Long 1941, mi bon long wanpela famili i no gat planti samting bilong skin long Paris, Frans. Mi save amamas long lainim ol nupela samting, so taim mi gat 10-pela krismas mi bin bel hevi nogut tru taim mi kisim sik TB na mi no inap go moa long skul! Ol dokta i tok mi mas slip tasol bambai mi no ken mekim ol wetlewa bilong mi i taiet. So inap sampela mun mi lusim taim long ritim wanpela dikseneri na harim ol program em ol i brodkastim long Radio Sorbonne long University of Paris. Bihain dokta bilong mi i tok olsem mi kamap orait na mi ken go bek long skul, mi amamas tru. Mi tokim mi yet olsem, ‘Man, ol dokta i save mekim gutpela wok tru!’ Kirap long dispela taim, mi gat laik tru long oraitim sik bilong ol manmeri. Long ol taim we Papa i save askim mi long mi laik mekim wanem long laip bilong mi, olgeta taim mi save bekim tok olsem, “Mi laik kamap wanpela dokta.” Em hau mi bin laikim tru wok dokta.

Famili bilong mipela i bilong lotu Katolik. Tasol mi yet i no save gut long God, na mi gat planti askim em mi no painim bekim bilong ol. Bihain tasol long mi kirap skul long yunivesiti long kamap dokta, mi save tru olsem i gat wanpela Krieta i wokim olgeta samting.

Mi tingim festaim mi bin lukim ol sel bilong tulip plaua aninit long maikroskop. Mi kirap nogut tru long lukim hau ol sel i save lukautim ol yet long taim bilong san na long taim bilong kol. Mi lukim olsem ol samting ol i kolim olsem cytoplasm long ol sel i save go liklik taim sol i tatsim em na em i save go bikpela taim em i stap insait long wara. Ol dispela samting na ol narapela samting i save wok insait long ol sel i helpim ol samting i gat laip long mekim ol senis bambai ol i ken stap gut insait long ol envairomen bilong ol. Taim mi lukim olsem olgeta wan wan sel i gat planti hap bilong en i wok gut wantaim, mi luksave tru olsem ol dispela samting i no kamap nating.

 Long namba 2 yia bilong mi long medikal skul, mi luksave olsem i gat planti evidens i soim olsem God i stap tru. Long ol anatomi klas, mipela i skelim gut na luksave long hau han bilong yumi ol manmeri i save wok gut long bendim na stretim ol pinga bilong yumi. Ol masol bilong han i stap stret na i gat ol ligamen na ol tendon em ol i wok gut wantaim narapela narapela. Eksampel: Mi lainim olsem i gat ol tendon i pasim masol i go long namba 2 bun bilong pinga, na ol dispela tendon i bruk i go long tupela hap olsem bris na ol i save slaid i go i kam na ol i stap stret long ples bilong ol. Ol strongpela tisiu i holim ol tendon i stap klostu long ol bun bilong pinga. Sapos ol dispela samting i no wok gut wantaim, orait ol dispela tendon bai i tait na i stap stret tru olsem string. Mi ken luksave stret olsem wanpela Man i gat bikpela save tru i disainim bodi bilong yumi ol man.

Mi laikim tru Man Bilong Wokim ol samting i gat laip taim mi stadi long hau ol pikinini i save bon. Mi kisim save olsem taim pikinini i stap yet insait long bel bilong mama, em i save kisim win oksijen long mama bilong em long rot bilong ambilikol kod. Olsem na ol alveoli, ol liklik samting olsem balun i stap insait long wetlewa bilong pikinini, i no solap i go bikpela yet. Klostu long taim pikinini i bon, samting ol i kolim olsem safektan i save karamapim insait bilong ol alveoli. Taim pikinini i bon, planti liklik senis i kamap long bodi bilong em taim em i pulim win namba 1 taim. Wanpela hul insait long lewa bilong pikinini i pas, na i stiaim blut i go long wetlewa bilong em. Long dispela taim stret, ol safektan i seperetim ol alveoli, em ol samting olsem balun, na win i kirap long pulapim ol dispela spes. Wantu tasol pikinini i gat rot long em yet i ken pulim win.

Mi laik kisim save long Man husat i wokim ol dispela samting i narakain tru, olsem na mi stat long givim bel tru long ritim Baibel. Mi bin kirap nogut tru olsem i gat ol lo bilong stap klin insait long dispela kontrak em God i bin mekim wantaim lain Israel winim 3,000 yia i go pinis. God i tokim lain Israel olsem ol i mas digim hul na karamapim pekpek bilong ol, na ol i mas wasim ol yet wantaim wara long olgeta taim bilong stap klin, na sapos wanpela man i gat sik we inap kalap long narapela, orait ol i mas larim em i stap wanpis ausait long taun. (Wkp. 13:50; 15:11; Lo 23:13) Baibel i tokaut klia long hau ol sik inap kalap i go long narapela man, em samting ol saientis i kisim save long en insait long sampela handret yia i go pinis. Mi luksave tu olsem lo God i givim long sait bilong maritpasin i stap long Buk Wok Pris i helpim lain Israel long i stap klin. (Wkp. 12:1-6; 15:16-24) Mi save tru olsem Man bilong givim ol dispela lo long lain Israel i mekim olsem bilong helpim ol long stap gut na em i blesim ol manmeri husat i bihainim ol dispela lo bilong em. Mi bilip tru olsem God yet em i As bilong ol tok bilong Baibel, tasol em God mi no bin save long nem bilong em long dispela taim.

Taim mi skul yet long yunivesiti long kamap dokta, mi bungim wanpela yangpela meri nem bilong em Lydie, na mi laikim em tru. Mitupela i marit long 1965 taim mi no pinisim yet skul bilong mi. Long 1971, mitupela Lydie i gat fes 3-pela pikinini na bihain mipela i gat narapela 3-pela pikinini. Lydie i bin stap olsem gutpela sapot bilong mi, long wok bilong mi olsem wanpela dokta na insait long famili bilong mipela tu.

Mi wok long haus sik inap 3-pela yia na bihain mi wokim klinik bilong mi yet. Bihain liklik long dispela, 2-pela marit, em 2-pela sikman mi bin stori long ol long kirap bilong dispela atikol, ol i kam lukim  mi bilong kisim sampela tritmen. Mi laik raitim pepa bilong kisim marasin long givim long man taim meri i tok olsem: “Plis, Dokta, ol marasin i no ken i gat blut long en.” Mi kirap nogut na mi askim: “Tru a? Wai?” Em i tok: “Mipela ol Witnes Bilong Jehova.” Mi no bin save long ol Witnes Bilong Jehova na tingting ol i gat long blut. Dispela meri i rausim Baibel long beg bilong em na em i soim mi skripsa i stori long as na ol i mekim disisen long ol i no inap kisim blut. (Apo. 15:28, 29) Bihain em na man bilong em i soim mi ol skripsa i stori long ol samting Kingdom Bilong God bai mekim; em bai pinisim pen na hevi, sik, na dai. (Rev. 21:3, 4) Mi amamas wantaim na tok: “Ol samting yu tokim mi em samting mi laik harim kirap long taim mi liklik yet! Mi kamap dokta bambai mi ken pinisim pen na hevi bilong ol manmeri.” Mi amamas tru na mipela i stori longpela taim inap 1 na hap aua olgeta. Taim dispela tupela marit i lusim klinik bilong mi, long tingting bilong mi, mi no stap moa olsem wanpela Katolik, na mi kisim save olsem dispela Krieta em mi bin laikim em tru nem bilong em Jehova!

Bihain mi bungim dispela 2-pela marit Witnes inap 3-pela taim long klinik bilong mi, long olgeta dispela taim mipela i toktok winim 1-pela aua. Mi singautim ol i kam long haus bilong mi bambai mipela i ken stori moa long Baibel. Maski Lydie i tok orait long joinim mipela long Baibel stadi, em i no tokaut stret olsem sampela bilip bilong ol Katolik em mipela i bin holim ol i no stret. Olsem na mi singautim wanpela Katolik pris i kam long haus bilong mipela. Mipela i stori long ol bilip em Misin Katolik i skulim ol man long en i go inap long biknait tru, na mipela i yusim wanpela tul tasol em Baibel. Dispela stori mipela i mekim i kirapim Lydie long bilip tru olsem ol Witnes Bilong Jehova i skulim ol man long tok i tru. Bihain long dispela, pasin bilong mipela long laikim tru God Jehova i kamap bikpela moa na mitupela i kisim baptais long 1974.

Taim mi kisim save long ol samting God i tingting pinis long mekim long ol manmeri, dispela i mekim bikpela senis long ol samting mi putim long laip bilong mi olsem nambawan samting. Mitupela Lydie i putim wok bilong Jehova olsem nambawan samting long laip bilong mipela. Mipela i tingting strong long mekim bikpela long ol pikinini bilong mipela long ol lo bilong Baibel. Mipela i skulim ol pikinini bilong mipela long laikim God na laikim ol manmeri, na dispela pasin laikim i mekim mipela i pas gut wantaim olsem famili.​—Mat. 22:37-39.

Taim mipela i tingim bek ol yia i go pinis, planti taim mitupela Lydie i save lap taim mipela i tingim hau ol pikinini i luksave olsem mitupela i save wanbel wantaim long mekim olgeta samting olsem papamama. Ol i save long tok Jisas i mekim olsem “‘Yes’ bilong yupela i mas minim yes tasol, na ‘Nogat’  bilong yupela i mas minim nogat tasol” na dispela em wanpela lo insait long famili bilong mipela. (Mat. 5:37) Olsem, taim wanpela pikinini meri bilong mipela i gat 17 krismas, Lydie i no tok orait long em bai go wantaim wanpela grup bilong ol yangpela. Wanpela long dispela grup i tokim em olsem, “Sapos mama bilong yu i no inap larim yu go, okei go askim papa bilong yu!” Tasol pikinini meri bilong mipela i bekim olsem: “I no gat wok long mi askim em. Olgeta taim tupela i save wanbel long olgeta samting.” Yes, olgeta 6-pela pikinini bilong mipela i luksave olsem mitupela i save wanbel long bihainim olgeta stiatok bilong Baibel. Mipela i tok tenkyu tru long Jehova olsem long nau mipela i gat bikpela famili tru em olgeta i mekim wok bilong Jehova.

Maski tok i tru i senisim ol samting we i stap nambawan samting long laip bilong mi, mi laik yusim yet save bilong mi olsem dokta long helpim lain bilong God. Olsem na mi volantia long mekim wok dokta long Betel long Paris na bihain long nupela Betel long Louviers. Mi bin stap olsem komiuta long Betel klostu 50 yia nau. Long dispela haptaim, mi kisim sampela gutpela pren tru long Betel famili, sampela bilong ol em nau ol i gat 90 krismas samting. Mi amamas tu long bungim wanpela nupela Betelait. Mi kisim save olsem dispela nupela Betelait em bebi we mi bin helpim mama bilong em long karim em inap 20 yia i go pinis!

Insait long ol yia i go pinis, pasin bilong mi long laikim Jehova i go strong moa taim mi kisim save olsem em i save stiaim na lukautim ol manmeri bilong em long rot bilong oganaisesen bilong em. Long yia 1980 samting, Gavening Bodi i kamapim wanpela program long Amerika bilong helpim ol dokta na ol wokman bilong haus sik long kliagut long as na ol Witnes Bilong Jehova i no save kisim blut.

Long 1988, Gavening Bodi i kamapim wanpela nupela dipatmen long Betel ol i kolim Hospital Infomesen Sevis. Pastaim, dispela dipatmen i save supavaisim Hospital Liesen Komiti (HLC) em ol i bin kamapim long Amerika bilong helpim ol Witnes em ol i sik long painim gutpela helt-ke. Taim ol i surikim dispela dipatmen i go long olgeta hap bilong graun, ol i bin kamapim ol Hospital Liesen Komiti long Frans tu. Mi amamas tru long lukim hau oganaisesen bilong Jehova i save tingim tru ol bratasista i sik long taim ol i nidim helpim!

Wok dokta em nambawan wok mi laikim tru. Tasol taim mi skelim gut ol samting mi laik putim olsem nambawan samting long laip bilong mi, mi luksave olsem nambawan bikpela rot bilong oraitim ol manmeri em long helpim ol long pas gut wantaim Man em As bilong laip, em God Jehova. Bihain long mi ritaia, mitupela Lydie i save lusim planti aua long olgeta mun long mekim wok bilong autim gutnius bilong Kingdom Bilong God olsem ol painia oltaim. Long nau mitupela i mekim yet dispela wok bilong seivim laip bilong ol manmeri.

Nau mi mekim yet wok bilong helpim ol manmeri i sik. Tasol mi luksave olsem maski wanpela man i stap olsem gutpela dokta tu, em i no inap tru long oraitim olgeta kain sik o pinisim indai. Olsem na mi luk fowed long dispela taim we pen, sik, na dai bai i no stap moa. Dispela nupela taim i wok long kam klostu tru, na mi bai stap oltaim oltaim na kisim bikpela save moa long olgeta samting God i wokim, dispela i makim tu narakain wei em i disainim bodi bilong yumi ol man. Tru tumas, mi ken tok tru olsem samting mi bin gat laik long en taim mi liklik yet, nau mi kisim save long hap tasol bilong en. Mi bilip tru olsem gutpela samting moa bai kamap bihain!