TUPELA yangpela meri i wokabaut wantaim long wanpela bisnis eria long biktaun Baguio, long Filipins. Ol i lukim wanpela kat bilong autim tok, tasol ol i no go klostu long en. Helen, em sista i sanap klostu long dispela kat, em i smail gut long ol. Tupela meri i wokabaut i go, tasol ol i laikim gutpela smail bilong Helen.

Bihain taim tupela meri i ron long bas i go bek long haus, ol i lukim wanpela bikpela sain bilong jw.org i stap long wanpela Haus Kingdom. Tupela i tingim em wankain sain ol i bin lukim long kat bilong autim long moning. Tupela i go daun long bas na i go lukim sediul bilong ol miting bilong narapela narapela kongrigesen i stap long geit bilong Haus Kingdom.

Dispela tupela meri i go long neks miting i kamap. Na ol i lukim husat taim ol i wokabaut i go insait long Haus Kingdom? Em Helen! Ol i luksave long em hariap bikos ol i tingim em olsem meri i gat bikpela smail! Helen i tok: “Taim tupela i wokabaut i kam long mi, mi pret liklik. Mi ting mi mekim wanpela rong.” Tasol tupela meri i stori gut long Helen olsem ol i bin lukim em taim em i sanap klostu long kat.

Tupela meri i enjoim miting na amamas long bung wantaim ol bratasista. Taim ol i lukim ol narapela i klinim Haus Kingdom bihain long miting, ol i askim sapos ol i ken helpim. Wanpela bilong dispela tupela meri i no stap moa long Filipins, tasol wanpela i stat long kam long ol miting na em i kirap stadi long Baibel—gutpela samting i kamap long smail tasol!