1, 2. (a) Olsem wanem eksampel bilong Noa, Daniel, na Jop inap strongim yumi? (b) Wanem samting i kamap taim Esekiel i raitim tok bilong Esekiel 14:14?

OLSEM WANEM? Yu karim ol kain hevi olsem sik, hevi bilong mani, o ol narapela i birua long yu? Sampela taim yu pilim hatwok long mekim wok bilong Jehova? Sapos olsem, eksampel bilong Noa, Daniel na Jop inap strongim yu. Ol i gat sin, na ol i bungim wankain hevi em yumi save bungim long nau. Na tu, sampela hevi ol i bungim inap mekim na ol i lusim laip bilong ol. Maski i olsem, ol i stap gut long God na ol i soim gutpela eksampel long pasin bilong bilip na bihainim tok.—Ritim Esekiel 14:12-14.

² Long yia 612 B.C.E., * Esekiel i raitim tok bilong Esekiel 14:14 taim em i stap long Babilon. (Ese. 1:1; 8:1) Esekiel i tok profet olsem Jerusalem bai bagarap, na dispela i kamap tru long yia 607 B.C.E. Ol manmeri  i bihainim wankain pasin olsem bilong Noa, Daniel na Jop, ol tasol i abrusim bagarap. (Ese. 9:1-5) Sampela bilong ol em Jeremaia, Baruk, Ebetmelek na lain Rekap.

3. Yumi bai skelim wanem samting long dispela stadi?

³ Long nau, ol manmeri em Jehova i orait long ol wankain olsem Noa, Daniel na Jop, ol tasol bai abrusim bagarap taim God i pinisim dispela haptaim nogut bilong nau. (Rev. 7:9, 14) Yumi ken skelim risen na Jehova i laik bai yumi bihainim pasin bilong Noa, Daniel na Jop. Taim yumi skelim pasin bilong ol, yumi bai stori long (1) wanem ol hevi ol i bungim, na (2) olsem wanem yumi inap bihainim pasin bilong ol long bilip na bihainim tok.

4, 5. (a) Noa i bungim wanem ol hevi? (b) Bilong wanem pasin bilong Noa long sanap strong long bilip i narakain tru?

⁴ Ol hevi Noa i bungim. Long taim bilong tumbuna papa bilong Noa, em Enok, ol manmeri i mekim ol kain kain pasin nogut tru. Ol i mekim ol “tok nogut tru” long Jehova. (Jut 14, 15) Pasin bilong pait na bagarapim man i go bikpela. Long taim bilong Noa, ol man “long olgeta hap bilong graun ol i wok long pait na bikhet tasol.” Ol bikhet ensel i kamap olsem ol man long graun na kisim ol meri na kamapim ol pikinini. Ol dispela pikinini i gat bikpela strong, na ol i save pait na bikhet. (Stt. 6:2-4, 11, 12) Tasol pasin bilong Noa i narapela kain long pasin bilong ol dispela manmeri. “Bikpela i amamas long Noa. . . . Noa em i gutpela man, na wokabaut bilong en i stret long ai bilong God. Em i pren tru bilong God.”—Stt. 6:8-10.

⁵ Tingim ol tok em Baibel i mekim long dispela stretpela man. Planti man long nau i save stap laip inap 70 o 80 yia. Tasol paslain long bikpela tait i kamap, Noa i stap gut long God klostu 6 handret yia! (Stt. 7:11) Long taim bilong Noa, i no gat ol manmeri husat i stap gut long God bambai em i ken bung wantaim ol. Na tu, ol bratasusa bilong em i no stap gut long God. *

6. Olsem wanem Noa i soim olsem em i gat pasin bilong strongim bel?

⁶ Noa i amamas long bihainim stretpela pasin long laip bilong em. Na tu, em i strongim bel na “tokaut long stretpela pasin” bambai ol man i ken luksave olsem em i bilip long Jehova. (2 Pita 2:5) Aposel Pol i tok: “Long dispela bilip bilong en, em i soim olsem ol manmeri bilong dispela graun i gat asua.” (Hib. 11:7) Ol man i tok bilas long em na birua long em. Na tu, ating ol i laik kilim em i dai. Tasol em i no ‘pret long ol man.’ (Snd. 29:25) Em i gat dispela strong em Jehova i save givim long ol man i stap gut long em.

7. Noa i bungim wanem ol hevi taim em i wokim sip?

⁷ Noa i stap gut long God winim 5 handret yia. Bihain Jehova i tokim em long wokim wanpela sip bambai ol manmeri na ol animal i ken abrusim bagarap. (Stt. 5:32; 6:14) Ating dispela wok i bikpela tru, na tu, ol man bai putim hevi long em! Noa i save olsem ol manmeri bai tok bilas na birua long em taim em i wokim dispela sip. Maski i olsem, em i bilip long God na i bihainim tok bilong em. “Noa i mekim olgeta samting olsem God i tokim em.”—Stt. 6:22.

8. Olsem wanem Noa i bilip olsem Jehova bai givim ol samting em i nidim?

⁸ Narapela bikpela wok Noa i mas mekim, em long lukautim meri na ol pikinini bilong em long sait bilong kaikai na klos samting. Paslain long Bikpela Tait, ol manmeri i taitim bun long planim kaikai long gaden, na Noa tu i mekim olsem. (Stt. 5:28, 29) Maski i olsem, Noa i no tingting tasol long sait bilong kaikai na klos samting, nogat. Em i putim laik bilong God i stap namba 1. Maski Noa i mas wokim sip inap 40 o 50 yia, oltaim em i tingim ol samting em i mas mekim bilong stap strong long bilip. Em i wok yet long mekim olsem  inap 350 yia bihain long Bikpela Tait. (Stt. 9:28) Noa i stap gutpela eksampel long pasin bilong bilip na bihainim tok!

9, 10. (a) Olsem wanem yumi inap bihainim pasin bilong Noa long bilip na bihainim tok? (b) God i gat wanem tingting long ol man i bihainim ol stretpela lo bilong em?

⁹ Olsem wanem yumi inap bihainim pasin bilong Noa long bilip na bihainim tok? Yumi inap mekim olsem taim yumi bihainim stretpela pasin bilong God, sakim ol pasin nogut bilong dispela graun, na putim wok bilong Kingdom i stap namba 1 samting long laip bilong yumi. (Mat. 6:33; Jon 15:19) Taim yumi stap gut long God, ol man bilong dispela graun bai i no amamas long yumi. Long nau, yumi bihainim ol lo bilong God long sait bilong marit na marit pasin, olsem na ol manmeri long sampela ples i holim tingting kranki long yumi. (Ritim Malakai 3:17, 18.) Olsem Noa, yumi pret long Jehova na i no long ol man. Yumi save olsem God tasol inap givim laip oltaim long yumi.—Luk 12:4, 5.

¹⁰ Olsem wanem long yu? Yu bai wok yet long stap gut long God maski ol narapela i tok bilas long yu, sutim tok long yu, o hevi bilong mani i traim pasin bilong yu long bilip olsem Jehova bai givim yu ol samting yu nidim? Sapos yu bihainim pasin bilong Noa long bilip na bihainim tok, yu ken bilip tru olsem Jehova bai lukautim yu.—Fili. 4:6, 7.

11. Daniel na 3-pela pren bilong em i bungim wanem ol hevi long Babilon? (Lukim piksa long kirap bilong stadi.)

¹¹ Ol hevi Daniel i bungim. Daniel i stap kalabus long Babilon, em taun we ol man i givim bel tru long lotuim ol god giaman na insait long wok bilong ol spirit nogut. Na tu, ol manmeri long Babilon i mekim nogut long ol Juda na tok bilas long ol na God bilong ol, Jehova. (Sng. 137:1, 3) Ating dispela i bagarapim tru bel long sampela Juda, olsem Daniel! Na tu, Daniel na 3-pela pren bilong em—Hanania, Misael na Asaria—i holim bikpela wok, na ol bai kisim trening bilong mekim wok bilong king. Ol wokman bilong king i redim ol kaikai bilong ol. Tasol Daniel i no laik kisim ol dispela kaikai na dring bikos em i no laik “kamap doti long ai bilong God.”—Dan. 1:5-8, 14-17.

12. (a) Daniel i kamapim wanem ol gutpela pasin? (b) Jehova i gat wanem tingting long Daniel?

¹² Wanpela hevi i kamap wantu na Daniel i mas yusim save bilong em, na dispela i mekim na em i kisim namba. (Dan. 1:19, 20) Em i no gat pasin antap na ting olsem em i save long olgeta samting, nogat. Em i mekim pasin daun, na oltaim em i tokaut olsem Jehova i givim save long em long mekim ol wok. (Dan. 2:30) Taim Daniel i yangpela mangi yet, Jehova i luksave long gutpela pasin bilong em. Olsem na God i kolim em stretpela man wankain olsem Noa na Jop. Yu ting i stret God i trastim Daniel long i stap gut long em? Yes! Daniel i bilip long God na i bihainim tok bilong em i go inap long em i dai. Ating Daniel i gat 97 krismas samting taim ensel bilong God i mekim dispela tok long em: “Daniel, God i laikim yu tumas.”—Dan. 10:11.

13. Olsem wanem Daniel i stap olsem blesing long lain Juda?

¹³ God i blesim Daniel, olsem na taim gavman bilong Babilon na Media-Persia i bosim ol manmeri, king i makim Daniel long bosim ol ofisa bilong king. (Dan. 1:21; 6:1, 2) Ating Jehova i mekim ol dispela samting i kamap bambai Daniel i stap na helpim lain Juda wankain olsem Josep i helpim lain bilong em long Isip, na Esta na Mordekai i helpim lain Juda. * (Dan. 2:48) Esekiel na lain Juda long Babilon i amamas na i stap bel isi  taim ol i luksave olsem Jehova i stiaim ol samting bilong lukautim ol!

14, 15. (a) Olsem wanem ol hevi i painim yumi i wankain long ol hevi i painim Daniel? (b) Ol papamama long nau inap kisim wanem skul long papamama bilong Daniel?

¹⁴ Olsem wanem yumi inap bihainim pasin bilong Daniel long bilip na bihainim tok? Long nau, yumi stap olsem ol manmeri bilong narapela kantri long graun we Bikpela Babilon i paulim tingting na bilip bilong ol manmeri. Bikpela Babilon i stap olsem “ples bilong ol spirit nogut.” (Rev. 18:2) Olsem na yumi stap narapela kain long ol manmeri bilong graun, na ol i birua long yumi. (Mak 13:13) Tasol yumi mas bihainim pasin bilong Daniel na i go klostu long Jehova, em God bilong yumi. Taim yumi daun long em na bilip long em, orait yumi tu bai stap olsem ol stretpela manmeri long ai bilong God.—Hag. 2:7.

¹⁵ Ol papamama long nau inap kisim skul long gutpela eksampel bilong papamama bilong Daniel. Maski pasin nogut i pulap long Juda long taim Daniel i liklik mangi yet, em i kisim pasin bilong laikim God. Daniel i laikim God bikos papamama i trenim em long kisim dispela pasin. (Snd. 22:6) Mining bilong nem Daniel em “God Em i Jas Bilong Mi,” na dispela i soim olsem papamama bilong em i save daun long God. Olsem na ol papamama, yupela i no ken givap long skulim ol pikinini bilong yupela. (Efe. 6:4) Na tu, yupela i mas beten wantaim ol na tingim ol long beten. Taim yupela i wok strong long putim tok i tru long bel bilong ol pikinini, Jehova bai blesim hatwok bilong yupela.—Sng. 37:5.

16, 17. Jop i bungim wanem ol hevi?

¹⁶ Ol hevi Jop i bungim. Jop i gat gutpela sindaun tru, tasol bihain em i bungim planti hevi long laip bilong em. Paslain long hevi i painim Jop, “em i gat biknem i winim biknem bilong ol arapela man long ol kantri bilong hap sankamap.” (Jop 1:3) Em i gat planti mani kago na biknem, na ol manmeri i save rispektim em. (Jop 29:7-16) Maski i olsem, Jop i no givim baksait long God na mekim pasin antap, nogat. Jehova i kolim Jop olsem “wokboi bilong mi,” na em i tok moa olsem: “Em i save lotu na aninit long mi, na i save bihainim olgeta tok bilong mi. Em i no save mekim wanpela pasin nogut.”—Jop 1:8.

¹⁷ Laip bilong Jop i senis wantu, olgeta mani kago bilong em i lus, na bel hevi i daunim em tru. Satan i giaman na sutim tok long Jop olsem em i lotuim God bikos em i laik kisim ol gutpela samting. (Ritim Jop 1:9, 10.) Jehova i no lusim tingting long dispela tok giaman! Em i larim Jop long  soim olsem em bai stap gut long God na lotuim em bikos em i laikim tru God long bel olgeta.

18. (a) Bilong wanem pasin bilong Jop long stap gut long God inap strongim yu? (b) Yumi kisim wanem skul long pasin Jehova i mekim long Jop?

¹⁸ Satan i kamapim kain kain bikpela hevi long Jop long pasin hait, na dispela i kirapim Jop long sutim tok long God. (Jop 1:13-21) Bihain 3-pela giaman pren bilong Jop i kam na mekim ol tok i bagarapim bel bilong Jop. Ol i tokim em olsem God i givim strafe long em long ol pasin nogut em i bin mekim! (Jop 2:11; 22:1, 5-10) Maski i olsem, Jop i stap gut yet long God. Sampela taim Jop i mekim planti toktok, tasol Jehova i save olsem Jop i karim bikpela hevi na em i no tingim gut ol tok em i mekim. (Jop 6:1-3) God i lukim olsem Jop i no givim baksait long Em. Na tu, maski Satan givim hevi long Jop na sutim kain kain tok long em, Jop i stap gut yet long God. Taim olgeta hevi bilong Jop i pinis, God i blesim em na dabolim ol samting Jop i gat winim long pastaim. Na tu, Jop i stap laip inap 140 yia moa. (Jems 5:11) Kirap long dispela taim, Jop i wok yet long lotuim Jehova. Olsem wanem yumi save long dispela? Jop i dai planti handret yia paslain long Esekiel i raitim tok i stap long Esekiel 14:14.

19, 20. (a) Olsem wanem yumi inap bihainim pasin bilong Jop long bilip na bihainim tok? (b) Olsem wanem yumi inap soim pasin sori bilong God long ol narapela?

¹⁹ Olsem wanem yumi inap bihainim pasin bilong Jop long bilip na bihainim tok? Maski wanem samting i kamap long yumi, oltaim yumi mas putim Jehova i stap namba 1 samting long laip bilong yumi, yumi bilip long em na bihainim tok bilong em long bel olgeta bilong yumi. Jop i no save olsem Satan i as bilong ol hevi i painim em, tasol em i stap gut long God! Tasol yumi save gut long ol pasin bilong Satan, olsem na yumi mas wok strong long bilip long God na bihainim tok bilong em. (2 Kor. 2:11) Yumi amamas olsem Buk Jop i stori gut long as na God i larim pen na hevi i stap. Long tok profet bilong Daniel, yumi save olsem Kingdom Bilong God bai bosim graun olgeta, na Jisas Krais bai stap King bilong en. (Dan. 7:13, 14) Yumi bilip tru olsem klostu nau Kingdom Bilong God bai pinisim tru olgeta pen na hevi.

²⁰ Eksampel bilong Jop i helpim yumi long luksave olsem yumi mas soim pasin sori long ol wanbilip i karim hevi. Taim hevi i painim Jop, dispela i mekim na em i toktok planti. Sampela taim ol bratasista bilong yumi inap mekim olsem tu. (Sav. 7:7) Tasol yumi mas bihainim gutpela tingting na soim pasin sori, na yumi no skelim ol. Taim yumi mekim olsem, yumi bihainim pasin laikim na pasin sori bilong Papa bilong yumi, Jehova.—Sng. 103:8.

21. Olsem wanem tok bilong 1 Pita 5:10 i stret wantaim stori bilong Noa, Daniel na Jop?

²¹ Noa, Daniel na Jop i stap long narapela narapela taim, tasol ol i sanap strong na karim ol hevi. Stori bilong ol i kirapim yumi long tingim tok bilong aposel Pita, em i tok: “God em i as bilong ol gutpela samting i kamap long rot bilong bikpela pasin helpim bilong em. . . . Na taim yupela i karim pen na hevi inap liklik haptaim, orait God bai inapim trening bilong yupela. Em bai strongim yupela na mekim yupela i sanap strong.”—1 Pita 5:10.

22. Yumi bai stori long wanem samting long neks stadi?

²² Jehova i kirapim Pita long kamapim ol tok we i soim olsem mm bai helpim ol wokman bilong em long sanap strong. Dispela tok i stret tu long ol manmeri bilong God long nau. Yumi olgeta i laik bai Jehova i strongim yumi na yumi sanap strong na lotuim em. Olsem na yumi laik bihainim pasin bilong Noa, Daniel na Jop long bilip na bihainim tok! Long neks stadi, yumi bai stori long as na ol i stap gut long Jehova—ol i save tru long em. Ol i “save tru long stretpela pasin” em God i laik bai ol i bihainim. (Snd. 28:5) Yumi tu i ken mekim olsem.