1. Taim meri Kristen i laik painim poroman bilong marit, em i mas givim wanem ol askim long em yet?

OLGETA Kristen i stap aninit long het bilong ol em Jisas Krais—em man i gutpela olgeta. Tasol taim wanpela meri Kristen i marit, em i stap aninit long het bilong em—em man bilong em husat i no gutpela olgeta. Sampela taim dispela i gat hatwok bilong en. So taim wanpela meri Kristen i laik painim wanpela poroman marit, i gutpela em i askim em yet olsem: ‘Wanem samting i soim olsem dispela brata bai stap gutpela het bilong famili? Em i putim ol wok bilong Jehova i stap namba 1 samting long laip bilong em? Sapos nogat, orait wanem samting i mekim na mi ting olsem em bai stap gutpela het bilong famili bihain long mipela i marit?’ Na tu, i gutpela sista i askim em yet olsem: ‘Mi gat wanem ol gutpela pasin we i ken helpim marit bilong mipela? Mi no save les kwik na mi redi long givim ol samting long ol narapela? Mi pas gut wantaim Jehova?’ (Ekl. 4:9, 12) Sapos meri i mekim ol gutpela disisen paslain long em i marit, dispela bai helpim marit bilong em long stap gut na stap amamas.

2. Bai yumi skelim wanem samting long dispela atikol?

² Planti milion sista Kristen i stap gutpela piksa long pasin bilong stap daun long man bilong ol. Yumi tok amamas long ol long dispela! Yumi amamas long mekim wok bilong Jehova wantaim ol dispela gutpela meri! Long dispela atikol, bai yumi skelim bekim bilong dispela 3-pela askim: (1) Wanem sampela hevi ol meri marit i save bungim? (2) Wai na meri marit i save daun long man bilong em? (3) Long pasin bilong stap daun, ol man marit na meri marit Kristen i ken lainim wanem samting long eksampel bilong Jisas, Abigel, na Maria em meri bilong Josep na mama bilong Jisas?

3. Wai na ol marit i save bungim ol hevi?

³ Marit em wanpela presen i gutpela olgeta i kam long God, tasol ol manmeri ol i no gutpela olgeta. (1 Jon 1:8) Olsem na Baibel i givim tok lukaut long ol marit olsem ol bai bungim sampela hevi long marit bilong ol olsem “ol bai karim pen na hevi long bodi bilong ol.” (1 Kor. 7:28) Yumi bai stori long sampela hevi em ol meri marit inap bungim.

4. Wai na meri marit inap pilim olsem sapos em i stap daun long man dispela i daunim em yet?

⁴ Ating bekraun bilong meri marit i i mekim na em i pilim olsem sapos em i stap daun long man bilong em, dispela i daunim em yet. Marisol long Amerika i tok: “Long hap mi kamap bikpela long en, planti taim ol i tokim ol meri olsem ol i wankain long ol man long olgeta samting. Mi save olsem Jehova i putim dispela wok bilong stap olsem het na em i tok long ol meri i mas stap daun long man bilong ol, na ol man i mas rispektim meri bilong ol. Tasol i hatwok long holim stretpela tingting long wok bilong man bilong mi long stap het.”

5. Wanem sampela tingting kranki ol man i gat long ol meri?

⁵ Long sampela hap, meri i maritim man husat i gat tingting olsem ol meri ol i samting nating tasol. Wanpela sista nem bilong em Ivon, em i save stap long Saut Amerika, em i tok: “Long hap bilong mipela, ol man i mas kaikai pastaim na bihain ol meri. Ol liklik gels i mas kukim kaikai na klinim haus, tasol long ol liklik bois, ol mama na ol sista i save mekim wok bilong ol na ol man i save tokim ol olsem ol i ‘king bilong haus.’” Yingling em wanpela sista i stap long Esia, na em i tok: “Long tokples bilong mi, i gat wanpela tok i makim olsem ol meri ol i no ken i gat save o sampela save bilong mekim wok. Wok tru bilong ol em ol wok bilong haus, na ol i no ken tru kamapim tingting bilong ol long man bilong ol.” Man marit husat i larim kain tingting kranki—em Baibel i no as bilong en—i stiaim em, em i save putim hevi long meri bilong em, na em i no save bihainim pasin bilong Jisas, na em i mekim Jehova i bel hevi.—Efe. 5:28, 29; 1 Pita 3:7.

6. Ol meri marit i mas mekim wanem bilong strongim pasin pren bilong ol wantaim Jehova?

⁶ Long atikol i go pinis, Jehova i tok long ol man marit Kristen i mas givim ol samting famili i nidim long sait bilong bilip, bel na tingting, na long sait bilong skin. (1 Tim. 5:8) Ol meri marit em ol i sista, ol i save bisi tru, tasol ol i mas makim haptaim long olgeta de long ritim Tok Bilong God na tingim tingim long bel ol dispela tok na toktok wantaim Jehova long rot bilong beten. Ating ol bai hatwok long mekim olsem. Ol meri marit i save bisi, so ating ol bai pilim olsem ol i no gat taim na strong bilong mekim ol dispela samting, tasol em i bikpela samting tru long ol i mas lusim haptaim bilong mekim olsem. Wai? Bikos Jehova i laik bai yumi wan wan i kisim pasin bilong pas gut wantaim em na wok yet long strongim dispela pasin pren.—Apo. 17:27.

7. Wanem samting bai mekim na i isi long meri i mekim wok Jehova i givim long em?

⁷ Em tru olsem meri marit i mas wok strong long stap aninit long wok bos bilong man bilong em husat i no gutpela olgeta. Tasol em bai pilim isi long mekim dispela wok Jehova i givim long em sapos em i save na em i kliagut long ol risen Baibel i givim long as na meri i mas i stap daun long man bilong em.

8. Olsem Efesus 5:22-24 i kamapim, wai na meri marit i mas stap daun long man bilong em?

⁸ Meri marit i mas stap daun long man bilong em bikos Jehova i tokim em long mekim  olsem. (Ritim Efesus 5:22-24.) Em i trastim Papa bilong em long heven, bikos em i save olsem pasin laikim i as bilong olgeta samting God i mekim na God i no inap askim em long mekim samting we inap putim hevi long em.—Lo 6:24; 1 Jon 5:3.

9. Wanem samting i save kamap taim sista Kristen i rispektim wok bos bilong man bilong em?

⁹ Ol man bilong dispela graun i kirapim ol meri long sakim ol stretpela lo bilong Jehova na tingim pasin bilong stap daun olsem wanpela pasin i daunim ol. Tru tumas, ol man i kamapim kain tingting ol i no save long God bilong yumi em Man i gat pasin laikim. Jehova i no inap givim tok long ol pikinini meri bilong em sapos em i save olsem dispela tok bai daunim ol. Sista husat i save wok strong long inapim wok Jehova i givim long em, em save i helpim famili bilong em long stap bel isi. (Sng. 119:165) Dispela i helpim man bilong em, helpim em yet, na helpim ol pikinini bilong em tu.

10. Yumi inap kisim wanem skul long tok bilong Carol?

¹⁰ Meri marit husat i stap daun long man bilong em husat i no gutpela olgeta, em i kamapim klia olsem em i laikim na rispektim Jehova—em Man i kamapim wok bilong i stap olsem het. Carol, em wanpela sista long Saut Amerika, em i tok: “Mi save olsem man bilong mi bai mekim ol popaia. Mi save tu olsem pasin mi mekim long em taim em i mekim ol dispela popaia, dispela bai soim klia olsem mi tingim tru pasin pren bilong mi wantaim Jehova o nogat. Olsem na mi wok strong long stap daun long em bikos mi laik amamasim Papa bilong mi long heven.”

11. (a) Wanem samting i helpim Aneese long fogivim man bilong em? (b) Na yumi inap kisim wanem skul long ol tok em i mekim?

¹¹ Sampela taim em bai hatwok long meri marit long rispek na daun long man bilong em sapos em i pilim olsem man i no save tingim filings bilong em na em i no save harim ol tingting bilong em. Tasol skelim samting em wanpela meri marit, nem bilong em Aneese, i save mekim taim kain samting i kamap. Em i tok: “Mi no laik bel hevi na kros. Mi save tingim olsem yumi olgeta i save popaia. Mi putim mak olsem mi mas redi long fogivim em olsem Jehova i save mekim. Taim mi fogivim em, mi save stap bel isi.” (Sng. 86:5) Meri marit husat i save fogivim man bilong em, em bai pilim isi long stap daun long em.

12. Baibel i gat wanem ol eksampel?

¹² Ating sampela bai pilim olsem man i save daun long ol narapela em i no gat strong. Tasol dispela tingting em i no tru. Baibel i gat planti stori bilong ol manmeri husat i gat strong em ol i save stap daun long narapela. Yumi ken stori long skul yumi inap kisim long Jisas, Abigel, na Maria.

13. Wai na Jisas i save daun long Jehova? Stori long dispela.

¹³ Jisas i stap daun long Jehova, tasol em i no mekim olsem bikos em i no gat save, nogat. Em i save skulim ol man long ol tok i isi na i klia long ol i ken kisimgut na dispela i soim olsem em i gat bikpela save tru. (Jon 7:45, 46) Jehova i rispektim save bilong Jisas long mekim wok, olsem na em i larim Jisas i wok wantaim em taim Jehova i wokim yunives. (Prov. 8:30; Hib. 1:2-4) Na bihain long Jisas i kirap bek, Jehova i givim em “namba long bosim olgeta samting long heven na long graun.” (Mat. 28:18) Maski Jisas i gat bikpela save, em i save larim Jehova i stiaim em. Wai? Bikos em i laikim Papa bilong em.—Jon 14:31.

14. (a) Ol man marit inap kisim wanem skul long tingting Jehova i gat long ol meri? (b) Na ol inap kisim wanem skul long tok i stap long Provep 31?

¹⁴ Skul em man marit i ken kisim. Jehova i no wokim meri na putim em i stap aninit long man bikos Em i tingim ol meri olsem samting nating, nogat. Jehova i soim klia olsem em i tingim ol meri taim em i makim ol meri long mekim wok king wantaim Jisas. (Gal. 3:26-29) Jehova i soim olsem em i bilip long Pikinini bilong em taim em i putim wok bos long han bilong em. Olsem tasol, man marit i gat gutpela tingting em bai givim sampela wok i gat namba long meri bilong em. Baibel i tok long wok bilong gutpela meri marit olsem em i save lukautim ol wok bilong haus, baim na salim graun, na mekim ol wok bisnis. (Ritim Provep 31:15, 16, 18.) Em i no wanpela sleiv husat i no gat rait long kamapim tingting bilong em, nogat. Man bilong em i save trastim em na putim yau long ol tingting em i kamapim. (Ritim Provep 31:11, 26, 27.) Taim man marit i mekim gutpela pasin rispek olsem long meri bilong em, meri bai amamas long stap daun long em.

15. Ol meri marit inap kisim wanem skul long eksampel bilong Jisas?

¹⁵ Skul em meri marit i ken kisim. Maski Jisas i mekim planti wok, em i stap daun long wok bilong Jehova olsem het na em i no pilim olsem dispela i daunim em. (1 Kor. 15:28; Fili. 2:5, 6) Olsem tasol, gutpela meri marit husat i bihainim pasin bilong Jisas, em i daun long man bilong em na em i no pilim olsem dispela i daunim em. Em i sapotim man bilong em bikos em i laikim em na moa yet bikos em i laikim na rispektim Jehova.

16. Olsem 1 Samuel 25:3, 23-28 i kamapim, Abigel i bungim wanem ol hevi? (Lukim fran pes piksa.)

¹⁶ Abigel em meri bilong Nabal. Em wanpela gridi man husat i gat pasin antap na em i no gat pasin bilong tok tenkyu. Maski i olsem, Abigel i no lusim em. Ating em inap pasim maus tasol na larim Devit na ol soldia bilong em i kilim i dai man bilong em. Tasol em i no mekim olsem, em i mekim ol samting bilong lukautim Nabal na ol narapela long haus bilong em. Tingim pasin bilong Abigel long strongim bel na i go long 400 soldia na long pasin rispek em i wok long toktok wantaim Devit. Em i redi tu long kisim asua bilong pasin man bilong em i mekim. (Ritim 1 Samuel 25:3, 23-28.) Devit i tokaut klia olsem Jehova i yusim dispela strongpela meri long givim em edvais na dispela i pasim em long mekim bikpela rong.

17. Ol man marit i ken lainim wanem samting long stori bilong Devit na Abigel?

 ¹⁷ Skul em man marit i ken kisim. Abigel em meri i gat gutpela tingting. I gutpela Devit i bin putim yau long edvais bilong em. Long dispela as, em i abrusim wanpela bikpela hevi na em i no gat asua long blut bilong ol man. Long wankain pasin, gutpela man marit i mas putim gut yau long tingting bilong meri bilong em paslain long em i mekim ol bikpela disisen. Ating tingting meri i kamapim inap helpim em long abrusim wanpela disisen i no stret.

18. Ol meri marit i ken kisim wanem skul long eksampel bilong Abigel?

¹⁸ Skul em meri marit i ken kisim. Taim meri marit i laikim na rispektim Jehova, dispela inap mekim sampela gutpela samting long famili bilong em, maski man bilong em i no save lotuim Jehova o i no bihainim ol stiatok bilong Em. Em i no inap painim rot bilong brukim marit—em samting Baibel i no orait long en. Taim em i rispek na daun long man bilong em, dispela bai kirapim man long kisim save long Jehova. (1 Pita 3:1, 2) Maski man i no mekim wanpela samting long gutpela pasin meri i mekim, Jehova i tingim tru gutpela pasin bilong meri long stap gut long em na daun long em.

19. Long wanem taim meri marit i no ken bihainim tok bilong man bilong em?

¹⁹ Gutpela meri marit i no inap sapotim man bilong em sapos man i tokim em long mekim ol samting i brukim ol lo o ol stiatok bilong Baibel. Olsem, em i no inap bihainim tok bilong man sapos man bilong em husat i no bilip i tokim em long mekim tok giaman, stilim samting, o mekim wanpela samting i no stret wantaim tok bilong Baibel. Olgeta Kristen na ol meri marit Kristen tu, ol i mas stap gut long God Jehova. Sapos man i askim em long mekim wanpela samting i no stret wantaim ol stiatok bilong Baibel, orait em i mas tok nogat, na long pasin rispek em i mas eksplenim risen na em i no inap bihainim tok bilong em.—Apo. 5:29.

20. Olsem wanem yumi save olsem Maria i bin pas gut wantaim Jehova?

²⁰ Maria i pas gut wantaim Jehova. Em i save gut long ol tok bilong Ol Rait Holi. Taim em i toktok wantaim Elisabet—em mama bilong  Jon Bilong Baptais, inap 20 taim olgeta em i kolim ol tok bilong Ol Skripsa Hibru. (Luk 1:46-55) Na tingim dispela: Maski Maria i bin pasim tok pinis long maritim Josep, ensel bilong Jehova i no bin kamap long Josep pastaim, nogat. Ensel i toktok stret wantaim Maria na tokim em olsem em bai i gat bel na karim Pikinini Bilong God. (Luk 1:26-33) Jehova i save gut long Maria na em i save olsem Maria bai laikim na lukautim gut Pikinini bilong Em. Na Maria i wok yet long pas gut wantaim Jehova bihain tu long Jisas i dai na kirap bek na go long heven.—Apo. 1:14.

21. Ol man marit inap kisim wanem skul long stori bilong Maria long Baibel?

²¹ Skul em man marit i ken kisim. Gutpela man marit i ken amamas taim meri bilong em i save gut long ol tok bilong Baibel. Em i no ken bel hevi na ting meri i laik stap het bilong famili. Em i ken save olsem taim meri bilong em i save gut long Baibel na ol stiatok bilong Baibel, em i ken helpim famili bilong em. So maski meri i gat bikpela save moa winim man bilong em, em wok bilong man marit long go pas long helpim famili bilong em long lotuim Jehova na long mekim ol narapela wok lotu.—Efe. 6:4.

22. Ol meri marit inap kisim wanem skul long Maria?

²² Skul em meri marit i ken kisim. Meri marit i mas daun long man bilong em, tasol em i gat wok long mekim ol samting bilong strongim bilip bilong em yet tu. (Gal. 6:5) Olsem na em i mas makim taim bilong mekim pesenel stadi bilong em yet na tingim tingim long bel ol tok em i stadi long en. Dispela bai helpim em long holimpas pasin bilong em long laikim na rispek long Jehova, na helpim em long amamas long stap daun long man bilong em.

23. Olsem wanem pasin bilong ol meri marit long stap daun long man bilong ol i helpim ol yet, famili bilong ol, na kongrigesen?

²³ Ol meri marit em ol i stap daun long man bilong ol bikos ol i laikim Jehova, ol bai stap amamas na belgut moa winim ol meri em ol i sakim dispela wok Jehova i putim bilong ol man long stap olsem het. Ol i stap gutpela piksa em ol yangpela man na ol yangpela meri i ken bihainim. Na tu, dispela i helpim famili bilong ol na kongrigesen long stap bel isi na amamas. (Tai. 2:3-5) Long nau, bikpela lain meri i stap gut long Jehova na mekim wok bilong em. (Sng. 68:11) Maski yumi man o meri, yumi olgeta i gat bikpela wok insait long kongrigesen. Atikol i kamap bihain long dispela bai stori long hau yumi olgeta wan wan i ken inapim dispela wok bilong yumi.