nogat. Baibel i soim klia olsem yumi olgeta wan wan inap kamap pren bilong God.

² Baibel i pulap long stori bilong ol bilipman na ol bilipmeri husat i pret long Jehova, bilip long em, na kamap pren bilong em. (Ritim Song 25:14.) Aposel Pol i tok, i gat “bikpela lain manmeri ol i olsem bikpela klaut,” na olgeta i stap olsem ol pren bilong God. (Hib. 12:1) Ol dispela manmeri i gat planti gutpela pasin.

³ Yumi ken skelim stori bilong 3-pela gutpela pren bilong Jehova em Baibel i stori long ol. Yumi bai skelim stori bilong (1) Rut, em yangpela wido bilong Moap; (2) Hesekia, em gutpela king bilong Juda; na (3) Maria, em mama bilong Jisas. Yumi inap kisim wanem skul long ol samting ol i mekim bilong kamap pren bilong God?

4, 5. (a) Rut i mas mekim wanem bikpela disisen? (b) Rut i mas skelim wanem ol samting taim em i mekim dispela disisen? (Lukim piksa long kirap bilong stadi.)

⁴ Long tingting, piksaim 3-pela wido meri i wokabaut long ples drai nating long rot i go long Moap, na win i wok long bloim klos bilong ol. Ol dispela wido em Naomi na 2-pela tambu meri bilong em, Rut na Orpa. Orpa i tanim na wokabaut i go bek, long wanem, em i laik i go bek long ples bilong em long Moap. Naomi i tingting strong long i go bek long ples bilong em long Israel. Rut i stap yet wantaim em, na em bai mekim wanpela bikpela disisen. Rut bai i go bek long ples na lain bilong em long Moap, o em bai bihainim tambu mama bilong em Naomi na i go long Betlehem.—Rut 1:1-8, 14.

⁵ Rut inap kisim tingting olsem em i gat famili long Moap—mama na ol narapela wanblut bai lukautim em. Moap em asples bilong em. Kalsa bilong Moap em kalsa bilong em, tokples bilong Moap em tokples bilong em, na lain Moap em lain bilong em. Naomi inap tokim Rut olsem kalsa, tokples, na ol manmeri long Betlehem bai i no wankain olsem long Moap. Olsem na Naomi i tokim Rut long i go bek long Moap. Naomi i tingting planti, long wanem, em i no inap painim wanpela man bilong maritim Rut. Na tu, em i no inap painim wanpela haus em ol tambu meri bilong em inap i stap long en. Rut bai mekim wanem? Tingim: Orpa i “go bek long lain bilong en na long god bilong ol tumbuna bilong en.” (Rut 1:9-15) Olsem wanem? Rut i tingting long i go bek long ol god giaman bilong lain bilong em? Nogat.

6. (a) Olsem wanem Rut i mekim gutpela disisen? (b) Bilong wanem Boas i tok Rut i mekim Jehova i stap olsem ples hait bilong em?

⁶ Ating Rut i kisim save long God Jehova long rot bilong man bilong em, o long rot bilong Naomi. Jehova i no olsem ol god bilong Moap. Rut i save olsem i stret long em i laikim Jehova na lotuim em. Rut i kisim pinis sampela save, tasol em i mas mekim sampela samting moa. Em i mas mekim disisen olsem: Em bai lotuim Jehova olsem God bilong em, o nogat. Rut i mekim gutpela disisen. Em i tokim Naomi: “Lain bilong yu bai i kamap lain bilong mi. Na God bilong yu bai i kamap God bilong mi.” (Rut 1:16) Yumi pilim tru pasin bilong Rut long laikim Naomi, tasol yumi pilim moa yet pasin bilong em long laikim Jehova. Boas em papagraun long hap Rut i stap long en, na em i givim biknem long Rut long pasin bilong em long mekim Jehova i stap olsem ples hait bilong em. (Ritim Rut 2:12.) Dispela stori inap kirapim yumi long tingim wanpela bebi pisin i painim ples hait aninit long ol strongpela wing bilong mama bilong en. (Sng. 36:7; 91:1-4) Jehova i stap olsem mama pisin na em i lukautim Rut. Na tu, Rut i bilip long God, olsem na God i blesim em na em i no gat rigret long disisen em i bin mekim.

7. Wanem samting bai helpim ol lain husat i surik long dediketim laip bilong ol long Jehova?

⁷ Planti manmeri i kisim save long Jehova, tasol ol i no laik mekim em i stap olsem ples hait bilong ol. Ol i no laik dediket na kisim baptais na stap olsem ol wokman bilong em. Sapos yu surik long dediket long Jehova, orait askim yu yet: Wai na yu surik long dediket long em? Olgeta man i stap laip long nau i mekim wok bilong kain kain god na ol narapela samting. (Jos. 24:15) Wanpela God tasol i gat rait long yumi lotuim em, olsem na mobeta yu mekim dispela God i kamap ples hait bilong yu. Taim yu dediket long Jehova, dispela em gutpela rot bilong soim olsem yu bilip long em. God bai helpim yu long stap gut long dediket bilong yu na yu inap karim olgeta kain hevi i painim yu. God i bin mekim olsem long Rut.

8. Stori long ol samting i kamap insait long famili bilong Hesekia.

⁸ Stori bilong Hesekia i narapela kain long Rut, long wanem, Hesekia i kamap long lain em ol i dediket pinis long Jehova. Tasol i no olgeta manmeri bilong lain Israel i stap gut long God. Papa bilong Hesekia em King Ahas, na em i no stap gut long God. Ahas i kirapim lain Juda long lotuim ol imis, na tu, em i bagarapim tempel bilong Jehova  long Jerusalem. Ol samting nogut tru i kamap insait long famili bilong Hesekia taim em i liklik yet; papa bilong em i sakrifaisim sampela brata bilong Hesekia long wanpela giaman god!—2 Kin. 16:2-4, 10-17; 2 Sto. 28:1-3.

9, 10. (a) Wanem ol samting inap kirapim Hesekia long kamap man nogut? (b) Bilong wanem yumi no ken kros long God? (c) Bilong wanem yumi no ken ting olsem sindaun bilong famili bai stiaim ol pasin yumi bihainim?

⁹ Taim Hesekia i kamap bikpela man, em inap bihainim pasin bikhet, na kamap man bilong belhat, na birua long God. Sampela manmeri i no karim ol bikpela hevi olsem Hesekia, tasol ol i pilim olsem i stret long ol i “putim hevi” long Jehova na “kros long em” o bagarapim oganaisesen bilong em. (Snd. 19:3) Sampela manmeri i ting olsem pasin nogut bilong famili bilong ol i kontrolim laip bilong ol, olsem na i hatwok long ol i abrusim pasin nogut, na ol inap mekim wankain pasin nogut olsem papamama bilong ol i bin mekim. (Ese. 18:2, 3) Yu ting dispela kain tingting i stret?

¹⁰ Laip stori bilong Hesekia i kirapim yumi long tok: Nogat tru! I no gat gutpela risen long kros long Jehova, long wanem, em i no kamapim ol pasin nogut i painim ol man long nau. (Jop 34:10) Em tru olsem papamama inap stiaim ol pikinini long bihainim stretpela pasin, o pasin nogut. (Snd. 22:6; Kol. 3:21) Dispela i no makim olsem sindaun bilong famili bai stiaim pasin bilong man long laip olgeta bilong em, nogat. Jehova i givim wanpela gutpela presen long yumi olgeta—yumi yet inap mekim disisen long ol samting yumi bai mekim, na ol pasin yumi laik bihainim. (Lo 30:19) Olsem wanem Hesekia i yusim dispela presen?

11. Bilong wanem Hesekia em wanpela gutpela king bilong Juda?

¹¹ Papa bilong Hesekia em wanpela king bilong Juda na em i mekim olgeta kain pasin i nogut tru, tasol Hesekia i bihainim stretpela pasin. (Ritim 2 King 18:5, 6.) Papa bilong Hesekia inap stiaim Hesekia long mekim ol pasin i nogut tru, tasol i gat ol narapela man husat i stiaim Hesekia long bihainim stretpela pasin. Em ol kain profet olsem Aisaia, Maika, na Hosea. Ating King Hesekia i tingim tingim na em i pilim tru ol tok kaunsel na ol skultok em Jehova i kirapim ol dispela bilipman long autim. Olsem na Hesekia i  stretim bek ol rong em papa bilong em i bin mekim. Em i klinim tempel, na givim ol animal bilong mekim ofa na rausim sin bilong ol manmeri, na em i bagarapim ol imis bilong ol god giaman bilong ol haiden. (2 Sto. 29:1-11, 18-24; 31:1) Taim King Senakerip bilong Asiria i laik bagarapim Jerusalem, dispela i putim bikpela hevi tru long Hesekia. Tasol em i sanap strong na soim klia olsem em i bilip tru long God. Em i bilip olsem God bai kisim bek lain Juda, na em i strongim ol manmeri long rot bilong ol tok na pasin em i mekim. (2 Sto. 32:7, 8) Bihain, Hesekia i kisim pasin antap. Tasol taim em i kisim tok bilong stretim em, em i daunim em yet na tanim bel. (2 Sto. 32:24-26) Hesekia i no larim pasin nogut bilong em i stiaim pasin em i bihainim. Em i soim olsem em i stap pren bilong Jehova na ol narapela inap bihainim gutpela eksampel bilong em.

12. Olsem wanem planti Kristen long nau i bihainim wankain pasin olsem Hesekia long i stap pren bilong Jehova?

¹² Yumi stap long taim we ol man i heitim ol narapela na mekim nogut long ol. Olsem na planti pikinini i kamap bikpela insait long famili we papamama i no gat pasin laikim na i no lukautim ol. (2 Tim. 3:1-5) Planti Kristen long nau i kamap bikpela insait long kain famili olsem, tasol ol i kamap gutpela pren bilong Jehova. Wankain olsem Hesekia, ol i no larim ol hevi i painim ol long pastaim i stiaim laip bilong ol. God i givim presen long yumi—yumi yet inap mekim disisen long ol samting yumi laik mekim. Olsem na yumi yet inap mekim disisen long stap gut long Jehova na givim ona na glori long em olsem Hesekia i bin mekim.

13, 14. (a) Wanem ol samting i mekim na asainmen bilong Maria em i narapela kain tru? (b) Maria i tok wanem long Gebriel?

¹³ Planti handret yia bihain long taim bilong Hesekia, wanpela yangpela meri Juda long taun Nasaret i kamap gutpela pren bilong Jehova. God i givim em asainmen i narapela kain tru long ol asainmen em i givim long ol narapela man. God i gat wanpela Pikinini tasol, em Pikinini tru bilong Em, na dispela yangpela meri bai karim dispela pikinini na mekim bikpela long em! Tingim, Jehova i trastim Maria, em pikinini meri bilong Heli, olsem na em i givim dispela bikpela wok long Maria. Orait, Maria i pilim olsem wanem long dispela bikpela wok em bai mekim?

¹⁴ Yumi inap tingting tasol long blesing em Maria i kisim, na yumi no tingim sampela samting we inap pretim em. Ensel Gebriel i tokim Maria olsem em bai i gat bel long rot bilong mirakel, maski em i no slip wantaim man. Gebriel i no tok olsem em bai i go long famili na ol wanples bilong Maria na kliaim tingting bilong ol long risen na Maria bai i gat bel. Ol bai i gat wanem tingting? Ating Maria i tingting planti long Josep, em man em bai maritim. Olsem wanem Maria bai kirapim Josep long trastim em, olsem maski em i gat bel,  em i bin i stap gut long Josep? Na tu, hau bai em inap lukautim na trenim Pikinini bilong God Antap Tru? Yumi no save long olgeta samting Maria i tingting planti long en taim Gebriel i toktok long em. Tasol yumi save long bekim bilong Maria, em i tok: “Mi wokmeri bilong Jehova! Samting yu tok long en i ken kamap long mi.”—Luk 1:26-38.

15. Wanem samting i soim olsem Maria i gat strongpela bilip?

¹⁵ Maria i gat strongpela bilip tru! Wokmeri i save bihainim tasol tok bilong bosman bilong em. Olsem na Maria i larim Bosman bilong em, Jehova, long tokim em long ol samting em bai mekim. Maria i laik mekim olgeta kain wok God i tokim em long mekim. Olsem wanem Maria i gat strongpela bilip? Pasin bilong bilip i no stap long man taim em i bon. Man i save kisim pasin bilong bilip taim em yet i mekim sampela samting na God i blesim em. (Gal. 5:22; Efe. 2:8) Wanem ol samting i soim olsem Maria i bin mekim sampela samting bilong strongim bilip bilong em? Orait yumi ken skelim pasin bilong em long putim yau, na ol tok em i mekim.

16. Wanem samting i soim olsem Maria i gat pasin bilong putim gut yau?

¹⁶ Pasin bilong Maria long putim gut yau. Baibel i tokim yumi long “putim yau kwik long harim tok, na . . . no ken hariap long mekim toktok.” (Jems 1:19) Yu ting Maria i gat pasin bilong putim gut yau? Yes. Inap 2-pela taim, Gutnius Bilong Luk i tokaut olsem Maria i putim gut yau long tok bilong God we i gat bikpela insait bilong en, na bihain em i lusim sampela haptaim long tingim tingim ol tok em i bin harim. Taim Jisas i bon, ol wasman bilong sipsip i tokim Maria long tok em ensel i mekim. Inap 12-pela yia bihain, Jisas i stap mangi yet, tasol em i mekim wanpela tok we i gat bikpela mining. Maria i putim gut yau long tok bilong ol wasman na tok em Jisas yet i bin mekim, na em i tingim gut ol dispela tok.—Ritim Luk 2:16-19, 49, 51.

17. Yumi kisim wanem skul long ol tok Maria i mekim?

¹⁷ Ol tok Maria i mekim. Baibel i no kamapim olgeta tok Maria i bin mekim. Longpela tok Maria i mekim i stap long Luk 1:46-55. Ol dispela tok i kamapim klia olsem Maria i save gut long ol tok bilong Rait Holi. Ol tok bilong em i klostu wankain long ol tok i stap long beten bilong Hana, em mama bilong profet Samuel. (1 Sml. 2:1-10) Inap 20 taim olgeta, Maria i kolim ol tok bilong Rait Holi taim em i toktok. Dispela i soim klia olsem Maria i save amamas long toktok long samting bilong lotu. Maria i amamas long kamapim long ples klia ol gutpela tok i stap long bel bilong em, em ol tok i tru em gutpela Pren bilong em, God Jehova i bin skulim em long en.

18. Yumi ken mekim wanem bambai yumi inap bihainim pasin bilong Maria long stap strong long bilip?

¹⁸ Wankain olsem Maria, sampela taim Jehova inap givim asainmen long yumi na yumi pilim olsem dispela asainmen i bikpela tumas. Yumi mas bihainim pasin bilong Maria na daunim yumi yet na bilip olsem Jehova bai helpim yumi. Sapos yumi laik bihainim pasin bilong Maria long stap strong long bilip, orait yumi mas putim gut yau long save yumi kisim long Jehova na ol samting em i tingting pinis long mekim. Na tu, yumi mas tingim tingim ol tok i tru bilong Baibel, na amamas long tokim ol narapela long ol samting yumi lainim.—Sng. 77:11, 12; Luk 8:18; Rom 10:15.

19. Taim yumi bihainim eksampel bilong ol bilip man na ol bilip meri em Baibel i stori long ol, yumi inap kisim wanem blesing?

¹⁹ Rut, Hesekia, na Maria i stap olsem ol pren bilong Jehova, wankain olsem Abraham long pastaim. Ol dispela bilip lain wantaim olgeta husat i stap olsem “bikpela klaut” na olgeta narapela bilip lain kirap long bipo yet i kam inap long nau, olgeta i kisim blesing bilong i stap olsem ol pren bilong God. Yumi mas wok yet long bihainim eksampel bilong ol long stap strong long bilip. (Hib. 6:11, 12) Taim yumi mekim olsem, yumi bai kisim gutpela blesing tru—yumi bai i stap gutpela pren bilong Jehova inap oltaim oltaim!