Long kirap bilong yia 1920, paslain long papamama i marit, ol i kisim save long tok i tru. Mi bon long kirap bilong yia 1939. Olsem wanpela liklik mangi long Inglan, mi save bihainim papamama i go long ol miting na amamas long Skul Tiokratik Bilong Autim Tok. I kam inap long nau, mi ken tingim fes tok mi bin mekim. Mi bin sanap antap long wanpela boks bambai het bilong mi i ken stap antap long podium. Mi bin gat 6 krismas na mi pret nogut tru taim mi lukim olgeta bikpela manmeri long odiens.

Long taim bilong autim tok, papa bilong mi i raitim wanpela sotpela tok long kat so mi save yusim long taim mipela i autim tok. Long fes taim mi yet i bin go autim tok long wanpela haus em long taim mi gat 8 krismas. Mi amamas tru taim man bilong haus i ritim kat bilong mi na kisim buk “Let God Be True”! Mi ran i go daun long rot bilong tokim papa bilong mi. Wok autim tok na ol miting i givim amamas long mi na i helpim mi long kisim dispela laik bilong mekim wok bilong Jehova fultaim.

Mi kirap long laikim tru ol tok bilong Baibel taim papa bilong mi i wokim sabskripsen bilong Wastaua bilong mi. Mi amamas tru long ritim olgeta wan wan kopi taim ol i kam long meil boks. Bilip bilong mi long Jehova i kamap strong moa na dispela i kirapim mi long dediket long em.

Famili bilong mi i go long Kibung “Theocracy’s Increase,” long New York. Long Fonde, Ogas 3, tim bilong dispela de em “Missionary Day.” Long dispela de, Brata Carey Barber, bihain em i kamap wanpela memba bilong Gavening Bodi, em i mekim tok bilong baptais. Long pinis bilong tok bilong em, em i mekim tupela askim long ol lain i laik kisim baptais, mi sanap na tok, “Yes!” Mi bin gat 11 krismas, tasol mi luksave olsem mi mekim  wanpela bikpela disisen. Tasol mi pret long i go insait long wara bikos mi no lain yet long swim. Ankol bilong mi i kisim mi i go long wara na strongim mi olsem olgeta samting bai orait. Yes, ol samting i kamap hariap na i pinis na mi pilim olsem tupela lek bilong mi i no bin tatsim plua insait long wara. Wanpela brata i salim mi i go long narapela brata; wanpela i baptaisim mi, na narapela i hapim mi i kam ausait long wara. Kirap long dispela de na i kam, Jehova i wok yet long mekim ol rot bilong mi i kamap stret.

Taim mi pinis long skul, mi tingting long mekim wok painia, tasol ol tisa bilong mi i kirapim mi long i go long bikpela skul. Mi harim tok bilong ol na i go long yunivesiti; tasol bihain mi luksave olsem mi no inap stap strong long bilip na long seim taim fokas long ol skul wok bilong mi, so mi mekim disisen long lusim skul. Mi kamapim dispela hevi long Jehova long beten na mi raitim wanpela pas i go long ol tisa na mi lusim skul long pinis bilong dispela fes yia. Mi trastim tru Jehova, olsem na mi kirap hariap long mekim wok painia.

Long Julai 1957, mi kirap mekim fultaim sevis long taun Wellingborough. Mi askim ol brata long London Betel long painim wanpela brata i gat ekspiriens we mi ken wok wantaim em. Brata Bert Vaisey i kamap tisa bilong mi, na pasin bilong em long mekim gut wok i helpim mi long kisim pasin bilong mekim gutpela sediul bilong autim tok. Long kongrigesen i gat 6-pela lapun sista na Brata Vaisey na mi. Taim mi redim miting na insait long ol miting, dispela i strongim pasin bilong mi long trastim Jehova na kamapim klia bilip bilong mi.

Mi bin kalabus sotpela haptaim bikos mi no laik insait long ami, na bihain long dispela mi bungim Barbara, wanpela spesel painia sista. Mipela i marit long 1959, na redi long i go long wanem hap ol i salim mipela i go long en. Pastaim, ol i salim mipela i go long Lancashire long not-wes bilong Inglan. Na long Janueri 1961, ol i singautim mi i go long Skul Bilong Wok Kingdom long London Betel, na bai mi skul inap wanpela mun olgeta. Long pinis bilong skul, mi kirap nogut olsem ol i makim mi long mekim wok sekit. Inap 2-pela wik, mi kisim trening long wanpela wasman sekit i gat save long mekim wok sekit long taun Birmingham, na ol i tok orait long Barbara i ken joinim mi. Bihain mipela i go bek long mekim asainmen bilong mipela long ol hap bilong Lancashire na Cheshire.

Long Ogas 1962, mipela i stap long holide na mipela i kisim wanpela pas i kam long brens ofis. Insait long dispela pas i gat aplikesen bilong Skul Gileat! Mipela i beten long dispela samting, na bihain mi na Barbara i pulimapim ol fom na salim hariap i go long brens ofis olsem ol i makim. Bihain long 5-pela mun, mipela i go long Brooklyn, New York, long insait long klas namba 38 bilong Skul Gileat, na mipela i skul long Baibel inap 10-pela mun olgeta.

Ol skul mipela i kisim long Gileat i lainim mipela long Tok Bilong God, na tu, hau oganaisesen i save mekim wok na hau ol bratasista i givim bel tru long mekim wok bilong God. Mipela i gat  25 krismas samting, na mipela i lainim planti samting long ol narapela sumatin long klas bilong mipela. Em wanpela gutpela blesing tru long mi inap wok olgeta de wantaim Brata Fred Rusk, em wanpela tisa bilong mipela. Wanpela samting we em i save strongim mipela long mekim em long givim tok kaunsel long stretpela pasin, dispela i makim olsem olgeta tok i mas kam stret long Baibel. Sampela bilong ol brata i mekim wok tisa long dispela taim em Nathan Knorr, Frederick Franz, na Karl Klein. Na mipela ol sumatin i kisim skul long pasin daun bilong Brata A. H. Macmillan, em i skulim mipela long hau Jehova i bin helpim lain bilong em long haptaim ol brata i bin karim bikpela hevi long 1914 i go inap long kirap bilong 1919!

Klostu long pinis bilong skul, Brata Knorr i tokim mi na Barbara olsem mitupela i kisim nupela asainmen long i go long Burundi long Afrika. Mipela i hariap i go long Betel laibreri long sekim Yearbook na painimaut hamas pablisa i stap long Burundi long dispela taim. Mipela i kirap nogut olsem i no gat namba bilong ol pablisa long Burundi! Yes, mipela bai i go autim tok long wanpela hap em ol i no bin autim tok long en bipo, em long Afrika, na mipela i no save gut tumas long dispela ples. Man! Mipela i tingting planti tru! Tasol bihain long mipela i beten strong, mipela i kisim bel isi.

Long nupela asainmen bilong mipela, olgeta samting i nupela long mipela—weda, kalsa, na tokples. Nau mipela i mas lainim tokples Frans. Mipela i hatwok tu long painim ples bilong i stap. Tupela de bihain long mipela i kamap, wanpela klasmeit bilong mipela long Gileat, em Harry Arnott, em i kam visitim mipela taim em i laik i go bek long asainmen bilong em long Sambia. Em i helpim mipela long painim wanpela ples slip, we i kamap fes haus misineri bilong mipela. I no longtaim, ol wokman bilong gavman i wok long birua long mipela, em ol i no save long ol Witnes Bilong Jehova. Mipela i enjoim asainmen bilong mipela, tasol ol wokman bilong gavman i tok mipela i no inap stap sapos mipela i no gat wok pemit. Sori tru olsem mipela i mas lusim dispela ples na lain gen long stap long nupela kantri em Yuganda.

Maski mipela i no gat visa, mipela i trastim Jehova na mipela i no pret long i go kamap long Yuganda. Wanpela brata long Kanada husat i bin mekim wok long hap i sot long ol pablisa long Yuganda  i stori long wanpela imigresen ofisa long hevi bilong mipela, na ol i givim sampela mun long mipela long i stap i go inap long mipela i kisim tok orait long i stap long dispela kantri. Dispela gutpela samting i kamap i soim mipela olsem Jehova i wok long helpim mipela.

Ol samting long dispela nupela asainmen i no wankain long Burundi. Wok bilong autim tok i kamap pinis long dispela hap, maski i gat 28 Witnes tasol long kantri olgeta. Long dispela teritori, mipela i painim planti lain em ol i save mekim tok Inglis. Bihain mipela i luksave olsem, bilong helpim ol man i gat laik long kisim save long kamap strong, mipela i mas lainim wanpela o tupela tokples bilong ol asples. Mipela i kirap autim tok long biktaun Kampala, we planti i save mekim tok Luganda, so mipela i kirap long lainim gut dispela tokples. Sampela yia i lus na mipela i save gut long dispela tokples, tasol em i helpim tru wok bilong mipela! Nau mipela i save gut long ol samting ol Baibel sumatin bilong mipela i nidim long sait bilong bilip. Na tu, ol i kamapim bel na tingting bilong ol long ol samting ol i wok long lainim.

Amamas bilong mipela long painim ol man i laik kisim save long tok i tru i opim rot long mipela inap kisim narapela blesing we mipela i no bin tingim—mekim wok sekit long kantri olgeta. Aninit long lukaut bilong Kenya brens, mipela i raun na painim ol hap we ol i nidim tru ol spesel painia. Planti taim, ol lain i no bin bungim ol Witnes bipo i mekim gutpela pasin long mipela. Ol i welkamim mipela, na tu, ol i redim ol kaikai bilong mipela.

Wanpela narapela kain raun. Long Kampala, mi kalap long tren na ron inap tupela de i go kamap long port of Mombasa long Kenya, na bihain mi kalap long sip na i go long ol ailan Seisel, em wanpela grup bilong ol ailan i stap long Solwara India. Na bihain, long 1965 i go 1972, Barbara i kam wantaim mi na planti taim mitupela i go long ol ailan Seisel. Long dispela taim, i gat 2-pela pablisa tasol i stap long dispela hap, bihain i gat grup i kamap na bihain long en wanpela kongrigesen i kamap. Ol narapela raun i opim rot long mi go visitim ol brata long Eritrea, Itiopia, na Sudan.

Long Yuganda, wok politik i senis bihain long wanpela militeri grup i kisim wok gavman. Long ol dispela yia, ol samting i hatwok tru na dispela i helpim mi long tingim olsem em i savetingting long bihainim tok olsem “ol samting bilong Sisar, givim long Sisar.” (Mak 12:17) Wanpela taim ol i tokim ol man bilong narapela ples long rejistaim nem bilong ol long polis stesin i stap klostu long haus bilong ol. Hariap tru mipela i bihainim tok. Bihain long sampela de, taim mipela i draiv i go long Kampala, sampela sikret polis ofisa i kam stopim mi na narapela misineri. Mipela i pret nogut tru! Ol i sutim tok long mipela olsem mipela ol spai na ol i kisim mipela i go long polis stesin, na long hap mipela i stori gut long ol olsem mipela ol misineri. Mipela i tokim ol olsem mipela i rejistaim nem bilong mipela pinis long ol polis, tasol ol i no harim tok bilong mipela. Ol polis i kisim mipela i go long polis stesin i stap klostu long haus misineri. Mipela i amamas tru taim polis ofisa i stap long stesin em i save olsem mipela i bin rejistaim nem pinis, em i luksave long mipela na tokim ol polis long lusim mipela i go!

Long dispela taim, planti taim mipela i save bungim hevi long han bilong ol militeri em ol i pasim ol rot, moa yet ol soldia husat i spak nogut tru i save stopim mipela long rot. Olgeta taim  mipela i beten na mipela i save kisim bel isi taim ol i larim mipela long draiv i go. Sori tru, long 1973 gavman i tok olgeta misineri bilong narapela kantri i mas lusim Yuganda na go bek long ples bilong ol.

Na asainmen bilong mipela i senis gen, nau mipela i go long Kot-Diwa, long Wes Afrika. Mipela i mas mekim sampela bikpela senis: mipela i mas lainim nupela kalsa, na long olgeta taim mipela i mas mekim gen tokples Frans na lain long i stap wantaim ol misineri bilong narapela narapela kantri! Mipela i pilim olsem Jehova i stiaim mipela, ol man i gat gutpela bel i hariap long putim yau long gutnius. Mitupela i lukim olsem pasin bilong trastim Jehova i mekim ol rot bilong mipela i kamap stret.

I no longtaim bihain, Barbara i kisim sik kensa. Maski mipela i go long ol narapela hap bilong kisim tritmen, long 1983 mipela i luksave olsem mipela i no inap stap moa long asainmen bilong mipela long Afrika. Mitupela i bel hevi tru.

Sik kensa bilong Barbara i go bikpela taim mitupela i mekim wok long London Betel, na em i dai. Betel famili i helpim gut mi. Tupela marit i helpim mi gut long mekim ol senis na wok yet long trastim Jehova. Bihain mi bungim wanpela sista i volantia long Betel, em i gat ekspiriens long mekim wok olsem spesel painia, na pasin bilong em long laikim tru Jehova i soim olsem em i save tingim tru ol samting bilong bilip. Mi na Ann i marit long 1989, na kirap long dispela taim na i kam inap long nau, mitupela i mekim wok yet long London Betel.

Kirap long 1995 i go 2018, mi amamas tru long mekim wok olsem brata em hetkota i salim (em bipo ol i kolim olsem wasman son), mi visitim klostu 60 narapela narapela kantri. Long olgeta wan wan visit mi mekim, mi lukim hau Jehova i save blesim ol wokman bilong em long olgeta kain taim.

Long 2017 mipela i mekim wanpela visit long Afrika. Mi amamas tru long kisim Ann i go long Burundi na mitupela i kirap nogut long lukim planti lain i kam insait long tok i tru long dispela hap! Long strit we mi bin autim tok long en long 1964, nau i gat wanpela naispela haus Betel na i gat winim 15,500 pablisa long dispela kantri.

Long 2018, mi amamas tru taim mi kisim pas bilong ol ples mi bai go visitim. Wanpela bilong ol kantri i stap long lista em Kot-Diwa. Taim mipela i kamap long biktaun Abijan, mi pilim olsem mi kam bek long ples bilong mi. Taim mi lukluk long telefon lista, long nem bilong ol brata i wok long Betel, klostu long rum mipela i stap long en, mi lukim nem bilong wanpela brata em mi inap tingim, em Sossou. Mi tingim em i bin mekim wok olsem wasman bilong biktaun taim mi stap long Abijan. Tasol mi popaia. Em narapela brata i gat wankain nem Sossou—em pikinini man bilong em.

Jehova i save truim tok promis bilong em. Long planti hevi i bin kamap, mi luksave olsem taim yumi trastim Jehova, em i save mekim ol rot bilong yumi i kamap stret. Nau mipela i wok yet long bihainim dispela rot i no gat pinis bilong en we bai kamap klia moa long nupela taim.—Prov. 4:18.